Previous Lesson -- Next Lesson
4. Yesu ta kabako fɔlɔ min kɛra kɔɲɔya ra Kana (Yuhana 2:1–12)
YUHANA 2:1-10
1 Ayiwa, tere fla tɛmɛnin kɔ, kɔɲɔya dɔ tun bɛ kɛra Kana, Galile mara ra. Yesu bamuso tun bɛ o kɔɲɔya ra. 2 O tun ka Yesu ni a ta karamɔgɔdenw fana wele ka taga o kɔɲɔya ra. 3 Ayiwa, ka o to ɲanagbɛ ra, duvɛn nana dɛsɛ o fɛ. Yesu bamuso k’a fɔ a ye ko: «O ta duvɛn dɛsɛra.» 4 Yesu k’a fɔ a bamuso ye ko: «Ne bamuso, i kana hami o ra; nka ne ta wagati ma se ban.» 5 Ayiwa, a bamuso k’a fɔ baaradenw ye ko: «Ni a nana fɛn o fɛn fɔ aw ye, aw ye o kɛ.» 6 O y’a sɔrɔ Yahudiyaw ta kabakurudaga wɔɔrɔ tun bɛ yi. Yahudiyaw tun bɛ o yɛrɛ saninya ni o dagaw ta ji le ye ka kaɲa ni o ta landa ye. Ji litiri biseegi walama kɛmɛ ni mugan tun bɛ se ka don o kabakurudagaw bɛɛ kelen kelen kɔnɔ. 7 Ayiwa, Yesu ko baaradenw ma ko: «Aw ye nin dagaw bɛɛ fa ni ji ye.» Baaradenw ka o bɛɛ fa fɔ ka se o da kɔrɔ. 8 O kɔ, a ko baaradenw ma ko: «Aw ye a bi sisan ka taga a di domuniko ɲanabɔbaga ma.» O k’a bi ka taga a di. 9 Ayiwa, ji yɛlɛmana ka kɛ duvɛn ye; domuniko ɲanabɔbaga ka o nɛnɛ. Ale tun ma o duvɛn bɔyɔrɔ lɔn, nka baaradenw kɔni tun ka a bɔyɔrɔ lɔn. Domuniko ɲanabɔbaga ka kɔɲɔcɛ wele, 10 ka na a fɔ a ye ko: «Mɔgɔ bɛɛ bɛ duvɛndiman le di mɔgɔw ma fɔlɔ; ni o ka o min caman tuma min na, min man di kosɛbɛ, o bɛ sɔrɔ ka o di o ma. Nka ele ka duvɛndiman to kɔ fɛ!»
Yesu tagara ni a ta karamɔgɔdenw ye ka bɔ o ta nimisayɔrɔ ra, Zuridɛn bada ta kɛnɛgbɛba yɔrɔ ra, ka taga ni o ye fɔ Galile mara ta kuruyɔrɔw ra, ka taga ɲagari kɛ ni o sigiɲɔgɔn dɔw ye kɔɲɔya dɔ ra. O tagama min tun ye kilo kɛmɛ tagama ye, o bɛ Layirikɔrɔ ni Layirikura ta faranfasiba tagamasiyɛn yira an na. Lanabagaw tɛ sariya ta dibi ra tuun, o bɛ terenninya ta ɲagari le ra ni Yesu ye, Yesu min ye sɔgɔmada tere ye, ani hɛra dibaga.
Yesu tun tɛ a yɛrɛ bari domuni ma i ko Yuhana Batizerikɛbaga. O cogo ra, Yesu tagara minkɛ ni a ta karamɔgɔdenw ye ka taga ɲanagbɛ dɔ ta ninsɔndiya kɛ, o yɛrɛ ye kabako dɔ le ye fɔlɔ. Yesu ma duvɛn ko kɛrɛ, sabu ale yɛrɛ ka mɔgɔw karan ko fɛn min bɛ don mɔgɔ kɔnɔbara ra, ko o tɛ mɔgɔ lanɔgɔ, nka ko saninyabari minw bɛ bɔ mɔgɔ jusukun na, o le bɛ mɔgɔ lanɔgɔ. Minw bɛ ban o diyanankow ma ka o farisogo tɔɔrɔ janko ka Ala ɲini, Yesu tun ma ban o siraw ma, nka a k’a fɔ ko o siraw nafa ka dɔgɔ. An jusukun jugu mako bɛ jogokura le ra, ani bangeko kura. O bɛɛ n’a ta Biblu bɛ dɔrɔtɔya ni dɔrɔ kanukojuguya kɛrɛ.
Karamɔgɔdenw tagara ni Yesu ye ɲanagbɛ ra. Natanayɛli yɛrɛ tun bɔra Kana dugu le ra (21:2). A bɛ i n’a fɔ ko Yesu bamuso tun ka kɔɲɔcɛ ta mɔgɔw lɔn. An b’a miiri ko o wagati k’a sɔrɔ ko Yusufu tun sara ka ban. Mariyamu kɛra muso cɛ sanin ye, minkɛ, Yesu le tun ka dencɛ fɔlɔ lɔyɔrɔ ta, ka kɛ gba kuntigi ye.
O le kosɔn Mariyamu k’a ɲa sin a ma, k’a daari ko a ye o ta mɔgɔw dɛmɛ ka o mako ɲa. Kabini Yesu tun bɔra Zuridɛn bada ra, a tun tɛ mɔgɔ gbansan ye tuun; Nin Saninman tun k’a yɛlɛma, k’a bla Ala ta baara sira kan; sani wagati dɔɔni karamɔgɔdenw tun bɛna o ko faamu.
Mariyamu jigi tun bɛ a Dencɛ kan, sabu a tun k’a ta kanuya lɔn. Kanuya min tun b’a fɛ Yesu ta fan fɛ, o le nana ni nin kabako fɔlɔ ye. Ka la Kirisita ta kanuya ra, o bɛ Ala boro don baara ra an ta nafa kama. Mariyamu ka baaradenw daari, ko ni Yesu nana min fɔ o ye, o ye o kɛ. A tun lara a ra ko ni a kɛra cogo o cogo, ko Yesu bɛna o dɛmɛ. A ka kuma min fɔ baaradenw ye, o bɛ Egilisiw bɛɛ ta baaracogo yira, ko: « Ni a nana fɛn o fɛn fɔ aw ye, aw ye o kɛ !» Aw ye aw yɛrɛ majigi Kirisita kelenpe ye; k’a ta kuma sira tagama, o bɛ na ni kabakow ye.
O daga minw tun blara saninyari kama, ji litiri kɛmɛ wɔɔrɔ tun bɛ don bɛɛ kelen kɔnɔ; o ka o fa ni ji ye. O b’a yira ko kɔɲɔdenw tun ka ji camanba ta ka o yɛrɛ saninya le. Nka ni Yesu bɛ yɔrɔ min na, saninyari suguya wɛrɛ le bɛ kɛ o yɔrɔ ra. Mɔgɔ si tɛ se ka don Sagaden ta kɔɲɔya ra, ni a ma saninya ka dafa.
O bɛɛ n’a ta, sanninyari tun tɛ Kirisita ta hamiko fɔlɔ ye. Kɔɲɔya ta ɲanagbɛ tun ka kan ka kɛ. Yesu ka o saninyari ji yɛlɛma ka o kɛ duvɛn dimanba ye. An t’a lɔn a ka o kabako kɛ cogo min na. Nka min ye Sagaden ta kɔɲɔya ye, an k’a lɔn ko a jori min bɔnna o bɛna mɔgɔ weleninw bɛɛ wasa. O ni dɔrɔtɔya tɛ sira kelen na. Nin Saninman tɛ sɔn dɔrɔtɔya ma. Nka duvɛn diman min dira k’a caya, o ye tagamasiyɛn ye min bɛ Kirisita ta yafari yira, dan tɛ yafari min na, a bɛ o yafari min kɛ adamadenw ye. Bɛɛ ye na a ninyɔrɔ ta sankolo ta ɲagari ra. Bɛɛ bɛ Ala waleɲumanlɔn, ka buru ni duvɛn sɔrɔ Matigi ta domuni wagati ra, o min ye tagamasiyɛn ye k’a yira ko Ala bɛ an cɛ ra – a bɛ yafa kɛ an ye, ka an laganviyanin to a ta ɲagari ra.
YUHANA 2:11-12
11 Ayiwa, o le kɛra Yesu ta tagamasiyɛn fɔlɔ ye. O kɛra Kana, Galile mara ra. A k’a ta sebagaya yira a ta karamɔgɔdenw na o cogo le ra; olugu lara a ra. 12 O kɔ, Yesu tagara Kapɛrinahumu, ani a bamuso, ani a balemaw, ani a ta karamɔgɔdenw. O ka tere dama kɛ yi.
Sebagaya min bɛ Yesu fɛ ka fɛnw yɛlɛma, o ko ka karamɔgɔdenw kɔnɔnɔban; o k’a faamu ko se bɛ Yesu ye ka danfɛnw cogo yɛlɛma. O k’a ta nɔɔrɔ ye, o lara a ra ko Ala le k’a ci. O kɛra sababu k’a to o ye la Yesu ra. Lanaya ka kan ka wagati kɛ janko ka bonya, kanminari fana b’a to an bɛ faamuri sɔrɔ lanaya ra. Ni aw bɛ Yesu ta kow karan, k’a ta kumaw sɛgɛsɛgɛ kosɛbɛ, o le ra aw bɛna a yɛrɛ ta bonya cogo faamu.
Yesu tun bɔra a ta somɔgɔw kɔrɔ, k’a yɛrɛ sen bɔ dunuɲa ta kow bɛɛ ra janko ka baara kɛ Ala ye. Nka a tun tora a bamuso ni a dɔgɔninw ta balemaya ra. Wagati dɔw ra, olugu ka tagama dɔw kɛ ni a ta karamɔgɔdenw ye. A balemaw tun tagara ni a ye Kapɛrinahɔmu, min ye Tiberiyadi bada ta duguba ye. A ta karamɔgɔdenw yɛrɛ kɔni tun lara a ra kosɛbɛ, nka o tun ma kɛ Kana ta kɔɲɔya ta kabako dɔrɔn kosɔn. O tun sirinin tun bɛ Yesu ra tuma bɛɛ, o fana ma faran a ra tuun.
DAARIKAN: Matigi Yesu, an b’i fo, sabu i ka an wele ka taga kɔɲɔya dɔ ra, ka an ladon i ta jɛnɲɔgɔnya ta ɲagari ra. An ta jurumunw yafa an ma, an fa i ta Nin Saniman na. An bɛna tugu i kɔ, ka tagama terenninya ni saninmanya ra, i ko i yɛrɛ k’a kɛ cogo min na, fɔ ka i yɛrɛ di saraka ye ka sa mɔgɔ caman kosɔn.
ƝININKARI:
- Mun kosɔn Yesu tagara ni a ta karamɔgɔdenw ye kɔɲɔya ra?
ƝININKARIW - 1
An balema ɲuman sɛbɛ karanbaga,
nin ɲininkari 24 min bɛ sɛbɛ dugumayɔrɔ ra, i ka kan ka jaabiri ɲuman 20 le sɔrɔ o ra ka o ci an ma. Ni o kɛra, karan min gbanna nin na an bɛna o karan ci i ma.
- Kibarodiman kitabu naaninan sɛbɛbaga ye jɔn ye ?
- Faranfasi juman bɛ kibarodiman kitabu naaninan ni kitabu tɔ saba cɛ, minw kɔnnna ka sɛbɛ ?
- Yuhana ta kitabu sɛbɛkun ye mun ye ?
- A sɛbɛra jɔntigiw le ye ?
- An bɛ se ka nin kitabu taran cogo di k’a kɛ karankunw ye ?
- Kumakun juman ye Yuhana sura 1 ta hayan fɔlɔ ta kumaba ye, ani o kuma kɔrɔ ye di ?
- Cogo wɔɔrɔ juman bɛ Kirisita ra Yuhana bɛ minw yira an na a ta Kibarodiman kitabu damina ra ?
- Yeelen ni dibi faranfasi ye juman ye Ala ko lɔnniya ta fan fɛ ?
- Yuhana Batizerikɛbaga ta baara kunbaw tun ye juman ye ?
- Jɛnɲɔgɔnya juman bɛ Kirisita ta Yeelen ni dunuɲa ta dibi cɛ ?
- Minw sɔnna Kirisita ma mun le bɛ kɛ olugu ye ?
- Kirisita ta adamadenya kɔrɔ ye di ?
- Ni an ko Kirisita ta alaya dafananin, o kɔrɔ ye di ?
- Kirisita nana ni miiriya kura juman ye dunuɲa kɔnɔ ?
- Yahudiyaw ta ɲamɔgɔbaw ta ciradenw ka ɲininkariw minw kɛ o kun tun ye mun le ye ?
- Batizerikɛbaga ka mɔgɔw wele cogo di ka Matigi ta sira labɛn ?
- Batizerikɛbaga ka seereya juma le kɛ Yesu ta ko ra Kititigɛjama ta ciradenw ɲa kɔrɔ, min nafa ka bon ni a tɔ bɛɛ ye ?
- Ni a fɔra ko «Ala ta sagagen» o kɔrɔ di ?
- Mun kosɔn Yesu bɛ kɛ Nin Saninman dibaga ye ?
- Mun kosɔn o karamɔgɔden fla tugura Yesu kɔ ?
- Karamɔgɔden fɔlɔw ka Yesu tɔgɔ lase mɔgɔw ma cogo juman na ?
- Karamɔgɔden fɔlɔw ka Yesu tɔgɔ fɔ mɔgɔ tɔw ye cogo di ?
- Mun le bɛ nin tɔgɔw siri ɲɔgɔn na – ‹Ala Dencɛ› ani ‹Min kɛra adamaden ye› ?
- Mun kosɔn Yesu tagara ni a ta karamɔgɔdenw ye kɔɲɔya ra ?
Aw ye aw ta jaabiw ci an ma, nka aw kana ɲina ka aw ta adɛrɛsi sɛbɛ ka ɲa, k’a ci nin yɔrɔ ra :
Waters of Life
P.O.Box 600 513
70305 Stuttgart
Germany
Internet: www.waters-of-life.net
Internet: www.waters-of-life.org
e-mail: info@waters-of-life.net