Previous Lesson -- Next Lesson
2. Batizerikɛbaga ta seereya barakamanw Kirisita ko ra (Yuhana 1:29-34)
YUHANA 1:29-30
29 o dugusagbɛ, Yuhana ka Yesu natɔ ye a fɛ; a ko mɔgɔw ma ko: «Ala ta Sagaden le ye nin ye, min bɛna dunuɲamɔgɔw ta jurumun bɔ o kunna. 30 Ne tun ka ale le ko fɔ aw ye ko mɔgɔ dɔ bɛna na ne kɔ fɛ, ko nka a bɛ ne ɲa, sabu sani ne ye woro, ale tun bɛ yi kakɔrɔ.
Fɔ ka na se nin wagati ma, Barizerikɛbaga tun b’a miiri ko Kirisita tun bɛna kɛ jamana ta kow yɛlɛmabaga le ye, min bɛna jamanadenw saninya, ka siman fiyɛ ka ɲaga woloma ka bɔ kisɛ ra; tun b’a miiri ko Kirisita bɛna kɛ mɔgɔ dɔ ye min bɛna na ni dimiba ye, ni a ta jende ye a boro, ka na yiri cɛjuguw bɛɛ tigɛ. Batizerikɛbaga fɛ, Kirisita nako tun bɛ Ala ta Dimilon le yira. A k’a fɔ minkɛ ko: «Masiya bɛ an cɛ ra», o kuma ka siranya bla a ta karamɔgɔdenw na, sabu o hakiri jigira o ta jurumun kow bɛɛ ra. O tun b’a miiri ko Ala ta kiti bɛna bara ka na ben olugu kan, hali a tɛ o lasɔmi.
Ka Kirisita si to san bisaba, a gbarara Batizerikɛbaga ra, ko a ye ale batize. Nka Batizerikɛbaga ma sɔn; a ko: «Ne le ka kan ka batize ele fɛ.» (Matiyu 3:13-17). Yuhana tun b’a fɛ Yesu ye ale ta jurumunw yafa a ma. Nka Yesu k’a fɔ k’a gbɛlɛya ko Yuhana ka kan ka ale batize janko ka Ala sago bɛɛ dafa.
Yuhana k’a faamu ko Ala Saninman nana, nka a nakun tun tɛ ka na mɔgɔw halaki, a nana o ta jurumunw doni le ta. A sɔnna ka batize adamadenw bɛɛ nɔ le ra. Matigi ta nako tun man kan ka kɛ ni dimi ye, nka a bɛ kɛ ni bɛn ni yafa le ye. Ka Batizerikɛbaga to Jɛnɲɔgɔnyakɔrɔ dan na, a sera ka Jɛnɲɔgɔnyakura kow ye ka se fɔ yɔrɔjan, Ala ta kanuya kɔsɔn. O miiriya kura k’a ta hakirinankow bɛɛ yɛlɛma pewu.
O dugusagbɛ, Yesu nana tuun minkɛ, Yuhana k’a yira mɔgɔw ra, k’a fɔ ko: «Aw y’a flɛ k’a faamu, aw ye aw ɲaw yɛlɛ k’a flɛ, ale lo!» A ma na ni mankanba ye, walama ni mɛlɛkɛ waga camanba ye, nka Ala ta Kuma sera yɔrɔ bɛɛ, janko bɛɛ ye a sɔrɔ k’a nafa lɔn. An tun bɛ Saninman min makɔnɔna, nin kanbelen le kɛra o ye, Matigi yɛrɛ lo, dunuɲamɔgɔw jigi lo.
Yuhana tun t’a fɛ ko mɔgɔw ye nɔrɔ o ta miiriya kɔrɔ ra Masiya ta ko ra, ko Masiya bɛna jamana fangatigiya ta, k’a juguw kɛrɛ ni muru ye ka se sɔrɔ o kan. Yesu tun ye Ala ta sagaden le ye, min majiginin lo, ani a sabarinin lo; Zuda ta Jara barakaman sesɔrɔbaga tun tɛ.
Yuhana fanin Nin Saninman na, a k’a fɔ ko: «Nin Yesu le bɛ dunuɲamɔgɔw ta jurumunw doni ta. A sɔnna ka kɛ Ala ta Sagaden ye, sagaden min tun ye sarakakow tagamasiyɛn ye fɔlɔfɔlɔ. Ale kelen le bɛ se ka kɛ adamadenw bɛɛ Lɔyɔrɔ Tabaga ye. A ta kanuya baraka ka bon, a nafa ka bon fana. Ale le ye Saninman ye, a fana bɛ to o saninmanya ra, hali ni a bɛ an bɛɛ kelen kelen ta jurumunw doni ta.» Min ma jurumun si kɛ ka ye, Ala ka ale bla jurumunkɛbagaw nɔ ra anw kosɔn, janko an ye jate mɔgɔ terenninw ye Ala ɲa kɔrɔ Kirisita sababu ra.
Batizerikɛbaga ta seereya ye kibarodiman kunba dɔ ye, i n’a fɔ Biblu sɔnkun. A ka nin faamu ko Kirisita ta nɔɔrɔ bɛ ye a ta tɔɔrɔ le fɛ, a ka min sɔnmina anw kosɔn. Kirisita ta kisiri ko ye dunuɲa bɛɛ ta le ye, a dira mɔgɔ suguya bɛɛ ma, ani siyaw bɛɛ. Naforotigiw ani fagantanw, denmisɛnw ani mɔgɔkɔrɔbaw, sɛbɛlɔnbagaw ani sɛbɛlɔnbariw, bɛɛ nin b’a ra. Kunu ta jurumunw, bi ta, ani sini ta, Kirisita bɛ o bɛɛ yafa an ye. Kirisita ta saya bɛ jurumun bɛɛ kafari. A bɛ sa an nɔ ra ka jurumun kafari min kɛ o dafanin lo.
Kabini a nalon fɔlɔ ka na kɛ Sagaden ye, tɔɔrɔkow sera a ma, nka a ma ban mɔgɔjuguw ra, a m’a kɔ don yɛrɛbonyabagaw ra fana, nka a ka o kanu yɛrɛ le. A k’a lɔn ko o mɔgɔw tun bɛ jurumun ta jɔnya ra hali bi, o kosɔn a tun b’a fɛ ka sa o nɔ ra.
Batizerikɛbaga k’a fɔ a lamɛnbagaw ye ko Ala ta Sagaden ka o bɔsi Ala ta dimi ma. Ale le tun kɛra saraka ye, sagaden min tun ka kan ka sa o nɔ ra. Minw tun bɛ o yɔrɔ ra, i b’a sɔrɔ ko olugu ka o yɛrɛ ɲininka ko mɔgɔ kelen bɛ se ka tɔw ta kojuguw doni ta cogo di ? Yuhana ta kumaw ka o ɲaw yɛlɛ, nka o tun tɛ se k’a faamu ko Yesu ta tɔɔrɔ bɛna se fɔ gbengbenyiri ma. Mɔgɔ tɛ ko min miiri, o le tun bɛna Ala ta ko latigɛninw dafa Kirisita sababu ra.
Barizerikɛbaga sekɔra kuma kan tuun, ko Yesu le tun bɛna kisiri ko dafa, sabu ale le ye Matigi banbari ye: «sani ne ye woro a tun bɛ yi kakɔrɔ, ani a bɛ ne ɲa.»
Kirisita ta nɔɔrɔ tun ka bon, nka a ta kanuya min sera fɔ gbengbenyiri kan, o ka o nɔɔrɔ kɔnɔnɔyɔrɔ yira an na. Kibarodiman sɛbɛbaga k’a fɔ ko : « An k’a ta nɔɔrɔ ye; a dulonna gbengbenyiri kan, ka tɔɔrɔ ; kanuya min bɛ an kisi, a ka o bonya yira.
DAARIKAN: E, Ala ta Sagaden saninman min bɛ dunuɲamɔgɔw ta jurumun doni ta, makari anw na. E, Ala Dencɛ banbari, min kɛra adamaden ye, an ta jurumunw yafa na ma. E, Nazarɛtikacɛ majiginin, ele min ma i yɛrɛ fisaya an ma an ta jurumunw kosɔn, an b’i bato, sabu i ka an kanu, ka an kɛ mɔgɔ dafaninw ye i ta jɛnɲɔgɔnya ra gbengbenyiri sababu ra. An b’i kanu, an b’i fo, sabu i ma na i ko kititigɛbaga, i nana i ko Sagaden le. An lara i ra, sabu i ka adamadenw bɛɛ ta jurumunw bɔ o kunna. Hakiritigiya di an ma, janko an ye se k’a fɔ mɔgɔ tɔw ye ko i ka o kunmabɔ.
ƝININKARI:
- Ni a fɔra ko «Ala ta sagagen» o kɔrɔ di »?