Previous Lesson -- Next Lesson
e) Biri i Perëndisë në Atin dhe Ati në të (Gjoni 10:31-36)
GJONI 10:31-36
31 Judenjtë morën përsëri gurë për ta vrarë me gurë. 32 Jezusi u përgjigj atyre: Ju kam treguar shumë vepra të mira nga Ati im; për cilën prej tyre më vrisni me gurë?. 33 Judenjtë iu përgjigjën: Ne nuk të vrasim me gurë për asnjë vepër të mirë, por për blasfemi, sepse ti, duke qenë njeri, e bën veten Perëndi. 34 Jezusi u përgjigj atyre: "A nuk është shkruar në ligjin tuaj: "Unë thashë: "Ju jeni perëndi?"? 35 Nëse ai i quan perëndi ata, të cilëve u qe drejtuar fjala e Perëndisë (dhe Shkrimi nuk mund të bjerë poshtë) 36 ju i thoni atij që Ati e ka shenjtëruar dhe e ka dërguar në botë: "Ti blasfemon", sepse unë thashë: "Unë jam Biri i Perëndisë?"
Judenjtë e urryen Jezusin, ndërsa u tha: "Unë dhe Ati jemi Një". Ata e trajtuan dëshminë e tij ndaj vetes si blasfemi dhe donin ta vrisnin me gurë siç e kërkonte ligji, përndryshe zemërimi i Jehovas do të binte mbi kombin. Kështu ata vrapuan në oborr dhe erdhën me gurë për t’i hedhur kundër tij.
Jezusi qëndroi i qetë para tyre duke i pyetur: "Çfarë të keqe ju kam bërë? Ju shërbeva, shërova të sëmurët tuaj, dëbova demonët dhe hapa sytë e të verbërve tuaj. Pastrova lebrozët dhe u predikova ungjillin të varfërve. Për cilin prej këtyre veprave doni të më vrisni? Ju kërkoni të shkatërroni mirëbërësin tuaj. Unë nuk kërkoj nder dhe para për shërbimet e mia, të cilat i quajta me përulësi veprat e Atit tim. Unë jam këtu si shërbëtori juaj".
Judenjtë bërtisnin: "Ne nuk të vrasim me gurë për asnjë vepër të kryer, por për shkak të blasfemisë tënde. Ti e ke ngritur veten në nivelin e Perëndisë, ndërsa ti qëndron mes nesh si një i vdekshëm. Ne do të derdhim gjakun tënd për të treguar se ti je i vdekshëm. Si guxon të thuash që je Perëndi, një me të Shenjtin?Duhet të jesh i pushtuar nga demonët, meriton shkatërrimin e menjëhershëm. Me besim të plotë Jezusi u përgjigj: "A nuk keni lexuar në Ligjin tuaj se Perëndia u fliste personalisht të zgjedhurve të tij duke thënë: "Ju jeni perëndi, të gjithë jeni bij të Shumë të Lartit" (Psalmi 82:6), ndërsa ju vet humbisni dhe bini nga një mëkat në tjetrin. Pa dyshim, të gjithë janë mëkatarë, që enden në gabime. Megjithatë Zoti i quajti ata "perëndi dhe bij" për hir të emrit të Tij hyjnor. Ai nuk dëshiron që ju të vdisni, por që të jetoni përgjithmonë. Kthehuni te Perëndia juaj dhe jini të shenjtë siç është Ai."
“Pra, pse doni të më vrisni me gurë? Vetë Zoti ju quan "zota dhe bij". Unë nuk kam bërë mëkat si ju. Unë jam i shenjtë me fjalë dhe me vepra, kam të drejtë të jetoj përgjithmonë, si Biri i vërtetë i Perëndisë, lexoni çfarë është shkruar në ligjin tuaj dhe do të më njihni, por ju nuk besoni as në Shkrimet tuaja dhe nuk e njihni hyjninë time".
"Unë nuk e kam dërguar veten time, por Ati i Shenjtë më ka dërguar. Unë jam Biri i tij; Ai është Ati im. Shenjtëria e tij qëndron në mua. Kështu që unë jam Perëndi nga Perëndia, dritë nga drita, i lindur e jo i krijuar, i të njëjtit thelb me Atin." Jezusi i mundi judenjtë me tekste nga vet Shkrimet e tyre dhe i shkatërroi argumentet e tyre. Por sytë e tyre mbetën përbuzës nga urrejtja, por ulën krahët, pasi Jezusi kishte vërtetuar nga Libri i tyre mundësinë e Birërisë hyjnore në Dhjatën e Vjetër në përgjithësi dhe në veçanti që zbatohej për të.
GJONI 10:37-39
37 "Nëse nuk i bëj veprat e Atit tim, atëherë mos më besoni, 38 por nëse i bëj, edhe pse nuk më besoni, u besoni të paktën veprave, që të njihni dhe të kuptoni se Ati është në mua dhe unë jam në Atin.” 39 Ata u përpoqën ta kapnin përsëri, por ai u shpëtoi nga duart e tyre.
"Kjo do të thotë," shpjegoi Jezusi, "Ju duhet të besoni në mua, pasi unë bëj atë që bën Perëndia, vepra mëshire. Sovraniteti nuk do të ishte i imi nëse nuk do të përfaqësoja dhembshurinë e tij. Meqenëse dashuria e Tij është e mishëruar në mua, unë kam autoritet për të përmbushur veprat e Perëndisë, sepse ato janë me të vërtetë veprat e Atit."
"Ka të ngjarë që mendjet tuaja nuk mund ta kuptojnë hyjninë në njerëzim. Megjithatë, shqyrtoni veprat e mia, kush mund të ringjallë të vdekurit me fjalën e tij, dhe të hapë sytë e verbër, apo të qetësojë stuhinë, ose të ushqejë 5.000 njerëz të uritur me pesë bukë dhe dy peshq? A dëshironi që Fryma e Shenjtë të hapë mendjet tuaja dhe të dëgjoni zërin e Tij, në mënyrë që të dini se vet Perëndia është në mua? Kur të jeni të mbushur me Frymën e Shenjtë, do të qëndroni në këtë njohuri thelbësore dhe do të kuptoni se plotësia e hyjnisë është në trupin tim."
Këtu dhe përpara turmave të çoroditura, Jezusi shqiptoi fjalët e fuqishme, se ai ishte në Atin, dhe ashtu si dega qëndron në hardhi dhe merr forcë nga rrënjët, ashtu edhe Krishti del nga Ati dhe qëndron në Të. Të dy janë të pandashëm, në harmoni dhe unitet të përsosur. Kështu mund të themi se Biri fshihet në Atin për të zbuluar Atin dhe për ta nderuar Atë. Kështu fillon lutja më e famshme: "Ati ynë, që je në qiej, u shenjtëroftë emri yt".
Kushdo që thellohet në dëshminë e Jezusit për hyjninë e tij, në lutje dhe adhurim, do të kuptojë se ajo është prova vendimtare kundër kuptimit sipërfaqësor të Trinisë së Shenjtë. Jo tre perëndi të veçuar nga njëri-tjetri, por unitet i përsosur në Trininë e Shenjtë, ndaj me gëzim dëshmojmë se Perëndia është Një.
Kur judenjtë dëgjuan dëshminë e përsëritur të Jezusit për bashkimin e tij të përsosur me Atin, u tërhoqën nga vrasja me gurë. Megjithatë donin ta arrestonin dhe ta çonin në Këshillin e Lartë, që atje të zbulonte pikëpamjet e tij. Jezusi u largua prej tyre. Askush nuk mund të dëmtojë një nga bijtë e Perëndisë, për sa kohë që vullneti i Atit i mbron ata. Jezusi tha: "Askush nuk mund t'i rrëmbejë nga dora e Atit tim."
LUTJE: Atë dhe Qengji i Perëndisë, ne shohim unitet të plotë në dashurinë tënde. Mendjet tona nuk mund ta kuptojnë hyjninë në njerëzimin tënd. Shpirti yt na ka ndriçuar, për të kuptuar atë dashuri të madhe dhe veprat e tua shpëtuese. Ti na bëre fëmijët e tu. Na ndihmo ta shenjtërojmë emrin tënd në motivet, fjalët dhe veprimet tona. Na shenjtëro siç Ti je i shenjtë.
PYETJA:
- Si e shpalli Jezusi hyjninë e tij?