Previous Lesson -- Next Lesson
1. Kititigɛbagaw ta ciraden dɔw ka Batizerikɛbaga ɲininka (Yuhana 1:19-28)
YUHANA 1:25-28
25 O ka a ɲininka tuun ko: «Ayiwa, ni i tɛ Kisibaga ye, i tɛ Iliya ye, i fana tɛ Cira ye, o tuma mun kosɔn ele bɛ mɔgɔw batizera?» 26 Yuhana ko: «Ne bɛ mɔgɔw batize ji dama le ra; nka mɔgɔ dɔ wɛrɛ bɛ aw cɛ ra, aw ma o tigi lɔn. 27 Ale bɛna na ne kɔ fɛ; ne man kan hali k’a ta sanbara juru foni ka a bɔ a sen na.» 28 Ayiwa, o kow bɛɛ kɛra Betani, Zuridɛn ba kɔ fɛ; Yuhana tun bɛ mɔgɔw batizera o yɔrɔ le ra.
Yahudiyaw tun ka saninyari cogo lɔn, saninyari min bɛ kɛ ni ji ye, ka kɛ i ko batɛmu bisigi dɔ, ka kaɲa Layirikɔrɔ ta sariyaw ye. Yahudiyaw tun bɛ ji ta saninyariw kɛ janko ka o jusukun saninya kojuguw ma, nka batɛmu yɛrɛ tun bɛ kɛ janko ka siya wɛrɛw le saninya, sabu yahudiyaw tun b’a jate ko olugu saninyanin tɛ. O bɛɛ n’a ta ni mɔgɔ min tun ka sɔn ka batize, o tun b’a yira ko o tigi k’a yɛrɛ majigi Ala ɲa kɔrɔ, ani ko a kɛra Ala ta mɔgɔ dɔ ye.
Ayiwa, o ciraden minw tun bɔra Zeruzalɛmu o ko le tun ka olugu hakiri ɲagami. «Ala ta mɔgɔ minw kɛnɛsigira, min bɛ Ala ta jɛnɲɔgɔnya ra ka ban, mun kosɔn i bɛ olugu wele ko o ye nimisa o ta jurumunw na tuun ? O tuma i bɛ an jate ko anw ma saninya wa, ani ko an tununa Ala ta dimi kosɔn wa, anw minw ye jamana ɲamɔgɔw kuntigiw ye ?»
Yuhana ta batɛmu ko tun kɛra «Ala ɲasiranbaga dɔw» kunnacɛn sababu le ye. O ko tun ka mɔgɔw taran, ka o kɛ jɛnkuru fla ye. Minw tun nimisara o ta jurumunw na ka batize, ka saninya, olugu tun ye jɛnkuru fɔlɔ mɔgɔw ye. Olugu tun labɛnna, ka o yɛrɛ bla danna ka Kirisita makɔnɔ. Minw tun ma sɔn ka nimisa, ani o ma sɔn ka batize, sabu ko olugu labɛnnin lo ka ban ka Kirisita makɔnɔ, olugu tun ye jɛnkuru flanan mɔgɔw ye. Olugu fɛ, Kirisita bɛna na ka na jamana ɲamɔgɔya kow le yɛlɛma, ka fanga kuraw ani sariya kuraw sigi sen kan.
Sigiya t’a ra ko Kibarodiman sɛbɛbaga Yuhana tun bɛ nin ciraden fagamaw ta ɲininkariw kɛyɔrɔ ra. Nin sɔsɔriw tun ka Yuhana kabakoya; ciradenw ta ɲininkariw yɛrɛ ka Yuhana karan kosɛbɛ, sabu o ɲininkariw ta jaabiriw fɛ Yuhana k’a faamu ko Batizerikɛbaga tun tɛ Kirisita ye, ko a tun tɛ Iliya ye, walama cira min ko tun fora. K’a fɔ jama ye ko ale tɛ o mɔgɔw si ye, Batizerikɛbaga ma siran o maroya ɲa.
Batizerikɛbaga tun k’a ta baara kɛta lɔn minkɛ, o kosɔn a tun ka ciradenw jaabi ni yɛrɛmajigiya ye ko : «Jo bɛ aw fɛ, sabu ne tɛ mɔgɔba ye. Ne bɛ mɔgɔw batize ni ji dama le ye, dabari tɛ ne fɛ, se tɛ ne ye. Ne bɛ fɛn o fɛn kɛ o bɛɛ ye tagamasiyɛn le ye, janko ka nabaga ta sira labɛn.»
Ayiwa, o kɔ, Batizerikɛbaga wurira ka lɔ ni a ta ɲɔgɔmɛ derege ye a kan na, ka pɛrɛn ni kanba ye, ka sin ciradenw ni jama ma, ko : « Aw bɛɛ ye fiyentɔw le ye. Nin koba min bɛ kɛra aw cɛra bi, aw ma o kɔrɔ lɔn. Aw bɛ ne ta kow sɛgɛsɛgɛra, ne min tɛ foyi ye ni mɔgɔ gbansan tɛ. Nka aw y’a flɛ! Kirisita bɛ nana! A bɛ nin jama cɛ ra, nin jama min nana nimisa o ta jurumunw na. Ne Yuhana Batizerikɛbaga, se tɛ ne ye ka foyi kɛ. Cira le dira ne ma, ko ne ye a kɛ. Ne ye kumakan dɔ le ye, Nin Saninman fana ka Matigi nako wagati yira ne ra. A bɛ yan. Bi le ye kisiri sɔrɔlon ye. Aw ye nimisa sabu wagati bɛ tɛmɛna.»
Nin kumaw ka jama kabakoya kosɛbɛ. O tun lajɛnna janko ka Kirisita kunbɛn. Nka Kirisita tun nana ka ban, mɔgɔ si m’a kɔrɔsi, mɔgɔ si m’a ye. Jama ka o kumaw mɛn ninkɛ, o hakiri ɲagamina, o ka kɛ ɲɔgɔn flɛ ye, o kabakoyaninba.
O kɔ, Batizerikɛbaga ka Kirisita cogo yira tuun ni kuma barakaman dɔw ye, ka seereya dɔ fɔ, min belen tun gbɛyara ka tɛmɛ Yuhana ta seereya kan, Yuhana tun ka o seereya min fɔ k’a dogo dɔɔni hayan 15 ra : «Ne tun ka min ko fɔ ko a bɛna na ne kɔ fɛ, nka a bɛ ne ɲa». O cogo ra, a ka Kirisita ta alaya banbari le yira, ani a nana cogo min na ka na sigi adamadenw cɛ ra. A k’a yira mɔgɔw ra ko ka kaɲa ni a farikolo cogoya ye, Kirisita tun ye adamaden gbansan le ye o cɛ ra, lɔnbaga tɛ min fɛ, bonya si tɛ min kan, fani ɲuman tɛ a kan na, mɔgɔ si tɛ sama a nɔ fɛ a ɲadenw cɛɲa kosɔn. A tun bɛ i ko mɔgɔ tɔw bɛɛ, foyi tun tɛ a ni mɔgɔ tɔw bɔ ɲɔgɔn na. Nka ka kaɲa ni a ta cogo yɛrɛ ye, ale ni mɔgɔ tɔw si tun tɛ kelen ye: A tun bɛ yi wagati bɛɛ ani tuma bɛɛ, a bɔra sankolo ra, a ni a ta alaya, nka a tun bɛ mɔgɔw cɛ ra i ko mɔgɔ gbansan.
Batizerikɛbaga k’a fɔ mɔgɔ ɲana ko hali ka kɛ Kirisita ta jɔn ye, ale man kan ni o ye. Ka kaɲa ni o wagati cogo ye, lonan minw tun bɛ na so kɔnɔ, jɔnw le tun ka kan ka olugu senw ko. Nka batizerikɛbaga tun b’a jate ko hali ka Yesu ta sanbara juruw foni ka bɔ a senw na janko k’a senw ko, ko ale man kan ni o ye.
O kumaw ka jama hakiri ɲagami. O ka ɲɔgɔn ɲininka ko: «O lonancɛ bɛ min an cɛ ra ? Matigi bɛ se ka kɛ mɔgɔ gbansan ye cogo di ? Mun kosɔn Batizerikɛbaga ko hali k’a ta sanbara juruw foni ko ale man kan ni o ye ?» O kɔ, ciradenw sekɔra la taga Zeruzalɛmu, ka kɛ Yuhana Batizerikɛbaga lɔgɔbɔ ye. I b’a sɔrɔ ko Batizerikɛbaga ta karamɔgɔden dɔw fana gbanna o kɔ ka taga ka bɔ Batizerkɛbaga kɔrɔ. Olugu tun b’a miiri ko Kirisita bɛna a yɛrɛ yira jamana ta dububa le kɔnɔ, ni nɔɔrɔba ani bonyaba ye, ko a tɛna kɛ i ko kelennamɔgɔ, mɔgɔ gbansan, min bɛ yalayala kongokolon kɔnɔ. O ra, cogo min tun dira olugu ma ka Ala ta Kirisita sɔrɔ, o bɔnɔra o ra.
O kow kɛra Zuridɛn kɔ terebɔyanfan le ra, masacɛ Herodi Antipasi ta mara ra ; o yɔrɔ tun ka jan Yahudiyaw ta kititigɛjama ta yɔrɔ ra. O ra, ciradenw tun tɛ se ka Batizerikɛbaga mina ka taga ni a ye Zeruzalɛmu ko o bɛ taga kiti tigɛ a kan.
DAARIKAN: Matigi Yesu Kirisita, i ni ce, sabu i nana ka na se fɔ anw ma, ka kɛ adamaden ɲanaman ye, ani Ala banbari. An b’i bato ka i bonya. I ka i yɛrɛ majigi farikolo ta fan fɛ janko ni Batizerikɛbaga tɛ, mɔgɔ si kana se ka i lɔn. I majiginin lo, i jusukun sabarinin lo. An karan, an ye kɛ ele bɔɲɔgɔnko ye, ka tugu i kɔ, k’a to i ta Nin Saninman ye o sira yira an na.
ƝININKARI:
- Batizerikɛbaga ka seereya juma le kɛ Yesu ta ko ra Kititigɛjama ta ciradenw ɲa kɔrɔ, seereya min nafa ka bon ni a tɔ bɛɛ ye?