Previous Lesson -- Next Lesson
1. Kititigɛbagaw ta ciraden dɔw ka Batizerikɛbaga ɲininka (Yuhana 1:19-28)
YUHANA 1:19-21
19 Yahudiyaw kuntigiw ka sarakalasebaga dɔw ci Yuhana fɛ, ani Alabatosoba baaraden dɔw; o bɔra Zeruzalɛmu ka taga Yuhana ɲininka ko: «Ele ye jɔntigi le ye?» Yuhana ka seereya min fɔ, o le ye nin ye. 20 Yuhana ka a gbɛya k’a fɔ o ye, a ma a dogo; a ko: «Kisibaga min layiri tara, ne tɛ o ye.» 21 O k’a ɲininka ko: «O tuma ele ye jɔntigi le ye? Cira Iliyaa wa?» A ko: «Ne tɛ Iliya ye.» O ko tuun ko: «Cira min ko fɔra, ele lo wa?» A ko: «Ɔn-ɔn.»
Ala ko tun bonyara mɔgɔw jusu ra wagati dɔ ra, Zuridɛn kɔba kɛnɛgbɛ ra, Yuhana Batizerikɛbaga ta waajuri kosɔn. Mɔgɔ waga caman le sɔnna ka sira cɛjugu dɔw tagama, ka bɔ kuruw sanfɛyɔrɔw ta maraw ra, ka jigi ka taga o ciraden kura ta kumaw lamɛn, ani ka batize a fɛ, janko ka o ta jurumunw yafa sɔrɔ. O mɔgɔw tun tɛ kolɔnbariw ye, i n’a fɔ yɛrɛwasobaga dɔw tun b’a miiri cogo min na tuma caman, nka Ala ko lɔgɔ le tun bɛ o ra, o tun bɛ Ala sago le ɲinina. Minw tun bɛ Ala sira tagama, mɔgɔw tun bɛ olugu lɔn joona joona o ta sebagaya ni a ta baraka sababu ra. O wagati ra mɔgɔw tun t’a fɛ ka landakow ni sariya ta cifɔninw ko mɛn tuun, nka o jusukun tun bɛ samana Ala yɛrɛ le nɔ fɛ.
Yahudiyaw ta kititigɛjɛnkuru mɔgɔw, minw tun bɛ Yahudiyaw ta diina kuntigiw bɛɛ kunna, olugu tun b’a kala ma ko Ala ko lɔgɔ tun bɛ mɔgɔw ra. O ra, o ka sarakalasebagaw ani Leviti dɔw fara ɲɔgɔn kan, ka olugu ci Yuhana fɛ; o mɔgɔw ta baara tun ye ka bɛganw faga ka o sarakaw lase Ala ma. O tun ka kan ka taga ɲininkari dɔw le lase Batizerikɛbaga ma, janko ni Ala tɔgɔcɛnkuma dɔ bɔra a da ra, o ye a faga sababu sɔrɔ.
Batizerikɛbaga ni kititigɛjɛnkuru ta ciradenw tun bɛna o kuma min kɛ, o ko tun bɔra fagamaw le ra, ani farati fana tun b’a ra. Kibarodiman sɛbɛbaga b’a fɔ ko Yahudiyaw tun lo. O tɔgɔ ye a ta kibarodiman karankun dɔ ye. Sabu o wagati ra Yahudiyaw tun ka Sariya ko mina k’a gbɛlɛya kosɛbɛ, k’a ko kɛ damatɛmɛ, ni ɲangboya ye; Zeruzalɛmu dugu fana tun bɛna kɛ Kirisita ta kow sɔsɔyɔrɔba ye. Layirikɔrɔ sira tagamabagaw bɛɛ le ma wuri Kirisita kama, nka sarakalasebagaw lo; Farisiw ta yɛrɛ le juguyara kosɛbɛ; ni karan min o min tun ma bɛn ni olugu ta miiriya ye Ala ko fan fɛ, ni o karan dibaga ma sɔn o ta ma, o tun bɛ wuri o kama. O kosɔn o k’a latigɛ ka taga Batizerikɛbaga mina o ta jan na ni o ta ɲininkariw ye.
Ka o to jama ra, jama bɛ o lamɛnna, o ka Yuhana ɲininka ko: «Ele ye jɔn le ye ? Jɔn le ka yɔrɔ di i ma ko i ye kuma ? Yala ele ka Sariya karan ka Ala ko lɔn wa ? Ele b’i yɛrɛ jate Ala ta cira dɔ le ye wa, walama Masiya yɛrɛ ? »
Yuhana jijara k’a yɛrɛ mabɔ o ta jan na, nka a fana ma faniŋa fɔ. Ni a tun k’a fɔ ko « ne ye Masiya ye », o tuma o tun bɛna kuma ben a kan k’a bon ni kabakuru ye ; Ni a tun k’a fɔ fana ko « Ne tɛ Masiya ye », jama tun bɛna bɔ a kɔ, o tun tɛna a ta kow si jate tuun. O wagati ra, Iburahima ta durujaw, yahudiyaw tun sɛgɛra Rɔmukaw ta fanga kɔrɔ. O kɔrɔtɔninba tun bɛ Kisibaga dɔ le makɔnɔna min tun bɛna o bɔsi ka bɔ Rɔmukaw ta fanga kɔrɔ.
Batizerikɛbaga k’a gbɛya k’a fɔ bɛɛ ɲana ko ale tɛ Kirisita ye, ale tɛ Ala dencɛ ye fana. A ma sɔn ka tɔgɔ dɔ la a yɛrɛ ra min tɛ bɛn ni Nin Saninman sago ye. A k’a latigɛ ko a bɛ a yɛrɛ majigi ka kɛ kankelentigi ye, sabu a lara a ra ko a ka kuma min lase mɔgɔw ma, ko Ala bɛna o can yira a wagati ra.
Yahudiyaw ta ciradenw ta ɲininkariw tun ma dan o ma; o ko : «Yala ele le ye Iliyahu ye wa ?». O tɔgɔ bɛ ɲasin Ala ta layiri dɔ ma, min bɛ sɔrɔ Malaki 4:5 ra, ani min b’a fɔ ko sani Masiya ye na, cira dɔ bɛna na, min ta hakiri ni a ta sebagaya bɛna kɛ i ko ciraba Iliyahu ta. Cira Iliyahu le tun ka tasuma lajigi ka bɔ sankolo ra k’a bɔn a juguw kan, ani ka su dɔ lakunu ka kaɲa ni Ala sago ye. Yahudiyaw bɛɛ tun b’a jate ko o cɛ barakaman tun ye o ta jamana ɲamɔgɔ dɔ le ye. Nka Yuhana k’a yɛrɛ majigi, hali k’a sɔrɔ can ra ale le tun ye o cira ye, min layiri tun tara ; Yesu yɛrɛ nana o le yira kɔ fɛ (Matiyu 11:14).
O kɔ, sarakalasebagaw ka Yuhana ɲininka ko yala ale le ye o cira ye wa, cira min layiri tun tara, ani Musa tun ka min ko fɔ, ko a bɛna kɛ i ko ale yɛrɛ, ka jɛnɲɔgɔnya kura ani jɛnɲɔgɔnya ba sigi (Sariya 18:15). O tun b’a fɛ k’a lɔn mɔgɔ min ka Yuhana ci ko a ye na kuma i ko cira, k’a lɔn a ta fanga tun bɔra yɔrɔ min, ni a kɛra ko a ta kuma tun bɔra Ala le ra, walama ni a tun bɔra a yɛrɛ le ra.
Ayiwa, Batizerikɛbaga banna, a ma sɔn ka Musa ta lɔyɔrɔ ta. A tun t’a fɛ ka layirikura sigi mɔgɔw ni Ala cɛ, k’a sɔrɔ Ala m’a ci o ra ; a tun t’a fɛ fana k’a yɛrɛ kɛ kɛrɛmasa ye, ka bla jama ɲa ko o bɛ taga o juguw kɛrɛ ka se sɔrɔ. O gbɛlɛyaw cɛma, a kɛra kankelentigi ye, a ma kɛ wasobaga ye ani yɛrɛbonyamɔgɔ. A ka mɔgɔw jaabi ni hakiritigiya ye, ka dan a ta kuma fɔta ma. Anw fana ye jija ka o sira ɲɔgɔn tagama an ta ɲanamanya ra.
DAARIKAN: Matigi Yesu, an b’i fɔ sabu i sɔnna ka Yunaha ci ka na an fɛ dunuɲa ra, ka kɛ mɔgɔ ye min majiginin tora tuma bɛɛ. Yafa an ma an ta yɛrɛbonya kosɔn, ni an b’a miiri ko an ka bon ani ko an ka fisa ni tɔw ye. An dɛmɛ an ye a faamu ko an ye baaradenw le ye, ko ele kelen le ka bon.
ƝININKARI:
- Yahudiyaw ta ɲamɔgɔbaw ta ciradenw ka ɲininkariw minw kɛ o kun tun ye mun le ye?