Previous Lesson -- Next Lesson
YUUHANNA - Ndaygu ngun jalbi ka nder nibhe
Jandeeji ka Linjiila no Yuhanna seedorii nonn
c) Fii no annabi Iisaa feenyirani Mariyama Magaduuna (Yuuhanna 20:11-18)
YUUHANNA 20:17-18
17 Kono Iisaa wi’i mo: Wota a jogito lan, ko fii mi yhentaali taho ka Ben an. Kono yahu ka musibbhe an bhen, wi’aa bhe wonde midho yhentude ka Ben an e ka Ben mon, ka Alla an e ka Alla mon. 18 Onsay kanko Mariyama Magaduuna o yahi, o wi’i taalibaabhe bhen wonde o yi’ii Koohoojo on, awa kadi kanko Iisaa o yewtii mo dhun.
Mariyama yani ka leydi o sujjani annabi Iisaa, o faalaa lunnaade mo koydhe dhen o meema mo, o catoo mo fii wota bhe seedu. Annabi Iisaa jabhaali o meema mo, bhayru giggol makko ngol ko ruuhuyankewal. O yedhiino mo hawa makko kan e wondigal makko ngal, ko o faalaa ko yo gomdhinal on ngal mawnu e nder humondiral e Ruuhu-Seniidho on. Hari o lanniino faaminde dhun taalibaabhe makko bhen ko o waynodirta e mabbhe. Ko o meemata mo kon e ko catotoo kon e makko humindirtaa bhe, kono ko rewrude e ko o gomdhinta mo kon ka bannhe ruuhu humindirta bhe.
Annabi Iisaa wi’i mo wonde o luttataa ka aduna. Ko o feenyata kon no rabhidhi, bhayru ko ka kammu o fokkiti. Himo faalanoo yiltaade ka Ben makko. Sadaka makko on ka hoore leggal altindiraangal udditii laawol hewtinayngol ngo ka Alla. On yottinoowo sadaka mawdho on subhike yedhugol hoore makko sadaka ko o hibbanta Laabhudho on yhiiyhan makko dhan. O maakani Mariyama: «Hita a humo e an, sabu midho haani timminde peewal ngal fow. Mi tefanoyay on mi addanoyay on bawgal Ruuhu Seniidho on.»
O faamini mo kadi wonde hinaa kanko tun woni ko jeyi mo, kono ko yimbhe bhen fow: «Yiltito ka sahaabaabhe bhen hollitaa bhe fii an no mi fewndori e fii ebbhooje an dhen e fii yhentineede an nden!»
Annabi Iisaa wakkilini taalibaabhe makko bhen rewrude e Mariyama Magaduuna. O noddiri bhe musibbhe. Rewrude e gomdhinal ngal, en wontii musidal worbhe e rewbhe sabu mayde makko nden e ummutal makko ngal e ngurndan makko dhan bontataa dhan. Awa hidhen bhuri wonugol jiyaabhe makko. Kisiyee on timmii, en tabitii jogitoreede wa bhibbhe laabhubhe. O windii sariya mawdho on fii ko wontudhen kon bhibbhe Alla rewrude e yhiiyhan makko dhan.
Ko hondhun e nelal Mariyama haanuno hewtinande taalibaabhe bhen? Aranun dhun, himo wuuri. Ko o fotti e makko kon ko huunde luttayde ka taariika. Dhimmun dhun Ben makko ko bne men enen kadi. Rewrude e ndin fodaari, annabi Iisaa no naatude taalibaabhe makko bhen e nder humondiral timmungal hakkunde mabbhe e Alla. Hinaa Alla woddhitiidho jogiidho doole o holli bhe, kono ko wa Baabaajo wondudho e giggol e bhadiidho en. Hinaa o Ben annabi Iisaa tun, kono ko o Ben men enen kadi. O noddiri Baabaajo on «Alla an» sabu ko kanko woni fow, woni e dhi fow. Sella-finde makko on e fee Baabaajo on dillaali ka tawi dhon tageefo ngon no seedi e Alla sabu junuubu on. Hinaa o ganyo men han kadi sabu junuubaaji men dhin, kono himo yidhi en, enen bhee bhe Almasiihu on yaafanii e bhe o sotti. Ka tawnoo dhon himo humondiri e Baabaajo on, himo faalaa yo en humondir e Tatoobhe Laabhubhe bhen e nder Gooto on, himo addande en Ruuhuh makko Seniidho on fii no giggol ngol yaajira rewrude e men.
Almasiihu on torii Mariyama, kanko adiidho on yi’ugol mo bhawto ko o fooli mayden nden, yo o hewtin fodaari ndin fii humondiral timmungal ngal. Himo dhoftii, o immii o dogi o hewtinoyi seeditoore makko nden haa e taalibaabhe bhen, himo bhangina ko bhe humondiri kon e ko Alla woni kon Baabaajo e fee humondiral men sabu sulfu on. Ngal nelal nanorgal wa wuttandu liital, deyyhini bherdhe taalibaabhe dhibbhitudhe dhen. Hara weltaare nden fii andugol wonde bhe wonii jabhaabhe ka Alla e ko bhe hebhata kon ngurndan poomayankejan dhan, hara dhun no hodhi e mon onon men? Hara hidhon gomdhini nelal ngal Mariyama yottinani en ngal fii ummutal Almasiihu on ngal?
TORAARE: Men jarnii ma, Iisaa Joomi, an oo immintinaadho hakkunde maybhe bhen e an oo wuurudho e amen fii ko noddirdhaa men kon musibbhe. Men handaa e wuurugol e fee humondirgol e maa. Men jarnii ma fii yaafuyee junuubaaji amen dhin. Wattu men sahaabaabhe wondubhe e weltaare fii no men yidhinira bheya no bhe dhabbhire.
LANDAL:
- Ko hondhun e nelal Almasiihu on hewtinani en rewrude e Mariyama Magaduuna?