Previous Lesson -- Next Lesson
YUUHANNA - Ndaygu ngun jalbi ka nder nibhe
Jandeeji ka Linjiila no Yuhanna seedorii nonn
e) Fii ko beccal annabi Iisaa ngal tufaa kon (Yuuhanna 19:31-37)
YUUHANNA 19:31-37
31 Nde tawnoo nden nyande ko hebulanagol fii nyalaande fowteteende nden e tawde kadi nden nyalaande ko mawnde. Tawi Yahuudiyankeebhe bhen faalaaka yo fureeji dhin acce ka leddhe altindiraadhe. Onsay bhe torii Pilaatu yo koydhe fureeji dhin hele si dhi ittee dhon. 32 Onsay suufaabhe bhen ari heli koydhe arano on e oya kadi mo o fempidanoo e mun. 33 Bhay wonii bhe hewtii Iisaa, bhe tawi o maayiino, laatii bhe helaali mo koydhe dhen. 34 Kono goddho e suufaabhe bhen tufiri mo conkenwal ka beccal, tun ndiyan e yhiiyhaan yalti. 35 Yi’udho mo on seeditike, awa seedee ko goonga o wowli, fii onon kadi no gomdhiniron. 36 Dhun wadhiri fii ko bindi dhin wi’i kon no laatora wonde: Yhi’al makko woo heletaake. 37 Nokku goo bindi dhin no wi’i kadi: Bhe ndaaray mo bhe tufi on.
Bhen feyyhintinoobhe ka sengo sariya, Yahuudiyankeebhe bhen joganooki miijo woo iwungo e juudhe neddhanke. Sariya Muusaa on no wi’i wonde fureeji waraabhe bhen no haanaa cippineede ado jemma on hewtude. Awa, ko dhun Yahuudiyankeebhe bhen wadhannoo fempanoobhe bhen tato ka leggal altindiraangal. Bhe faalanooka yi’ude ko yurmi nyande juldeere nden. Bhe landii Pilaatu yo bhe rabbhindhin ngurndan mabbhe dhan e fee helugol koydhe mabbhe dhen. Yimbhe fempanoobhe goo ka leggal altindiraangal no waawunoo ronkude maayde nde baldhe tati feyyhi. Suufaabhe bhen no dhoftaade yamirooje dhe bhe yamiraa dhen.
Bhe bhadii takko annabi Iisaa, bhe tawi jaka o maayii. Bhandu makko ndun no lo’i sabu ko o piyaa kon, wonkii makko kin no andunoo ande e hoore bonnere e tikkere Alla nden. Ko hoore anniye annabi Iisaa maayiri fii moyyhintingol hakkunde men e Alla. Fii no Yahuudiyankeebhe bhen fellitira o maayii tigi, suufaajo on yhetti kaafa, o tufi beccal makko ngal ka binde bhernde makko. Ndiyan e yhiiyhan yaylti, seedee wonde o maayii ado saa’a jeegabho juma on.
Piiji tati no fennyini fii polgal Alla ngal. Aranun dhun: Ibuliisa tindini Yahuudiyankeebhe bhen yo bhe helu yhi’e Almasiihu on dhen fii wota gooto waawu wi’ude wondema ko Fempaadho on ka leggal altindiraangal woni sadaka iwudho on ka Alla. Dewe wadheteedhe dhen ka Juldeere Yawtaneede no landii Baalun kun aldaa e ella, hara yhi’e dhen helaaka (Eggudu 12:46). Wano non, Alla no hisinde Bhiddho on haa ka mayde, gooto waawataa yeddude fii ko o subhaa kon wonugol Baalun Alla kun.
Dhimmun dhun: ko beccal makko ngal tufaa kon ko ko annabi Zakariyaa’u hiitinoo non (12:10). Ka deftere Zakariyaa’u 11:13, annabaajo on yi’i wonde jamaa on ka Ahadi Hindi no sikki haray ngurndan Ngaynaako mabbhe on jaraa ko feyyhi tammaaji cappandhe tati kaalisi. Dhun e tawde dhin kaalisiiji dhuudhaa, Alla immini Ruuhu wallitotoodho on ka toraare e hoore suudu Daawuuda ndun e jamaa Yerusalaama on no gite mabbhe dhen udditora e no bhe anditira Fempaadho on ka leggal altindiraangal wondude e Ben makko. Bhaawo nden jande dhon, bhe andataano Alla, bhe andataano kadi kisiyee makko on. Ko rewrude e Fempaadho on ka leggal altindiraangal tun Ruuhu Allaahu on hendortee, wano windori non: «Tufunoobhe mo bhen yi’oyay mo.»
Tammun dhun: taalibaajo mo yiltanooki on bhaawo makko ka binde leggal altindiraangal seeditorii gite mun dhen dhin piiji feyyhudhi fow. O dogaali ko o yi’i suufaabhe bhen, o tertaaki Joomi on bhawto ko on maayi. O yi’ii ko honno bhe tufiri beccal annabi Iisaa ngal, o seeditike fii giggol Alla ngol, e maanaa Baabaajo on e Bhiddho on e Ruuhu-Seniidho on fii no gomdhiniren fii humondiral woodungal ngal hakkunde Tatoobhe laabhubhe bhen e nder Gooto on e fii ngurndan poomayankejan dhan.
TORAARE: Iisaa-Almasiihu Joomi, ko an woni fooludho on junuubi e Ibuliisa e nyaawoore nden. Ko an woni Wurdho on, Landho laamodudho on e Baabaajo on e nder humondiral Ruuhu on.
LANDAL:
- Ko hondhun faameten fii ko yhi’e Almasiihu on dhen ronkaa kon heleede?