Previous Lesson -- Next Lesson
c) Gbengbenyiri ye bangekokura dafasababu ye (Yuhana 3:14–16)
YUHANA 3:14-16
14 Ayiwa, cira Musa ka sa siranɛgɛraman kɔrɔta cogo min na kongokolon kɔnɔ, jagboya lo ko Min kɛra Adamaden ye, o fana ye kɔrɔta o cogo raa, 15 janko ni mɔgɔ o mɔgɔ ka la a ra, o tigi ye ɲanamanya banbari sɔrɔ. 16 Sabu Ala ka dunuɲamɔgɔw kanu haali fɔ Den kelenpe min bɔra Ala ra, a ka o di ka a kɛ saraka ye, janko ni mɔgɔ o mɔgɔ ka la o ra, o tigi kana halaki, nka o tigi ye ɲanamanya banbari sɔrɔ.
Yesu tagara ɲa karan na ni Nikodɛmu ye, k’a yira a ra ko nin ta bangeko tɛ se ka dafa ni mɔgɔ ma nimisa a ta jurumuuw na ni a jusukun bɛɛ ye, k’a ta miiriya yɛlɛma, ani ka la a ra ko Kirisita sara adamadenw nɔ ra. Yesu ka o cogow ɲafɔ Nikodɛmu ye ni Izirayɛlimɔgɔw ta kokɛnin dɔ ye fɔlɔ fɔlɔ.
Ka Izirayɛlimɔgɔw to Sinayi kongokolon kɔnɔ, o ŋunuŋununa ka kuma juguw fɔ Ala ma, ka muruti ko o tɛ sɔn Ala ta ma (Jateri 21:4-9). Ala ka sajugu dɔw bla ka na o kin, fɔ ka mɔgɔ caman faga o cɛ ra, ka o kɛ o ta kunkologbɛlɛya sara ye.
A kɛra ten minkɛ, dɔw lɔra o ta jurumun, ka Musa daari ko a ye Ala daari, janko a ye o saw mabɔ jama ra. Ala k’a fɔ Musa ye ko a ye sa dɔ lalaga ni siranɛgɛ ye, ka o kɛ Ala ta kiti tagamasiyɛn ye. Musa ka o sa lalaga ka o dulon bere dɔ ra, k’a kɔrɔta san fɛ jama cɛ ra, k’a yira o ra ko Ala ta dimi banna. Ni mɔgɔ min tun ka o tagamasiyɛn flɛ, min tun ye Ala ta kiti banko tagamasiyɛn ye, ka la Ala ta nɛɛma ra, o tigi tun bɛ kɛnɛya, ka kisi saw ta baga ta saya ma.
Kabini Awa ta kɔrɔbɔri wagati ra, sa kɛra kojugu tagamasiyɛn le ye. Yesu nana tuma min na, a ka adamadenw ta jurumun doni ta. O cogo ra, Kirisita min ma jurumun si kɛ ka ye, ale blara jurumunkɛbagaw nɔ ra anw kosɔn. Yesu bɛ i ko nin sa siranɛgɛraman, baga tɛ min na, jurumun si tɛ a ra fana, nka a ka an ta jurumunw doni le ta.
Ala Dencɛ ma na dugukolo kan ni cɛɲaba ye, nka a majiginin le nana, i ko den min bɔra Ala ra; a jusukun tɔɔrɔra, ani dimi k’a sɔrɔ, sabu sariya ta danga benna a kan. A kɛra adamaden ye minkɛ, o kosɔn a sera ka sa an nɔ ra. Ka wele ko Den min bɔra Ala ra, o tun ye lɔyɔrɔba ye ale fɛ. O siranɛgɛsa min tun dulonna bere ra o tun ye Ala ta dimi banko tagamasiyɛn ye cogo min na, o cogo kelen na Kirisita gbengbenna yiri ra minkɛ, o fana ye Ala ta dimi banko tagamasiyɛn ye. Ala ka an ta jurumunw bɛɛ bla a Dencɛ kan, janko ka an bɔsi a ta tɔɔrɔ sababu ra.
Ni sa tun ka mɔgɔ min kin, ni o tigi tun k’a ɲa kɔrɔta ka siranɛgɛsa flɛ, ka la Ala ta layiri tanin ra, o tigi tun bɛ kɛnɛya. Ka la o nɛɛma tagamasiyɛn ra, o le tun bɛ o lanamɔgɔ ɲanamanya, ani k’a nin kisi. Ni mɔgɔ min ka gbengbenyiri flɛ, ani ka nɔrɔ gbengbenyiri tigi ra, o tigi bɛ ɲanamanya banbari sɔrɔ. Pɔli k’a sɛbɛ ko: «Ne ni Kirisita gbengbenna yiri ra ɲɔgɔn fɛ. Ne tɛ ɲanamanya ne yɛrɛ sago ma, nka Kirisita le bɛ ɲanamanya ne kɔnɔ.» (Galasikaw 2:20). Kirisita ta saya ye ne ta saya le ye, a ta ɲanamanya ye ne ta ɲanamanya le ye. Ni mɔgɔ o mɔgɔ ka sɔn ko Kirisita sara ale nɔ ra, o tigi bɛ jate mɔgɔ terennnin ye, a bɛ tɔ ni Kirisita ye tuma bɛɛ. O jɛnɲɔgɔnya sababu ra ale fana bɛna kunu i ko Kirisita kununa cogo min na.
Ala ta kiti bɛnna an bɛɛ kan, nka ni an bɛ Yesu flɛ, o bɛ an kisi. A bɛ bangekokura di an ma. Sira wɛrɛ tɛ yi min bɛ an lataga Ala fɛ, mafɔ ni an ka tɛmɛ gbengbenyiri tigi fɛ. O kosɔn Setana bɛ nin ko fla kɛrɛ kosɛbɛ, minw ye kisiri sɔrɔsababu fla: O kow ye Kirisita ta aladenya ye, ani Kirisita gbengben yiri ra ko. Dunuɲa ta kisiri ju sigira o ko fla le kan.
Ala ye kanuyatigi Ala ye; a ta makari bonya bɛ i ko kɔgɔjiba, dan tɛ min na. A ta kanuya kosɔn, a ma ban an dunuɲamɔgɔw ra, an mɔgɔ banninw, nka halii bi, a belen bɛ an kanu. A tɛ ban an jurumunkɛbaga mɔgɔ murutiniw na, nka a bɛ hina an na. Ala ta terenniya tun bɛ fɛn o fɛn ɲini, a Dencɛ ta saraka ka o bɛɛ kɛ k’a dafa jurumunkɛbagaw ta kisiri kama. Kisiri tɛ sɔrɔ Dencɛ kɔ.
Ne balema, yala ele bɛ sɔn ka i ta wari dɔɔni kɛ saraka ye janko ka i teri dɔ kisi wa? Yala i bɛ sɔn ka taga kaso ra i teri dɔ nɔ ra wa? I bɛ sɔn ka sa a nɔ ra wa? O bɛ se ka kɛ, ni a kɛra ko ni i teri ko ka di i ye. Nka ni i jugu dɔ lo, ne ma la ra ko i bɛna sɔn ka o kɛ a ye. O le bɛ Ala ta kanuya bonya yira an na, sabu ale bɛ a Dencɛ kɛ saraka ye mɔgɔfagabagaw kosɔn, janko ka o kisi.
Kirisita ka dunuɲa ta kisiri ko ɲanabɔ k’a dafa gbengbenyiri kan. An bɛɛ mako bɛ a ta saraka ra, ni an kɛra mɔgɔ karannin ye, walama mɔgɔ karanbari, ni an kɛra mɔgɔbonyabaga ye walama mɔgɔ marobari, ni an kɛra naforotigi ye walama fagantan, ni an kɛra mɔgɔɲuman ye walama mɔgɔkolon. Mɔgɔ si tɛ yi min tɛrɛnnin lo. Kirisita ka bɛn ladon dunuɲamɔgɔw ni a Fa Ala cɛ.
Nin ye kabako dɔ ye, ko mɔgɔw tɛ nin can faamuna, mafɔ mɔgɔ minw sɔnna ka la gbengenyiri tigi ra. Aw bɛ sɔn ka aw jigi la Kisibaga kan cogo min na, o le bɛ aw ta kisiri ko latigɛ. Ni lanaya tɛ aw fɛ, o tuma aw bɛ to Ala ta dimi kɔrɔ. Aw ta kɛwalew bɛɛ bɛ jate i ko kɛwale terenbariw, ani kɛwalejuguw, Ala ta saninmanya ta yeelen ɲa kɔrɔ. Nikodɔmu, ale karamɔgɔba, min tun bɛ sariya sira tagama, ani a terennin lo, ale ka nin kumaw lamɛn, nka o kumaw digira a ra fana.
Ni mɔgɔ o mɔgɔ ka sɔn gbengbenyiri ta kisiri sira ma, Dencɛ min kɔrɔtara k’a gbengben o maroya yiri kan, o tigi bɛ ɲanamanya, foyi tɛna sɔrɔ ale ta sira kan tuun, min bɛ ale ni Ala ta jɛnɲɔgɔnya bari. Yala aw bɛ Ala fo aw ta jurumun yafa kosɔn wa? Yala Aw bɛ aw yɛrɛ dira a ta baara ma wa?
Ni mɔgɔ min ka la Kirisita ra o tigi bɛ ɲanamanya; ni mɔgɔ min ka to Kirisita ta jɛnɲɔgɔnya ra, o tigi tɛna sa k’a ye. Ni mɔgɔ nin k’a ɲa lɔnnin to Kirisita ra, o tigi bɛ ɲanamanya banbari jigiya sɔrɔ. Lanaya bɛ kɛ sababu ye k’a to an b’a lɔn ko Nin Saninman bɛ an kɔnɔ. Hayan 14 ka se 16 ma, o hayanw bɛ min fɔ, ani a kɔrɔ ye min ye, ni aw ka se ka o kɔrɔ faamu ka se yɔrɔjan, o tuma aw bɛna kibarodiman fɔkun yɛrɛ sɔrɔ o kumakun kelen na.
DAARIKAN: An Fa min bɛ sankolo ra, an bɛ i bato i ta kanuya banbari kosɔn. I ka i Dencɛ kelenpe di ka sa an nɔ ra. A ka an ta jurumunw doni ta, ani tɔɔrɔ min tun ka kan ka se an ma an ta jurumun kosɔn, ka an bɔsi i ta dimi ma. An bɛ gbengbenyiri flɛ, ni lanaya ye, ani ka i bato, ka i waleɲumanlɔn. I ka an ta jurumunw yafa an ma, ka bɛn don i ni dunuɲamɔgɔw bɛɛ cɛ. An dɛmɛ janko an ye se ka o kibaroya fɔ mɔgɔ tɔw ye, janko olugu fana ye se ka ɲanamanya banbari sɔrɔ an ta seereya sababu ra.
ƝININKARI:
- Mun le ka Kirisita ni siranɛgɛsa bɔ ɲɔgɔn fɛ?