Previous Lesson -- Next Lesson
1. Kuma ta cogoya ani a ta baara sani a ye kɛ farisogo ye (Yuhana 1:1-5)
YUHANA 1:2-4
2 Kabini fɔlɔfɔlɔ o Kuma ni Ala bɛ ɲɔgɔn fɛ. 3 Ala ka fɛn bɛɛ dan ale le baraka ra. Fɛn o fɛn danna fana, o si ma dan ale kɔ. 4 Ɲanamanya tun bɛ sɔrɔ ale le ra. O ɲanamanya le tun bɛ yeelen bɔ mɔgɔw ye.
Kirisita ma ɲanamanya a yɛrɛ ye, nka a ɲamanyara Ala le ye tuma bɛɛ. A ma faran a Fa ra, nka a ta ko bɛɛ tun bɛ ɲasin a Fa ma, ka ɲanamanya ni a le ye, ani ka to a ta jɛnɲɔgɔnya ra. Kirisita ka o sira min tagama, k’a ɲasin «a Fa ma» fɛn bɛɛ ra, o ko nafa tun ka bon Yuhana fɛ, fɔ a sekɔra o kuma kan. O kelenya min bɛ Kirisita ni a Fa cɛ wagati bɛɛ, o le ye Ala ta yiracogo gundo ye. An ma la ala saba le ra, minw bɛɛ kelen kelen bɛ o danna, minw faranna ka bɔ ɲɔgɔn na, nka an lara Ala kelenpe le ra, min fara kanuya ra. Sisan Matigi Ala tɛ a kelen na, a dencɛ bɛ ni a ye wagati bɛɛ, ka ɲanamanya ni a ye jɛnɲɔgɔnya dafanin na. Mɔgɔ min ma Ala ta kanuya silɔn, ka Nin Saninman sɔrɔ a jusukun na, o tigi tɛ se ka Ala ta cogo can faamu. Ala ta kanuya, o ye fɛn min bɛ Fa ni Dencɛ ni Nin Saninman jɛn ka o kɛ Ala kelen ye.
Fɔlɔfɔlɔ, wagati min Ala ka dunuɲa dan, a ma o kɛ a kelen na, k’a kɛ ko mankan si ma bɔ, nka a ka ɲanamanya di danfɛnw ma a ta Kuma baraka ra. I n’a fɔ Kirisita tun ye Ala ta Kuma ye, o ra, dunuɲa danna ale le sababu ra. O kɔrɔ ye ko Kirisita ma kɛ Kisibaga ye dɔrɔn, ani soronadonbaga, ani Kunmabɔbaga, nka a kɛra danbaga ye fana. I n’a fɔ fɔyi tɛ kɛ ni ale ma min latigɛ, o b’a yira ko a bɛ fɛn bɛɛ kunna. Kirisita ye min ye, ni mɔgɔ min sera ka o faaamu, ka sɔn a ma a jusukun na, Ala bɛ baraka don o tigi ra. Bi, mɔgɔw ka fɛn o fɛn sɔrɔ o ta lɔnniyaw fɛ, ani dunuɲa ni a kɔnɔfɛnw bɛɛ, olugu si kun tɛ ko wɛrɛ ye, fɔ ka Kirisita ta bonya ni a ta sebagaya yira an na. Aw kumakan, aw farisogo, aw farikolo cogoya, aw jusukun panpan cogo, o bɛɛ ye Kirisita ta bonya dɔw le ye, a ka minw di aw ma gbansan. Yala aw bɛ miiri ka Kirisita fo o kosɔn wa ?
K’a bɔ Ala ra, ani a ta Kuma, ani a Nin, fɛn tɔ bɛɛ danna le. Ale yɛrɛ ɲanaman lo, damina walama laban t’a ra, ani a saninman lo. Ɲanamanya bɛ Ala yɛrɛ ra cogo min na, o cogo ra Kirisita le ye ɲanamanya sɔbɛ sɔrɔyɔrɔ ye, min bɛ mɔgɔ ɲanamanya, ka an bɔsi saya, ani jurumun ta jaraki ma, ka ɲanamanya banbari di an ma. Ala ta ɲanamanya min bɛ Kirisita ra, o ka se sɔrɔ saya kan. A bɔra kaburu kɔnɔ a ta alaya ta sebagaya sababu ra.
Kirisita ma kɛ Danbaga ye dɔrɔn, nka ale yɛrɛ ye ɲanamanya sɔrɔyɔrɔ ye. I n’a fɔ a saninanyanin lo a tɛ sa k’a ye. Jurumun si tɛ sɔrɔ Ala ra, walama a Dencɛ ra, a ɲanaman lo wagati bɛɛ. An bɛ miiriya caman sɔrɔ Kirisita ta ɲanamanya ko ra Yuhana kitabu suraw ra. O ɲanamanya ye Yuhana ta kitabu karan jusiginanw dɔ ye. Tere ta yeelen bɛ ɲanamanya lase an ta dugukolo ma. Nka min ye Kirisita ta ye, a tɛ o cogo ra : ale ta ɲanamanya le ye yeelen bɔyɔrɔ ye, sabu an bɛ yeelen ni jusukun kura min sɔrɔ ale fɛ, o bɛ an jigi kɛ jigi kura ye. An ta diina tɛ sariya ani saya ani kiti ta diina ye, nka ɲanamanya, ani yeelen ani jigiya kibaro lo. Nin Saninman min siginin bɛ an kɔnɔ, o sababu an bɛ an ninyɔrɔ sɔrɔ Ala ta ɲanamanya ra.
Dunuɲa bɛ dibi ra jurumun kosɔn, nka Kirisita ye kanuya ye yeelen na. Dibi, walama juguya, walama kojugu, o si tɛ a ra. O kosɔn Kirisita b’a yɛrɛ yira a ta nɔɔrɔba cɛma. A bɛ manamana ka tɛmɛ hali yeelen kan. O bɛɛ n’a ta Yuhana tɛ a damina ka Kirisita ta nɔɔrɔba le yira an na, nka a bɛ Kirisita ta baraka ni a ta ɲanamanya le lakari. Sabu ka Kirisita ta saninmanya lɔn, o bɛ an ta kow bla kɛnɛ kan, ka kiti ben an kan, ka an halaki. Nka k’a ta ɲanamanya sɔrɔ, o bɛ ɲanamanya di an ma. Ka miiri Kirisita ta kow ra o bɛ an jusu saro, ka baraka kura don an na can ra.
Yesu ye adamadenw ta yeelen ye. A tɛ manamana a yɛrɛ le kosɔn, a fana tɛ a yɛrɛ tɔgɔ le bonya. A bɛ manamana anw ta nafa le kosɔn. Yeelen tɛ bɔ anw na, nka dibi le bɔ anw na. Adamaden bɛɛ ka jugu, nka Kirisita bɛ yeelen bɔ an ye, janko an ye se ka ale lɔn, ani k’a faamu ko an ye jurumuntɔw ye. Kirisita ta Kibarodiman sababu ra an bɛ kunu ka bɔ saya ra ka don ɲanamanya banbari ra. Kirisita bɛ an sama ani ka an wele a ta ɲanamanya ta yeelen sababu ra, ko an ye bɔ an ta cogo jugu ra. An bɛ gbara ale ra ni jagbɛlɛya ni lanaya ye.
DAARIKAN: Matigi Yesu, an bɛ an yɛrɛ majigi i ɲa kɔrɔ sabu Fa Ala ni Nin Saninman ni ele, aw ye kelen le ye. I ka dunuɲa dan, i ni Fa Ala, jɛnɲɔgɔnya kɔnɔ. I ka ɲanamanya di ne ma. Ne ta jurumunw yafa ne ma, ka yeelen bɔ ne ye i ta Nin Saninman baraka ra, janko ne ye ɲanamanya, ka bɔ ne ta dibirakow ra, ka gbara i ta ɲanamanya banbari ta yeelen na.
ƝININKARI:
- Cogo wɔɔrɔ juman bɛ Kirisita ra Yuhana bɛ minw yira an an a ta Kibarodiman kitabu damina ra?