Fluwa kaan 02 -- Ee Nyanmiԑn, si min aunnvuԑ afin n ti sa tԑ yofuԑ!
Cԑn kun’n, like klefuԑ anyansifuԑ kun ᴐli awlo bo kun nunfuԑ’m be osu nianlԑ. Ͻ kanngannin ndԑ kun anyansifuԑ’m be fluwa mma’n nun nin i sa mma mun. Ndԑ sↄ’n wo Zezi i Jasin Fԑ’n nun. Awlo sᴐ’n nunfuԑ’m be nuan boli be wun, be si’a wie se, yԑlԑ kԑ ↄ kanngan fluwa nin i sa mma mun yԑ i kannganlԑ’n ti sa pᴐpↄ i sa nun. Be niԑn i sa mma mun, be kᴐ be ba. Kpԑkun be ti fluwa ng’ↄ kanngan’n. Like klefuԑ anyansifuԑ sᴐ’n ↄ kpali sa kun b’ᴐ juli sran nnyↄn be nguan’n nun be klᴐ lↄ nyanmiԑn sua dan’n nun:
« Sran nnyↄn be ᴐli Nyanmiԑn i sua’n nun kԑ be ′ko srԑ Nyanmiԑn, kun ti Farizifuԑ, yԑ kun ti gua bo sika defuԑ. Farizifuԑ’n jrannin nglo ↄ kannin kԑ i bᴐbↄ ti’n kleli Nyanmiԑn, ᴐ seli kԑ : ‟Nyanmiԑn, kwla o, afin n liԑ’n, n ti-man kԑ sran nga’m be sa : be de sran like wue kekle su, be di-man nanwlԑ, be kunndԑ bla bé yi bo nin bian bé wun bo, yԑ n ti-man kԑ gua bo sika defuԑ ng’ↄ jin yԑ sa. Le mᴐcuԑ kwlaa n ci nglԑmun kpԑ nnyↄn, yԑ like kwlaa nga n nyԑn i’n, n yi i blusu.” Gua bo sika defuԑ’n jrannin mmua lᴐ, ↄ’a kwla mԑn-mԑn i ti’n su bᴐbↄ, sanngԑ ᴐ fԑ i sa’n finfin i wue nun, yԑ ↄ seli kԑ : ‟Ee Nyanmiԑn, yaci, n ti sa tԑ yofuԑ, si min wun aunnvuԑ.” » (Lik 18 : 10 – 13).
Like klefuԑ jrannin nan ᴐ’a se be nga be tie i ndԑ’n be kԑ: « Man e usa e wun kosan: «? Wan yԑlԑ min? ? N ti kԑ bian b’ↄ bu i wun sran kpa’n sa annzԑ n ti kԑ gua bo sika defuԑ bᴐ sran’n kwlaa be si kԑ ↄ ti awiefuԑ sanngԑ ᴐ dili i sa tԑ’n nanwlԑ’n sa? »? Bian b’ↄ bu i wun sran kpa’n, ᴐ ti-man kԑ e nvle’n sa? Afin ↄ fin i nuan fite kԑ ᴐ’a kunndԑ-man bla i yi bo annzԑ bian i wun bo, ↄ’a wua-man, ᴐ’a di-man sran ndrunmun, sanngԑ ↄ dili Nyanmiԑn i mmla’m be su kpa, ᴐ cili nglԑmun le mↄcuԑ kun nun kpԑ nnyᴐn, ↄ yili i blusu’n kwlaa yԑ ᴐ ukali afԑfuԑ mun.
Be kwlaa be tᴐli bliin, nan bian kpԑnngbԑn kun ↄ’a se kԑ : Man manmanlԑ’n ᴐ yo Nyanmiԑn liԑ. Bian sↄ’n ᴐ kwla fԑ i wun mantan Nyanmiԑn blԑ kwlaa ng’ↄ klo’n, ᴐ nin Nyanmiԑn be kwla koko yalԑ nanwlԑ su, ↄ kwla uka afԑfuԑ mun, nin yalԑfuԑ mun. Sanngԑ ↄ seli i wun kԑ ᴐ ti sran kpa i sↄ’n ti, ᴐ dili i nuan, ↄ mԑnmԑnnin i bᴐbↄ wun, ᴐ’a manman-man Nyanmiԑn i sa kpakpa ng’ↄ yoli be’n ti. Be wun Nyanmiԑn fa mantanlԑ kԑ nga sa’n, bᴐ be bu-man Nyanmiԑn i akunndan’n, ↄ ti be wun tulԑ ».
Ndԑ nga bian kpԑnngbԑn’n kannin’n, ᴐ jↄli anyansifuԑ like klefuԑ’n i klun nan ᴐ’a uka su kԑ : « Be kwlaa nga be klun jↄ be bᴐbↄ be wun bᴐ be se be wun kԑ be ti Nyanmiԑn sufuԑ kpa’n, be kete be awlԑn’n ↄ nin be akunndan’n. Be si-man Nyanmiԑn i ndԑ b’ᴐ ti nanwlԑ’n, be kplin-man su kԑ be ti sa tԑ yofuԑ, kannzԑ be si Nyanmiԑn ndԑ’n ngba be ti nun’n. Sran kwlaa ng’ↄ yo kԑ ᴐ fԑ i wun mantan Nyanmiԑn b’ↄ sro-man Nyanmiԑn’n, ᴐ ti atofuԑ yԑ klolԑ’n nu’ԑn i nun. Be nga kԑ be srԑ Nyanmiԑn be manman be wun’n, be kaci wuntufuԑ yԑ be ijↄ dandan. Ͻ fata kԑ i sᴐfuԑ mun be usa be wun kԑ : « ? Nyanmiԑn yԑ n kaan ndԑ kle i yԑ annzԑ n kaan ndԑ kle min wun? ? N bu Nyanmiԑn i akunndan’n, n yi i ayԑ annzԑ n manman min wun alaje bↄ n lԑ i’n ti? ».
Gbanflԑn kun usa anyansifuԑ’n kԑ : «? Nguԑ ti yԑ e srԑ Nyanmiԑn-ↄn ? ? Nguԑ yԑ e nyԑn i Nyanmiԑn srԑlԑ’n nun-ᴐn ? ? Wan yԑ ↄ tie ndԑ nga e kan be mun-ↄn ? ». Anyansifuԑ’n tԑli i su amanniԑn su seli kԑ : «? Sran ng’ᴐ wun ase kpa’n ↄ kwla nian i nyrun ndԑnman su lele ᴐ wun ninnge kwlaa ? ? San i nyima’n ko wie lika kun, nԑn i-ᴐ? » Kannzԑ ↄ kwla wun-man mmua lᴐ guԑ-mԑn i ti nin i bo’n, sanngԑ ↄ lafi su kԑ asiԑ’n ti kukluku yԑ ᴐ kpԑ i wun; i kunngba’n nin-ↄn, e o Abijan sanngԑ e kwla flԑ sran nyanman nun abloki lᴐ, annzԑ e kwla tran buake nan y’a flԑ sran nyanman nun Amlԑnkԑn’m be lↄ. Sran nga e flԑ i nyanman nun’n, e lafi su kԑ e kwla ti i nԑn’n kannzԑ e kwla wun-mԑn nin e nyima’n. Be nga be lafi Nyanmiԑn su’n, be liԑ’n i sin-ᴐn. Be si kԑ Nyanmiԑn b’ↄ kwla like’n kwlaa yo’n, ᴐ ti be srԑlԑ’n yԑ ᴐ tԑ be asamian nin be asenna’m be su afin be klo Nyanmiԑn yԑ be awlԑn’n ti wԑtԑԑ.
Like klefuԑ’n ↄ suli i like klelԑ’n su. Ͻ kannin guabo sika defuԑ’n i nyanmiԑn srԑlԑ’n i ndԑ. Ͻ seli kԑ : « Nyanmiԑn suli gua bo sika defuԑ’n i bo ↄ man ᴐ kpatali Nyanmiԑn i sa tԑ’m be ti yԑ ↄ kpԑli i wun Nyanmiԑn wun. Ͻ suli i akunndan’n su yԑ ᴐ kaan ndԑ kleli Nyanmiԑn aunnvue sifuԑ dan’n. I srԑlԑ’n kle kԑ ↄ lafi Nyanmiԑn su kԑ Nyanmiԑn o lԑ, ᴐ lԑ kwlalԑ yԑ ↄ kwla sa’n kwlaa yo, afin ᴐ flԑli i kԑ « Nyanmiԑn » yԑlԑ kԑ ↄ si kԑ Nyanmiԑn ti kun i kwlalԑ’n nun, i ndԑ’n nun yԑ i wawԑ’n nun. Guabo sika defuԑ’n ᴐ dili i sa tԑ’m be nanwlԑ ↄ man ᴐ nyannin Nyanmiԑn aunnvuԑ sifuԑ’n i saun yolԑ’n, afin ↄ lafili Nyanmiԑn i aunvuԑ silԑ’n su ᴐ nin jↄlԑ bᴐ Nyanmiԑn ↄ wa di i i sa tԑ’m be ti’n su. Ͻ nantili Nyanmiԑn i klun ufue’n nin i sԑsԑ b’ᴐ ti’n be afiԑn. Kԑ ᴐ bu akunndan kԑ i Min’n ↄ kwla bu i fᴐ nan ↄ kwla fԑ i yi blᴐlↄ sin’n nun lↄ’n, srԑ kunnin i. Sanngԑ i osu kunngba’n nun’n, ↄ lafili Nyanmiԑn aunvuԑ sifuԑ b’ᴐ ti Saun’n i su, nan ↄ’a fԑ i wun a mԑntԑn i. Ͻ lafili su kԑ Nyanmiԑn i aklunye’n ᴐ ti dan tra i jↄlԑ dilԑ’n, yԑ kwlafuԑ dan’n, i klolԑ’n ti’n, ᴐ tuli i sa tԑ’n kwlaa. I sↄ’n ti ᴐ sↄli klun ufuefuԑ’n i sa nan ᴐ’a se i kԑ ↄ yaci i tԑ mun cԑ i. I sᴐ’n ti yԑ ↄ kpannin seli kԑ : « Ee Nyanmiԑn, si min wun aunnvuԑ afin n ti sa tԑ yofuԑ ! » nin-ᴐn.
Anyansifuԑ’n ↄ yiyili nzuԑn kacilԑ’n nun kleli be, ᴐ seli be kԑ : « Awiefuԑ’n ↄ dili i nanwlԑ kԑ ᴐ yoli sa tԑ, i sↄ’n ti ᴐ yoli fiԑn, ↄ sacili ᴐ man Nyanmivn yili i blo. Kԑ ↄ jran Nyanmiԑn saunfuԑ’n i nyrun’n, ᴐ wun wafa nga i bↄbↄ ti’n, ᴐ fite i nyrun weiin. Nyanmiԑn nyrun’n, like kpa fi nu’ԑn i nun. Ͻ ti sa tԑ yofuԑ kain kpa ».
Like klefuԑ’n kԑnnin ekun kԑ : « Sran kpanngban kpa be laka be bᴐbↄ be wun be nguan’n su yԑ be bu be wun sԑsԑfuԑ, be bu be wun sran kpa. Sanngԑ sran kwlaa ng’ᴐ jran Nyanmiԑn i kpajalԑ’n bo’n, ↄ wun i wlԑ weiin kpa kԑ sran fi ti’a sԑsԑ san Nyanmiԑn kunngba cԑ. Man su yralԑ tran gua bo sika defuԑ b’ᴐ kacili i nzuԑn’n su, afin ↄ yoli akunndanfuԑ, ᴐ wunnin i wlԑ kԑ ↄ ti sa tԑ yofuԑ, ᴐ kpԑli i nyin Nyanmiԑn b’ↄ yili i’n i wun lᴐ nan ↄ’a se i kԑ ᴐ si i aunnvuԑ, ↄ dili ndrunmun kwlaa ng’ᴐ dili’n i nanwlԑ, kpԑkuun ↄ nyannin yaci cԑlԑ nin aunnvuԑ silԑ Nyanmiԑn sa nun. Nyanmiԑn yi-man sran ng’ↄ kaci i nzuԑn’n i blo, afin i sᴐ sran liԑ’n ↄ klo kԑ i awlԑn’n kaci, ᴐ klo kԑ ᴐ kaci i nzuԑn’n, ↄ klo kԑ i akunndan’n yo saun. E Min’n ᴐ ′kpↄ i ti, ᴐ ′tu i sa tԑ’n weiin kpa yԑ ↄ ′bu i sran kpa, afin ᴐ dun mmua siesieli kԑ ↄ yo i sᴐ fa man be kwlaa nga be kaci be nzuԑn’n.
Like klefuԑ’n ↄ usali be nga be tie i ndԑ’n be kԑ: «? An klo kԑ amun si ndԑ nga Krist, Mari i wa yasua’n kԑnnin sran bᴐ bu i wun sran kpa’n, ↄ nin awiefuԑ b’ᴐ dili i sa tԑ’n nanwlԑ b’ↄ kacili i nzuԑn’n be su’n i atabo’n? ». Ͻ tikeli Jasin Fԑ’n su nan ᴐ’a bo i kannganlԑ bo nin i sa mma mun. Ͻ kanngannin Krist i nuan ndԑ mun :
« Nanwlԑ kԑ guabo sika defuԑ sↄ’n kᴐ i awlo’n, Nyanmiԑn nin i be afiԑn a sԑ, sanngԑ ↄ nin kun’n, be afiԑn a sԑ-man. Afin sran kwlaa ng’ᴐ yo i wun dandan’n, Nyanmiԑn ′guԑ i nyin ase, sanngԑ sran ng’ↄ tu-mԑn i wun’n, Nyanmiԑn man ᴐ ′nyan nyrun » (Lik 18 : 14).
Wↄ bᴐ a su kanngan ndԑ nga’n,
tie ndԑ nga wↄ awlԑn’n kan’n. ? Ͻ klun jᴐ ↄ bᴐbↄ ᴐ wun ↄ sԑsԑ bᴐ a ti’n ti, ↄ sa kpakpa nga a yo be’n be ti, nin ᴐ nzuԑn kpa’n ti ? ? Annzԑ nyanzuԑn kun wↄ sa nga a faa ᴐ nguan’n yoli’n ti, ↄ man a kan ᴐ wun ase saunfuԑ’n i bo ? Man an si kpa kԑ sran kwlaa ng’ↄ tu i wun b’ᴐ bu i wun kԑ ↄ ti sran kpa’n, san ᴐ ′fin ase. Sanngԑ sran kwlaa ng’ↄ kaci i nzuԑn’n, b’ᴐ kpԑ i nyin i Min’n i wun, b’ↄ di i sa tԑ’m be nanwlԑ’n, ᴐ ′nyan yaci cԑlԑ yԑ Nyanmiԑn ′bu i sran kpa, afin i aunnvuԑ silԑ dan nun’n, i Min’n ↄ ′tu i sa tԑ’m be kwlakwla.
Nzuԑn kacilԑ srԑlԑ
Man e kan David i srԑlԑ’n likawlԑ. David ti Nyanmiԑn nuan ijᴐfuԑ. Ͻ dili i sa tԑ’n nanwlԑ kԑ Nyanmiԑn dili i nyanzuԑn sa ng’ↄ yoli be’n i jↄlԑ’n afin ᴐ kunndԑli bla i yi bo kpԑkuun ↄ yoli man be kunnin bla sᴐ’n i wun’n:
« Ee Nyanmiԑn klun ufuefuԑ, yo n ye. Nian wↄ aunnvuԑ bↄ a si klᴐ sran’n ti, nunnun min sa tԑ mun. Wunnzin min weiin kpa, man fↄnlԑ bᴐ n fↄnnin’n ᴐ wie. Yo min saun kpa man min wun sa’n kwlaa wie weiin. Afin n wun sa tԑtԑ nga n yo be’n. Sa tԑtԑ sↄ’m be sinsin min nyin su. Ͻ kunngba yԑ n yoli wᴐ sa nin-ↄn. N yoli sa nga a klo-mԑn i’n. Ͻ man kԑ a ′di min jᴐlԑ’n, ndԑ nga a ′kan gua su’n, i kanwlԑ su-ↄ, yԑ n fᴐ nga a ′bu’n, i buwlԑ su-ↄ. Nian, sa tԑ nun yԑ be wuli min-ᴐn, afin sa tԑ nun yԑ min nin wunnzԑli min-ↄn. Kusu like bᴐ a klo kԑ ↄ tran klᴐ sran nun’n yԑlԑ nanwlԑ’n, ↄ man yo man n si ngwlԑlԑ kpa sakpa. Yo man min wun sa tԑ’n wie nan man n yo saun, wunnzin min man n fԑn fitafita. Kan ndԑ fԑ kle min man min wun kpaja min nan n klun jᴐ. Sԑ a yo sↄ, min bᴐ a kleli min nun’n, min wun ↄ ′sanndi min. Yi ᴐ nyin min sa tԑ’n su, nunnun sa nga n yoli’n kwlaa. Ee Nyanmiԑn, man min anwlԑn kun bↄ i nun ti weiin, yo man n sin min osu nun n ‵fa akunndan kpa nan ᴐ ka min nun. Nán fuan min man n jaso ↄ nyrun lԑ, nán yi ᴐ Wawԑ b’ↄ o min nun’n. Aklunnjuԑ nga i nun bᴐ a de min a fa mannin min’n, fa man min ekun, yԑ man ↄ Wawԑ klun ufuefuԑ’n ᴐ suan min bo. N ′fa wↄ atin’n n ′kle be nga be jaso ᴐ wun’n, kpԑkuun be nga b’a fↄn’n be ′sa be sin be ba ᴐ sin. Ee Nyanmiԑn, Nyanmiԑn, wↄ yԑ a ti min defuԑ nin-ᴐn! De min wie’n i nuan nun. Man m bo delԑ bↄ a de min’n i jᴐ n sin. Min Min, uke min nuan’n man m manman wᴐ. A kunndԑ-man sraka fi, sԑ ᴐ ti-mԑn i ti’n, wuun n ′yi wie m ′man wↄ. A kunndԑ-man tԑ nga be yrԑ i nnԑn’n kↄlikↄli’n bↄbↄ. Sraka nga Nyanmiԑn kunndԑ’n, yԑlԑ bé wun ase kanlԑ b’ↄ man be di sa nga be yoli’n i nanwlԑ’n. Ee Nyanmiԑn, sran ng’ↄ yo sↄ’n, i wun yo wↄ fԑ » (Jue mun 51: 1 – 17).
An suan Nyanmiԑn i nuan ndԑ’n
Sԑ an klo kԑ amun `si Nyanmiԑn i saun b’ↄ ti’n, nin i klolԑ bↄ yԑ man ᴐ yo sran’m be ye’n, an klԑ e fluwa yԑ e ′fa Krist i Jasin Fԑ’n nin i nun yiyilԑ’n nin srԑwa wie mun blԑ amun an yi-man nun sika fi.
An fa Zezi i Jasin Fԑ’n cԑ amun tranfuԑ mun
Sԑ fluwa nga i nun ndԑ’n kannin amun awlԑn’n yԑ sԑ an klo kԑ an fa cԑcԑ amun jannvuԑ mun’n, an kle nga an klo’n i nuan. Kԑ ng’ↄ o e sa nun’n fa ti ju’n, e fa blԑ amun. An klԑ amun dunman ᴐ nin lika nga e kwla fa fluwa ko man amun’n weiin kpa.
WATERS OF LIFE
P.O. BOX 60 05 13
70305 STUTTGART
GERMANY
Internet: www.waters-of-life.net
Internet: www.waters-of-life.org
e-mail: info@waters-of-life.net