Previous Lesson -- Next Lesson
d) Ka ban Kirisita ra o bɛ an lataga Ala ta kiti ra (Yuhana 3:17-21)
YUHANA 3:17-21
17 Den min bɔra Ala ra, Ala ma o ci dunuɲa ra ka na kiti ben mɔgɔw kan, nka a ka a ci le, janko dunuɲamɔgɔw ye kisi a sababu ra. 18 «Ni mɔgɔ min ka la a ra, Ala tɛna kiti ben o tigi kan; nka ni mɔgɔ min ma la a ra, kiti benna o tigi kan ka ban, sabu Den kelenpe min bɔra Ala ra, a ma la o ra. 19 O kiti kun le ye nin ye: Ala ta yeelen nana dunuɲa ra, nka dibi diyara mɔgɔw ye ka tɛmɛ yeelen kan, sabu o ta kɛwalew ka jugu. 20 Sabu mɔgɔ o mɔgɔ bɛ kojugu kɛ, o bɛ yeelen kɔninya le; a tɛ sɔn ka bɔ kɛnɛ kan fana, sabu a bɛ siran ko mɔgɔw kana na bɔ a ta kɛwalejuguw kɔrɔ ma. 21 Nka mɔgɔ min bɛ can kan, o tigi bɛ a ta kow kɛ kɛnɛ kan, janko bɛɛ ye a ye ka a lɔn ko a bɛ tagama Ala ta sira le kan.»
Yuhana Batizerikɛbaga ka Masiya min ko fɔ, o Masiya tun bɛna kiti le ben mɔgɔw kan, ka yiri cɛjuguw tigɛ ka bɔ a ta jamana kɔnɔ. Yesu k’a fɔ Nikodɛmu ye ko a tɛna jɛni tasuma ra, ko nka a ka kan ka sɔn kisiri ma. An Kisibaga bɛ hina. Batizerikɛbaga nana o gundo faamu tuma min na, ko Kirisita bɛna sa an nɔ ra, ka an ta jurumun kafari, a ka Yesu wele ko Ala ta Sagaden.
Ala ta kanuya kosɔn, a ka a Dencɛ ci ka na dunuɲa ra; nka a m’a ci Yahudiyaw dama ma dɛ, a k’a ci dunuɲamɔgɔw bɛɛ le ma. Ni a fɔra ko «dunuɲa», o kuma fɔra siɲaga saba hayan 17 wa. O kuma digira Yahudiyaw, sabu olugu tun bɛ siya wɛrɛ mɔgɔw mina i ko wuruw. Ala tun bɛ siya tɔw kanu i ko a tun bɛ Iburahima ta duruja kanu cogo min na. Adamaden bɛɛ ka kan ni Ala ta tigi le ye. Nka o bɛɛ n’a ta Yesu ma na janko ka na kiti ben mɔgɔw kan, nka a nana ka na mɔgɔw kisi le. Kabini a damina, tagamasiyɛn min fɔra sa ta ko ra, Yesu ka o dafa, ko a bɛna kɔrɔta gbengbenyiri kan, ka lɔ ni Ala ta kiti ye, kiti min tun ka kan ka ben adamadenw kan. Siya woloma tɛ Ala ta kanuya ra, o kanuya bɛ siyaw bɛɛ mina cogo kelen na.
Ayiwa, sisan Kirisita bɛ ko dɔ fɔ, min bɛ bara an na: «Ni mɔgɔ min ka la Dencɛ ra, Ala tɛna kiti ben o tigi kan tuun.» O cogo ra, Ala ta kitilon ta siranya bɛɛ banna o tigi fɛ. An tun ka kan ni saya min ye, ni an ka la Kirisita ra, an ta lanaya bɛ an bɔsi o saya ma. Ni i ka i yɛrɛ karifa Yesu ma, i bɛ bɔsi Ala ta kiti ma.
Ni mɔgɔ min ka ban Kirisita ta kisiri ma, k’a miiri ko ale mako tɛ o kisiri ra, o tigi bɛ i ko fiyentɔ, mɔgɔ hakirintan lo, a fana k’a yɛrɛ faran ka bɔ Kirisita ta nɛɛma ra. Ni mɔgɔ min ma Kirisita ta sebagaya mina ko ɲa, o tigi bɛ a yɛrɛ bɔnɔ Nin Saninman ta yeelen manamanatɔ ra. Ni mɔgɔ min ka Kirisita ta saya ko mafiyɛnya, walama ka ban a ra, a kɛra i n’a fɔ o tigi murutira Ala le ma, k’a yɛrɛ ta terenniya sira ɲini a yɛrɛ ye. Ala tɛ sɔn o tigi ta kɛwalew si ma, sabu a ka Ala ta bonya le mafiyɛnya.
Fɛn min b’a to dɔw bɛ ban kisiri ma, Yesu bɛ o ɲafɔ an ye: jurumun ka di o ye ka tɛmɛ Ala ta terenniya kan, Kirisita min ye dunuɲa ta yeelen ye, o bɛ kɔsegi, ka o yɛrɛ mabɔ o yeelen na. O bɛ nɔrɔ o ta jurumunw na. Kirisita ka an jusukun cogoya lɔn, ani an ta miiriyajuguw bɔyɔrɔ. Mɔgɔ si tɛ se k’a latigɛ ka kɛ mɔgɔɲuman ye a yɛrɛ sago ma. An ta miiriyaw, ani an ta kumacogow, ani an ta kɛwalew, o bɛɛ ka jugu wagati bɛɛ, kabini an worolon. Nin kumaw digira Nikodɛmu na, sabu Kirisita tun k’a ta kumaw damina ni kumadimanw ye fɔlɔ, janko ka Nikodɛmu ta yɛrɛbonya bɛɛ ban, ani k’a to a ye nimisa.
Yesu ka dɔ fara a ta kuma kan, k’a fɔ ko ni mɔgɔ min ma la ale ra, ko o tigi bɛ kojugu le kanu, a bɛ koɲuman kɔniya, a bɛ nɔrɔ a ta jurumun na. Mɔgɔ caman le kɛra flankafuw ye, sabu o bɛ o yɛrɛ kɛ Ala ɲasiranbagaw ye, ka yɛrɛko misɛnw kɛ mɔgɔw ɲa kɔrɔ janko ka o ta jurumunw dogo. O bɛ Kirisita kɔniya, o tɛ bɔ a kala ma, walama o bɛ a lawuri a kama. Yala aw lɔra aw ta jurumunw na ka o fɔ Kirisita ye wa? Ni aw ma lɔ aw ta jurumunw na ka o fɔ Kirisita ye, o tuma aw tɛna se ka bange kokura. Aw ye aw jusukun dayɛlɛ ka Ala ta yeelen sɔrɔ, janko aw ye saninya; Ni an ka la Ala ta Sagaden na, o bɛ an saninya. O ra, aw ye aw yɛrɛ majigi, ka lɔ aw ta kojuguw ra Ala ɲa kɔrɔ, ka aw jigi la a kan, janko aw ye ɲanamanya wagati bɛɛ.
Ka an ta lanaya waleya, o kɔrɔ ye ka koɲuman kɛ. Ka teriya ka sɔn Ala ta can ma, o le b’a to an jusukun bɛ yɛlɛma. Ni Kirisita ta can ka sigiyɔrɔ sɔrɔ mɔgɔ o mɔgɔ kɔnɔ, ni a ma dan miiriya dɔrɔn ma, nka ni ni a kɛra ni a jusukun bɛɛ ye, o tigi jusukun bɛ yɛlɛma. Faniɲafɔbagaw bɛ yɛɛlɛma ka kɛ kankelentigiw ye, nanbaratɔw bɛ kɛ mɔgɔ terenninw ye, janfabagaw bɛ kɛ canfɔbagaw ye. Minw bangera kokura, olugu tun tɛ mɔgɔ ɲumanw ye kakɔrɔ, nka o lɔra o ta jurumunw na, ka Ala kankelentigi ta yafa sɔrɔ. Olugu ta saninyari daminana; Ala bɛ kanuya ta sebagaya di o ma, janko o ye se ka Ala ta Nin Saninman ta kɛwalew kɛ. Ala bɛ baara kɛ lanabagaw jusukun na Kirisita sababu ra, janko o ye se ka kɛwalew kɛ, kɛwale minw bɛ na ni hɛra ye.
An tɛ ban kɛwaleɲumanw ma, nka kɛwaleɲumanw tɛ bɔ an na, o bɛ bɔ Ala le ra. An tɛ an yɛrɛ bonya ko anw le sera ka kɛwaleɲumanw kɛ, Ala ta nɛɛma lo. O kɔrɔ ye ko an bɛ an kɔ don an yɛrɛ ta wasoya ra, min ju sigira an yɛrɛ ta natabayakow kan, ka an jusukun dayɛlɛ Ala ta terenninya ni a ta nɛɛma ye, min bɛ sɔrɔ Kirisita jori baraka ra. Mɔgɔ minw bɛɛ bangera kokura, ka to Kirisita ta jɛnɲɔgɔnya ra, olugu le bɛ Ala jusu diya. O ta dunuɲalatigɛ bɛɛ ra, o bɛ Ala waleɲumanlɔn a ta nɛɛma kosɔn. Bangekokura ni saninmanya, o ye bato ye, bato min ka di Ala ye.
DAARIKAN: Matigi Yesu, i ni ce, sabu i ka Ala ta kiti tɔɔrɔ sɔn mina an nɔ ra, o kiti min tɛna se an ma tuun, sabu an bɛ i ta jɛnɲɔgɔnya kɔnɔ lanaya sababu ra. I ka an bɔsi Ala ta dimi ma. An bɛ lɔ an ta jurumunw na i ɲa kɔrɔ; jurumun nege min bɛ to ka an sɔrɔ, o nege bɔ an na. Nin Saninman ta kɛwalew ladon an kɔnɔ, janko an ta ɲanamanya ye kɛ bato ye, bato min bɛ se Ala ma, Ala min ye an Fa ye sankolo ra.
ƝININKARI:
- Mun kosɔn lanabaga minw lara Kirisita ra olugu sen tɛ Ala ta kiti ra tuun?