Previous Lesson -- Next Lesson
2. Batizerikɛbaga bɛ Kirisita ta sira labɛn (John 1:6-13)
YUHANA 1:6-8
6 Ala ka cɛ dɔ kɛ a ta ciraden ye, o cɛ tɔgɔ tun ye ko Yuhana. 7 A nana ka na seereya le kɛ, ka yeelen ko fɔ mɔgɔw ye, janko a ta kuma sababu ra bɛɛ ye la o yeelen ta ko ra. 8 Ale yɛrɛ tun tɛ yeelen ye, nka a nakun tun ye dɔrɔn ka na yeelen seereya kɛ mɔgɔw ye.
Ala ka Yuhana batizerikɛbaga ci dunuɲa kɔnɔ janko ka mɔgɔw wele ka na Ala ta yeelen manamanatɔ ra. An bɛɛ k’a lɔn ko jurumun caman bɛ dibi ra. Nka ni mɔgɔ min ka lɔ a ta kojuguw ra ka o fɔ Ala ye, ka nimisa ani k’a yɛrɛ majigi, o tigi bɛ na yeelen na. Aw ta cogo bɛ di ? Yala aw nana yeelen na wa, walama aw belen bɛ dogora dibi ra ?
Batizerikɛbaga ka adamaden jusukun cogo yira. Ka kaɲa ni Ala ta sariya ye adamadenw bɛɛ ka kojugu kɛ. O ka kan ka nimisa, ka o jogo yɛlɛma pewu, janko o kana taga halaki Matigi ta kiti lon na. Batizerikɛbaga min tun bɛ mɔgɔw welera kongokolon kɔnɔ ko o ye na nimisa, ale ta welekan donna jama caman jusukun na ; olugu teriyara ka taga a fɛ, ka taga lɔ o ta jurumunw na mɔgɔw ɲana, k’a to o ye o batize Zuridɛn kɔji ra, ka o kɛ o ta jurumunw kafari tagamasiyɛn ye, ka o ta natabayakow bɛɛ latunu baji ra, ka bɔ ji ra ka don ɲanamanya kura ra.
Ala ka Yuhana batizerikɛbaga ɲanawoloma. Ala k’a ta miiriya don a kɔnɔ, k’a ci ka taga mɔgɔw lana sira ɲuman kan, k’a to o ye o ta miiriyaw yɛlɛma, ka labɛn ka Kirisita nawagati makɔnɔ. Min bɛ na Matigi tɔgɔ ra, o ko tun fɔra Layirikɔrɔ ta mɔgɔw ye kosɛbɛ. Cira Ezayi k’a fɔ o tigi ta ko ra ko : « Mɔgɔ minw tun bɛ tagamana dibi ra, yeelenba bɔra olugu kan. Minw tun siginin bɛ saya jamana dibi ra, yeelen dɔ manamanana olugu kan » (Ezayi 9:1). A ka nin kuma fana fɔ Matigi tɔgɔ ra, ko : « Wuri ka manamana, sabu i ta yeelen nana; Matigi Ala ta nɔɔrɔ bɛna manamana i kan » (Ezayi 60:1). Batizerikɛbaga ka mɔgɔw karan ko yeelen nako dibi cɛma, ko o ma kɛ Layirikɔrɔ mɔgɔw dɔrɔn kosɔn, nka a nana adamadenw bɛɛ le kosɔn. O cogo ra Batizerikɛbaga ta waajuri tun ye dunuɲa bɛɛ lajɛnnin ta le ye ; Azi mara mɔgɔw ani kɔgɔjiba kɛrɛfɛyɔrɔ mɔgɔw tugura a ta karan kɔ san caman hali a sanin kɔ.
Mɔgɔ waga caman tugura Yuhana Batizerikɛbaga kɔ, hali k’a sɔrɔ a k’a fɔ k’a gbɛlɛya ko ale yɛrɛ le tɛ yeelen ye, ko ale ye kumalasebaga le ye, min cira ka bla yeelen ɲa fɛ. A tun tɛ mɔgɔw wele ka tugu a yɛrɛ kɔ, nka a tun bɛ o lataga Kirisita le kɔ. O le ye Ala ta ciraden sɔbɛw bɛɛ ta tagamasiyɛn ɲuman ye, ko o tɛ o ta karamɔgɔdenw nɔrɔ o yɛrɛ ra, nka o bɛ o lataga Kirisita kelenpe le fɛ.
Yuhana ta baara kun tun tɛ nimisari ni batɛmu ye, a kun tun ye lanaya ye, ko o ye la Kirisita ra. A tun k’a lɔn ko mɔgɔw tun b’a miirira ko ale yɛrɛ le bɛna kɛ Kirisita ye. Nka a ma sɔn k’a to o miiriya ye a kun mina ; a ka sira labɛn Matigi le ye. A tun k’a lɔn ko min tun bɛna na ko o bɛna mɔgɔw batize ni Nin Saninman ye. Yuhana tun k’a lɔn fana ko k’a fɔ i yɛrɛ kɔnɔ dɔrɔn ko i nimisara, ko o t’a bɔ fiyewu, hali ni o tigi batizera k’a ta jurumun yafa sɔrɔ. A tun k’a lɔn ko an bɛɛ mako bɛ min na, o ye ko an jusukun kɔnɔyɔrɔ le ye yɛlɛma pewu. Ala tun ka jusukun yɛlɛmari sebataya di a ma, k’a sɔrɔ o sebagaya tun ma di Layirikɔrɔ ta ciraw si ma. O setigiya tun blara ka n’a di yeelen tigi yɛrɛ le ma, min ye danbaga ye, kuma min bɛ ɲanamanya di, ka mɔgɔ cogo yɛlɛma ni a ta sebagaya ye, ni o tigi lara a tɔgɔ ra, k’a jusukun dayɛlɛ yeelen ye. O cogo ra, Yuhana ka mɔgɔ caman lana lanaya ra Kirisita fɛ, sabu a k’a lɔn ko lanaya dɔrɔn le bɛna o lataga yɔrɔ kura ra.
Apolɔsi tun ye cɛ hakiribatigi ye ani cɛ jijanin, min tun ka teri a ta kow fɛ. A tun tugura Yuhana ta karan le kɔ. A ka Kirisita ko fɔ mɔgɔw ye, k’a sɔrɔ a tun ma Layirikura ta yeelen sira lɔn fɔlɔ. Nka wakati min a k’a yɛrɛ di Kirisita ma, yeelen donna a jusukun na, ale yɛrɛ kɛra Matigi ta yeelen dɔ ye, min bɛ mana mɔgɔw ye dibi ra. A ka yeelen bɔ mɔgɔ caman ye (Kɛwalew 18:24-28).
DAARIKAN: E, Yesu, an b’i tɔgɔ tando, ka i fo, sabu ele le ye dunuɲa ta yeelen ye, ani dɛsɛbagatɔw jigi. I ka yeelen ladon an jusukunw ta dibi ra, ka an ta jurumunw bɔ kɛnɛ kan, ani ka o yafa an ma. I ni ce, sabu i ka an kɛ i ta yeelen denw ye, ka an bɔsi, janko an ye ɲanamanya banbari sɔrɔ. A to i ta yeelen ye manamana an teriw ni an ta somɔgɔw fana kan, janko o ye nimisari sɔbɛ sɔrɔ, ka don i ta yeelen ɲuman na lanaya sababu ra.
ƝININKARI:
- Yuhana Batizerikɛbaga ta baara kunbaw tun ye juman ye?