Previous Lesson -- Next Lesson
a) Mɔgɔw nana Yesu fɛ (Yuhana 2:23-25)
YUHANA 2:23-25
23 Ayiwa, ka Yesu to Zeruzalɛmu, Jɔnyaban ɲanagbɛ ra, mɔgɔ caman lara a ra a ta tagamasiyɛn kɛninw kosɔn. 24 Nka Yesu tun ma la o ta lanaya ra, sabu a tun ka o bɛɛ jusukun lɔn. 25 A mako tun t’a ra fana ko mɔgɔ dɔ ye na dɔ ta koɲaw fɔ ale ye, sabu adamaden jusukun cogo ye min ye, a ka o lɔn.
Jama caman tun bɛ Zeruzalɛmu Jɔnyaban ɲanagbɛ kosɔn, sabu o yɔrɔ le tun ye Ala batoyɔrɔba ye. O tun bɛ o hakiri jigi Sagaden ta ko ra, min sababu ra o bɛmaw tun kisira Ala ta kiti ma; o tun bɛ jɛn ka o sarakasogow domu ɲɔgɔn fɛ.
Yesu, min ye Ala ta Sagaden ye, ale tun nana Zeruzalɛmu, ka na kabako caman kɛ, k’a ta kanuya ni a ta sebagaya yira. O kosɔn bɛɛ ta miiriya tun bɛ ale le kan, ani a tɔgɔ tun bɛ bɛɛ da ra fana; Mɔgɔw tun bɛ ŋunuŋununa ko : «Yala cira dɔ lo wa, walama Iliya min ka kan ka na Masiya ɲa ale lo wa, walama Masiya yɛrɛ lo?» A ta ko ka mɔgɔ caman kun mina, o lara a ra, ko can ra a bɔra Ala le ra.
Nka min tun bɛ o mɔgɔw jusukun na, Yesu tun ka o lɔn, o kosɔn a ma o mɔgɔw si ta ka o kɛ a ta karamɔgɔden dɔ ye. O mɔgɔw tun ma Yesu ta alaya faamu fɔlɔ; adamadenya ta miiriyaw le tun bɛ o kɔnɔ. O ta miiriya tun ye ko Yesu bɛna o bɔsi ka bɔ Rɔmukaw ta fanga ra, k’a to o ye baara ɲanamanw sɔrɔ, ani ka o ta siniɲasigi labɛn ka ɲa. Yesu tun ka adamaden bɛɛ kɔnɔnɔko lɔn, a ka bɛɛ jusukunnakow lɔn. O si tun tɛ Ala ɲinina can yɛrɛ ra. Ni a kɛra ko o tun bɛ Ala ɲinina ni jusukun gbɛnin ye, o tun bɛna sɔn ka batize Zuridɛn kɔba ra, ka lɔ o ta jurumunw na, ani ka nimisa o ta kojuguw ra.
Kirisita ka aw jusukun cogo lɔn, ani aw bɛ ko minw ŋaniya aw yɛrɛ kɔnɔ, ani aw ta Ala daariw, ani aw ta jurumuw. A ka aw ta miiriyaw lɔn ani o miiriyaw bɔyɔrɔ. Aw bɛ min ɲini janko ka ɲanamanya terenninya ra a ka o lɔn. Aw bɛna yɛlɛma ka bɔ aw ta yɛrɛbonya ra wagati juman? Wasoya min b’a to aw bɛ aw yɛrɛ jate ko a ka fisa ni tɔw ye, aw bɛna bɔ o ra wagati juman, janko Ala ye aw fa Nin Saninman na?
b) Mɔgɔ ka kan ka bange kokura (Yuhana 3:1-13)
YUHANA 3:1-3
1 Ayiwa, cɛ dɔ tun bɛ Farisiw ra, min tɔgɔ tun ye ko Nikodɛmu; Yahudiyaw ta ɲamɔgɔ dɔ tun lo. 2 Lon dɔ, su fɛ a nana Yesu fɛ ka na a fɔ a ye ko: «An karamɔgɔ, an kɔni k’a lɔn jate ko Ala le ka ele ci ka na an karan; sabu i bɛ kabako minw kɛra nin ye, mɔgɔ si tɛ se ka o kɛ ni Ala tɛ ni o tigi ye.» 3 Yesu k’a jaabi ko: «Can ra, ne b’a fɔ i ye ko ni mɔgɔ min ma woro kokura, o tigi tɛ se ka don Ala ta Masaya ra fiyewu.»
Cɛ dɔ bɔra jama ra, min tɔgɔ tun ye ko Nikodɛmu; Ala ɲasiranbagaba tun lo, min lɔyɔrɔ tun ka bon kosɛbɛ, ani Kititigɛjama cɛ 70 dɔ tun lo. A k’a kɔrɔsi k’a ye ko Ala ta sebagaya bɛ Yesu kan. I b’a sɔrɔ ko a tun b’a fɛ ka jɛnɲɔgɔnya dɔ don nin cira kura ni yahudiyaw ta jama cɛ. Nka a tun bɛ siranna sarakalasebagaw ni jama ɲa. A tun ma la Yesu ta kow ra kosɛbɛ. A nana Yesu fɛ su fɛ, ka na Yesu ta kow sɛgɛsɛgɛ fɔlɔfɔlɔ, sani a ye fara Yesu ta mɔgɔw kan.
Nikodɛmu ka Yesu wele minkɛ ko «Rabi», a ka o fɔ ka kaɲa ni jama ta miiriya le ye, sabu mɔgɔw tun bɛ Kirisita jatera i ko karamɔgɔ min tun bɛ mɔgɔw karan Ala ta kuma, ani karamɔgɔden dɔw tun b’a fɛ. A sɔnna a ma ko Ala le ka Yesu ci, ko a ta tagamasiyɛnw bɛ o yira. A k’a fɔ ko : «An lara a ra ko Ala bɛ i fɛ, a bɛ baraka don i ra. I b’a sɔrɔ ko i ye Masiya ye.» O kumaw b’a yira ko Nkodɛmu tun lara Yesu ta alaya ra, hali ni a m’a gbɛya k’a fɔ.
Yesu k’a ta ɲininkariw jaabi, nka a ma a jigi la nin cɛ kan kosɛbɛ, min tun kɛra i ko soronadonbaga, jamana kuntigiw ni Kirisita cɛ. A tun ka Nikodɛmu jusukun cogo lɔn, ko a tununin lo, a tun k’a ta jurumunw lɔn, k’a lɔn fana ko a bɛ terenniya sira ɲinina. Yesu tun tɛ se k’a dɛmɛ ni a tun m’a yira ra fɔlɔ ko a bɛ i ko fiyentɔ, Ala ko ta fan fɛ. Nikodɛmu ni a ta alaɲasiran bɛɛ, a tun ma Ala lɔn a cogo ra fɔlɔ. Yesu gbɛra a ye k’a fɔ a ye ko: «Can lo ko mɔgɔ si tɛ se ka Ala lɔn a yɛrɛ ta kɛwalew baraka ra; A ka kan ka bange kokura fɔlɔ Ala ta Nin Saninman sababu ra.»
Kirisita k’a ta karan ju sigi Ala ko kan, ka kaɲa ni can sira ye. Sabu Ala lɔnniya tɛ sɔrɔ ni an yɛrɛ ta hakiri ye, fɔ an ye bange kokura. Ni arajo bɛ i fɛ, i bɛ se k’a munumunu ka kan caman mɛn, nka i tɛ ja si ye a ra. N’i b’a fɛ ka jaw ye, o tuma televisiyɔn le ka kan ka kɛ i fɛ. Adamaden fana ta bɛ ten; a ni a ta alaɲasiran ni a ta baara bɛɛ, a tɛ se ka Ala ye, a ta miiriya ra, walama a jusukun na. Ka Ala sɔrɔ i jusukun na, fɔ yɛlɛmari dɔ ye kɛ, fɔ Ala ye i kɛ mɔgɔ kura ye, ka i kɛ danfɛn kura ye.
YUHANA 3:4-5
4 Nikodɛmu ko: «Ni mɔgɔ kɔrɔra ka ban, a bɛ se ka woro cogo di tuun? Yala a bɛ se ka kɔsegi a bamuso kɔnɔ ka woro kokura tuun wa?» 5 Yesu ka a jaabi ko: «Can ra, ne b’a fɔ i ye ko ni mɔgɔ min ma woro ji ni Nin Saninman baraka ra, o tigi tɛ se ka don Ala ta Masaya ra.
Yesu ta jaabi k’a yira minkɛ ko Nikodɛmu ma Ala lɔn, o ko ka Nikodɛmu kɔnɔnɔban. A tun ma deri ka bangekokura ko mɛn fɔlɔ. Yala mɔgɔ bɛ se ka kɔsegi a bamuso kɔnɔ tuun ka bɔ wa? O kuma ye adamadenw ta miiriya ye, nka o bɛ adamaden ta fiyentɔya yira. Nikodɛmu m’a faamu ko Fa Ala bɛ se ka mɔgɔ bange k’a kɛ a den ye a ta Nin Saninman baraka ra.
Nikodɛmu ko tun ka di Yesu ye. Yesu kɛra sababu ye k’a to a ye lɔ a ra ko ale ma Ala ta masaya sira lɔn; o kɔ, Yesu b’a yira a ra ko ale le ye Can ye. An ka kan ka la a ra ko an tɛ se ka don Ala ta masaya ra ni an ma bange ko fla kɛ. O ko kelen le ye a sira ye.
Ka bange kokura, o kɔrɔ ye di? Bange ko yɛrɛ lo, karan dama tɛ; a tɛ bɔ adamaden ta kɛwalew ra, sabu mɔgɔ si tɛ se k’a yɛrɛ bange; o ra, Ala le ye bange kɛbaga ni ɲanamanya dibaga ye. O bangekokura ye Ala ta nɛɛma le ye, mɔgɔ jogo yɛlɛma ko tɛ, a ta kɛwale yɛlɛma ko fana tɛ. Adamadenw bɛɛ ye kojugukɛbagaw, kabini o fitinima; cogo tɛ mɔgɔ si fɛ fana k’a yɛrɛ jogo yɛlɛma. Nin Saninman ta bangekokura, o ye Ala ta ɲanamanya doncogo ye adamaden kɔnɔ.
O ko bɛ kɛ cogo di? Yesu k’a fɔ Nikodɛmu ye ko o bangeko bɛ kɛ ji ni Nin Saninman le sababu ra. Ji bɛ an hakiri jigi Yuhana ta batɛmu ko ra, ani daga minw tun bɛ kɔɲɔya yɔrɔ ra, minw tun blara saninyari kama. Layirikɔrɔ ta mɔgɔw tun k’a lɔn ko saninyari ta ji tun ye jurumun yafa tagamasiyɛn le ye. A kɛra i ko Yesu tun k’a fɔ le ko: «Mun na i tɛ taga Yuhana batiserikɛbaga fɛ ka taga batize?» Yɔrɔ dɔ ra Yesu k’a fɔ fana ko: «Ni mɔgɔ min b’a fɛ ka tugu ne kɔ, o tigi ka kan ka ban a yɛrɛ ra, k’a ta gbengbenyiri ta ka tugu ne kɔ.» (Matiyu 16:24). An balemaw, aw ye lɔ aw ta jurumunw na, Ala ka min fɔ aw ra jurumunw ta ko ra, aw ye sɔn o ma. Aw bɛ kojuguw kɛ, aw bɛ halakiri sira le kan fana.
Yesu ma dan ji ta batɛmu ko dɔrɔn ma, nka ni mɔgɔ min ka nimisa, ale bɛ o tigi batize ni Nin Saninman ye, janko ka ɲanamanya kura di a ma jusukasi nɔ ra. Yesu gbengbenna minkɛ, an b’a ye ko an jusukun ta saninyari bɛ sɔrɔ a jori le sababu ra. O saninyari bɛ kɛ Nin Saninman ta baara sababu ra. Ni Nin Saninman ka mɔgɔ min lana a yɛrɛ fɛ, a bɛ o tigi fa ɲanamanya banbari ra, ani a ta kɛwale ɲumanw na; a bɛ kɛ mɔgɔ ɲuman ye, ka tagama ka kaɲa ni Yesu ta kuma ye. O yɛlɛmari, o bangeko flanan bɛ wagati ta ka sɔrɔ ka dafa lanabaga jusukun na, i n’a fɔ den bɛ mɔ dɔɔni dɔɔni cogo min na a bamuso kɔnɔbara ra ka sɔrɔ ka woro.
Yesu tun ka o ko kɛ a ta waajuri kun ye, o ye Ala ta Masaya ko ye. O ra, o Masaya kɔrɔ ye di? O Masaya ko ni politi ko tɛ sira kelen na, walama dunuɲa ta nafa ɲinisiraw; lanabaga kura bɛ jɛnɲɔgɔnya min sɔrɔ ni Fa Ala ye, ani Dencɛ ani Nin Saninman, o ko lo. O Nin barakaman bɛ jigi lanabaga kan, wagati min a bɛ a yɛrɛ to Kirisita boro, k’a lɔn ko Kirisita ye Masa ye, a ka kan ka min kan mina.
DAARIKAN: Matigi Yesu, i ni ce ne ta bangekokura kosɔn, ne bɛ min sɔrɔ i ta nɛɛma kelenpe sababu ra. I ka ne ɲa yɛlɛ Ala lɔnniya ta fan fɛ. A to ne ye to i ta kanuya ra. Minw bɛ i yɔrɔ ɲinina can kan, olugu fana ɲaw yɛlɛ, janko o ye lɔ o ta jurumunw na, ka o fɔ i ye, janko o jusukun ye yɛlɛma i ta Nin Saninman baraka ra; i ta jori min bɔnna, o ye o jigi la o kan, janko o ye se ka don jɛnɲɔgɔnya ra ni i ye ani ka to o cogo ra.
ƝININKARI:
- Faranfasi juman bɛ sɔrɔ Nikodɛmu ta Ala ɲasiran ni Kirisita ta karan cɛ?