Previous Lesson -- Next Lesson
2. Batizerikɛbaga ta seereya barakamanw Kirisita ko ra (Yuhana 1:29-34)
YUHANA 1:31-34
31 Ne yɛrɛ fana tun ma a lɔn fɔlɔ; nka ne nana mɔgɔw batize ji ra, janko o ye kɛ sababu ye k’a to ne ye a yira Izirayɛlimɔgɔw ra. 32 Yuhana ka seereya kɛ Yesu ta ko ra, ko: «Ne ka Nin Saninman jigitɔ ye ka bɔ sankolo ra i ko jɛnɛtugani ka na sigi a kan. 33 Ne yɛrɛ tun ma a lɔn. Nka min ka ne ci ka na mɔgɔw batize ji ra, ale tun k’a fɔ ne ye ko: ‹Ni i nana Nin Saninman jigitɔ ye ka na sigi mɔgɔ min kan, o tigi le bɛna mɔgɔw batize ni Nin Saninman ye.› 34 Ayiwa, ne nana a ye ten, ne fana ka o seereya kɛ, ko Den min bɔra Ala ra ko nin lo.»
Ka Batizerikɛbaga si to san 30, Ala k’a wele, ka Kirisita ta sira labɛn, ani ka Kirisita yira mɔgɔw ra. O ko sera ka kɛ batizeri le sababu ra, o min tun bɛ mɔgɔ nimisabaga jusukun yɛlɛma, ka o kɛ Kirisita makɔnɔbagaw ye. Ala tun ka layiri ta Batizerikɛbaga ye, ka fɛn dɔ yira a ra, mɔgɔ si tun ma fɛn min ye fɔlɔ, o ye Nin Saninman jigitɔ ye Kirisita kan. Nin sigira Yesu kan a damana cogo le ra. Layirikɔrɔ ta ciraw ka Ala Nin sɔrɔ wagati dɔɔni dɔrɔn le, nka Kirisita fanin tora a ra tuma bɛɛ. Nin Saninman bɛna lanabagaw fa Ala ta sebagaya ra, i ko yiri min flaburuw nugunin bɛ to wagati bɛɛ.
Yesu ni Yuhana tun lɔnin bɛ ɲɔgɔn kɔrɔ Zuridɛn bada ra; Sankolo dayɛlɛra o wagati ra, Yuhana ka Nin Saninman ye i ko jɛnɛtugani gbɛman, sankolo kɔnɔ, hɛra ni ɲumanya tagamasiyɛn.
O Nin ma jigi Batizerikɛbaga le kan, walama nimisabagaw, nka a terenna ka na jigi Yesu le kan, k’a yira Batizerikɛbaga ra ko Nazarɛtika kanbelen tun ka bon ni ciraw ni danfɛnw bɛɛ ye. Batizerikɛbaga tun k’a lɔn ko Ala le tun bɛ ale ɲa kɔrɔ, o tun bɛ Matigi Ala min makɔnɔna.
Batizerikɛbaga fara tandori ni ɲagari ra i ko wagati min Mariyamu tun tagara a balemuso Elizabɛti fɛ. O wagati ra, ka Yuhana to a bamuso kɔnɔbara ra, a ɲagarira fɔ ka lama (Luka 1:36-45).
Batizerikɛbaga k’a lɔn ko Kirisita le ye Nin Saninman dibaga ye. A ma o gundo mara a kelen ta ye, nka a k’a lase mɔgɔw ma ka pɛrɛn, ko: «Matigi nana; a bɛ yan, nka a ma na kiti le tigɛ, a nana ni kanuya ni ɲumanya le ye. Mɔgɔ gbansan tɛ, nka Ala Dencɛ lo, min fara Nin Saninman na. Ni mɔgɔ min ka sɔn a ma ko Yesu ye Ala Nin ye, o tigi bɛ lɔ a ra fana ko Ala Dencɛ lo.» O cogo ra a ka Kirisita nakun ɲafɔ: a nana ka na nimisabagaw batize Nin Saninman na. Ala ye Nin ye; A Dencɛ ye Ala Nin ye, min kɛra farisogo ye. A ka di a ye k’a ta karamɔgɔdenw fa o Nin ra, min ye Ala ye : Ala ye kanuya ye.
Ne balemacɛ, yala i fara Nin Saninman na wa ? Yala i ka Kirisita ta sebagaya sɔrɔ i ta ɲanamanya ra wa ? Ni i ka la Kirisita ta saraka ra, ka sɔn i ta jurumun yafa ma, Ala bɛ o koɲuman kɛ i ye. Ni mɔgɔ min ka sɔn Ala ta Sagaden ta yafari ma, o tigi bɛ fa Nin Saninman na. Ala Dencɛ b’a fɛ k’a ta nɛɛmafɛnw di lanabagaw bɛɛ ma.
DAARIKAN: Ala Dencɛ, an b’i bato, ka i tando. I ka i yɛrɛ majigi anw kosɔn, ka an ta jurumunw doni ta. An b’i fo an ta jurumun yafa kosɔn, i ka i ta jori bɔn gbengbenyiri kan ka yafa min kɛ an ye. An b’i fo fana i ta Nin Saninman ta sebagaya kosɔn, i ka min kɛ an kan, ani i kanubagaw bɛɛ kan. Minw bɛɛ belen bɛ sunɔgɔ ra o ta kojuguw ni o ta jurumunw na, olugu lakunu. O jusukun yɛlɛma ka o jusukun fa n’i ta can ye.
ƝININKARI:
- Mun kosɔn Yesu le kɛra Nin Saninman dibaga ye?