Previous Lesson -- Next Lesson
b) Yesu k’a yira karamɔgɔdenw na ko simantigɛwagati sera (Yuhana 4:27-38)
YUHANA 4:31-38
31 Ayiwa, o y’a sɔrɔ karamɔgɔdenw tun bɛ Yesu daarira ko: «An karamɔgɔ, domuni kɛ sa!» 32 Yesu ka o jaabi ko: «Domunifɛn dɔ bɛ ne fɛ ka a domum, aw tɛ domunifɛn min lɔn.» 33 Karamɔgɔdenw ka kɛ ɲɔgɔn ɲininka ye, ko: «O tuma dɔ le nana domuni di a ma yan wa?» 34 Yesu k’a fɔ o ye ko: «Ka ne cibaga sago kɛ, ani k’a ta baara kɛ k’a dafa, o le ye ne ta domuni ye. 35 Aw tɛ derira k’a fɔ ko karo naani le bɛ dannikɛwagati ni simantigɛwagati cɛ wa? Ayiwa, ne b’a fɔ aw ye ko aw ye aw ɲa kɔrɔta ka forow flɛ; siman kɔgɔra, a tigɛwagati sera ka ban. 36 Min bɛ siman tigɛra, o tigi bɛ a ta sara sɔrɔra ka ban; a bɛ simankisɛ lajɛn ka a bla ɲanamanya banbari kosɔn. O cogo ra dannikɛbaga ni simantigɛbaga bɛɛ bɛ ɲagari ɲɔgɔn fɛ. 37 Sabu zana min ko: ‹Dɔ bɛ danni kɛ, dɔ wɛrɛ bɛ siman tigɛ,› o zana ye can ye. 38 Ayiwa, aw ma baara kɛ foro min na, ne ka aw ci ka taga o siman tigɛ; mɔgɔ wɛrɛw ka baara min kɛ, aw bɛ tɔnɔ sɔrɔra olugu ta baara nɔ le ra.»
Yesu ka nin muso jurumuntɔ nin kisi ka ban minkɛ, ka ɲanamanya banbari di a ma, sisan a b’a ɲa munu a ta karamɔgɔden fɛ, ka olugu fana karan. Olugu ta miiriyaw bɛɛ tun bɛ nin dunuɲa ta fɛnyetaw le kan. Ala ta Nin Saninman tun ka min kɛ nin muso jusukun na o tun tɛ ɲagarira o ra. Sigiya t’a ra ko domuni ni ji lɔyɔrɔ ka bon adamaden ta ɲanamanya ra, nka domunifɛn dɔ wɛrɛ bɛ yi min nafa ka bon ka tɛmɛ to kan, wasafɛn wɛrɛ bɛ yi min lɔyɔrɔ baraka ka bon ka tɛmɛ ji ta lɔyɔrɔ kan. Karamɔgɔdenw tun ka kan ka o fana famu. Olugu tun man fisa ni Samarikamuso ye, hali ni Ala ɲasiran tun bɛ o ra, ani o tun bɛ tugu Yesu kɔ.
Domunifɛn min bɔra sankolo ra, domunifɛn min bɛ mɔgɔ nin baro, Yesu ka o kɔrɔ ɲafɔ o ye. O domunifɛn bɛ mɔgɔ nin wasa ka tɛmɛ domunifɛn tɔ bɛɛ kan. Yesu kɔni tun wasara kosɛbɛ yɛrɛ le, sabu ale kɛra dɔw ta nɛɛma sɔrɔsababu ye, ani a k’a Fa Ala fana sago dafa.
Yesu tun ye Ala ta ciraden le ye. A tun kɛra Dencɛ ye a yɛrɛ sago ma, k’a Fa kan mina, k’a Fa sago kɛ ni ɲagari ye, sabu Ala ye kanuya ye. Mɔgɔ min bɛ to kanuya ra, o bɛ to Ala ta jɛnɲɔgɔnya ra fana. Kirisita ta kanminari t’a yira ko a ka dɔgɔ ni Fa ye, nka o bɛ a ta kanuya bonya le yira. Dencɛ k’a fɔ ko dunuɲa ta kisiri ko ye ale Fa ta baara le ye, hali ni ale yɛrɛ le ka o kisiri ko dafa. A ka nɔɔrɔ la a Fa kan, i n’a fɔ Fa tun kɔnna ka fɛn bɛɛ to Dencɛ boro cogo min na. Fa ka a Dencɛ bla fɛn bɛɛ kunna, k’a lasigi a kininboroyanfan fɛ, ka fangatigiya bɛɛ bla a ta fanga kɔrɔ, sankolo ra ani dugukolo kan.
Kɔlɔnda ra, Ala sago tun ye ka nin muso mafiyɛnyanin nin kisi. Ala tun ma Yahudiyaw dɔrɔn le wele kisiri kama, nka adamadenw bɛɛ lo. Adamadenw bɛɛ kɛra kojugukɛbagaw ye, Ala ko lɔnniya lɔgɔ bɛ o ra fana. Yesu ka nin muso ta faamuri hakiri bonya ye, ani a tun bɛ a ta jurumunw yafa sira ɲinina cogo min na. An b’a ye ko ale tun kɔrɔtɔra cogo min na ka Ala ta yafa sɔrɔ, o tun tɛmɛna hali Yahudiyaw ta kan. Nin Saninman ka Yesu fa, fɔ a barara ka dunuɲa bɛɛ lajɛnnin ye a ɲa kɔrɔ, i ko foro ba, min fara siman na, siman min sera tigɛri ma.
O bɛɛ n’a ta karamɔgɔdenw ma se ka nin foro ye, min ye dunuɲa tagamasiyɛn ye, ko dunuɲa bɛ i ko foro min sera a simantigɛ wagati ma. Yesu tun sera Samari nɛnɛba wagati le ra, o wagati ra simantigɛ wagati tun ka jan belen. A bɛ i n’a fɔ Yesu k’a fɔ le ko: «Aw bɛ ko gbansanw le jate, sɔsɔri tɛ minw na. Aw ye adamaden jusukun kɔnɔnɔkow jatamina; aw kana to ka aw yɛrɛ ɲininka tuun, aw ye o dabla; ɲanamanya min bɛ mɔgɔ wasa aw ye o le ɲini, aw ye Ala ɲini. Bi le ye simantigɛ wagati ye. Mɔgɔ caman tun bɛna sɔn Ala Dencɛ ma, ka sɔn a ma k’a kɛ o Kisibaga ye, ni kisiri ko waajuri tun kɛra o mɔgɔw ye ni hakiritigiya ye ani kanuya.»
A bɛ se k’a kɛ ko aw bɛ aw yɛrɛ yera cogo wɛrɛ ra; ne sigiɲɔgɔnw bɛɛ ye mɔgɔ kungologbɛlɛnw ye, o tɛ sɔn mɔgɔ wɛrɛ ta miiriya ma, o fiyennin lo. Sigiya t’a ra Yesu ta karamɔgɔdenw ta miiriya tun ye o le ye, sabu o ta jatemina tun bɛ dan kow kɛnɛmayɔrɔ le ma. Nka Yesu kɔni bɛ jusukun kɔnɔnɔkow bɛɛ sɛgɛsɛgɛ. A ma nin muso jɛnɛyakɛbaga jaraki, k’a sɔrɔ muso tun ka ale jate i ko lonan. A ma sigiya ka kuma ni muso ye, hali ni o kuma minw tun bɛ ɲasin Ala ta kow ma, o tun ka bon muso ta faamuri ma; Yesu kumana ni a ye ka kow faamucogo nɔgɔya, k’a gbɛya muso ye. Yesu ta Nin Saninman ka muso dɛmɛ k’a ta kuma faamu, k’a hakiri jigi Ala bato ko ra, ani Masiya ta bonya ko ra, fɔ ka muso kɛ kibarodiman fɔbaga dɔ ye. Nin ye yɛlɛmariba ye dɛ! Nin muso yɔrɔ tun ka surun Nin Saninman ta sebagaya ra ka tɛmɛ Nicodɛmu kan, ale min tun b’a yɛrɛ jate Ala ɲasiranbaga ye. Ni aw bɛ baara kɛ Yesu ye, aw mako bɛ a ta kanuya ra janko minw bɛ aw kɛrɛ fɛ, Ala ta terenninya nege bɛ minw na i ko kɔngɔ, aw ye se ka olugu ye, ani ka o dɛmɛ. Aw kana o ta jusukun gbɛlɛya flɛ, walama ko o mako tɛ aw ra, sabu Ala bɛ o kanu; Yesu bɛ o wele. Ala bɛna o hakiri dayɛlɛ dɔɔni dɔɔni ka faamuri sɔrɔ, a ta nɛɛma baraka ra. Aw kana je, k’a sɔrɔ nin dunuɲamɔgɔw makoba le bɛ Ala ra.
Ni mɔgɔ min ka na Kirisita fɛ, o tigi bɛ ɲanamanya banbarri sɔrɔ. Jusukunw bɛ fa ɲagari ra. Hali ni jurumunkɛbaga kelenpe le ka nimisa, mɛlɛkɛw bɛ ɲagari sankolo kɔnɔ o kosɔn. Ayiwa, Ala kɔni b’a fɛ ko mɔgɔw bɛɛ ye kisi, ka can lɔn. Minw bɛ sɔn Ala sago ma, k’a kan mina, ka kibarodiman fɔ tɔw ye ni yɛrɛmajigiya ye, olugu nin bɛna wasa, ka ɲagari sɔrɔ. A bɛ i n’a fɔ Yesu yɛrɛ k’a fɔ cogo min na, ko: «Ka ne cibaga sago kɛ, ani k’a ta baara kɛ k’a dafa, o le ye ne ta domuni ye.»
Yesu ka ale ni karamɔgɔdenw ta kuma laban, k’a fɔ ko: «Ne ka aw ci ka taga siman tigɛ.» Batizerikɛbaga tun ka foro sɛnɛ dugukolo gbɛlɛnw na, o kɔrɔ ye ko a ka waajuri kɛ ko mɔgɔw ye nimisa o ta jurumunw na – Yesu yɛrɛ kɛra simankisɛ ye, Ala ka min dan o dugukolo sɛnɛnin na. A sara gbengbenyiri kan, i ko siman min danna, ka den kɛ; a ta saya ka den minw kɛ an bɛ o denw le tigɛra bi. Ni Yesu ka aw wele ko aw ye taga siman tigɛ, aw ye aw hakiri to a ra ko o tɛ aw yɛrɛ ta siman dannin ye. Matigi ta baara lo. Kirisita ta sebagaya sababu le ra Nin Saninman ta denw bɛ kɔgɔ. An bɛɛ ye baaraden dɛsɛbagatɔw le ye, nka o bɛɛ n’a ta Kirisita bɛ an wele ka Ala ta baara kɛ ni ale ye, ka an kɛ dannikɛbagaw ye wagati dɔw ra, ka an kɛ foro sɛnɛbagaw ye wagati dɔw ra, walama simantigɛbagaw. An ka kan ka an hakiri to a ra ko anw le ma kɛ Ala ta baaraden fɔlɔw ye. Mɔgɔ caman kɔnna ka baara gbɛlɛnw kɛ an ɲa fɛ, ka sɛgɛ fɔ ka ɲaji bɔ; olugu ta daarikanw sɛbɛra sankolo ra. Aw ta baarakɛminaw man fisa ni Ala ta baarakɛbaga tɔw ta ye, aw fana tɛ hakiritigiw ye ka tɛmɛ o kan. Aw bɛ ɲanamanya Ala ta nɛɛma le sababu ra wagati bɛɛ ra. Aw ka aw yɛrɛ di Ala ta baara ma cogo min na, aw ye aw yɛrɛ degi ka to ka Nin Saninman kan mina o baara ra. Ka aw to simantigɛ ra, aw ye baara kɛ Ala ye, ka baraka la a ye, ka aw sankolo Fa Ala ta bonya lakari ni simantigɛbaga tɔw ye, minw bɛ to ka pɛrɛn k’a fɔ Ala ye ko: «I ta massaya ye na; masaya ni sebagaya ni nɔɔrɔ ye i ta ye, wagati bɛɛ ani tuma bɛɛ. Amina. »
c) Kibarodiman fɔko Samari mara ra (Yuhana 4:39–42)
YUHANA 4:39-42
39 Ayiwa, o muso ta kuma kosɔn, Samarika caman lara Yesu ra o dugu ra, sabu muso k’a fɔ o ye ko: «Ne ka ko o ko kɛ ka tɛmɛ, a ka o bɛɛ fɔ ne ye.» 40 O kosɔn Samarikaw nana Yesu fɛ minkɛ, o k’a daari ko a ye to olugu fɛ; Yesu ka tere fla kɛ ni o ye. 41 Mɔgɔ caman wɛrɛ lara a ra a yɛrɛ ta kuma kosɔn. 42 O mɔgɔw ko muso ma ko: «An ma la a ra ele ta kuma kosɔn dɛ, nka an yɛrɛ ka a lamɛn, an ka a lɔn ko can ra ale le ye dunuɲa Kisibaga ye.»
Jamaba le bɔra dugu kɔnɔ ka bori ka taga Yesu fɛ, sabu muso ta kuma ka o kɔnɔnɔfiri. Yesu ka o mɔgɔw ye minkɛ, o kɛra a ɲa kɔrɔ i ko foro min siman sera, ani a siman sera tigɛri ma. A kumana o fɛ lanaya ko ra, ani ɲanamanya banbari; o kɔ a tora ni o ye fɔ tere fla. A ta karamɔgɔdenw tagara o yɔrɔ mɔgɔw waaju o ta sow kɔnɔ ka o ninw kisi, ka kɛ i ko simantigɛbagaw. Kirisita ta kokɛcogow ani a ta kumaw ka o dugu mɔgɔw jusukun wasa kosɛbɛ. O k’a faamu ko Ala tun nana dunuɲa ra, olugu ta jusukasi cɛ ra Kirisita sababu ra, janko ka olugu jurumunkɛbagaw kisi. O Samarikaw le kɛra mɔgɔ fɔlɔw ye ka nin tɔgɔ la Yesu ra, ko «dunuɲa Kisibaga», sabu o k’a faamu ko Yesu tun ma na a yɛrɛ ta mɔgɔw dɔrɔn le kisi, nka a tun nana dunuɲamɔgɔw bɛɛ ta jurumunw le bɔ o kunna. Dan si tɛ a ta kanuya ta sebagaya ra. Hali bi, minw bɛ jurumun ta jɔnya ra, Setana ta fanga kɔrɔ, a bɛ se ka olugu kisi ka o bɔsi, ani a bɛ minw bɔsi, a bɛ olugu mara fana. Can ra, ale le ye dunuɲa kititigɛbaga ye. Wagati dɔ ra o tun ka Rɔmu masacɛba Sezari wele ko «dunuɲa Kisibaga ani a Marabaga». Nin Samarikaw k’a faamu ko Yesu tun ka bon ni Masacɛba Sezari ye; Yesu bɛ hɛra banbari di a ta mɔgɔw ma.
DAARIKAN: Yesu, an b’i fo; i ka nin muso jurumuntɔ ta ɲanamanya yɛlɛma k’a kɛ ɲanamanya kura ye, k’a yira an na ko ka Nin Saninman kan mina, ko o ka fisa ni batori ye. Fɛn o fɛn bɛ an siri ka an bari ka i ta baara kɛ, an bɔsi ka bɔ o bɛɛ ra, janko an ye se ka i sago kɛ ni ɲagari ye, ani sabari, ani ka i ta kisiri ko fɔ mɔgɔ tununinw ye; ni o kɛra o bɛna la i ra, ka ɲanamanya banbari sɔrɔ o lanaya baraka ra.
ƝININKARI:
- An bɛ se ka kɛ Yesu ta simantigɛbaga nafamanw ye cogo di?