Previous Lesson -- Next Lesson
3. Karamɔgɔden wɔɔrɔ minw kɛra fɔlɔw ye (Yuhana 1:35-51)
YUHANA 1:47–51
47 Kabini Yesu ka Natanayɛli natɔ ye, a ko: «Nin ye Izirayɛliden yɛrɛworo le ye, nanbara tɛ min jusukun na.» 48 Natanayɛli ko: «Ele ka ne lɔn cogo di?» Yesu ko: «Ka i to torosun kɔrɔ, sani Filipe ye taga i wele, ne ɲa tun bɛ i ra yi.» 49 Natanayɛli ko: «Rabi, Den min bɔra Ala ra, ele lo; ele le ye Izirayɛli ta masacɛ ye.» 50 Yesu ko: «Ne k’a fɔ i ye minkɛ ko ka i to torosun kɔrɔ, ko ne ɲa tun bɛ i ra, o dɔrɔn le kosɔn i lara ne ra kɛ. I bɛna ko dɔw ye minw ka bon ni nin ye.» 51 Yesu ko fana ko: «Can ra, ne b’a fɔ aw ye ko lon dɔ aw bɛna sankolo dayɛlɛnin ye, ka Ala ta mɛlɛkɛw yɛlɛntɔ ni o jigitɔ ye ne kunna, ne Min kɛra Adamaden ye.»
Natanayɛli dabari banna dɔɔni, tuma min a k’a ye ko Yesu sera ka ale ta miiriya lɔn k’a fɔ. Natanayɛli tun ye Ala ɲinibaga ye ka kaɲa ni Layirikɔrɔ ta Ala ɲini sira ye, sabu a tun lɔra a ta jurumunw na Yuhana Batizerikɛbaga ɲa kɔrɔ, a fana tun bɛ Ala ta Masaya makɔnɔna ni a jusukun bɛɛ ye. Ale ta Ala ɲini ko tun tɛ farisiw ta flankafuya ɲɔgɔn ye, nka a ta cogo tun bɛ i ko mɔgɔ minw jusu tun kasinin lo o ta jurumunw kosɔn, fɔ o bɛ Ala daari ko a ye Masiya ci ka na, min ye Kisibaga ye.
Yesu ka o daarikan lamɛn, sabu a tora yɔrɔjan ka Natanayɛli ye, a k’a kinbiri gban a bɛ Ala daarira yirisun jukɔrɔ. Ka mɔgɔ ta ko dogoninw ye ka o fɔ, o sebagaya ye Ala ta baara le ye.
Yesu m’a kɔ don Natanayɛli ra, nka a k’a jate mɔgɔ terennin ye, k’a yira ko mɔgɔ minw ka o jigi la Layirikɔrɔ ta layiriw kan, ka to ka Kirisita nawagati makɔnɔ, ko Natanayɛli ye o dɔ ye.
Kirisita ka Natanayɛli tando cogo min na, o ka Natanayɛli ta sigiya bɛɛ ban. A sɔnna Yesu ta kuma ma, k’a bonya; tɔgɔ minw dira Masiya ma Biblu kɔnɔ a ka o fɔ, ko: Ala Dencɛ ani Izirayɛli ta Masacɛ. Natanayɛli ka o tɔgɔ minw fɔ, a tun bɛ se ka kɛ a faga sababu ye, sabu sariyakaramɔgɔw ani yahudiyaw ta ɲamɔgɔw tun tɛ sɔn o ko ma, ko Dencɛ bɛ Ala fɛ. O kuma ɲɔgɔn tun ye Ala tɔgɔcɛn kuma le ye olugu fɛ. Natanayɛli lɔra a ra fana k’a fɔ minkɛ ko mɔgɔ dɔ ye Izirayɛli ta Masacɛ ye, o ko tun bɛ se ka kɛ sababu ye k’a to Herodi ye wuri a kama k’a tɔɔrɔ, ani Rɔmu ta fagamaw fana tun bɛ se k’a lalɔ. Nin cɛ Ala ɲinibaga jusukun gbɛnin k’a yira ko layiri minw yirara ciraw ra, ko ale ka o layiriw nafa bonya faamu. Sani a ye siran adamadenw ɲa, a siranna Ala ɲa, k’a bonya k’a tɔgɔ wele ko Fa, ko gbɛlɛn minw tun bɛ se k’a sɔrɔ a ma o jate.
Karamɔgɔdenw si tun ma nin tɔgɔw di Kirisita ma fɔlɔ. Kirisita ma ban o tɔgɔw ma minkɛ, o bɛ se ka bara an na, ani k’a ye ko a ka sankolo dayɛlɛnin ko fɔ Natanayɛli ye, k’a jusukun magaya. Mɛlɛkɛ dɔw tun bɛ Kirisita lamini wagati bɛɛ, mɔgɔ tɛ mɛlɛkɛ minw ye; olugu tun bɛ yɛlɛ sankolo ra, k’a ta kabakow yira Fa Ala ra, ani ka kɔsegi ka na Dencɛ fɛ, ni nɛɛma caman ye o boro. Yakuba ta siko ta kow bɛ dafa o cogo le ra, sabu nɛɛma bɛɛ dafanin bɛ Yesu le ra. A bɛ i n’a fɔ Pɔli k’a sɛbɛ cogo min na, ko: «An ye Ala tando, an Matigi Yesu Kirisita Fa; ale le ka Nin Saninman ta barakaw bɛɛ di an ma sankolo yɔrɔw ra, Kirisita ta jɛnɲɔgɔnya kosɔn.» (Efɛsikaw 1:3) Kabini Kirisita bange wagati ra ni a batize wagati ra, sankolo dayɛlɛnin tora. Fɔlɔfɔlɔ, sankolo tun datugunin lo Ala ta dimi kosɔn, fɔ mɛlɛkɛ dɔw tun bɛ sankolo dondaw kɔrɔsira ni famuruw ye o boro. Mɔgɔ bɛ don da min fɛ ka taga Ala fɛ, o dayɛlɛnin lo sisan Kirisita sababu ra.
Nin ye a siɲaga fɔlɔ ye ko Yuhana bɛ Kirisita ta kuma fɔcogo ta, a bɛna to ka kuma min ɲɔgɔn fɔ siɲagako caman, ko: « Can ra, can ra, ne b’a fɔ aw ye ko...» Nin nɛɛma wagati bonyakojugu fɛ, o nɛɛma ko bɛ tɛmɛ adamaden ta hakiri dan kan; o bɛɛ n’a ta adamaden mako bɛ o nɛɛma ra, ka o kɛ a ta lanayakura jusiginan ye. Ni Yesu bɛ o kuma fɔ ka sinsin a kan nin cogo ra, o b’a yira ko an ka kan ka lɔ, ka miiri a fɔkun na, sabu min bɛ na o kumafɔcogo kɔ fɛ, o ye Ala ta fɛn yiranin le ye min kɔrɔ ka bon an ta faamuri ma.
O kumabaw fɔnin kɔ, Kirisita ka Natanayɛli ta seereya kumaw yɛlɛma, janko tɔɔrɔ si ka na se a ma, walama tɔɔrɔ ka na se Egilisi kura ma. A m’a gbɛya k’a fɔ ko ale le ye Masacɛ ye, min layiri tara, ani Ala Dencɛ, nka a k’a yɛrɛ tɔgɔ la ko ‹Min kɛra adamaden ye›. Yesu tun bɛ o tɔgɔ le kɛ k’a yɛrɛ ko fɔ tuma caman na. A farikogo dɔrɔn le tun blara halakiri kama. A kɛra i n’a fɔ anw – nin ye kabakoba ye, ko Ala Dencɛ kɛra adamaden ye, janko ka sa i ko Ala ta Sagaden anw nɔ ra.
Nka Yesu tɔgɔ min ye ko ‹Min kɛra adamaden ye›, o tɔgɔ bɛ gundo dɔ le yira, min fɔra Daniyɛli ta kitabu kɔnɔ. ‹Min kɛra adamaden ye›, Ala ka kiti ko don o boro. Natanayɛli nana k’a faamu ko Yesu ma kɛ Masacɛ ni Dencɛ dɔrɔn ye, ko nka ale le kɛra dunuɲa ta kititigɛbaga ye fana – Alaya bɛ min na, o ka adamadenya cogo ta. O cogo ra, Yesu ka o cɛ lanabaga kɔrɔta ka lanaya dɔ di a ma min baraka ka bon ni fɔlɔ ta ye. O lanaya ɲɔgɔn sɔrɔko tun bɛ se ka gbɛlɛya, sabu Yesu tun ye kanbelen ye, ani kongokɔnmɔgɔ. Nka lanaya baraka ra, karamɔgɔdenw sera k’a ta nɔɔrɔ dogonin ye a kan – ka sankolo dayɛlɛnin ye a kunna.
DAARIKAN: An b’i bato, Ala Dencɛ, ani dunuɲa bɛɛ ta kititigɛbaga. An man kan ni foyi wɛrɛ ye ni i ta dimi tɛ, nka an bɛ i ta yafa daari, i ta nɛɛma kosɔn, ani ka i ta makari daari an teriw kosɔn. I ta nɛɛmaw caya Ala ɲininbagaw bɛɛ kan, janko o ye se ka i ye, ka i lɔn, ka i kanu, ka o jigi la i kan, ani ka bonya i ta lɔnniya ra, ani ka o jigi fana bonya.
ƝININKARI:
- Mun le bɛ nin tɔgɔ fla siri ɲɔgɔn na – ‹Ala Dencɛ› ani ‹Min kɛra adamaden ye›?