Previous Lesson -- Next Lesson
1. Murugu dɔ kɛnɛyako Bɛtisayida (Yuhana 5:1-16)
YUHANA 5:1-9
1 Ayiwa, o kow kɔ fɛ, ɲanagbɛba dɔ tun bɛ Yahudiyaw fɛ Zeruzalɛmu; Yesu tagara o ɲanagbɛ ra. 2 Zeruzalɛmu dugu donda min bɛ wele ko Sagaw ta donda, dinga jiman dɔ tun bɛ o donda kɛrɛ fɛ, min bɛ wele heburukan na ko Bɛtisayida; gbata looru lɔnin tun bɛ o dinga kɛrɛ fɛ. 3 Ayiwa, banabagatɔ caman tun lalanin bɛ o gbataw kɔrɔ: fiyentɔw, ani nabaraw, ani muruguw. O tun bɛ ji lamaga wagati le kɔnɔna. 4 Sabu Ala ta mɛlɛkɛ dɔ tun bɛ to ka jigi ji ra wagati dɔw ra ka a lamaga. Ji lamaganin kɔ, ni banabagatɔ min tun ka kɔn ka jigi a kɔnɔ, o tigi tun bɛ kɛnɛya, hali ni a ta bana ka kɛ bana suguya min o min ye. 5 Ayiwa, cɛ dɔ tun bɛ o yɔrɔ ra, ale tun ka san bisaba ni seegi kɛ bana ra. 6 Yesu ka o cɛ lanin ye minkɛ, a ka a lɔn ko a mɛɛnna bana ra; a ka a ɲininka ko: «Yala i b’a fɛ ka kɛnɛya wa?» 7 A ka Yesu jaabi ko: «An karamɔgɔ, ni ji ka lamaga, mɔgɔ tɛ ne fɛ ka ne ta ka ne lajigi ji ra; ni ne fana ko ne bɛ wuri ne yɛrɛ ma, sani ne ye se yi, dɔ bɛ kɔn ka jigi ne ɲa.» 8 Yesu ko a ma ko: «Wuri ka i ta lanan ta ka tagama.» 9 Ayiwa, o yɔrɔnin bɛɛ a kɛnɛyara; a wurira ka a ta lanan ta ka kɛ tagama ye.
A bɛ se ka kɛ ko Yesu ka wagati min kɛ Galile o ka ca ni karo kɔnɔtɔn ye. O kɔ, a tagara Gbatakɔrɔsɔsigi ɲanagbɛ ra Zeruzalɛmu. A tun k’a lɔn lanaya ko ta kɛrɛ bɛna juguya o duguba kɔnɔ. Hali ni sariya ko gbɛlɛyabagaw ani Ala ɲinibaga dɔw tun bɛ to k’a sɔsɔ, o bɛɛ n’a ta a tun bɛ sariya sira bɛɛ tagama. San o san, ni a bɛ se ka kɛ, a tun bɛ taga Zeruzalɛmu Alabatosoba kɔnɔ siɲaga saba, ka taga Ala bato (Sariya 16:16).
Dinga jiman dɔ tun bɛ dugu cɛmancɛ ra; ka kaɲa ni gɛrɛkikan Biblu dɔw ye, mɛlɛkɛ dɔ tun bɛ to ka na o ji lamaga wagati dɔw ra. Herɔdi tun ka gbata dɔw lɔ ka o dinga jiman lamini. O gbataw benni tɔ dɔw yera nin san labanw na. O yɔrɔ tɔgɔ tun ye ko «Hina ta bon», sabu banabagatɔ caman tun bɛ to ka taga o yɔrɔ ra ka taga kɛnɛya ɲini – ka ji lamagawagati kɔnɔ. O tun b’a miiri ko ni mɔgɔ min kɔnna ka don ji ra o wagati ra, o tigi tun bɛ kɛnɛya.
Yesu tagara o dinga jiman yɔrɔ ra, ka banabagatɔ caman sɔrɔ yi. A ka cɛ dɔ kɔrɔsi, min tun murugunin lo kabini san bisaba ni seegi, a deguninba, ani a tɔɔrɔninba. Ka fara o kan, kɔniya tun bɛ a ni mɔgɔ tɔw cɛ. O hina sɔrɔyɔrɔ ra, bɛɛ le tun bɛ lɔ ni i yɛrɛ ta ko ye; mɔgɔ si tun tɛ hina a mɔgɔɲɔgɔn na. Nka o bɛɛ n’a ta cɛ jigi tun ma tigɛ; a tun bɛ Ala ta hina sɔrɔwagati makɔnɔna, hali ni a tun sɔrɔ man di. Ayiwa, hina farisogoraman barara ka na lɔ cɛ ɲa kɔrɔ; Yesu k’a ta kɛnɛyari baara damina, ka cɛ ta hakiri bɔ dinga jiman kan. O kɔ, a ka kɛnɛyari lɔgɔ don a ra tuun. Yesu ka yɔrɔ di a ma janko min b’a dimi a ye o fɔ: «Mɔgɔ si tɛ a janto ne ra! Ne ka kɛnɛya ɲini tuma caman, nka ne ma la a ra tuun: ne ta ko hami tɛ mɔgɔ si ra yan. Yala ele bɛ se ka to yan ka ji lamaga wagati makɔnɔ, janko ka ne ladon ji ra wa?»
Ne ta ko hami tɛ mɔgɔ si ra! Yala o ye ele cogo ye wa, ne balema? Yala mɔgɔ tɔw banna i ra wa? I ka kan k’a lɔn ko Yesu lɔnin bɛ i ɲa kɔrɔ: i ta ko hami bɛ ale ra, a fana nana i fɛ. A bɛ se ka i dɛmɛ, ka i kisi. Nin le tun ye murugu ta miiriya ye. A k’a ɲa lɔ Kirisita ra, k’a kɛ i n’a fɔ a bɛna a ɲininka, sabu Kirisita ta hina sababu ra a lara Matigi ta kanuya ra.
Tuma min Yesu k’a ye ko kɛnɛyari nege b’a ra can ra, ko a lara ale ra, a k’a fɔ a ye ko: «Wuri ka i ta lanan ta ka tagama.» Nin tun ye Ala ta ci le ye, min b’a to kokɛbari ye se ka kɛ. Murugu tun lara Kirisita ta kuma ra, a tun k’a jigi la a ta sebagaya kan, ka Ala ta baraka dontɔ ye a kolow ra, k’a fari lamagatɔ ye Ala ta sebagaya baraka ra. A ka baraka sɔrɔ, a kɛnɛyara.
O yɔrɔnin kelen bɛɛ ra, a barara ka wuri ka lɔ a sen kan ni ɲagariba ye, k’a ta lanan ta k’a la a kun na ka taga. A ta lanaya ka Kirisita ta kuma barakaman dafa, ka kɛnɛyari lase a ma o yɔrɔnin kelen bɛɛ ra.
DAARIKAN: Matigi Yesu, an b’i fo, sabu i ma tɛmɛ nin banabagatɔ kɔrɔ ka taga, nka i k’a kɔrɔsi ka lɔ a kɔrɔ i ta makari kosɔn. Mɔgɔ si tun t’a fɛ ni ele tɛ, ele min ye Makaritigi ye. An dɛmɛ k’a to an ye nɔrɔ i ra, an kana an jigi la adamadenw ta dɛmɛ kan. An jusukun yɛlɛma ka kaɲa ni i ta kanuya cogo ye, ka an dɛmɛ janko an ye an janto tɔw ra, i ka nɛɛma min di an ma, an ye o dɔ di olugu ma fana.
ƝININKARI:
- Yesu ka murugu kɛnɛya cogo di Bɛtisayida dinga jiman yɔrɔ ra?