Previous Lesson -- Next Lesson
5. Jamana ɲamɔgɔ dɔ ta dencɛ kɛnɛya ko (Yuhana 4:43-54)
YUHANA 4:43-46a
43 Ayiwa, o tere fla tɛmɛnin kɔ, Yesu ni a ta karamɔgɔdenw bɔra ka taga Galile. 44 K’a sɔrɔ Yesu yɛrɛ tun k’a fɔ ko: «Cira si tɛ bonya a yɛrɛ ta jamana ra.» 45 Ayiwa, o sera Galile minkɛ, Galilekaw ka a kunbɛn ni ɲagari ye, sabu Yesu tun ka ko minw bɛɛ kɛ Zeruzalɛmu Jɔnyaban ɲanagbɛ ra, Galilekaw tun ka o ye, sabu olugu yɛrɛ tun tagara ɲanagbɛ ra. 46 Ayiwa, Yesu sekɔra ka taga Kana tuun, Galile mara ra, a tun ka ji yɛlɛma ka kɛ duvɛn ye yɔrɔ min na.
Yesu ni a ta karamɔgɔdenw ka waajuri kɛ Samari. O ka kibarodiman fɔ ni ɲanamanya banbari ta sebagaya ye, ani ɲagari. Wagati min o bɛna taga kibarodiman fɔ ka se fɔ dunuɲa fan bɛɛ ra, o wagati ma se fɔlɔ; Yesu tun ka kan ka se sɔrɔ ninjuguw kan a yɛrɛ ta jamana ra fɔlɔ. A terenna ka taga Galile, hali ni Nazarɛtikaw tun bɛ a lɔgɔbɔ, ani dɔw tun bɛ se ka wuri a kama ka kojugu kɛ a ra. A teriw ni a ta somɔgɔw tun ma la a ta alaya ra fɔlɔ, i n’a fɔ o ta gba tun ye gba fitini le ye. Olugu tun bɛ bori naforo ni tɔgɔ le kɔ, ka Yesu mafiyɛnya a ta fagantanya kosɔn. Yesu ma kabako si kɛ o cɛ ra o ta lanabariya kosɔn.
Kirisita tɔgɔ tun tagara yɔrɔ jan, ko a bɛ banabagatɔw kɛnɛya; o ko fɔra ka se fɔ yɔrɔ jan. A tun ka kabako minw kɛ Zeruzalɛmu ani Galile, o ko kibaroya tun bɛ fɔra a kɔ fɛ yɔrɔ bɛɛ ra. Galileka caman tun bɛ Zeruzalɛmu Jɔnyaban ɲanagbɛ wagati ra. Yesu tun ka kuma minw fɔ ani a tun ka ko minw bɛɛ kɛ, olugu tun ka o kumaw mɛn, ani ka o kow ye, k’a lɔn ko a tun bɛ waajuri kɛ ni baraka ye. Yesu sera o fɛ minkɛ o k’a kunbɛn ni ɲagarikanbaw ye, sabu o tun b’a miiri ko a bɛna kabako dɔw kɛ olugu ye. Kɔɲɔkura minw tun furura Kana, Yesu kɔsegira olugu ta yɔrɔ ra. Minw tun k’a damina k’a jate a ta kabako fɔlɔ kɛnin kosɔn, a tun b’a fɛ k’a ta baara dafa olugu cɛ ra.
YUHANA 4:46b-54
46b O y’a sɔrɔ jamana ɲamɔgɔ dɔ tun bɛ Kapɛrinahumu, o ta den tun man kɛnɛ. 47 O cɛ k’a mɛn minkɛ ko Yesu bɔra Zude ka na Galile mara ra, a tagara Yesu fɛ ka taga a daari ko a ye na Kapɛrinahumu, ko ale dencɛ bɛ ɲini ka sa, ko a ye na a kɛnɛya. 48 Yesu k’a fɔ a ye ko: «Ni aw ma tagamasiyɛnw ni kabakow ye aw ɲa ra, aw tɛ la ne ra fiyewu!» 49 O kuntigi ko Yesu ma ko: «An karamɔgɔ, sabari ka na joona, janko ne dencɛ kana na sa.» 50 Yesu ko a ma ko: «Kɔsegi ka taga, i dencɛ kɛnɛyara.» O cɛ lara Yesu ta kuma ra; a tagara. 51Ayiwa, ka a tagatɔ to, a ta baaradenw ka a kunbɛn sira ra k’a fɔ a ye ko: «I dencɛ kɛnɛyara.» 52 A ka a ta baaradenw ɲininka ko: «A fisayara wagati juman le ra?» O ka a jaabi ko: «A ta farigban banna kunu le, wagati min na tere tun bɛ kuncɛ.» 53 Den facɛ k’a jate mina k’a ye ko o wagati kelen le ra, Yesu tun k’a fɔ ale ye ko: «I dencɛ kɛnɛyara.» O cɛ ni a ta somɔgɔw bɛɛ lara Yesu ra. 54 Ayiwa, kabini Yesu bɔra Zude ka na Galile mara ra, nin le kɛra a ta tagamasiyɛn flanan ye.
Masacɛ ta baaraden kuntigi dɔ nana Yesu fɛ, sabu a tun ka Yesu ko mɛn, k’a ta sebagaya ko mɛn. Dugumɔgɔw tun b’a miirira ko cɛ tun gbarara Flakɛbaga ra janko ka masacɛ le ko fɔ a ye.
Nka o kuntigi dencɛ le tun man kɛnɛ; o tun bɛ Kapɛrinahumu, bada ra. Facɛman tun tagara ni a ye flakɛbaga caman fɛ, ka wari caman bɔ, nka den ma kɛnɛya. A laban a tagara Yesu fɛ; yala Yesu bɛna se k’a ta den kɛnɛya wa, walama a tɛna se? Facɛman tun b’a fɛ Yesu ye bɔ Kana ka taga Kapɛrinahumu, sabu a tun b’a miiri ko ni Yesu yɛrɛ bɛ yi, o bɛna se ka den kɛnɛya.
Yesu ka o kuntigicɛ fo, hali a ma kɛ ni sɔsɔri ye. Nka o kuntigicɛ ta lanabariya ka Yesu ɲana sisi. Yesu tɛ se ka mɔgɔ si dɛmɛ, ni i ma la ale Yesu ra, k’a lɔn ko ale ɲɔgɔn tɛ yi. Dɔw bɛ Ala daari, o bɛ la Yesu ra, nka sigiya fana bɛ o jusukun na, sabu o ɲa bɛ se ka dɛmɛ min ye, o bɛ o le fɛ. Lanabaga sɔbɛ min lara Ala ra, ni a ka kɛ cogo cogo ale b’a jigi la Ala ta kuma kan, ka la a ra ko Ala bɛna a jaabi.
Yesu ka o kuntigicɛ jarakiri ni kuma min ye, o ma digi kuntigicɛ ra, nka a k’a yɛrɛ majigi, k’a fɔ Yesu ma ko «Matigi», k’a yɛrɛ jate Kirisita ta jɔn dɔ ye. A dencɛ ta kanuya kosɔn, ani a ka bonya min la Yesu kan o kosɔn, a segira a kan ka Yesu daari ko a ye na Kapɛrinahumu.
Yesu k’a ye ko a b’a fɛ ka la a ra ko ale ye Matigi ye minkɛ, a k’a fɔ a ye ko: «Taga, i dencɛ kɛnɛyara.» Yesu ma taga Kapɛrinahumu, nka a ka den facɛ ta kanuya sɛgɛsɛgɛ, ka baraka don a ta lanaya ra. Yala a tun lara a ra ko Yesu bɛ se ka den kɛnɛya hali ni olugu ni den banabagatɔ yɔrɔ tun ka jan ɲɔgɔn na wa?
Ka o to kuma ra, kuntigicɛ ka Yesu cogo faamu, ani a ta kanuya. A lara a ra a jusukun na ko Yesu tun tɛ faniɲa fɔra, ko a tun tɛ ale lɔgɔbɔra le fana. A lara Yesu ra hali ni a ɲa tun ma a dencɛ kɛnɛyanin ye. A ka Yesu kan mina ka sekɔ ka taga a ta so. A ta kanminari ka Yesu bonya, ka den kɛnɛyako kɛ can ye. Ni Yesu bɛ se ka ne dencɛ sabagatɔ kɛnɛya, o tuma a ka bon ni fɛn bɛɛ ye. Den kɛnɛyako bɛ Yesu ta fangatigiya yira, ani a ta alaya. Kuntigicɛ kɔsegiko tun kɛra a ta lanaya sɛgɛsɛgɛ wagati ye, ani a ta lanaya bonya sababu.
Yesu k’a kɛ fana ko kuntigicɛ ta baaradenw ye bɔ ka na a kunbɛn sira ra, janko k’a fɔ a ye ko a dencɛ kɛnɛyara ka bɔ bana ra pewu. Cɛ ta kɔnɔgban banna, fɔ a ka Matigi tando. A tun b’a fɛ k’a lɔn a dencɛ kɛnɛyara wagati kelen min na; o k’a fɔ a ye ko a kɛnɛyara wagati min tere tun bɛ kuncɛ, o kɔrɔ ye wagati min yɛrɛ ra Yesu tun ka den kɛnɛyako fɔ a ye, ani k’a layiri ta a ye.
O kuntigicɛ ka Kirisita ta sebagaya ni a ta kanuya seereya kɛ a ta somɔgɔw bɛɛ ye, ka Yesu waleɲuman lɔn.
Nin kɛnɛyari le kɛra Yesu ta kabako flanan ye, Yuhana bɛ min lakari an ye. Yesu ta kow kibaroya tun sera masacɛ ta so kɔnɔ. Mɔgɔw kɔrɔtɔninba tun bɛ ko wɛrɛw makɔnɔna, Yesu bɛna minw kɛ. Aw ye la a ra, ko ka la Kirisita ra, ko o le ye batori sɔbɛ ye, Ala bɛ sɔn min ma, ani ko Ala b’a yira ni tagamasiyɛnw ani kabakobaw ye ko a sɔnna o batori ma.
DAARIKAN: Matigi Yesu, an b’i fo i nako kosɔn. I ka ni cɛdennin banabagatɔ sabaga kɛnɛya Kapɛrinahumu, hali k’a sɔrɔ a yɔrɔ tun ka jan i ra. I k’a facɛ dɛmɛ k’a to a ye la i ra, k’a ta lanaya baraka bonya. An karan, an ye la i ta kanuya ra ani i ta sebagaya. Minw sanin lo o ta jurumunw na, an bɛ i daari olugu ta kisiri ko ra, ka la a ra ko i bɛ an ta daariw jaabi.
ƝININKARI:
- Kuntigicɛ tun ka kan ka tɛmɛ sira juman ni juman le fɛ janko k’a ta lanaya bonya?