Previous Lesson -- Next Lesson?
5. Lanabariya kun (Yuhana 5:41-47)
YUHANA 5:41-44
41 «Ne tɛ adamadenw ta bonya kɔ; sabu aw ye mɔgɔ suguya minw ye, ne ka o lɔn. 42 Ne ka a lɔn fana ko Ala ta kanuya tɛ aw jusukun na. 43 Ne nana ne Fa tɔgɔ le ra, nka aw ma sɔn ne ma, k’a sɔrɔ ni mɔgɔ wɛrɛ nana a yɛrɛ tɔgɔ ra, aw bɛ sɔn o tigi ma. 44 Aw bɛ se ka la ne ra cogo di, aw minw bɛ aw ta bonya ɲini aw mɔgɔɲɔgɔnw le fɛ, nka bonya min bɛ sɔrɔ Ala kelenpe fɛ, aw tɛ o ɲini?
Yesu k’a juguw dogoyɔrɔ ci ka o bɔ kɛnɛ kan, ka o jusukun cogo yira o ra, o laban bɛna kɛ min ye a ka o fɔ o ye. A ka o ta ŋaninyajuguw fɔ o ye k’a gbɛlɛya, ani jogojuguya min siginin bɛ o kɔnɔ.
Yesu mako tun t’a ra ko mɔgɔw ye ale bonya ni tɛgɛrɛfɔkan ye, sabu a tun cira baara min kama a tun lanin lo o baara ra. A jigi tun ma la a ta baara nɔ kan, mɔgɔw bɛ min yera. Ni mɔgɔw tun bɛ a bonya, a tun bɛ o bonya kɔsegi a Fa le ma. A ka karamɔgɔdenw karan ko o ye o ta daari lase Fa le ma fɔlɔ; o ra, a ka daaricogo ɲuman yira an na, min b’a fɔ ko: «An Fa min bɛ sankolo ra, i tɔgɔ saninman ye bonya mɔgɔw bɛɛ fɛ, i ta masaya ye na, i sago ye kɛ dugukolo kan i ko a bɛ kɛ sankolo ra cogo min na.» Ka bonya ni nɔɔrɔ ɲini a yɛrɛ ye, Yesu banna o miiriya ma. A Fa ta bonya, o le tun kɛra a ta ko bɛɛ ye. Ala ta terenninya sigi ko, o hami le tun bɛ a jɛnina a jusukun na i ko tasuma.
Ala ta kanuya bɛ ye dunuɲa danwagati ra, ani an kunmabɔri wagati ra, ani an ta kisiri dafa ko ra. Kanuya le ye Ala saninman ta Yiracogo Saba jusiginan ye. Sariya sira tagama, ani min bɛ Ala sira tagama bɛɛ dafa ka ɲa, o bɛ sɔrɔ kanuya le ra. Ni mɔgɔ min ka kanuya sɔrɔ, o tigi tɛ ɲanamanya a yɛrɛ ye tuun, a tɛ a yɛrɛ ta bonya ɲini, nka a bɛ mɔgɔ tɔw bonya, ka ban a yɛrɛ ra, k’a yɛrɛ kɛ tɔw ta baaraden ye. A bɛ sɔn k’a borofɛn bɛɛ di fagantanw ma. Kanuya tɛ dɛsɛ foyi ra.
Mɔgɔ si tɛ a latigɛ ka Ala kanu a yɛrɛ ma; nka jurumun ta saninyabariya bɛ mɔgɔ min jusu kasi, ni o tigi ka nimisa ka la Ala ta kanuya ra, min bɛ sɔrɔ Kirisita ra, o tigi bɛna lɔ a ra k’a fɔ ko Ala ta kanuya donna an jusukun na Nin Saninman baraka ra, o min dira an ma, i n’a fɔ Pɔli k’a fɔ cogo min na. O kanuya bɛ lɔn an ta yɛrɛdicogo fɛ, ani an ta yɛrɛmajigiya, ani an ta muɲuri. Ni mɔgɔ min k’a jusukun dayɛlɛ Ala ta Nin Saninman ye, o tigi bɛ Ala saninman ta Yiracogo Saba kanu, ka mɔgɔ bɛɛ kanu fana. Nka mɔgɔ min bɛ a yɛrɛ bonya, k’a miiri ko ale ka ɲi, o tigi tɛ nimisabaga ye; Ala ta Nin Saninman jugu dɔ lo. A bɛ miiri a yɛrɛ dɔrɔn ta ko le ra. A tɛ a jusukun yɛlɛmacogo ko miiri, a t’a lɔn ko a mako bɛ Kisibaga ra, nka a bɛ a jusukun gbɛlɛya le. Kirisita ma na ni ala dɔwɛrɛ tɔgɔ le ye, mɔgɔ ma ala min lɔn, nka a nana Fa tɔgɔ le ra ka na Ala ta kanuya ni a ta makari yira mɔgɔw ra. Mɔgɔ minw bɛɛ bɛ ban Kirisita ta kanuya ma, olugu k’a yira le ko o ka o jusukun datugu Ala ta kanuya ɲa. Dibi le ka di o ye ka tɛmɛ yeelen kan; o ra, minw kɛra yeelen denw ye, o bɛ olugu kɔniya. Kirisita ka Kirisita kɛrɛbaga nako fɔ a juguw ye, ko a bɛna mɔgɔ natabaw bɛɛ lajɛn ɲɔgɔn kan, ka o lamuruti, ka bla o ɲa ka Ala ta kanuya ko kɛrɛ. A bɛna kabakow kɛ ka Kirisita yɛrɛ ladegi.
Mɔgɔ caman tɛ se ka la Kirisita ra; ka ɲɔgɔn nɛgɛ, o le ka di o ye ka tɛmɛ jurumun nimisa kan. O bɛ o yɛrɛ jate mɔgɔ ɲumanw ye, ani mɔgɔ barakamanw, ani hakiritigiw. O tɛ yɛrɛyɛrɛ Ala Saninman ɲa kɔrɔ, o fana tɛ a faamu ko ale Ala kelen le ka ɲi. Ka miiri ko i ta kow bɛɛ ɲana ka ban, o le bɛ na ni lanabariya ye, yɛrɛbonya fana ye o miirijugu tagamasiyɛn dɔ ye.
Ni mɔgɔ min ka Ala lɔn, k’a yɛrɛ nin halakiko lɔn, o tigi bɛna a yɛrɛ firi dugu ma le, ka lɔ a ta jurumun na Ala ɲa kɔrɔ, ka ban bonya ni tandori bɛɛ ma. A bɛ bonya la Fa ni Dencɛ le kan wagati bɛɛ; nɛɛma min k’a kisi a bɛ o kɔrɔta. Ka la a ra ko an ye jurumunkɛbagaw ye, ko Ala le yafara an ma, o bɛ an bɔsi yɛrɛbonya suguya bɛɛ ma an tagamacogo ra. An ye min ye an yɛrɛ ka o lɔn, Ala ye min ye an ka o lɔn fana. Kanuya bɛ mɔgɔ min fɛ, o bɛ can fɔ a teri ye; yɛrɛbonyabaga kɔni bɛ to k’a yɛrɛ lafiri tuma bɛɛ, ani ka tɔw fana lafiri, ka to k’a yɛrɛ mabɔ Ala ta Nin Saninman na, k’a sɔrɔ o le bɛ an kɛ mɔgɔ majigininw ye.
YUHANA 5:45-47
45 Aw kana a miiri ko ne bɛna aw jaraki ne Fa ɲa kɔrɔ dɛ! Aw jigi lanin bɛ cira Musa min kan dɛ, ale le bɛ aw jarakibaga ye. 46 Ni aw tun lara cira Musa ra, aw tun bɛna la ne ra fana, sabu cira Musa ka ne ta ko le sɛbɛ a ta kitabuw ra. 47 Nka cira Musa ka min sɛbɛ, ni aw ma la o ra, aw bɛna la ne ta kumaw ra cogo di?
Kirisita kumana ka digi Yahudiya flankafuw ra kosɛbɛ, k’a fɔ o ye ko: «Ne le tɛna taga aw jaraki Ala ɲa kɔrɔ dɛ, Musa le bɛna aw jaraki. A ka Jɛnɲɔgɔnya ta Sariya min di aw ma, o sariya le bɛ kiti ben aw kan. Kanuya ka aw dɛsɛ minkɛ, o kosɔn aw b’a fɛ ka Sariya kɛ sababu ye ka ne faga. Aw ka aw yɛrɛ mabɔ Ala ra, ka to ka tagama aw kun fɛ dibi ra, ka aw yɛrɛ latunu. Ne ka banabagatɔ dɔ kɛnɛya nɛnɛkirilon na minkɛ, o kosɔn aw dimina ne kɔrɔ Ala ta baara kosɔn; aw bɛ ne kɔninyara yɛrɛ le, ne – Ala ta kanuya min kɛra adamaden ye. Aw bɛ ban ka la a ra ko nin ye Masiya ta baaraw le ye; Aw ye mɔgɔ murutininw le ye ani mɔgɔ jusukungbɛlɛnw. Ala ka sariya di aw ma ɲanamanya le kama, a m’a di saya kama. Ni aw tun nimisara, aw tun bɛna Kisibaga yɔrɔ ɲini. Min tun ka kan ka na, Sariya ni Ciraw nakun tun ye ka na o nako le labɛn dɔrɔn. Sariya dikun ye min ye aw ka o yɛlɛma, ka aw ja gbɛlɛya ka Ala kumakan kɔrɔfɔ. Aw tɛ se ka ciraw ta kumaw faamu. Jusukunjugu min bɛ aw ra, o le bɛ aw bari ka can faamu. Aw bɛna to kolɔnbariya ra, ani torogberenya ra, aw bɛna to ka Ala ta Nin Saninman sɔsɔ tuma bɛɛ. Aw ta jusukungbɛlɛya kosɔn, aw tɛ la Ɲanamanya Kuma ra.»
ƝININKARI:
- Mun kosɔn Yesu ma sɔn ko bonya ye la ale yɛrɛ kan, i n’a fɔ mɔgɔ tɔw tun b’a kɛ cogo min na?
ƝININKARIW - 2
An balema ɲuman sɛbɛkaranbaga,
nin ɲininkari 19 min bɛ sɛbɛ dugumayɔrɔ ra, i ka kan ka jaabiri ɲuman 17 le sɔrɔ o ra ka o ci an ma. Ni o kɛra, karan min gbanna nin na an bɛna o karan ci i ma.
- Mun kosɔn Yesu ka Alabatoso yaala, ani ka jagokɛbagaw gbɛn?
- Faranfasi juman bɛ sɔrɔ Nikodɛmu ta Ala ɲasiran ni Kirisita ta karankun cɛ?
- Bangekokura tagamasiyɛnw ye juman ye lanabaga ta ɲanamanya ra?
- Mun le ka Kirisita ni siranɛgɛsa bɔ ɲɔgɔn fɛ?
- Mun kosɔn lanabaga minw lara Kirisita ra olugu sen tɛ Ala ta kiti ra tuun?
- Kirisita ye kɔɲɔcɛ ye kɔrɔ juman le ra?
- An bɛ ɲanamanya banbari sɔrɔ cogo di?
- Yesu bɛ ninfɛn juman le di an ma? O ninfɛn ɲaci ye mun ye?
- Mun le bɛ se ka kɛ sababu ye ka Ala bato sɔbɛ bari ka se Ala ma, ani an bɛ se ka o batori sɔbɛ sira sɔrɔ cogo di?
- Mun le bɛ se k’a to ɲanamanya ta ji ye bɔn anw kan?
- An bɛ se ka kɛ Yesu ta simantigɛbaga nafamanw ye cogo di?
- Kuntigicɛ tun ka kan ka tɛmɛ sira juman ni juman le fɛ janko k’a ta lanaya bonya?
- Yesu ka murugu kɛnɛya cogo di Bɛtisayida dinga jiman yɔrɔ ra?
- Mun kosɔn Yahudiyaw tun bɛ Yesu tɔɔrɔ ?
- Ala bɛ baara kɛ ni a Dencɛ ye cogo di, ani mun kosɔn a bɛ o kɛ?
- Fa Ala ka baara nafaman fla juma le karifa Kirisita ma?
- Jɛnɲɔgɔnya juman bɛ Fa ni Dencɛ cɛ, ka kaɲa ni Yesu ta ɲafɔcogo ye?
- Seereya naani minw fɔra Yesu ta ko ra, o ye juman ye, ani o kow bɛ seereya kɛ Yesu ta ko ra cogo di?
- Mun kosɔn Yesu ma sɔn ko bonya ye la ale yɛrɛ kan, i n’a fɔ mɔgɔ tɔw tun b’a kɛ cogo min na?
Aw ye aw ta adɛrɛsi sɛbɛ ka ɲa aw ta jaabiriw sɛbɛfura fana kan, aw kana a sɛbɛ lɛtɛrɛ forogo dɔrɔn kan, o kɔ bɛ a ci nin yɔrɔ ra:
Waters of Life
P.O.Box 600 513
70305 Stuttgart
Germany
Internet: www.waters-of-life.net
Internet: www.waters-of-life.org
e-mail: info@waters-of-life.net