Waters of Life

Biblical Studies in Multiple Languages

Search in "Peul":
Home -- Peul -- Matthew - 017 (Jesus' birth)
This page in: -- Arabic -- Armenian -- Azeri -- Bulgarian -- Chinese -- English -- French -- Georgian -- Hausa -- Hebrew -- Hungarian? -- Igbo -- Indonesian -- Javanese -- Latin? -- PEUL -- Polish -- Russian -- Somali -- Spanish? -- Telugu -- Uzbek -- Yiddish -- Yoruba

Previous Lesson -- Next Lesson

MATTA - Tuubee ko fii laamu Almasiihu on ngun bhadike!
Jandeeji suutaadhi ka Linjiila Almasiihu on no Matta yottiniri mo non
SOBBHUNDU 1 - Piiji arani dhin ka golle Almasiihu on (Matta 1:1 - 4:25)
A - Fii jibineede annabi Iisaa e paykunyaagal makko ngal (Matta 1:1-2:23)

2. Fii jibineede Iisaa nden e fennyineede innde makko nden (Matta 1:18-25)


MATTA 1:22-23
22 Dhun fow wadhiri fii ko Joomiraadho on daalirnoo annabaajo on kon no laatora, wonde: 23 Awa, jiwo mo andaali gorko on reeday, o firtoo boobo gorko, o innee Imanu’iila, ko woni firo dhun ko: Alla no wondi e men.

Malaa’ikaajo on tentinani Yuusufu wonde ko immorde e Ruuhu Seniidho on yumma Mariyama soworii bhiddho on. O andintini mo kiitol ngol annabi Isaaya hiitinoo ngol duubhi 700 adalde dhun (Isaaya 7:14; 9:6). Allaahu on no faalaa faaminde Yuusufu wondema oo kaawake hawniidho hinaa nii tun laatori, kono ko hiitanoodhun ko neebhi, ko kisiyee haqiiqaajo on non, e kattudi taariika jamaa Yahuudiyankeebhe bhen.

«Fodaadho on» ko bhiddho mo jiwo mo andaa gorko jibini on. Innde makko nden ko Imanu’iila (e haala Yahuudiyanke) dhun no firi «Alla no wondi e men». Rewrude e makko, Alla aray, o hodhida e jamaa makko on. Gila ko junuubu on naati ka nder aduna, Tagudho on seedii e bhe o tagi bhen bhayru himo toowi fota, ko o seniidho kadi. Tippude e darja makko on e laabhal makko ngal, himo haani happande junuubu on. Bhayru mbaadi ndi o mari ndin weltodataa e junuubu, junuubankeejo woo kadi waawataa wonude yeeso makko. O donkinay dendaangal bhen bhe hebulaaki tuubude, ruttoo kuudhe mun aaliidhe dhen.

Ndee innde «Imanu’iila» no yawti faamu men ngun. Allaahu on wontii neddho hakkunde men, o moyyhintinii hakkunde makko e aduna on, o addii bhuttu ngun e o naadii en ka ahadi e ka yubbhondiral hakkunde men e makko. Adii arugol Almasiihu on, hari ko ka juulirde mawnde Allaahu on hodhi, kono jooni o «Wontii neddho». Allaahu on no hodhi hakkunde jamaa makko on rewrude e Imanu’iila makko fodaadho on, e maanaa annabi Iisaa dhoo yo o hodhu e fee maande wonde nden e Serubiinaaji dhin.

Allaahu on ebbhii kuugal hawniingal fii moyyhintingol hakkunde makko e yimbhe bhen. Mbaadiiji dhidhi no mottindiraa e aaden Tefoowo on, on gaynoowo wonugol nyaawoowo on fii «ittugol sawru makko ndun e hoore men» (Ayyuuba 9:34), bhayru himo bhornii mbaadi ndi Alla ndin e ndi neddhanke ndin. Rewrude e dhun, ko gundoo moolanaadho e yurmeende moolanaande fewtudhen e mun. E fee tagoore nden, hidhen sutii Alla toowudho wondho dow men on. E fee sariya on, hidhen sutorii mo wa nyaawoowo hulbhinoowo en. Kono e fee Linjiila on, hidhen sutorii mo wa «Imanu’iila» heewudho on giggol, Alla no wondi e men, himo yaadude e men e nder mbaadi men ndin, ko o bhadiidho e nabhideteedho. E ndun sobbhundu dhon, Jattinoowo on no andintinde fii giggol makko ngol.

On saliidho tuubude ko wondudho e dhayne. O dhaynii hoore makko, o dhaynii yimbhe bhen, tentinii nde yibbhe bhen no hiwroo mo, wi’a: «Yo Alla wondu e maa.» E hino ko bhe haanunoo wi’ude mo kon: «Alla no lindodirde e maa», sabu tikkere Alla nden no bhangi e hoore bhen bhe hulataa Alla e bhe fewaa bhen fow.

Jibinande Almasiihu on no janni en wonde laabhal Alla ngal ko humodirngal e giggol makko ngol e yurmeende makko nden. Bhiddho on jibina ka nder dingiraa hoore o aldaa e junuubu, ko o laabhudho fii no o moyyhintinira hakkunde men e Alla seniidho on. O montii junuubaaji men dhin, o ronditanike en tikkere nyaawoore haanaade nden faweede e men. O foolii nde wootere fii fow kala heedaango heedindingo en e Alla. Ko Almasiihu fewnoowo on e yurmeteedho on woni tefanoowo en on hakkunde men e Alla.

Diina woo diina, aaden woo aaden, jogaaki feere wi’ugol «Alla no wondi e men» yawti bhen jabhubhe Almasiihu on. E fee makko kanko Almasiihu on, Alla wontii neddho e himo huuwude. Bhen humiibhe e makko e nder nundhal, hendoto Ruuhu-Seniidho ardotoodho on gomdhinbhe bhen fow e nder laabhal ngal e goonga on e golle dhen. Gooto waawataa wi’ude wonde «Alla no wondi e men» si tawii hinaa Ruuhu makko on ardii mo e si o alaa yi’ude nafa kuugal makko ngal.

On dhabbhoowo Alla no nhaldhi fii nelal weebhungal wongal ngal e Iisaa neddho on, «Alla no wondi e men». Teddingol ngol torndeeji dhin e sariyaaji dhin e nyalaadhe juuleteedhe dhen e mun e beyti dhin ka dewe bhadindirta en e Alla si wonaa hara en humondir e Tefoowo mo Alla immini on. En handaa e ardu makko ndun, e hin le non debbo mo andaa gorko on hebhii bhiddho, o innaama Imanu’iila. Ko ebbhoore Alla nden non gila ko neebhi.

TORAARE: Mi sujjanii ma yaa an Alla jom laabhal sabu giggol maa ngol. Hita a bugito lan, yurme lan. A aririi yankinaarre haa e an e nder dingiraa, a fawtike junuubaaji an dhin, a labbhinii lan e kala bonnere. Mi jarnii ma fii ko fodudhaa kon a accitataa lan.

LANDAL:

  1. Ko hondhun woni firo ndee innde «Imanu’iila»? Ko hondhun wadhi si Almasiihu on no handi e nden innde?

www.Waters-of-Life.net

Page last modified on May 18, 2012, at 08:58 AM | powered by PmWiki (pmwiki-2.3.3)