Previous Lesson -- Next Lesson
1. Alabatosoba saninya ko (Yuhana 2:13-22)
YUHANA 2:13-17
13 Yahudiyaw ta Jɔnyaban ɲanagbɛ tun bɛ surunyara. Yesu tagara Zeruzalɛmu. 14 Yesu ka mɔgɔ dɔw sɔrɔ Alabatosoba lu kɔnɔ, olugu bɛ misiw ni sagaw ni jɛnɛtuganiw fiyeerera; warifalenbagaw fana tun bɛ yia. 15 Yesu ka jurukisɛ dɔ kɛ bisan ye ka o bɛɛ gbɛn ka bɔ Alabatosoba lu kɔnɔ, ani o ta misiw ni o ta sagaw bɛɛ. A ka warifalenbagaw ta wariw bɛɛ janjan, ka o ta tabaliw ɲɔniɲɔni ka benben. 16 O kɔ, a k’a fɔ jɛnɛtugani fiyeerebagaw ye ko: «Aw ye nin fɛnw ta ka bɔ yan; aw kana ne Fa ta bon kɛ jagokɛyɔrɔ ye.» 17 Yesu ka o kɛ minkɛ, a ta karamɔgɔdenw hakiri jigira ko a sɛbɛra Kitabu kɔnɔ, ko: «I ta so ko hami bɛ ne jɛnina ne jusukun na i n’a fɔ tasuma.»
Yesu tagara Zeruzalɛmu Jɔnyaban ɲanagbɛ wagati ra; Yahudiya mɔgɔ waga camanba fana tun bɔra dunuɲa bɛɛ lajɛnni fanw bɛɛ ra ka na Zeruzalɛmu. O tun bɛ na sagaw faga ka o kɛ sarakaw ye, ka o hakiri jigi nin lon na, lon min na Ala tun ka o bɛmaw kisi, Jɔnyaban ta sagaden saraka sababu ra. Ni jori ma bɔn, jurumun yafa tɛ sɔrɔ. Ni bɛn ma sɔrɔ mɔgɔw ni Ala cɛ, o tuma batori tɛ foyi ɲa. Mɔgɔw tun ka batɛmu min kɛ Zuridɛn kɔba ra, o tun ye tagamasiyɛn le ye k’a yira ko Yesu ka o ta jurumunw bɔ o kunna. Yesu ka saya ta batɛmu kɛ mɔgɔw nɔ ra, ka o kɛ tagamasiyɛn ye k’a yira ko Ala ta dimi bɛnna ale kan. A tun k’a lɔn a yɛrɛ kɔnɔ ko ale le ye Ala ta sagaden ɲanawolomani ye.
Wagati min a donna dugu kɔnɔ, ka taga se Alatabosoba ma, a ma nafa si ye o bonba cɛɲa ra; a ta miiriya tun ye adamadenw ta kisiri ko le ye, o bɛna kisiri min sɔrɔ ale ta saraka sababu ra. Min ye kabako ye, o ye ko a ma cogo si sɔrɔ nin Alabatoso kɔnɔ, min bɛ mɔgɔ hakiri sigi, k’a ta Ala bato ko nɔgɔya. A ka ɲamanɲamanw, ani mankanw, ani misiw kasikanw, ani jagokɛbagaw ta sɔsɔriw mankanw, ani bɛganw joriw nɔw le sɔrɔ Alabatoso kɔnɔ. A ka wari falenbagaw pɛrɛnkanw mɛn, olugu tun bɛ wari wɛrɛw falenna Yahudiyaw ta wari ra, janko Ala batobagaw ye se ka o ta wari sarakaw bɔ.
O mankanw bɛɛ tun b’a yira ko mɔgɔw tun b’a miiri ko Ala ta terenniya bɛ se ka san ni wari ani mɔgɔ yɛrɛ ta baara ye. Ala batobagaw tun b’a miiri ko Ala ta nɛɛma ani a ta terenninya bɛ san ni sarakaw ni wari ye; O tun m’a lɔn ko kisiri tɛ sɔrɔ kɛwaleɲumanw sababu ra.
Yesu ka o kow ye minkɛ, a k’a yira ko o kow digira ale ra. Mɔgɔw ka Ala bato cogo cɛn minkɛ, o dimi k’a mina, fɔ a ka bɛgan fiyeerebagaw ta wariw bɔn dugu ma. A ma fɔ ko a ka mɔgɔ bugɔ, nka minw tɛ Ala ta bonya jate, ala bɛna min lase olugu ma, a ka o tagamasiyɛn le kɛ ni nin ko ye. Batori si tɛ se ka diya Ala ye nin dugukolo kan, fɔ ni i ta jurumunw ka i jusu kasi, k’a to i ye i yɛrɛ majigi Ala Saninman ye.
Mɔgɔw ma Ala ta saninmanya jate minkɛ, o ko ka Yesu jusu kasi. O murutiri ni o kolɔnbariya min tun bɛ sɔrɔ o mɔgɔw ta Ala sira tagama gbansan na, o b’a yira ko o jusukun ni o hakiri tun datugunin lo, hali ni sariya tun dira o ma kabini san 1300. Yesu ka nin batorikɛyɔrɔ saninya, ka Ala ta dimi ni a saninmanya yira. Nin batorikɛyɔrɔ nɔgɔcogo tun bɛ mɔgɔw jusukun cogo le yira fana. Yɛlɛmari tun ka kan ka don Ala sira ko ra, mɔgɔw ta Ala ɲinicogo tun ka kan ka kɛ cogo wɛrɛ ra.
YUHANA 2:18-22
18 Ayiwa, Yahudiyaw ta ɲamɔgɔw ka Yesu ɲininka ko: «I bɛ se ka tagamasiyɛn juman le kɛ k’a yira an na ko jo bɛ i fɛ ka nin kow kɛ?» 19 Yesu ka o jaabi ko: «Aw ye Alabatosoba nin ci; ne bɛna a lɔ kokura tere saba kɔnɔ.» 20 Yahudiyaw ko: «E, o ka san binaani ni wɔɔrɔ le kɛ nin Alabatosoba min lɔri ra, ele bɛna o lɔ kokura tere saba kɔnɔ!» 21 Nka Yesu tun bɛ kumana Alabatosoba min ko ra, o tun ye a yɛrɛ farikolo le ye. 22 Ayiwa, Yesu nana kunu minkɛ ka bɔ saya ra, a ta karamɔgɔdenw hakiri jigira a ra ko Yesu tun ka o fɔ. O lara Ala ta Kuma ra. Yesu tun ka kuma min fɔ fana, o lara o ra.
Sarakalasebagaw nana Alabatoso saninyako mankan mɛn minkɛ dɔrɔn, ani jagokɛbagaw pɛrɛnkan, o girinna ka taga Yesu kɔ, ka taga a ɲininka ko: «Jɔn le ka nin ko kɛsira di i ma? Jɔn le ka i ci? I ta fangatigiya sababu fɔ an ye.» O ma Yesu sɔsɔ Alabatoso saninya ko ra; o k’a ye ko Yesu ma nin kɛ a yɛrɛ ta dimi kosɔn, nka a k’a kɛ Ala ta batoso kanuya bonya kosɔn, janko ka hakiri ɲuman di jama ma, min b’a to o bɛ Ala bato a cogo ra; kun min na Yesu ka nin ko kɛ, ani a kɛra ni ŋaniya min ye, o tun b’a fɛ ka o le lɔn. Yesu kɛra o jugu ye, sabu a tun b’a fɛ ka Alabatoso ko yɛlɛma k’a sɔrɔ a ma o ko sara olugu ta kuntigiw ra.
Yesu ka o jaraki o ta flankafuya kosɔn, sabu o Ala batobaga caman ta mankankolonw, ani naforoko ta yɛrɛbonya, o tun bɛ o fɛ ka tɛmɛ Ala ta jususuma kan, mankan si tɛ min na. Yesu kɔnna k’a lɔn ko o ta Alabatosoba bɛna ci, ka o sababu kɛ olugu yɛrɛ ta batori barakantan ni o ta kolɔnbariya ye. Alasiratagama min ye mɔgɔw yɛrɛ ta ko labɛnnin ye, ani o ta kolatigɛnin, o tɛ se ka mɔgɔ kisi. Ala ta can min bɛ mɔgɔ kisi, ka mɔgɔ jusukun yɛlɛma, o le bɛ mɔgɔ jogo yɛlɛma.
Kisibaga min kɛra adamaden ye, o tun bɛ o cɛ ra. Yesu le ye Abatosoba sɔbɛ ye. Ala tun bɛ Kirisita ra, o batoso kɔnɔ. A kɛra i n’a fɔ Yesu k’a fɔ le ko: «Alabatoso min ye ne farisogo ye, aw ye o ci, sabu Ala ta ko kanuyaba min bɛ ne jusu ra aw tɛ se ka o muɲu. Aw bɛna cogo bɛɛ kɛ janko ka nin Alabatoso ci, nka ne bɛna nin farisogo kunu k’a bɔ saya ra tere saba kɔ; ne bɛna bɔ kaburu kɔnɔ. Aw bɛna ne faga, nka ne ɲanaman lo, sabu ne le ye ɲanamanya ye, Ala min kɛra farisogo ye. Aw tɛ se ka ne faga.» Yesu k’a kunuko lakari ni kuma kɔrɔmanw ye. Fɔ ka na se bi ma, o kunuko kɛra kabako bɛɛ ra belebeleba ye.
Sarakalasebaga ta ciradenw ma nin kuma kɔrɔman faamu Alabatoso ko ra. O ka o bonba ta samasenw flɛ, o samasen minw lɔra ni faragbɛ ye, ani bon sanfɛyɔrɔ koorininw, minw munna ni sani ye; o k’a fɔ o yɛrɛ kɔnɔ ko Yesu bɛ Ala tɔgɔcɛnkumaw le fɔra Ala batoso kɔnɔ, Herɔdi ka o bonba min lɔ. Olugu ta kuma tun ye bon kabakuruw ko ye, nka Yesu ta kuma tun ye a farisogo ko ye. O sɔsɔriba min kɛra Yesu ta baara damina wagati ra, o kow bɛna wuri tuun Yesu ta kiti wagati ra Yahudiyaw ta Kititigɛjama ɲa kɔrɔ, seere faniɲafɔbaga dɔw ta kuma sababu ra.
Layirikɔrɔ ta mɔgɔw ma lanaya kura ko faamu can ra, Kirisita nana ni lanaya min ye. Hali karamɔgɔdenw ma nin diina kura ko faamu ka se yɔrɔ jan, fɔ wagati min Yesu sara ka kunu. O wagati le ra o k’a faamu ko Dencɛ sara ka jurumuw kafari, ani ka kunu ka bɔ saya ra.
Bi, Yesu bɛ ni an ye, an kɛra Nin Saninman ta Alabatoso ye, Yesu bɛ o batoso kɔnɔ; ka anw ɲanaman to, an kɛra o bon kabakuruw ye. Nin Saninman k’a ta miiriya don karamɔgɔdenw kɔnɔ; o sera ka o kumaw kɔrɔ faamu Layirikɔrɔ Kitabuw ra, Yesu ta karan sababu ra. O jijanin tora lanaya ra, o farara ɲɔgɔn kan ka kɛ Ala Saninman ta batoso ye.
DAARIKAN: Matigi Yesu, ele le ye Ala sigiyɔrɔ ye, ani jurumunkɛbagaw ni Ala ta ɲɔgɔnkunbɛnyɔrɔ. An dɛmɛ, an ye nimisari ni Ala bato sira tagama, ka an fa i ta baraka ra, janko an ye to ɲɔgɔn fɛ Nin Saninman ta batoso kɔnɔ, ka Fa Ala bonya wagati bɛɛ.
ƝININKARI:
- Mun kosɔn Yesu ka Alabatoso yaala, ani mun kosɔn a ka jagokɛbagaw gbɛn?