Previous Lesson -- Next Lesson
1. Kuma ta cogoya ani a ta baara sani a ye kɛ farisogo ye (Yuhana 1:1-5)
YUHANA 1:1
1 Fɔlɔfɔlɔ min bɛ wele ko Kuma, o tun bɛ yi. O Kuma ni Ala tun bɛ ɲɔgɔn fɛ, o Kuma ye Ala ye.
Adamaden bɛ a ta miiriyaw ni a ta ŋaniya yira kuma le fɛ. Mɔgɔ bɛ min fɔ min, i bɛ o le ye. I ta kumaw bɛ i yɛrɛ cogo le yira, ka i ta hakirinakow bɔ kɛnɛ kan.
Cogo wɛrɛ ra, an bɛ se k’a fɔ ko Ala ta Kuma bɛ Ala ta alaya ko fɔ an ye, ani a ta sebagaya min bɛ ye a ta Kuma saninyanin kɔnɔ. Sabu fɔlɔ fɔlɔ Ala ka sankolo ni dugukolo dan a ta Kuma barakaman fɔkan fɛ. Ni a ko fɛn min ma ko: «Nin ye kɛ», o fɛntɔgɔ bɛ kɛ. Fɔ ka na se bi ma, Ala ta sebagaya bɛ ye a darakumaw fɛ. Yala aw m’a lɔn ko nin kibarodiman kitabu min bɛ aw boro, ko Ala ta fangatigiya fanin bɛ o kɔnɔ wa ? Nin kitabu ta sebagaya ka bon ka tɛmɛ marifajuguw bɛɛ kan, sabu kojugu min bɛ aw jusukun na, a bɛ o ban, ka koɲuman bange o kojugu nɔ ra.
Yuhana kitabu kɔnɔ, ni a fɔra ko « kuma », kɔrɔ fla le bɛ o ra gɛrɛkikan na : 1) a fɔlɔ, dafɔɲɔ min bɛ kumakan labɔ an da ra ; 2) a flanan ye ninmafɛn cɛman dɔ ye. Arabukan na, nin kɔrɔ fla faranfasi ye, kɛwale ye, min bɛ tugu kuma kɔ, ni a fɔra ka kaɲa ni musokan ye, walama cɛkan. Kirisita bɔra Fa Ala ra i n’a fɔ kumakan gbansan bɛ bɔ mɔgɔ da ra cogo min na. O cogo ra, Kirisita ye Ala sago ni Ala ta miiriya faranin ye ɲɔgɔn kan. An bɛ nin kumafɔcogo ɲɔgɔn sɔrɔ dina wɛrɛw ra, ko Kirisita ye Ala ta Kuma ye, ani Nin min bɔra Ala ra. O sankolo sawura tɛ adamaden si fɛ, m’a fɔ min kelen bangera Mariyamu sunguruman sababu ra.
Kirisita bange ko Bɛtilɛhɛmu, o ma kɛ a ta ɲanamanya damina ye, sabu a tun bɛ ni Fa Ala ye wagati bɛɛ ani tuma bɛɛ, a tun bɛ yi sani dunuɲa ye dan. Damina walama laban tɛ Fa Ala ra cogo min na, damina walama laban tɛ Kirisita fana ra ; Kirisita tɛ yɛlɛma, i n’a fɔ Ala ta Kuma tɛ yɛlɛma cogo min na.
Jɛnɲɔgɔnyaba dɔ bɛ Kirisita ni a Fa cɛ, Yuhana bɛ o yira an na. Kirisita ma faran ka bɔ a Fa ra, i n’a fɔ kuma min bɛ bɔ an da ra, ka tunu fɔɲɔ ra. Kirisita tora ni Ala ye, ka to a ta jɛnɲɔgɔnya ra. Ni a fɔra ko «ni Ala ye», o kɔrɔ ye gɛrɛkikan na ko kuma tun bɛ taga Ala fan fɛ, fɔ ka taga don a kɔnɔ. O ra, Kirisita tun bɛ taga Ala fan le fɛ. Mɔgɔ minw bangera Nin Saninman baraka ra olugu ta cogo bɛ ten, sabu Ala ye kanuya sɔrɔyɔrɔ ye. Kanuya tɛ a yɛrɛ faran ka to a yɛrɛ ma, nka a bɛ a ɲa sin a bɔyɔrɔ ma, ka to a bɔyɔrɔ kɔnɔ.
Ala ma Kirisita dan a ta kuma sababu ra k’a sɔrɔ foyi t’a boro, i n’a fɔ danfɛn tɔw ta kɛra cogo min na. Nka Dencɛ yɛrɛ le ye Kuma ye, Kuma min ka fɛnw dan, ani a Fa ta fanga bɛɛ bɛ sɔrɔ a fɛ. Nin hayan fɔlɔ laban na, an bɛ nin kumakan barakaman sɔrɔ, ko Kuma tun ye Ala yɛrɛ ye. Kibarodiman sɛbɛbaga b’a yira an na ko Kirisita ye Ala ye min bɔra Ala ra, yeelen min bɔra yeelen na, Ala ɲanaman min bɔra Ala ɲanaman na, a bɔra Ala ra, nka a ma dan. A kelen cogo ni Ala cogo ka kan, Ala banbari, sebagayatigi, Ala saninman, ani hinatigi. Ni mɔgɔ o mɔgɔ ka la a ra k’a fɔ ko Kirisita ye Ala ta Kuma ye, o tigi bɛna sɔn a ta alaya fɔcogo ma fana.
DAARIKAN: Matigi Yesu Kirisita, an bɛ an yɛrɛ majigi i ɲa kɔrɔ sabu i tun bɛ ni Fa Ala ye kabini wagati bɛɛ, ka i ɲasin ale ma wagati bɛɛ. An dɛmɛ, an kana faran i ra ka an yɛrɛ bla an danna, nka an ye an yɛrɛ di Ala ma, ka to a ta kanuya kɔnɔ. An bɛ baraka la i ye, an Matigi Yesu, sabu i ta kibarodiman kɔnɔ, i bɛ na an ma ni kumaw ye an bɛ se ka minw faamu, ka i ta fangatigiya yira an na janko an ye la a ra, lanaya baraka ra, i ta Kuma sababu ra.
ƝININKARI:
- Kumakun juman ye Yuhana sura 1 ta hayan fɔlɔ ta kumaba ye, ani o kuma kɔrɔ ye di?