Previous Lesson -- Next Lesson
3. Batizerikɛba bɛ kɔɲɔcɛ Yesu ta seereya kɛ (Yuhana 3:22–36)
Batizerikɛbaga ka Yesu ko seereya kɛ ni yɛrɛmajigiya ye, ka ɲagari k’a ye ko lanaya ko bɛ tagara ɲa; sisan, a bɛ seereya kɛ tuun ka Kirisita ta bonya lakari, ani a ta karan min ɲɔgɔn tɛ. A ko:
YUHANA 3:31
31 «Sabu min bɔra Ala ra, o le bɛ bɛɛ kunna; nka min sɔrɔra dunuɲa ra yan, o ye dunuɲa ta le ye, a fana bɛ kuma ka kaɲa ni dunuɲa ta cogo le ye. Nka min bɔra sankolo ra, o bɛ bɛɛ kunna.
Adamadenw ye dunuɲa danfɛnw ye, o mako b’a ra ka bange kokura. Yesu kelenpe le bɔra sankolo ra, ka kɛ adamaden ye janko ka gbara an na, ka an kumabɔ. Yesu Nazarɛtika, ale ka bon ni ciraw bɛɛ ye, ani lɔnnikɛbagaw ni kuntigiw bɛɛ, sabu sankolo le bɛ dugukolo kunna. Adamadenw ta fɛn labɛnninw bɛ an kabakoya, nka o ka fɛnw bɛɛ kɛ Ala ta danfɛnw le sababu ra. Dencɛ le ye ɲanamanya ni yeelen ye, ani an ta dunuɲalatigɛ kun. Danfɛnw si tɛ se ka suma ni ale ye. Dencɛ bangera Fa fɛ, a bɛ yi wagati bɛɛ ani tuma bɛɛ. A dafanin lo, a bɛ danfɛnw bɛɛ kunna.
YUHANA 3:32–35
32 A ka min ye, ani a ka min mɛn, a bɛ o le fɔ, nka mɔgɔ si fana tɛ sɔn a ta seereya ma. 33 Ni mɔgɔ min ka sɔn a ta seereya ma, o tigi ka a yira ka a gbɛya ko Ala bɛ min fɔ, o ye can le ye. 34 Ala ka min ci, o le bɛ Ala ta Kuma fɔ mɔgɔw ye, sabu Ala bɛ Nin Saninman di a ma hakɛya min na, dan tɛ o ra. 35 Den min bɔra Ala ra, Fa Ala bɛ o kanu, o kosɔn a ka fɛn bɛɛ sebagaya di a ma.
Seere min ka sankolo can ye, o ye Yesu adamaden ye. A ka Fa Ala ye can ra, k’a kumakanw mɛn. A ka Fa ta miiriyaw lɔn ani a ta ko latigɛninw. Ale le ye Ala ta kuma ye, kuma min bɛ bɔ Fa yɛrɛ ra. A ka min yira Ala ta ko ra o dafanin lo. Ciraw ka min yira Ala ta ko ra, o tun ma dafa. Ala sago bɛ laban min ma, min b’a bɛɛ dafa, Yesu bɛ o yira an na. Yesu ye seere kankelentigi ye, min tɔɔrɔra ka sa a ta seereya kosɔn. A ka Fa bonya. Nka min ye bɔnɛ ye, o ye ko mɔgɔ caman belen bɛ ban a ta seereya ma. Ala min yɔrɔ ka surun o ra, o tɛ o fɛ, sabu o ko bɛna o ta ɲanamanya yɛlɛma jagboya ra. O bɛ ban Yesu ta denya ma, o tɛ sɔn a ma fana ko Ala ye Fa.
Nka an ye Ala tando, sabu bɛɛ tɛ Ala ni a ta Nin kɔniyabaga ye. Mɔgɔ ɲanawolomanin dɔw bɛ Fa Ala ɲini Dencɛ sababu ra, ani ka sɔn a ta saraka dafanin ma. Dencɛ ka min yira an na ni mɔgɔ min lara o ra, ka la a ra ko a bɛ an kunmabɔ, i tigi ka Ala bonya. Ala tɛ se ka faniɲa tigɛ; Dencɛ ye can tigi le ye. Fa Ala m’a ta miiriyaw yira an na sariyasɛbɛ dɔ kɔnɔ, walama kitabu dɔ, nka a k’a yira Yesu le sababu ra. Ni mɔgɔ o mɔgɔ k’a jusukun dayɛlɛ nin kumaw kɔnɔkow ye, o tigi bɛ kɛ danfɛn kura ye. Kirisita bɛ an wele ko an ye can kibaroya fɔ, k’a sira tagama ani k’a kɛ. O ra, a ta Kibarodiman bɛ kɛ anw yɛrɛ le ye.
Yesu ma ko dɔw miiri a yɛrɛ kɔnɔ ka o fɔ, walama sigiya bɛ ko minw na, walama a yɛrɛ diyanankow; a ta kumaw tun ye kuma ɲanamanw le ye, ani kuma barakamanw, ani kuma gbɛninw. Ala yɛrɛ le kumana a Dencɛ fɛ. Nin min tun b’a kɔnɔ dan tun tɛ o ra. Fa Ala k’a fa ni hakiritigiya ni fangatigiya bɛɛ ye.
Fa ka Dencɛ kanu ka fɛn bɛɛ to a boro. Kanuya ye fɛndinin le ye, Dencɛ fana bɛ Fa bonya. K’a fɔ ko jɔn le ka bon, Fa wa, Dencɛ, kun tɛ o ɲininkari ra. O ɲininkariw ɲɔgɔn bɛ bɔ Setana le ra. Ala ta Yiracogo saba bɛ bonya la ɲɔgɔn kan. Ni mɔgɔ min ma o cogo lɔn, o tigi ma Matigi le lɔn. Fa tun tɛ siran ko Dencɛ bɛna ale lɔyɔrɔ ta, sabu Ala tun ka Dencɛ ta sabari ni a ta kanminari, ni ta yɛrɛmajigiya dafanin lɔn. Fɛn bɛɛ bɛ Yesu ta fanga kɔrɔ, i n’a fɔ a yɛrɛ k’a fɔ cogo min na, ko: «Fanga bɛɛ dira ne ma dugukolo kan ani sankolo ra.»
YUHANA 3:36
36 Ni mɔgɔ min ka la Dencɛ ra, o tigi bɛ ɲanamanya banbari sɔrɔ; nka ni mɔgɔ min ka ban Dencɛ ra, o tigi tɛna o ɲanamanya sɔrɔ, nka Ala ta dimi le bɛ o tigi kan.»
Kibarodiman sɛbɛbaga Yuhana bɛ an karan kisiri sɔrɔkan na, ko: Ni mɔgɔ min k’a jigi la Dencɛ kan, o tigi bɛ ɲanamanya banbari sɔrɔ. O kuma surunman ye kibarodiman kuma dɔ ye. Ni mɔgɔ min ka gbara o kanuya ta kelenya ra, min bɛ ye Fa ni Dencɛ cogo ra, o tigi bɛ gbara Ala ta kanuya le ra, min yirara gbengbenyiri kan. A bɛ o kuma ju sigi Ala ta sagaden le kan, sabu Sagaden le ka an ta kojuguw bɔ an na. Ka an to o jɛnɲɔgɔnya ra, an b’a ta makari baraka sɔrɔ a ta kanuya banbari sababu ra. Dencɛ min gbengbenna ni an bɛ la o ra, o bɛ ɲanamanya sɔbɛ di an ma. Ɲanamanya banbari tɛ damina saya kɔ fɛ, a bɛ damina sisan le. Nin Saninman bɛ jigi Yesu ta lanabagaw kan. Ni mɔgɔ min k’a kɔ don Kirisita ta kuma ra, ka ban ka la a ra ko Dencɛ lo, ani ka ban gbengbenyiri ma, o tigi bɛ Nin Saninman jusu kasi. A tɛ langanviya sɔrɔ a jusukun na. Ni mɔgɔ min tɛ a yɛrɛ majigi Yesu ye, o tigi banna Ala yɛrɛ le ra, ka to nin ta saya ra. Diina minw bɛɛ bɛ Dencɛ ko ni gbengbenyiri ko sɔsɔ, o diinaw bɛ Ala ta can le kɛrɛ. Ni mɔgɔ min k’a kɔ don a ta kanuya ra, o tigi ka a ta dimi le ɲanawoloma.
Pɔli ta miiriya ni Yuhana ta ye kelen ye: Ala b’a ta dimi lajigi ka bɔ sankolo ra mɔgɔw ta Alaɲasiranbariya ni o ta terenbariyakow bɛɛ le kosɔn. Sabu mɔgɔ bɛɛ ka jurumun kɛ, ka ban can ma o ta kɛwalejuguw fɛ. Aw ye nin faamu ko Ala ta dimi min bɛ mɔgɔ halaki, ko o benna adamadenw kan.
Sa kɔrɔtara kongokolo kɔnɔ cogo min na, o cogo ra Kirisita gbengbenna ka kɛ an ta kisiri tagamasiyɛn ye, ka an bɔsi Ala ta dimi ma. Dencɛ ka nɛɛma sɔrɔyɔrɔ dayɛlɛ an ye. Ni mɔgɔ min k’a ta nɛɛma mabɔ gbengbenyiri ra, o tigi bɛ to Ala ta kiti kɔrɔ. Setana bɛ minayɔrɔ sɔrɔ a ra. Minw ma Kirisita sɔrɔ olugu ta cɛnna. Tuma juman aw bɛna a damina ka Ala daari dɔw ye, janko o ye la Dencɛ ra ka kisi? Aw bɛna kuma aw teriw fɛ tuma juman janko o ye Ala ta ɲanamanya sɔrɔ aw ta seereya sababu ra?
DAARIKAN: Matigi Yesu, an bɛ i tando i ta kanuya ni i ta can kosɔn. An dɛmɛ an ye i kan mina lanaya baraka ra, ka Fa Ala bonya. An bɛ la a ra k’a lakari ko ele ni Fa ye kelen le ye. Minw bɛ o kɔ don i ra kolɔnbariya kosɔn, makari olugu ra. I ta kuma seereya kɛ o ye. I ka minw karifa an ma, an dɛmɛ k’a to an ye olugu ye, ka i ko fɔ o ye, i ka min kɛ an ye ka o fɔ o ye.
ƝININKARI:
- An bɛ ɲanamanya banbari sɔrɔ cogo di?