Previous Lesson -- Next Lesson
YUUHANNA - Ndaygu ngun jalbi ka nder nibhe
Jandeeji ka Linjiila no Yuhanna seedorii nonn
b) Fii ko jamaa on e dental fewjoobhe bhen yeddondiri kon fii Iisaa (Yuuhanna 7:14-53)
YUUHANNA 7:14-18
14 Wa fewndo ko juldeere nden feccii e hakkunde, Iisaa yahi ka juulirde mawnde woni e janngugol. 15 Onsay Yahuudiyankeebhe bhen nhaldhi, bhe wi’i: Ko honne oo andiri bindhi dhin, o jangaali? 16 Onsay Iisaa jaabii bhe, wi’i: Gandal an ngal hinaa e an iwi, kono ko e Nuludho lan on. 17 Kala faalaadho wadhude faale Alla on anday si ko e makko ndee jannde iwri, e si tawii dhii kongudhi an ko e immorde e an min. 18 On mo no wowlude kongudhi iwrudhi e mun, haray ko hoore mun woni dhabbhande darja, kono on mo no dhabbhude darja nuludho dhun on, haray on ko goongaajo, haray angal peewal alaa e makko.
Iisaa hulaano mayde nden, o hulaano kadi ko aybhe makko bhen cukkii mo kon. Himo jokkirde doy laawol makko ngol haa o hewta Yerusalaam no yaadiri e faale Ben makko on. Ton o suudhoytaako, kono o yahi kisan ka juulirde mawnde fii jannirgol cuucal Linjiila on, wa jannoowo jabhanaadho. Hari yimbhe bhen no andude wonde ko Alla tigi woni fewtude e mabbhe. Bhe woni e landodirgol: e ko honto oo suka hebhi dhii miijooji jannaydhi fii Alla luggirdhi nii? Wonaa jom gandal andaadho janni mo Bindi laabhudhi dhin. E ko honno miniisiyeejo mo jangaali waawirta jannirde men fii goonga Alla on?
Iisaa jaaborii wano nii: «Ka haqiiqa, midho jogii jande wondude e goonga on. Bhuri dhun, ko min woni Daaluyee Alla on. Miijo Alla kala e faale makko kala no wondi e an. Jande an nden hinaa e an iwi, ko min woni hawa Alla tabitayka kan e an, ko Ben an woni jannoowo lan on. Midho andi miijooji makko dhin fow, e ebbhooje makko dhen e bawgal makko ngal e faale makko on fow. Mi ardaali e miijooji an dhin min tigi, sabu ko miijooji Alla dhin tun woni goongindhi dhin. Midho timminde ko fennyinaa kon sengo ka lannaali ton timminegol.»
Himo mawninde mawnina Ben makko, o dhoftoo mo, himo weebhitorii wa nulaadho Alla on. O ariraali hoore makko, kono ko e innde Ben makko nden o ariri e dow bawgal Alla ngal. Ko Iisaa woni Bhiddho Alla on e Nulaadho makko on, dhin dhidhi kala; hidhen haani wattande yili e makko, gomdhinen mo, rewen mo wano Baabaajo on non.
Fii no weebhitiren gomdhingol mo ngol, o holli Yahuudiyankeebhe bhen laawol welugol faamude no bhe faamira wondema ko o jannata kon no yaadi e ko Alla faalaa kon. Wano non, ko hondhun woni seedze keldhudho seeditiidho tigi fii ko Iisaa jannata kon e ko o woni kon? O wi’i bhe: «Huuwiree no Linjiila an on holliri non, on yiitay ko mi mawni kon. Huutoree kongudhi Almasiihu on dhin, aaya hebhi aaya, on yiitay wonde kongudhi makko dhin ko ka Alla iwri, hinaa ka yimbhe bhen.»
Etagol huutora jande Almasiihu on nden no landii aranun yo en fibhu anniye. Hara ko faale makko on faaladhon? Si wonaa on yhubhidir faale mon e faale makko on, on faamataa gandal haqiiqawal Jomiraadho on. Ko nde faale mon dhen dhoftii faale Almasiihu on dhen woo, bhuriroyton andude no Alla woniri non.
On ekkitotoodho huuwugol faale Baabaajo on, wano Iisaa janniri en non, hebhay haqqil fii gaynka kan hakkunde Linjiila on e Sariya on. Joomiraadho on okkay en doole haanudhe dhen no rondoren dongal ngal o halfini en ngal. En waaway ontuma timminde faale makko on e nder weltaare. On dhoftiidho yamiroore Almasiihu on nden, hebhay doole no o wuurira e nder giggol makko ngol. Jande makko nden faljintaa goddho, wano woniri non ka sariya Muusaa, kono ko nde ngurndan heewudhan moyyhere Alla nden. Kala on faalaadho dhoftaade faale Alla fennyinaadhe dhen ka jande Almasiihu on, humodiray tigi e Alla, o faamay wonde Almasiihu on hinaa jannoowo tun, kono ko Daaluyee Alla wontudho on bhandu. Hinaa jande nde wadhoraa o addani en, kono himo okkorde en yaafuyee junuubaaji men dhin, o okka en kadi bawgal ngurndan iwudhan dhan ka Alla.
YUUHANNA 7:19-20
19 E hara Muusaa jonnaano on sariya on? Kono hay gooto e mon jokkaali on sariya. E ko fii hondhun non ebbhanton warugol lan? 20 Yimbhe bhen jaabii mo, wi’i: An, jinnaaru no e maa ! Ko hombo woni dhabbhude no warire?
No jikku Almasiihu on laabhiri non no wadhude o wi’a Yahuudiyankeebhe bhen: «On hendike sariya on, kono gooto alaa mo huutorde no haaniri!» Nden yewtere makko dinbi jamaa Yahuudiyanke’en, sabu himo holli wonde hay gooto e bhee ka Ahadi Hindi huutoraali haa-hande ko sariya on landii kon fow. On mo bonnii yamiroore wootere haray o woni bonnudho hedditiidhe dhen fow. Tikkere Alla nden no tabiti e makko. Ko non Iisaa lontiniri haalaaji Yahuudiyankeebhe fewtudhi dhin peewal ngal, o holli wonde wakkilaare nden e etaare mabbhe nden fow kambhe sariyanko’en ko bundhoyaagal non.
O fennyinani bhe himo andi ko fewjoobhe bhen faalaa kon warugol mo. Huunde suudhanaaki mo. O holli hedhotoobhe mo bhen yo bhe wattan yili e wakkilaare nde nafataa nden, o tentinani bhe fii coggu iwtirgol ngol bhaawo makko.
O landoyto non: «Ko fii hondhun faaliradhon warude lan?»
Jamaa on jibhii fii kongudhi Almasiihu on dhin, bhe huli ko bhe nani kon wonde gooto e feewudho alaa hakkunde mabbhe. Jaabawol makko ngol suudhi ebbhoore mabbhe nden: «O’oo, o’oo, ko hombo faalaa warude ma? Alla no tonhi sahinbingol wonkii!» Wobbhe no sikka wurin ko ruuhu bondho naati e makko. Ngayngu mabbhe ngun no nibhintinde gite mabbhe dhen, ronkina bhe faamude no bhe sendindirira Ruuhu-Seniidho on e ruuhu bondho. Hari faale fii andugol giggol Alla ngol bontiriino bhe.
LANDAL:
- Ko seede hombo seeditii wonde Linjiila on ko ka Alla iwri?