Previous Lesson -- Next Lesson
b) Yesu k’a yira karamɔgɔdenw na ko simantigɛwagati sera (Yuhana 4:27-38)
YUHANA 4:27-30
27 Ayiwa, karamɔgɔdenw kɔsegira ka na; o k’a ye ko Yesu bɛ kumana ni muso ye minkɛ, o ka o kɔnɔnɔban. Nka o si ma sɔn ka a ɲininka ko a bɛ mun le ɲininkara muso fɛ, walama ko mun kosɔn a kumana ni muso ye. 28 Muso ka a ta jibiminan to kɔlɔnda ra, ka taga dugu kɔnɔ, ka taga fɔ mɔgɔw ye ko: 29 «Aw ye na cɛ dɔ flɛ. Ne ka ko o ko kɛ ka tɛmɛ, a ka o bɛɛ fɔ ne ye; Kisibaga min ko fɔra, kɔni ale tɛ dɛ?» 30 Mɔgɔw bɔra dugu kɔnɔ ka na Yesu fɛ.
Ka Yesu ni muso to kuma ra, karamɔgɔdenw tun tagara domuni min san dugu kɔnɔ, o nana ni o ye. O kabakoyara ka Yesu ye a kelen bɛ kumana ni muso dɔ ye, o fana ma kɛ muso wɛrɛ ye fɔ samarikamuso. Nka o si ma sɔn k’a ɲininka, sabu o tun ka Kirisita ta sebagaya ye. O ka muso ɲada cogo ye minkɛ, o k’a faamu ko Kirisita tun ka kabako dɔ kɛ. Muso k’a ta Kisibaga sɔrɔ, o ninsɔndiya tun bɛ ye a ɲada kan.
Muso k’a ta daga lakolon to kɔlɔnda ra. Ale tun ma ji minta di Yesu ma, nka Yesu tun yafara ale ma, k’a ta minlɔgɔ ban. Muso yɛrɛ kɛra bununji ye ka mɔgɔ caman ta minlɔgɔ ban. A borira ka taga dugu kɔnɔ, ka taga Kirisita ko fɔ dugumɔgɔw ye. Kuma lakolonw tun bɛ bɔ da min na fɔlɔfɔlɔ, sisan o da kelen kɛra i ko bununji saninyanin min bɛ Kirisita ko seereya kɛ mɔgɔw ye. A k’a ta dugumɔgɔw sama ka na Kisibaga fɛ, k’a fɔ o ye ko a ka ale jurumunw fɔ a ye. Dugumɔgɔw ka o kuma mɛn minkɛ, o k’a faamu ko ko dɔ kɛra min ma deri ka kɛ, min kɛra Ala ta baara ye nin muso ta ɲanamanya ra. Mɔgɔw tun b’a fɛ ka muso ta gundo lɔn minkɛ, o borira ka taga kɔlɔnda ra, ka taga Yesu siginin sɔrɔ, a ni a ta karamɔgɔdenw.
A bɛ kɛ o cogo le ra, wagati min Kirisita bɛ baara kɛ a nɔfɛmɔgɔw jusukun na. An fana ye nin kibaroya lase an teriw ni an sigiɲɔgɔnw ma, ko Kirisita nana an kisi. Ni o kɛra o ji ɲanaman sɔrɔlɔgɔ bɛna kɛ o ra, Nin Saninman fana bɛna a di o ma. Yala ele kɛra ɲanamanya bununji dɔ ye wa, i sigiɲɔgɔnw bɛ se ka min bunun min na? Ni i ma kɛ o ye fɔlɔ, o tuma i ka kan ka lɔ i ta jurumunw na Yesu ɲa kɔrɔ, ka i yɛrɛ majigi a kɔrɔ. A bɛna i ta jurumun ko, ka i saninya, k’a to mɔgɔ caman ye nɛɛma sɔrɔ i sababu ra – i n’a fɔ muso jɛnɛyakɛbaga ta kɛra cogo min na, ale min tagara a sigiɲɔgɔnw waaju.
DAARIKAN: Matigi Yesu, ne b’i fo, sabu i ka ne yɔrɔ ɲini, ani i ka ne lɔn. Ne man fisa ni nin Samarika muso ye. Ne ta jurumunw yafa ne ma. Ala bɛ ji min di janko ka can minlɔgɔ ban ne ra, o di ne ma, ka ne ta ɲanamanya saninya. Ne ɲaw yɛlɛ, k’a to ne ye se ka Fa Ala ye. Ne jusukun fa Nin Saninan na janko ne ye kɛ mɔgɔ nafaman ye, ani janko ne ta ɲanamanya ye bla i ta batori kama k’a yira ko ne ka i ta nɛɛma sɔrɔ. Mɔgɔ caman kisi, ka o lana i ma. Sabu minw bɛɛ bɛ sɔn ka na i fɛ i tɛ ban olugu si ra.
ƝININKARI:
- Mun le bɛ se k’a to ɲanamanya ta ji ye bɔn anw kan?