Previous Lesson -- Next Lesson
c) Jezusi ia zbulon veten të shëruarit si Biri i Perëndisë (Gjoni 9:35–41)
GJONI 9:35-38
35 Jezusi dëgjoi se e kishin nxjerrë jashtë dhe, pasi e gjeti, i tha: A beson ti në Birin e Perëndisë?. 36 Ai u përgjigj: Po kush është Zot, që të besoj në të? 37 Jezusi i tha: Ti e ke parë dhe është pikërisht ai që po të flet. 38 Ai tha: Zot, unë besoj dhe e adhuroi.
E kemi lexuar këtë histori ngushëlluese. Kur Jezusi dëgjoi për dëbimin e të shëruarit, e kërkoi dhe e gjeti në ankth. Ky është ngushëllimi në dispozicion të çdo besimtari, i cili është ndarë nga familja dhe miqtë për hir të Krishtit. Nëse jeni në këtë situatë, ju sigurojmë se Jezusi do t'i dëgjojë thirrjet tuaja dhe do të vijë personalisht tek ju dhe nuk do t'ju lërë. Mos shikoni njerëzit përndryshe do të zhgënjeheni. Shikoni vetëm Jezusin. Ju nuk keni shpresë në tokë ose në qiell, përveç se në të. Ai të do ty.
Pastaj Jezusi i bëri të riut pyetjen vendimtare: "A beson në Birin e Perëndisë, i cili është gjithashtu Biri i njeriut?" Kjo tregon se Jezusi ishte i vetëdijshëm për njohjen e të riut me pjesë të Dhjatës së Vjetër dhe e dinte nga Danieli 7:13–14, se Biri i Njeriut është Gjykatësi i Botës dhe Biri i Perëndisë. Jezusi po ia bënte këtë pyetje për të zbuluar nëse i riu donte t'i dorëzohej madhështisë së Birit të Perëndisë për atë moment dhe për përjetësinë duke mos u tërhequr. Ai e kishte ndjerë tashmë se Jezusi nuk ishte një njeri i zakonshëm dhe iu drejtua atij si "Zot". Megjithatë ai dëshironte të dinte më shumë se kush ishte Biri i Perëndisë, në mënyrë që të mos adhuronte një njeri të thjeshtë – gjë që do të ishte idhujtari.
Atëherë Jezusi i dha një përgjigje të lavdishme: "Ti e ke parë që më parë me anë të besimit, para se ta shihje nga pamja, unë jam Ai; Biri i Perëndisë që po të flet". I riu nuk vonoi as edhe një çast për t’iu dorëzuar plotësisht Jezusit. Ai u përkul para tij, si për të thënë: "Zot, unë jam i yti dhe ti je mbreti im, zotëria dhe Zoti im. Ti je Dashuria e mishëruar, unë të dorëzohem me dëshirë, që të jem skllavi yt tani e tutje". Vëlla, a e ke njohur Jezusin, Birin e Perëndisë, në formë njerëzore? A je lidhur me të si besimtar? A e ke adhuruar atë si të ishe shërbëtori i tij i lidhur?
GJONI 9:39-41
39 Pastaj Jezusi tha: "Unë erdha në këtë botë për të bërë një gjyq, që ata që nuk shohin të shohin dhe ata që shohin të verbohen." 40 Disa nga farisenjtë që ishin afër tij e dëgjuan këtë dhe i thanë: A jemi edhe ne të verbër?. 41 Jezusi u tha atyre: ''Po të ishit të verbër, nuk do të kishit asnjë mëkat; por tani që thoni: "Ne shohim", mëkati juaj mbetet".
Kur i riu u përkul para Jezusit, ai nuk u pengua ta bënte këtë, sepse Jezusi është i denjë për çdo nder. Por Jezusi tha se ardhja e tij do të sillte gjykimin për krenarët dhe njerëzit e devotshëm që e imagjinonin veten të dallueshëm nga të tjerët, por nuk dinin asgjë për të vërtetën. Të verbërit dhe mëkatarët e kishin kuptuar këtë e u penduan dhe kurorëshkelësit u pastruan. Jezusi nuk i gjykoi të papenduarit; ata e gjykuan veten për refuzimin e shpëtimit të tij. Ata kishin marrë pakëz dritë në të kaluarën nëpërmjet profetëve dhe dëshmive biblike. Por nëse kundërshtojnë qëllimisht predikimin e Jezusit, ata do të humbasin pjesën tjetër të ndriçimit që ishte në dispozicion. Ata do të bëheshin vrasës të verbër, zemërngurtë, kokëfortë dhe të urryer. Ardhja e Krishtit dhe predikimi i tij kanë dy rezultate: Shpëtim ose dënim, bekim ose mallkim. Cili është rezultati në zemrën tuaj?
Mes dëgjuesve të Krishtit kishte farisenj, të cilët mendonin se Jezusi po i vinte në shënjestër me fjalët e tij. Ata e pyetën: "A jemi të verbër?" Jezusi e shpoi hipokrizinë e tyre duke thënë: "Nëse realisht e shihni veten të verbër dhe të pikëlluar për gjendjen tuaj shpirtërore, do të ishit penduar për mëkatet tuaja përpara Gjon Pagëzorit dhe do të kishit braktisur mëkatet tuaja; atëherë do të kishit marrë falje dhe bekim. Por ju mashtroni veten , dhe pretendoni se kuptoni gjithçka, duke menduar se jeni të drejtë. Por me një mburrje të tillë ju provoni verbërinë dhe ngurtësinë tuaj. Nuk do të merrni as edhe një rreze drite nga drita e botës."
LUTJE: Zoti Jezus, ti je Biri i Perëndisë në formë njerëzore. Ne të adhurojmë dhe të dorëzohemi tani dhe përgjithmonë. Ne jemi në dispozicionin tënd me energjitë dhe pasuritë tona. Të lutemi të na falësh e të na shenjtërosh zemrat, që asnjë mëkat sado i vogël të mos na ndajë prej teje.
PYETJA:
- Çfarë do të thotë përkulja përpara Jezusit?