Previous Lesson -- Next Lesson
2. Batizerikɛbaga bɛ Kirisita ta sira labɛn (John 1:6-13)
YUHANA 1:11-13
11 A nana a yɛrɛ ta mɔgɔw fɛ, nka a ta mɔgɔw ma sɔn a ra. 12 Nka mɔgɔ minw sɔnna a ra, a ka olugu kɛ Ala denw ye. 13 O ma o Aladenya sɔrɔ i ko adamaden bɛ woro cogo min na; adamaden sago tɛ, mɔgɔ si sago tɛ, nka Ala yɛrɛ sago lo.
Layirikɔrɔ ta mɔgɔw tun kɛra Ala ta mɔgɔw ye, sabu Matigi Ala tun ka o siya jurumuntɔw saninya, ka jɛnɲɔgɔnya don ni o ye. A ka o ɲamina fɔ san caman. A ka o jusukun labɛn ni sariya ta ciw ye, janko ka o labɛn ka sɔn Kibarodiman ma. O cogo ra, Iburahima ta duruja ta kow bɛɛ tun ɲasinna Kirisita nako le ma. A nako tun ye Layirikɔrɔ sɛbɛkun ni a labankan ye.
Nin ye kabako ye, k’a ye ko minw tun ɲanawolomara janko ka Matigi Yesu ladon, ko olugu yɛrɛ banna a ra, o m’a ta yeelen sɔrɔ. Ka ɲanamanya sariya ta dibi ra, o le diyara o ye, fɔ o bɛ o sen teriya ka taga Ala ta kiti fɛ. O ka o yɛrɛ bɔnɔ Ala ta nɛɛma ra pewu, ka o yɛrɛ ta kɛwalew ko diya o ye, ka tɛmɛ Kirisita ta kisiri kan. O ma nimisa, nka o ka o jusukun gbɛlɛya ka ban can sira ma.
Layirikɔrɔ ta mɔgɔw dɔrɔn le tun ma kɛ Ala ta mɔgɔw ye, nka adamadenw bɛɛ lo, sabu Sebɛɛtigi Ala ka farakuruw dan, ani yiriw, ani bɛganw, ani adamadenw bɛɛ. O kosɔn Layirikɔrɔ ta mɔgɔw ka min kɛ, dunuɲa mɔgɔw bɛɛ sen bɛ o ra fana. An danbaga ni an Matigi b’a fɛ ka don an jusukun na ani an ta sow kɔnɔ ; Jɔn bɛna a ladon ? Aw ye Ala ta le ye. Yala aw ka aw yɛrɛ bla Matigi ye wa ? Bi, min ye kojugu ye, o ye ko siyaw fanba tɛ sɔn ka o jusukun dayɛlɛ Kirisita ta yeelen ye. O t’a fɛ ka sɔn o yeelen ma, k’a to a ye o ta dibi ban. O bɛ ban Ala Dencɛ ra tuun.
Iburahima ta duruja min o min, walama adamaden min o min bɛ a jusukun dayɛlɛ Kirisita ye, k’a yɛrɛ to Kisibaga barakaman boro, o tigi bɛ kabakoba dɔ ye a ta ɲanamanya ra. Sabu sankolo yeelen bɛna Ala ta yeelen bɔ a ye, ka se sɔrɔ a jusukun ta dibi bɛɛ kan. Ka fara o kan, Ala ta sebagaya bɛna don a jusukun na, k’a kɛ danfɛn kura ye. Kirisita bɛ an bɔsi jurumun ta jɔnya ma. A bɛ an kɛ Ala ta denw ye ka an kɛ an yɛrɛ ta ye. Ni aw bɛ Kirisita kanu, o tuma Nin Saninman bɛna sigi aw kɔnɔ, ka kisiri baara damina aw ta ɲanamanya ra.
O bɛɛ n’a ta, Kibarodiman sɛbɛbaga m’a fɔ ko an bɛna kɛ, walama ko an kɛra Ala denw ye, nka a ko an bɛ kɛ Ala denw ye ni an bɛ mɔ lanaya ra. Faranfasiba bɛ ni kumaw cɛ, sabu ni mɔgɔ min lara Kirisita ra, o tigi bɛ don ɲanamanaya kura le ra. O wagati kelen na a bɛ to ka baraka sɔrɔ, ka mɔ lanaya ra fɔ ka taga dafa a ni Ala jɛnɲɔgɔnya ta fan fɛ. Matigi ta sebagaya ka an kɛ danfɛn kura ye, a fana bɛ to ka an saninya, ka to ka an ta lanaya baraka bonya.
An ma kɛ Ala denw ye ko sabu Ala sɔnna an ma dɔrɔn, nka an kɛra Ala denw ye k’a kɛ i n’a fɔ an bangera le Ala fɛ. Kirisita Nin bɛ min don a jusukun na, o bɛ an fa Matigi ta sebagaya ra. O sebagaya min kɛra lanabagaw kan ten, o sababu ra nin dunuɲa ta fanga, ani wagati laban ta fanga, o si tɛ se ka lanabaga bari ka fa Ala ta lɔnniyaw ra. Kirisita le ye lanaya daminabaga ye, ale le ye a dafabaga ye fana.
An tɛ se ka Ala denw suma ni dunuɲa ta mɔgɔw ye. Adamaden bɛɛ bangera a facɛ ni a bamuso le sababu ra, ka kaɲa ni bangebagaw sago ye, walama cogo wɛrɛ ra. A bɛ se ka kɛ ko bangebagaw ka Ala daari ɲɔgɔn fɛ, ka sɔn Nin Saninman sago ma. Nka an bɛ fɛn o fɛn sɔrɔ cɛn ye an bangebagaw fɛ, farisogo walama jusukun, walama nin ta fan fɛ, o ni an ta bangeko kura min bɛ bɔ Ala ra, o tɛ fɛn kelen ye. Sabu an bɛ jusukun kura min sɔrɔ ka kɛ danfɛn kura ye nin ta fan fɛ, o saninyanin lo kabini a damina, ani o bɔra Ala yɛrɛ le ra, sabu lanabaga bɛɛ bangera kokura Ala yɛrɛ le sababu ra. Ala le ye an Fa yɛrɛ ye nin ta fan fɛ.
Den si tɛ se k’a yɛrɛ bange, ka woro a yɛrɛ ma. Dɔ le b’a woro le. O cogo kelen na an ta nin ta bangeko kura ye Ala ta nɛɛma dɔrɔn le ye. Kirisita bɛ Kibarodiman siman dan an jusukun na. Ni o siman diyara min ye, o tigi bɛ sɔn a ma, k’a mara. Ala ta ɲanamanya banbari bɛna bonya a kɔnɔ. Minw bɛ Ala ta kuma mɛn, k’a mara, olugu t’a ɲana.
Ka woro lanabaga gba dɔ kɔnɔ, walama ka kɛ lanabaga jɛnkuru dɔ ta mɔgɔ ye, o tɛ se ka an kɛ Ala denw ye, fɔ lanaya ye kɛ an fɛ, an ye la Kirisita tɔgɔ ra. O lanaya kɔrɔ ye ko an ka kan ka gbara Kirisita ra, k’a ta cogo ɲumanw ɲini, k’a ta sabari faamu, ka an yɛrɛ to a ta sebagaya boro, ani ka baraka sɔrɔ o ra. An bɛ se ka baraka sɔrɔ ni an bɛ an yɛrɛ to a boro, ka la a ra ko a bɛ an kisi, ka an yɛlɛma ka an kɛ i ko ale yɛrɛ. Lanaya Kirisita ra, o ye bɛn sɔbɛ le ye, ani jɛnɲɔgɔnya banbari an ni ale cɛ. O jusukun ta bangeko kura, o tɛ se ka kɛ an kɔnɔ ni o lanaya tɛ fɛ. An tɛ se k’a fɔ ko bangeko kura ka bon, walama ko a ka gbɛlɛn ka tɛmɛ lanaya kan, walama ko lanaya ka nɔgɔn ka tɛmɛ bangeko kura kan. O fla bɛɛ ka kan.
Fɔ ka na se nin yɔrɔ ra, kibarodiman sɛbɛbaga Yuhana ma Yesu Kirisita tɔgɔ fɔ fɔlɔ. A ka Kirisita cogo le sɛbɛ k’a yira siya wɛrɛw ta lanabagaw ra ni kumakan dɔw ye, minw bɛ bɛn ni olugu yɛrɛ ta miiriyaw cogo ye. Kɔrɔ wɔɔrɔ minw bɛ Kirisita ta yiracogow ra, kibarodimman sɛbɛbaga kɔnna ka o minw yira an na, yala aw ka o faamu wa ? Yala aw ka aw jusukun dayɛlɛ janko ka Kirisita yiracogow ta sebagaya sɔrɔ wa ? Ni aw ka o kɛ, o tuma aw bɛna kɛ Ala den sɔbɛ dɔ ye !
DAARIKAN: Matigi Yesu, ne bɛ ne yɛrɛ majigi i ɲa kɔrɔ. Ne bɛ i kanu, ne bɛ ne jusukun dayɛlɛ i ye. I nana ne fɛ hali ne jurumuntɔ, ka ne saninya ka bɔ ne ta hakɛw bɛɛ ra. E, Matigi, ne bɛ ne jusukun bɛɛ dayɛlɛ i ye. Na sigi ne jusukun na i ta Nin Saninman baraka ra.
ƝININKARI:
- Minw sɔnna Kirisita ma mun le bɛ kɛ olugu ra?