Waters of Life

Biblical Studies in Multiple Languages

Search in "Peul":
Home -- Peul -- Matthew - 018 (Jesus' birth)
This page in: -- Arabic -- Armenian -- Azeri -- Bulgarian -- Chinese -- English -- French -- Hebrew -- Hungarian? -- Indonesian -- Latin? -- PEUL -- Polish -- Russian -- Spanish? -- Uzbek -- Yiddish

Previous Lesson -- Next Lesson

MATTA - Tuubee ko fii laamu Almasiihu on ngun bhadike!
Jandeeji suutaadhi ka Linjiila Almasiihu on no Matta yottiniri mo non
SOBBHUNDU 1 - Piiji arani dhin ka golle Almasiihu on (Matta 1:1 - 4:25)
A - Fii jibineede annabi Iisaa e paykunyaagal makko ngal (Matta 1:1-2:23)

2. Fii jibineede Iisaa nden e fennyineede innde makko nden (Matta 1:18-25)


MATTA 1:24-25
24 Bhay kanko Yuusufu o finii, o wadhi ko malaa’ikaajo on yamiri mo kon, o yhetti bheyngu makko, o addi ka makko. 25 Kono laatii o yiidaali e debbo on haa nde o firtinoo on bhiddho gorko, o inni mo Iisaa.

Yuusufu gomdhini daaluyeeji malaa’ikaajo on, o yhetti debbo mo o yhami on, o watti mo bheyngu makko. O radhii kala sikkitaare ka ruuhu makko, o tippi e ko Allaahu on holli mo kon. Rewrude e ngal kuugal, o naati ka mojobere gomdhinbhe nantubhe innde bhen.

Yuusufu wayli miijo, o dhoftii yamiroore malaa’ikaajo on nden. O yhetti bheyngu makko, hara o yeddaali ko bhuri e fandhude, ko fii himo catii e dhoftagol ko o hollaa kon immorde ka kammu. Hinaa ko haani non hendagol tindinooje hawnordhe wano non. E hin le hande kadi, Alla no andinde en tindinooje makko dhen rewrude e Ruuhu-Seniidho on: e nder torndeeji dhin rewrude e daaluyee makko on, e maandeeji dhi o yedhata dhin, e golle gollaydhe dhen ka fondo men e waajuuji taalibaabhe annabi Iisaa bhen. No woniri woo, tindinooje yaajudhe wondhe dhen ka daaluyee Alla windaadho on no haani yaadude e tindinooje dhe hendinadhen dhen. E kala fokkitande ka nder ngurndan men, tentinii e saa’iiji wano dhii dhi Yuusufu feyyhini, hidhen haani toraade Alla yo o ardo on.

Yumma Mariyama yewtaali fii ko Alla fennyinani mo kon, maa fii huunde hawniinde hebhude mo nden. O torii Alla, o gomdhini, o fawi hoolaare makko nden e Alla, on mo o halfinii on. Joomi on non no faami fii tippirooji nder-nderji dhin, himo yedhude mo jaabawol wondugol e darja. Yuusufu jabhi hara o ittaali bote e makko, o wadhi no debbo mo andaa gorko on wonira mo andaa gorko haa nde o firtinoo Bhiddho Alla on.

Matta no sifaade ko rabbhidhi fii jibinande annabi Iisaa nden. Yahuudiyankeebhe bhen non foygintinaano ndee huunde bhurnde piiji dhin fow ka nder taariika baanii-aadama kan hittunde. Hay si ko e nder deyyhere dhun wadhiri hara maagara woo tawaaka. Annabi Iisaa ko e nder dingiraa jibinaa. Yawti huunde wootere pet, bawdhe dhen fow e moyyhereeji Alla dhin fow ko e nder huunde mawnde suudhaa. Malaa’ikaabhe dhuudhubhe weltii bhayru Tagudho on e tagaabhe bhen yubbhondirii. Jinaaji dhin no nhatidirde nyiinye sabu Fooludho on arii fii hettugol ka pedhaali mabbhe ko bhe jattunoo kon, o nyaawa bhe.

Fodaari malaa’ikaajo on laatii. Yuusufu noddiri boobo penuujo on «Iisaa». O dhoftii tindinooje Alla dhen, hara ko no yaadiri e naamuuji bheynguure makko nden non.

E fee jibineede Iisaa nden, ko saa’i keso fuddhii. Gila nden nyannde, aduna on iraaki han kadi ka nder ngayka hulbiniika sariya on kan e nyaawoore nde woopataa nden e tikkere Alla nden. Ko saa’i sulfu on nii. Allaahu on arii fii dandugol yimbhe bhen, o watta bhe laabhubhe, hara hinaa tippude e humagol e kuudhe sariya on e wakkilaare mabbhe. En hendike moyyhere Alla heewude nden. Hara hidhon gelii wonde, gila ko annabi Iisaa ari, no dhiya diinaaji fewndori non e no dewe dhen wadhirtee non e yedheede nden e sariyaaji majji on lannii feyyhude, dhi nafataa huunde han kadi bhayru Alla yedhii yimbhe bhen ballal hara huunde bhe yobhaali?

TORAARE: Mi mawninii ma, mi yettii ma yaa an Baabaajo on e Bhiddho on e Ruuhu-Seniidho on, an Alla bajjo on. Mi jarnii ma fii ko sottudhaa lan kon. Midho sujjande ma e nder ruuhu wondudho e giggol. Midho weltii fii ko arudhaa kon haa e an dhun e tawde midho wondi e ellaaji. Udditu gite kawtidubhe e an bhen no bhe yi’ira sulfu maa on e moyyhere maa nden e yurmeende maa nden e ko wondudhaa kon e Iisaa-Almasiihu Joomi on.

LANDAL.

  1. Ko honno Yuusufu, oo yhettirdho annabi Iisaa wa bhiddho, wontiri tawaadho e bhe gomdhinal mun nanti innde bhen?

www.Waters-of-Life.net

Page last modified on May 18, 2012, at 08:59 AM | powered by PmWiki (pmwiki-2.2.109)