Previous Lesson -- Next Lesson
YUUHANNA - Ndaygu ngun jalbi ka nder nibhe
Jandeeji ka Linjiila no Yuhanna seedorii nonn
e) Fii ko Ɓiɗɗo Alla on woni kon e Baabaajo on e ko Baabaajo on woni kon e Ɓiɗɗo on (Yuuhanna 10:31-36)
YUUHANNA 10:31-36
31 Yahuuudiyankeeɓe ɓen hocci kadi kaaƴe fii fiɗugol mo. 32 Iisaa wi’i ɓe kadi: Mi hollii on kuuɗe moƴƴe buy iwruɗe ka Baabaajo on. E hara ko fii hongal e ɗen kuuɗe wonɗon mi fiɗirde kaaƴe? 33 Onsay Yahuudiyankeeɓe ɓen jaabii mo, wi’i: Men fiɗirtaa ma fii kuugal moƴƴal, kono ko fii ko hoynuɗaa kon, e tawde kadi an, ko a neɗɗo, hiɗa waɗitii Alla. 34 Iisaa jaabii ɓe kadi, wi’i: E hara windaaki ka Sariya mon: Allaahu on daali : ko on allaaɓe? 35 Ɓay non Alla noddirii ɓee ɓe daaluyee makko on tuggaa e mun : allaaɓe, e hin-le bindi ɗin montotaako, 36 haray ko honno wi’irton on mo Baabaajo on suɓiii, nuli ka aduna no hoynude, fii tun mi wi’ii ko mi Ɓiɗɗo Alla.
Yahuudiyankeeɓe ɓen ɓurti kadi aɲude Iisaa fewndo ko o wi’i: «Min e Baabaajo on ko men Gooto.» Hiɓe ƴettiri seeɗitoore makko nden wa tiwugol, ɓe faalaa fiɗugol mo kaaƴe wano sariya on yamiriri non, fii wota tikkere Yehowaa nden yanu e hoore jamaa on. Ɓe dogi ka tata fii hoccoyngol kaaƴe.
Iisaa darii takko maɓɓe, o landii, o wi’i: «E ko honɗun non mi boni? Mi kurkanikke on, mi sellini ɲawɓe mon ɓen, mi raɗike jinnaaji ɗin, mi udditii gite mbunɗo mon on. Mi sellini mo ɗamajan nangi on, mi waajike Linjiila on fii miskimɓe ɓen. E hara ko fii hongal e ɗen kuuɗe faaliraɗon warugol lan? Hiɗon faalaa mulude moƴƴiiɗo e mon on. Hinaa kaalisi maa kurkaneede mi ɗaɓɓi, ko kuuɗe Ben an ɗen tun mi woni e noddude e nder yankinaare. Ko mi woniri ɗoo ko fii kurkanagol on.»
Yahuudiyankeeɓe ɓen ƴettiti haala kan, wi’i: «Men fiɗiraali ma kaaƴe fii kuugal woo, kono ko sabu ko hoynuɗaa kon Alla. A fonnii hoore maa Alla, hara le hiɗa hakkunde amen wa aaden maayoowo. Meɗen hibbude ƴiiƴan maa ɗan fii hollugol wonde ko a maayoowo. Ko honno suusirɗaa wi’ugol wondema ko a Alla, humodirɗo e Seniiɗo on? Haray hiɗa wondi e jinna, ko a haanaaɗo wareede kisan.»
E hoore pellital, Iisaa jaabii, wi’i: «E hara on jangaali ka windii ɗon ka sariya Alla wonde Alla no woowi noddirde suɓaaɗo makko on tigi ‘Ko on allaaɓe, on fow ko on ɓiɓɓe Jom-Ɓural on’ (Zabuura 82:6) hara non hiɓe maayude, e hiɓe waɗude junuubu e hoore junuubu? Pellet, yimɓe ɓen fow ko junuubankeeɓe, e faljooɓe. Kono-le Alla noddirii ɓe ‘allaaɓe e ɓiɓɓe’ e innde Alla nden tigi. O faalaaka few yo on maayu, ko o faalaa ko yo on wuuru haa poomaa. Artee ka Alla, wonon laaɓuɓe wano kanko o woniri non laaɓuɗo.»
«Ko faaliraɗon fiɗugol lan? Alla tigi no noddirde on ‘allaaɓe e ɓiɓɓe’. Mi waɗaali junuubu wa mon. Miɗo laaɓi e kongol, miɗo laaɓi e kuugal; sabu ko mi woni kon Ɓiɗɗo Alla, miɗo haani wuurude haa poomaa. Jangee sariya mon on, on anday fii an, kon hay Bindi mon ɗin on hoolaaki, on anditaali allankaaku an ngun.»
«Hinaa min neli hoore an, kono ko Ben an laaɓuɗo on nelinmi. Ko min woni Ɓiɗɗo makko on; ko kanko woni Ben an. Laaɓal makko ngal no tabiti e an. Ko ɗun waɗi ko mi Alla mo Alla, ndaygu ngu ndayngu ngun, woodinaaɗo hara hinaa tagaaɗo, suutande suutaade e suutaande wootere e Baabaajo on.»
Iisaa fooli Yahuudiyankeeɓe ɓen e haalaaji maɓɓe ɗin tippude e bindi maɓɓe laaɓuɗi ɗin tigi. Ɓe rukaama hoore hiɓe wondi e ngayngu ka nder ɓernde maɓɓe, sabu Iisaa hollii seedee iwuɗo ka Ahadi Hindi fii ko tawi kon hiɗen waawa jeyidude e Alla, ɗun ko ka yaajingol, tentinii non kadi fii makko kanko.
YUUHANNA 10:37-39
37 Si mi waɗaali kuuɗe Ben an ɗen, haray wota on hoolo lan. Kono si mi waɗii ɗe, hay si on hoolotaako lan, hoolee ɗe kanje kuuɗe ɗen, fii no andiron faamon wonde Baabaajo on no e an, min kadi miɗo e makko. 39 Ɓe ɗaɓɓi kadi no ɓe nangira mo, kono o laawi ɓe.
«Ɗun no firi, e firo annabi Iisaa ngon, hiɗon haani gomɗinde lan, sabu ko sifa kuuɗe Alla ɗen mi woni e huuwude, kuuɗe wondude e yurmeende. Laamu an ngun wonantaa lan si tawii mi lontanaaki yurmeende makko nden. Ɓay giggol makko ngol ko e an wonti neɗɗo, miɗo jogii bawgal fii timmingol kuuɗe Alla ɗen, sabu ko Baabaajo on tigi woni ko huuwi ɗe.»
«No gasa hara ruuhu mon on waawaali faamude allankaaku an ngun e nder neɗɗankeyaagal ngal. Kono non, taskee kuuɗe an ɗen: ko hombo waawa immintinde mayɓe rewrude e kongol makko ngol, o wuntina bumɓe, o deƴƴina kenii, maaɗun o ɲammina yimɓe 5000 weelaaɓe hara ko bireediije jowi e liƴƴi ɗiɗi tun o huutori? Hara hiɗon faalaa yo Ruuhu-Seniiɗo on udditu ruuhu mon on, o yewta on no andiron wonde Alla tigi no e an? Nde heewuɗon Ruuhu-Seniiiɗo on woo, on tabitay e nder gandal hittungal ngal, faamon wondema Alla no e an ko heewi.»
Iisaa yewti konguɗi tiiɗuɗi yeeso jamaa on, e maanaa himo e Baabaajo on. Wano salndu ndun sinhorta non e daƴƴere nden non ndu heɓira doole iwuɗe ɗen ka ɗaɗi, ko wano non Almasiihu on iwiri ka Baabaajo on, himo tabiti e makko. Ɓen ɗiɗo seedataa, hiɓe wuuri e nder nanodiral e humodiral timmuɗun. Awa en waaway haalude wonde Ɓiɗɗo on no suuɗii e Baabaajo on no o feɲɲinira fii Ben makko, o teddina mo kadi. Toraare ɓurnde andeede nden ko nii fuɗɗorta: «Baaba amen Wonɗo ka kammu, yo innde maa nden hormore.»
On miijitike fii seeditoore Iisaa nden fii allankaaku makko ngun, hara ko e nder toraare e dewal, on faamay wonde ko seedee timmuɗo fuɗɗotoo on faaminde fii Tatooɓe laaɓuɓe ɓen e nder Gooto on. Hiɗen seeditorde weltaare wondema Alla ko gooto, hinaa ɓe tato sertuɓe dey mo bee e muuɗun, kono ko humondiral timmungal e nder Tatooɓe laaɓuɓe ɓen e nder Gooto on.
No Yahuudiyankeeɓe ɓen nanirnoo seeditoore nde Iisaa fillitii nden fii ko o humodiri kon e Baabaajo on no timmiri, ɓe acci kisan fiɗugol mo kaaƴe. Hiɓe faalaanoo non nangugol mo, adda mo ka dental fewjooɓe ɓen no ɓe andira miijooji makko ɗin. Iisaa laawii ɓe. Gooto waawataa barminde paykun Alla, fannii Baabaajo on no faalaa hiwugol kun. Iisaa maaki: «Hay gooto waawataa ɓe ittude e juuɗe Ben an.»
TORAARE: Yaa an Baaba e Baalun Alla kun, meɗen yi’ude humodiral timmungal ka giggol maaɗa. Ruuhu amen on waawataa faamude allankaakuyaagal wongal ngal e nder ko wontuɗaa kon neɗɗo. Ruuhu maa on findinii men no men faamira fii giggol maa tiiɗungol ngol e kuuɗe maa hisinayɗe ɗen. A wattii men fayɓe maa. Wallito men no men teddinira innde maa nden e nder miijooji amen ɗin e konguɗi amen ɗin e kuuɗe amen ɗen. Laɓɓin men sabu ko a laaɓuɗo.
LANDAL:
- Ko honno Iisaa ɓanginiri allankaaku makko ngun?