Previous Lesson -- Next Lesson
1. Murugu dɔ kɛnɛyako Bɛtisayida (Yuhana 5:1-16)
YUHANA 5:10-13
10 O ra, Yahudiyaw k’a fɔ o cɛ kɛnɛyanin ma ko: «Bi ye Nɛnɛkirilon le ye! Ka kaɲa ni sariya ye, i man kan ka i ta lanan ta ka tagama bi.» 11 O cɛ ko Yahudiyaw ma ko: «Min ka ne kɛnɛya, ale le ko ne ma ko: ‹I ta lanan ta ka tagama!› » 12 O ka a ɲininka ko: «Jɔntigi le k’a fɔ i ye ko i ye i ta lanan ta ka tagama?» 13 Nka mɔgɔ kelen min tun ka cɛ kɛnɛya, a tun ma o tigi lɔn tuun; sabu jama tun ka ca, Yesu fana tun tununa jama ra.
Mɔgɔ minw tun bɛ dinga jiman yɔrɔ ra, nin ko ka olugu bɛɛ jusu diya, mafɔ yahudiya diinamɔgɔ flankafuw. Ɲangboyaba le tun bɛ o diinakuntigi flankafuw ra, sabu o kɛnɛyari tun kɛra nɛnɛkirilon le ra. Yesu tun ma dan murugu kɛnɛyari ma, nka a tun k’a fɔ a ye fana ko a ye a ta lanan ɲu ka tagama dugukɔnɔsiraw fɛ ka taga. Olugu fɛ, o tun ye jurumun le ye Ala ɲa kɔrɔ, nɛnɛkirilon jate ko ta sariya ta fan fɛ, sabu baara bɛɛ tun ka kan ka dabla o lon na. Ni mɔgɔ o mɔgɔ tun ka o sariya cɛn o tigi tun bɛ se ka faga (Jateri 15:32-36). Yahudiyaw tun b’a miiri ko Masiya tɛ se ka na, ni Ala ta mɔgɔw tɛ nɛnɛkirilon ta sariya sira bɛɛ tagama a cogo ra.
O Yahudiyaw tun tɛ se ka cɛ ye ni a ta lanan ye a kunna, k’a bon ni kabakuru ye o yɔrɔnin kelen bɛɛ ra, sabu o ka kan ka o tigi lasɔmi fɔlɔ, sani k’a latigɛ ko a ye faga. O jarakiri tun b’a yira ko kojugu tun bɛ se ka kɛ a ra. O cɛ kɛnɛyanin k’a ta kɛwale kɛkun fɔ, ko Yesu le k’a fɔ ko ale tagama. K’a ta lanan ta, o le tun bɛ kɛ sababu ye k’a to a ye kɛnɛya dafanin sɔrɔ.
Diinakuntigi flankafuw jusu tun gbanna, cɛ kɛnɛyako ma o ninsɔndiya fana. Yesu ta kanuya ni a ta sebagaya min ka cɛ kɛnɛya o ma o si jate. O ka ɲangboya sɔsɔriw damina, ka kɛnɛyarikɛbaga yɛrɛ kɔniya, sabu a tun sɔnna k’a fɔ banabagatɔ ye ko a ye a ta lanan ta ka tagama nɛnɛkirilon na. Olugu fɛ, Yesu tun ye sariya cɛnbaga le ye, min ka kan ni fagari ye.
Cɛ kɛnɛyanin tun m’a kɛnɛyabaga lɔn, sabu Yesu tun ye lonan le ye. Nin tun ye Yesu nako fɔlɔ le ye Bɛtisayida. A bɛ i n’a fɔ kɛnɛyari kɛnin kɔ, Yesu tununa jama ra. Yesu t’a fɛ ko ni mɔgɔ min bɛ la ale ra, o ta lanaya ju ye sigi kabakow kan, nka lanaya ju ka kan ka sigi ale kanuya tigi Yesu yɛrɛ le kan.
YUHANA 5:14-16
14 O kɔ fɛ, Yesu nana bɛn ni o cɛ ye Alabatosoba lu kɔnɔ; Yesu ko a ma ko: «A flɛ, sisan i kɛnɛyara; i kana to jurumun na, janko kojugu wɛrɛ kana na i sɔrɔ min ka jugu ni nin ye.» 15 O cɛ tagara a fɔ Yahudiyaw ye ko Yesu le ka ale kɛnɛya. 16 Yahudiyaw wurira o le ra ka kɛ Yesu kɔninya ye ko mun kosɔn a ka cɛ kɛnɛya Nɛnɛkirilon na.
Yesu ka cɛ kɛnɛyanin yɔrɔ ɲini janko k’a bɔsi a ta jurumun ma, k’a ta kɛnɛyari dafa. A tagara a sɔrɔ Alabatosoba kɔnɔ a bɛ Ala tandora. A ka Yesu ye minkɛ, o kɛra ɲagari ni siranya ye. Yesu k’a fɔ a ye ko:
I kɛnɛyara. Nin kabako min kɛra i ye, o bonya jatemina. Kabini san 38 i bɛ tɔɔrɔ ra. Nin ko ye Ala ta baara le ye, adamaden ta baara tɛ. Ala min kɛra adamaden ye, ale yɛrɛ ka i jusukun dayɛlɛ. I ka i ta jurumunw lɔn. Ala tun tɛ i ta ɲanamanya ra minkɛ, o nana ni kojugu ye. I kɛnɛyara, i ta jurumunw bɛɛ yafara i ma.
Yesu k’a fɔ a ye ko a ye Ala kan mina, a kana jurumun kɛ tuun, janko kɛnɛyari baraka ye se a jusukun ma. Yafari sɔrɔri bɛ an jagboya k’a latigɛ ko an tɛna o jurumun ɲɔgɔn kɛ tuun. Ni mɔgɔ min ka sɔn Kirisita ta kuma barakaman ma ka nimisa, o tigi bɛ Ala ta sebagaya sɔrɔ, ka se sɔrɔ kojugu kan ni Ala ta dɛmɛ ye. Min sɛ tɛ an ye, Kirisita tɛ o ɲini an fɛ, nka a bɛ Nin Saninman di an ma janko o sebagaya ye se sɔrɔ an farisogota kɔrɔbɔriw kan, ani ko minw bɛ an sɛgɛ. Can ta Nin b’a to an ye faran kojugu ra, ani ka ban a ma.
Tuma dɔw ra, Ala yɛrɛ bɛ se k’a to banaw ni kogbɛlɛn dɔw ye an sɔrɔ, ka kɛ sababu ye k’a to an ye kɔsegi Ala ma. Tuma dɔw ra fana naforo, ani an b’a fɛ ka fɛnɲuman minw diyabɔ, o bɛ kɛ sababu ye ka an jusukun gbɛlɛya, ka Ala ta kiti lase an ma. Jusukun gbɛlɛya bɛ se ka mɔgɔ kɛ jinatɔ ye, fɔ ka taga o tigi laban kɛ tasuma banbari ye. Aw kana toron kɛ ni jurumun ye; nka aw bɛ sama jurumun kelen min kɔ, aw ye lɔ o ra, ka Kirisita daari ko a ye aw bɔsi o jurumun boro. Aw kana to Yesu ni jurumunw furancɛ ra. Jurumun ta miiriya min bɛ aw kɔnɔ, aw ye ban o ma. Aw ye jɛnɲɔgɔnya don ni aw Kisibaga ye. A bɛna aw kisi ka dafa.
Kabako! Cɛ kɛnɛyanin ka Yesu ta ladikanw lamɛn ka ban minkɛ a borira ka taga Yahudiyaw fɛ, ka taga a fɔ o ye ko Nazarɛtikacɛ le ka ale kɛnɛya, ani ka ale kunnacɛn ka bɔ nɛnɛkirilon ta sariya sira kan. Sigiya t’a ra, sariya ko seregebagaw k’a miiri ko o bɛna to ka Yesu kɔrɔsi dogo ra, janko ka cogo dɔ sɔrɔ k’a mina.
Wagati min Yesu tun ka Alabatosoba saninya, sarakalasebagaw tun k’a kɔniya cogo min na, o tun man bonya ka Farisiw ta juguya bɔ, wagati min a ka nin cɛ kɛnɛya. Kirisita ka min kɛ, o ko tun ka olugu ta ‹terenniya› cogo mafiyɛnya, k’a yira ko sariya min jusigira natabaya kan, janko ka mɔgɔw bari dɔrɔn, ko terenninya tɛ sɔrɔ o sababu ra. Ala bɛ hina ni kanuya le ɲini an fɛ. Saninyari kanuyantan o ye faniya ye. Ala bɛ hina le ɲini an fɛ, a tɛ diina sira tagama fɛ. Ala baraka, a ka an bɔsi ka bɔ sariya ta cifɔni camanba le ra, k’a ta kanuya di an ma, ka o kɛ cifɔnin kelenpe ye.
ƝININKARI:
- Mun kosɔn Yahudiyaw tun bɛ Yesu tɔɔrɔ?