Previous Lesson -- Next Lesson
1. Kuma ta cogoya ani a ta baara sani a ye kɛ farisogo ye (Yuhana 1:1-5)
YUHANA 1:5
5 Yeelen bɛ manamana dibi ra, nka dibi ma sɔn a ma.
Ala ta ko bɛɛ ye yeelen ni saninmanya le ye. Ni a bɛ se yɔrɔ o yɔrɔ, dibi tɛ kɛ o yɔrɔ ra. Fɛn bɛɛ bɛ gbɛya, ka teren, ka kɛ can kan, ani saninmanya. Saninyabariya ko si tɛ se ka to ale kɔrɔ. Nin Saninman saninyanin lo, Matigi ta yeelen tɛ manamana ni fariya ye, nka a bɛ manamana ni jususuma le ye. A bɛ mɔgɔ jusu saro, k’a kɛnɛya.
Kirisita ta yeelen ta manamanaw tɛ to sankolo kɔnɔ dɔrɔn. A bɛ manamana ka dibi cɛci ka mɔgɔw kunmabɔ. K’a lɔn ko Kirisita ta yeelen bɛ manamana bi dibi cɛma o ye nɛɛma ɲumanba le ye. Kirisita tɛ ban mɔgɔ tununinw na, a bɛ o bɔsi le ka yeelen bɔ o ye.
An ka kan k’a lɔn ko dibirakow bɛ dunuɲa kɔnɔ, minw bɛ yeelen ta kow kɛrɛ. Dibi kɛra cogo min na ka na, an ma o lɔn. Kibarodiman sɛbɛbaga Yuhana ma o gundo ɲafɔ an ye. A b’a fɛ an ye se ka yeelen le lɔn, an kana to dibirakow sɛgɛsɛgɛri ra. Adamadenw bɛɛ ani danfɛnw bɛɛ benna dibi ra, ani dunuɲa bɛɛ lajɛnni bɛ kojugu ta fanga le kɔrɔ.
Aw bɛ se ka aw yɛrɛ ɲininka ko : Ni Kirisita ka dunuɲa dan, ale ni Ala ta jɛnɲɔgɔnya kɔnɔ, k’a kɛ fɛn ɲuman ye, o tuma dibirakow kɛra cogo di ka na don dunuɲa kɔnɔ ? Ni Ala ka adamaden dan ka kaɲa ni a yɛrɛ cogo ye, mun na anw bɛ ban Ala ta nɔɔrɔ ma bi ?
Yuhana tɛ Setana tɔgɔ fɔ, o Setana min banna ka Matigi Ala kan mina, k’a fɔ ko a bɛ Ala ta yeelen dufa. Setana bɛ Kirita kama tuma bɛɛ. O ra, yeelen min tun dira a ma, o yeelen bɔsira a ra. Yɛrɛbonya nana don Setana ra, a ka Ala to yi ko a bɛ bonya ɲini yɔrɔ wɛrɛ. A tun b’a fɛ k’a yɛrɛ bla Ala yɛrɛ san fɛ, fɔ ka se sɔrɔ Ala kan. O le kosɔn a kɛra dibirakow kuntigi ye.
Ne balemaw, aw ta ɲanamanya kun ye mun ye ? Yala aw bɛ bonya, ani tɔgɔtigiya, ani aw yɛrɛ ta wasa le ɲini, ka Ala to yi wa ? Ni a bɛ o cogo ra, o tuma minw bɛ dibi ra, aw fana kɛra olugu dɔ ye i n’a fɔ Mɔgɔjugu. Sabu Mɔgɔjugu ma to a kelen na, nka a ka mɔgɔ miliyɔn caman le sama ka olugu fara a yɛrɛ kan. Aw bɛ bɛn ni mɔgɔ minw ye siraw ra, aw ye o tigiw ɲada kɔrɔsi. Yala aw bɛ yeelen walama dibi le ye o ɲa ra wa ? Yala o jusukun cogo bɛ min yira o ye Ala ta ɲagari le ye wa, walama Setana ta ɲanasisi lo ?
Setana bɛ Ala kɔninya sabu Ala ta yeelen saninman bɛ kiti ben a kan. A t’a fɛ Ala ta yeelen ye ale ta juguya bɔ kɛnɛ kan. A bɛ to ka dogo, ka cogo ɲini ko a bɛ se sɔrɔ Kirisita kan ani minw bɛ tagama Kirisita ta yeelen na. Nin mɔgɔjanfabaga tɛ se ka lɔ Matigi ta yeelen na, ko kosɔn a bɛ o yeelen kɔninya. A bɛ a lawuri a kama k’a ɲada dogo, janko a ɲa kana yeelen ye. Min ye siranyako ye, o ye ko mɔgɔ miliyɔn caman bɛ yi, minw tɛ Kirisita ta tere yeelen ye, k’a sɔrɔ a bɛ manamana ka se fɔ o ta jurumunw dibi ma. An bɛɛ ka tere lɔn. Kun t’a ra ka o ɲafɔ. Tere bɛ yi, a bɛ yeelenba bɔ, a bɛ manamana k’a yeelen se yɔrɔ bɛɛ ra. An bɛɛ kelen kelen k’a lɔn ko tere ye ɲanamanya difɛn ye.
Cɛ caman ani muso caman tɛ se ka Kirisita ta nɔɔrɔ ni a ta sebagaya ye, sabu o t’a fɛ ka cogo ɲini k’a faamu. Adamadenw ta mɔgɔlafiri kumaw bɛ o mɔgɔw ɲaw fiyen, k’a kɛ i ko fani le birira o ɲada kan, k’a to o bɛ ban Kirisita ta alaya kibaroya kuma ta can ma. Can ra, o bɛ ban ka lɔ o yɛrɛ ta jurumunw na le. O t’a fɛ ka gbara yeelen na. Ka to dibi ra, o le ka di o ye. O tɛ sɔn ka o kɔ don o ta kɛwalew ra, ka lɔ o ta jurumunw na. O bɛ kɛ yɛrɛwasobagaw ye, ani yɛrɛbonyabaga. O ɲaw datugunin lo, o tɛ se ka Kirisita ta yeelen ta nɛɛma ye. Dibi bɛ Yeelen kɛrɛ, nka Yeelen bɛ dibi cɛci kanuya sababu ra. Ayiwa, aw bɛ a fan juman le ra ? Matigi ta yeelen na wa, walama Setana ta dibi ra ?
DAARIKAN: E Matigi, ele ye dunuɲa yeelen ye. Ne bɛ tugu i kɔ lanaya baraka ra i ta kanuya kosɔn. Ne tɛ tagama dibi ra, sabu ne ka ɲanamanya yeelen sɔrɔ. Ne bɛ i fo sabu i ma ne kelen to dibi siranya ra ani Ala ta dimi kɔrɔ, nka i ka ne wele ka na i ta yeelen manamanatɔ ra. Minw bɛ ne kɛrɛ fɛ, ni o tɛ yeri kɛ, k’a sɔrɔ i ta yeelen bɛ manamana ka o lamini, i ta yeelen bɔ olugu ye. Matigi, makari ne ra, i ye ne fa i ta yeelen na !
ƝININKARI:
- Yeelen ni dibi ta faranfasi ye juman ye, Ala lɔnniya ta fan fɛ?
Mɔgɔ minw tun bɛ tagamana dibi ra, yeelenba bɔra olugu kan.
Minw tun siginin bɛ saya jamana dibi ra,
yeelen dɔ manamanana olugu kan.
(Ezayi 9:2)