Previous Lesson -- Next Lesson
1. Kititigɛbagaw ta ciraden dɔw ka Batizerikɛbaga ɲininka (Yuhana 1:19-28)
YUHANA 1:22-24
22 O ko: «O tuma ele ye jɔntigi le ye? Dɔ fɔ an ye kɛ, janko an ye taga o fɔ an cibagaw ye. Ele bɛ i yɛrɛ jate jɔntigi le ye?» 23 Yuhana ka o jaabi ni cira Ezayi ta kuma ye. A ko: «Pɛrɛnkan min bɛ bɔ kongo kɔnɔ k’a fɔ ko: ‹Aw ye sira labɛn Matigi ye,› ne le ye o pɛrɛnkan ye.» 24 Minw tun cira Yuhana fɛ, olugu tun ye Farisi dɔw ye.
O ciradenw tun nana o ta ɲininkariw gban Yuhana ra, k’a kɛ i n’a fɔ mɔgɔ min bɛ fɛn bonna ni biyɛnw le. O ɲininkariw kun tun kɛra karanjuguw le kosɔn, o tun b’a miiri ko dɔw bɛna na mɔgɔw kunnacɛn ni karanjugu minw ye sani Masiya yɛrɛ ye na. Nka Yuhana k’a fɔ o ye minkɛ ko ale tɛ Masiya ye, walama Iliya, walama Musa ka cira min ko fɔ, o tuma o ma nafa bla Yuhana ta ko ra, o m’a juguman ye a ta ko ra. O bɛɛ n’a ta o ka ɲininkariw gban kosɛbɛ, janko k’a lɔn Yuhana b’a ta karan sɔrɔra jɔntigi le fɛ. O tun t’a fɛ ka sekɔ ka taga kititigɛjɛnkuru fɛ ni o ma o ko sɛgɛsɛgɛ k’a cogoya bɛɛ faamu.
O ta ɲininkariw ni Ezayi ta ciraya kumaw tun tɛ sira kelen na (Ezayi 40:3), nka Nin Saninman ka o yira Batizerikɛbaga ra. A k’a yɛrɛ ko fɔ ko ale ye kumakan dɔ ye min bɛ pɛrɛn kongokolon kɔnɔ ka Matigi ta sira labɛn. Ni a tun ma kuma o fɛ k’a ta kuma jusigi Ala ta Kuma kan, o tun bɛna a jaraki ko a bɛ a yɛrɛ kɛra tɔgɔtigi ye, ko a ta karan bɛ bɔra a yɛrɛ le ra. O tuma o tun bɛna kiti ben kan ko a ka Ala tɔgɔ cɛn. Yuhana k’a yɛrɛ majigi o cogo le ra, ka Layirikɔrɔ ta lɔyɔrɔ bɛɛ ra dɔgɔmani le ta, ko ale tɛ foyi wɛrɛ ye ni kumakan dɔrɔn tɛ, min bɛ pɛrɛn kongokolon kɔnɔ.
An bɛɛ bɛ kongokolon le kɔnɔ nin dunuɲa ra yan. Mankanba ni dibifinba le ka an lamini. Nka Ala tɛ an to a kelen na, a bɛ a ta dɛmɛ lase an ma. A bɛ na, ka na mɔgɔ juguw kisi. Yesu ye bɔ sankolo ra ka na dugukolo kan, o ye nɛɛmaba le ye. Ala saninman tɛ an halaki, i n’a fɔ an ka kan ni a ye cogo min na, nka a bɛ an yɔrɔ ɲini, a bɛ mɔgɔ tununinw yɔrɔ ɲini. An bɛ miiri ka se hakɛya min o min ma, a ta kanuya ka bon ka tɛmɛ o bɛɛ kan. A bɛ kisiriba min kɛ an ye, o bɛ i ko ka kongokolon yɛlɛma k’a kɛ yiritu flaburuman ye.
Nin Saninman ta yirari baraka ra, Batizerikɛbaga k’a faamu ko Ala nana dunuɲa kɔnɔ Kirisita sababu ra. O cogo le ra a k’a damina ka mɔgɔw wele ko o ye o jogo yɛlɛma ka o yɛrɛ labɛn, janko Min ka kan ka na o ye se ka o kunbɛn. A jijara cogo min na ka Kirisita ta sira labɛn, o le k’a kɛ kumakan dɔ ye an ta dunuɲa kongokolon kɔnɔ. A m’a yɛrɛ kɛ Ala ta cira dɔ ye, walama ciraden dɔ, nka a k’a yɛrɛ kɛ kumakan dɔrɔn le ye. O kumakan tun fara Ala ta baraka le ra, o kosɔn minw k’a lamɛn olugu lanin ma se ka to o ta jurumun sunɔgɔ ra.
O kumakan tun bɛ mun le fɔra? A ta kuma kunbaw flɛ nin ye : Aw ye aw jogo yɛlɛma, k’a lɔn ko Ala ta Masaya bɛ aw cɛ ra! Aw ye aw yɛrɛ labɛn! Ala saninyanin lo, a bɛna aw ta kiti tigɛ. Aw ka faniɲa min o min fɔ, ani sonyariw, ani kojugu wɛrɛw, Ala bɛna aw ɲininka o bɛɛ ra, ka aw tɔɔrɔ ni jahanama tasuma ye. Aw ta jurumunw si ma dogo Ala ma. Min ye mɔgɔjuguw ye, o bɛna jate mɔgɔjugu ye Ala ɲa kɔrɔ. Min b’a yɛrɛ jate mɔgɔ ɲuman ye, o tɛna jate ko a ka fisa ni mɔgɔjugu ye. Sabu mɔgɔ si jarakibari tɛna to Ala ɲa kɔrɔ.
Batizerikɛbaga ka o kuma minw fɔ, o ye welekan le ye, ko an ye an yɛrɛ sɛgɛsɛgɛ, ka lɔ an ta terenbariyaw ra, ka an ta yɛrɛbonya dabla, ka an ta miiriyaw yɛlɛma. Ne balema, yala i bɛ i yɛrɛ jate mɔgɔ ɲuman ye, ani mɔgɔ min ko ka di Ala ye wa? I ka kan ka sɔn can ma, ka lɔ a ra ko i jarakira! Ni i ka dɔ ta fɛn sonya, hali ni a kɛra fɛn fitini le ye, i ye o sekɔ o tigi ma sisan sisan. I ta yɛrɛbonya dabla, ka ɲanamanya Ala ye. Ko minw ma teren i ta tagamacogo ra, i ye o ɲanabɔ. I yɛrɛ majigi sabu i ka kojugu kɛ.
Ɲamɔgɔw ta ciradenw caman tun ye Farisiw ye. Batizerikɛbaga ta jagbɛlɛya k’a to o dimina, sabu olugu tun bɛ o yɛrɛ jate mɔgɔ terenninw ye, ani Ala ɲasiranbagaw, ani mɔgɔ ɲumanw, minw tun bɛ hali sariya ko fitiniw bɛɛ tagama ni timinadiya ye. Nka o tun bɛ o yɛrɛ lafirira le. O tun bɛ o yɛrɛ kɛ Ala ɲasiranbagaw ye mɔgɔw ɲa kɔrɔ, k’a sɔrɔ terenbariya tun bɛ o jusukun na; o ta jusufariya kosɔn o tun ka teri ka kojugu kɛ mɔgɔw ra ka o yɛrɛ dimibɔ, i ko fɔnfɔniw.
O mɔgɔw ta fariya ma se ka Yuhana lasiran ; a sɔngɔra o ra k’a yira o ra tuun ko an bɛɛ mako bɛ a ra ka sekɔ ka na Ala fɛ, ka an jusukun sira labɛn janko sani dɔɔni Matigi ye se ka na an fɛ.
DAARIKAN: Matigi, i ka ne jusukun cogo lɔn, ne ta ko tɛmɛninw ani ne ta jurumunw. Ne ta jurumun maroya bɛ ne ra, ne ta jurumun minw bɔra kɛnɛ kan walama min dogonin lo. Ne bɛ lɔ ne ta juguya kow bɛɛ ra i ɲa kɔrɔ, ka i daari ko i ye yafa ne ma. A to ne kana ne yɛrɛ mabɔ i ra. Ne ka fɛn minw sonya mɔgɔw fɛ, ne dɛmɛ ka o kɔsegi o ma; ne ka mɔgɔ minw hakɛ ta, ka digi o ra, ne ye o yafa daari olugu fɛ. Ne ta yɛrɛbonya cɛn, ka ne saninya ka bɔ ne ta jurumunw bɛɛ ra i ta makari kosɔn, ne Matigi, ele min bɛ hina hinabagaw ra.
ƝININKARI:
- Batizerikɛbaga ka mɔgɔw wele cogo di ka Matigi ta sira labɛn?