Home -- Dioula -- John - 026 (The Baptist testifies to Jesus)
Previous Lesson -- Next Lesson
3. Batizerikɛba bɛ kɔɲɔcɛ Yesu ta seereya kɛ (Yuhana 3:22–36)
YUHANA 3:22-30
22 O kow kɔ fɛ Yesu ni a ta karamɔgɔdenw bɔra dugu kɔnɔ ka na to Zude mara ra; a tora ni o ye ka wagati dama kɛ, ka to ka mɔgɔw batize. 23 Yuhana fana tun bɛ mɔgɔw batizera Enɔn, Salimu kɛrɛ fɛ; sabu ji caman tun bɛ o yɔrɔ ra; mɔgɔw tun bɛ na a fɛ ka na batize. 24 O y’a sɔrɔ Yuhana tun ma bla kaso ra fɔlɔ. 25 Ayiwa, sɔsɔri dɔ nana wuri Yuhana ta karamɔgɔdenw ni Yahudiya dɔ cɛ saninyari ko ra. 26 Yuhana ta karamɔgɔdenw tagara a fɔ Yuhana ye ko: «An karamɔgɔ, i ni cɛ min tun bɛ ɲɔgɔn fɛ Zuridɛn ba kɔ, i tun ka seereya kɛ min ta ko ra, a flɛ, a bɛ mɔgɔw batizera sisan; mɔgɔw bɛɛ fana bɛ tagara ale le kɔ.» 27 Yuhana ka o jaabi ko: «Ni Ala ma fɛn min di mɔgɔ ma, a tɛ se ka o sɔrɔ. 28 Aw yɛrɛ ye ne seere ye ko ne k’a fɔ aw ye ko: ‹Ala ka Kisibaga min layiri ta, ne tɛ o ye. Ala ka ne ci ka na a ɲa fɛ dɔrɔn.› 29 Kɔɲɔcɛ ta le bɛ kɔɲɔmuso ye. Kɔɲɔcɛ tericɛ kɔni lɔnin bɛ a kɔrɔ; ni a ka kɔɲɔcɛ kumakan mɛn, a bɛ ɲagari kosɛbɛ kɔɲɔcɛ ta kumakan kosɔn. Ne ta ɲagari ye o ɲɔgɔn le ye; o ɲagari fana dafara. 30 Ale ka kan ka bonya, ne ka kan ka dɔgɔya.
Jɔnyaban Ɲananagbɛ tɛmɛnin kɔ, Yesu bɔra Zeruzalɛmu, k’a damina ka mɔgɔw batize. Karamɔgɔdenw tun k’a lɔn ko mɔgɔ jusukun ka kan ka tɔɔrɔ i ta jurumunw kosɔn, sani i ye bange kokura, ani ko ni mɔgɔ ma lɔ i ta jurumunw na, kisiri tɛ kɛ. Ka batize ka jurumun yafa sɔrɔ, o tun ye tagamasiyɛn ye mn b’a yira ko i jusukun tɔɔrɔra i ta jurumunw kosɔn; nimisabaga b’a yira o le fɛ ko a b’a fɛ ka don jɛnɲɔgɔnyakura ra ni Ala ye.
Batizerikɛbaga tun bɔra a ta yɔrɔkɔrɔ ra, ka taga to ka mɔgɔw batise Enɔn, fɔ Zuridɛn kɛnɛgbɛ sahiliyanfan na. Mɔgɔw tun bɛ taga a fɛ o yɔrɔ ra, ka taga o ta jusukunnakow fɔ a ye; a tun bɛ o batize, ka o labɛn ka sɔn Yesu ma.
Yesu tun sekɔra, nka a ma teren ka taga Galile; a tun k’a damina ka mɔgɔ nimisabagaw batize jamana fan wɛrɛw ra. I n’a fɔ a ta fangatigiya tun ka bon, o ra mɔgɔ caman tun bɛ tagara ale fɛ ka tɛmɛ Yuhana kan. O kɛra sababu ye ka sɔsɔri dɔ lawuri o jɛnkuru fla cɛ. Ɲininkari kɛra ko: Nin kuntigi fla ra, juman kelen le ka kan ka ni saninyari ta baara ye ka mɔgɔw bɔ o ta jurumunw na? O fla ra, juman le ka surun Ala ra? O ɲininkari nafa tun ka bon kosɛbɛ, sabu min ye karamɔgɔ ɲuman ye o fla ra, mɔgɔw tun b’a fɛ ka tugu o le kɔ, ka kɛ o ta karamɔgɔden ye. Ne balema, i bɛ i ta bato kɛra min kosɔn, yala i miirira o tigi cogo ra wa?
Batizerikɛbaga k’a yɛrɛ mina a kana mina jan na. Yesu ta baara ɲacogo, o celiya m’a sɔrɔ, nka a k’a faamu ko dan tun bɛ ale yɛrɛ ta baara. A sɔnna a ma k’a fɔ ko: « Mɔgɔ gbansan si tɛ se ka nin baaraɲuman ɲɔgɔn kɛ a kelen na. A tɛ se k’a kɛ ni Ala m’a ta sebagaya di a ma, ani a ta baraka ani a tɔnɔ.» Nka anw kɔni, anw bɛ an yɛrɛ waso, ka an yɛrɛ bonya an ta lɔniya kosɔn Ala ko ta fan fɛ, ani an ta Ala daaricogow, ani an ta kumacogo ɲuman. Ni an ka kan ka nɛɛmafɛn dɔ sɔrɔ, o bɛ bɔ Ala le fɛ. An kɛra Ala ta jɔnw le ye, minw man kan ni foyi ye, hali ni an ka Ala sago kɛ. Batizerikɛbaga k’a yɛrɛ majigi, a m’a yɛrɛ bla baara dɔw ra, minw ka bon a ma, nka a ka Ala kelenpe le bonya.
Yuhana batizerikɛbaga ka Yesu ko seereya kɛ tuun a ta karamɔgɔdenw ye. A ko ale tɛ Masiya ye. I b’a sɔrɔ ko a tun b’a miiri ko Yesu dontɔ Zeruzalɛmu, jama bɛna a kunbɛn ni bonyaba ye, nka a ma kɛ ten. Yesu belen tora ka mɔgɔw batize minkɛ, o ko ka Batizerikɛbaga hakiri ɲagami, nka o bɛɛ n’a ta a ka Ala kan mina. Ale tun ye mɔgɔ dɔ ye min blara ka na Kirisita ɲa fɛ ka na a ta sira labɛn dɔrɔn.
Ala ka min yira Yuhana ra, a tora o kan. A k’a yira ko Yesu le ye kɔɲɔcɛ ye, ale le bɛ nimisabaga saninya, k’a ko ni batɛmu ji ye, k’a kɛ i ko kɔɲɔmuso. Bi, Nin Saninman bɛ lanabagaw bɛɛ jɛn ka o kɛ kelen ye, i n’a fɔ Pɔli k’a fɔ cogo min na, ko: «An kɛra Kirisita farikolo yɔrɔ dɔw ye, Kirisita kɛra farikolo kungolo ye; An kɛra farikolo kelen ye ale ta jɛnɲɔgɔnya ra.» Kirisita tɛ an ta kititigɛbaga ye tuun, nka an Kisibaga lo, kɔɲɔcɛ lo. Kɔɲɔya tagamasiyɛn ni a ninsɔndiya, o bɛ an ta jigiya yira an na, an bɛ min sɔrɔ Kirisita sababu ra.
Batizerikɛbaga tun tora yɔrɔjan, a bɛ Egilisi bonyacogo flɛ ka ɲagari. A tun bɛ lɔ Yesu kɛrɛ fɛ, nka a tun tɛ don Yesu ta jamakuru cɛ ra. A k’a fɔ ko ale ye tericɛ kankelentigi le ye. Ka Batizerikɛbaga to a danna kongokolon kɔnɔ, Yesu donna Zeruzalɛmu, ka kabakow kɛ, ani ka mɔgɔw waaju. Batizerikɛbaga ka Ala ta Masaya bonyatɔ kɔrɔsi, ka ɲagari o ra. Kɔɲɔcɛ kumakan ni a ta nɔɔrɔ k’a ninsɔndiya. Kirisita ta baara ɲacogo kibaroyaw mankan diman sera a ma, i ko sankolo fɔrifɛn dɔ mankan. O ra, Kirisita ta ɲumanya ka Batizerikɛbaga jusu ladiya dɔɔni, ale min tun derira kongokɔnɔyaala le ra, sabu a fana tun bɛ sera a ta baara laban yɔrɔ ra. Ale kɛra o kɔɲɔya ɲanagbɛ labɛnbaga dɔ ye minkɛ a ɲagarira o ra.
Yuhana tun labɛnna saya kama minkɛ, a tun t’a fɛ ka dɔ fara a yɛrɛ ta karamɔgɔdenw kan tuun. A tun b’a fɛ ale ye dɔgɔya le, fɔ ka taga ban, janko Egilisi ye se ka bonya.
Ele sɛbɛkaranbaga, jɔn le bɛ aw ta jɛnkuruw ɲamɔgɔ ye? Yala bɛɛ le bɛ siyɛn tara janko ka kɛ ɲamɔgɔ ye wa, walama bɛɛ bɛ yɔrɔ to tɔw ye? Aw ye kɛ bɛɛ ra fitini ye, janko Kirisita ye bonya aw kɔnɔ. Aw y’a fɔ i ko Yuhana: «Ale ye bonya, ne ye dɔgɔya.»
ƝININKARI:
- Kirisita ye kɔɲɔcɛ ye kɔrɔ juman le ra?