Previous Lesson -- Next Lesson
b) Mɔgɔ ka kan ka bange kokura (Yuhana 3:1-13)
YUHANA 3:6-8
6 Sabu min worora adamadenw baraka ra, adamadenya cogo le bɛ kɛ o ra. Nka ni min worora Nin Saninman baraka ra, Nin Saninman cogo le bɛ o tigi ra. 7 Ayiwa, ne k’a fɔ i ye minkɛ ko aw ka kan ka woro kokura, o kana i kɔnɔnɔban. 8 I m’a ye, fɔɲɔ bɛ fiyɛ ka taga yɔrɔ min ka di a ye, i bɛ a mankan mɛn, nka i tɛ a bɔyɔrɔ lɔn, i tɛ a tagayɔrɔ lɔn fana. Mɔgɔ min worora Nin Saninman baraka ra, o tigi ta bɛ ten le.
Yesu k’a yira Nikodɛmu na ko mɔgɔ bɛɛ kelen kelen jusukun ka kan ka yɛlɛma le pewu. O yɛlɛmari ko ka bon, i ko farisogo ni nin faranfasi ka bon cogo min na. Layirikura kɔnɔ, farisogo ko bɛ adamaden jogokɔrɔ le yira, min k’a to adamaden benna jurumu na, ka faran ka bɔ Ala ra; mɔgɔjuguw bɛ saya ta sira le kan. Ni a fɔra ko farisogo ta jogokɔrɔ, o bɛ ɲasin jurumunkɛbagaw farikolo ma, nka o nin, ani o hakiri fana sen b’a ra. O b’a yira ko jurumun ka adamaden yɔrɔ bɛɛ le cɛn, i n’a fɔ Yesu k’a fɔ cogo min na, ko: «miiri juguw bɛ bɔ mɔgɔ jusukun le ra.» Ka don Ala ta Masaya ra, mɔgɔ si man kan ni o ye. Adamaden ka jugu kabini a worowagati, a fana bɛ a ta juguya yɛlɛma tɔw fɛ.
Ni a fɔra ko «Nin», o ye Nin Saninman ye, o ye Ala yɛrɛ ye, min fara can ra, ani saninmanya, ani sebagaya ani kanuya. Ala tɛ ban mɔgɔjuguw ra, o kosɔn a ka farisogo jogokɔrɔ ta fanga cɛn, Kirisita baraka ra. O bɛ bangeko flanan kɛkun yira an na. Ni Nin Saninman sigira an kɔnɔ, a bɛ an farisogo negejuguw halaki, janko Ala ka an wele min kama, an ye ɲanamanya ka kaɲa ni o ye. Yala Aw bangera kokura, ka bɔsi ka bɔ farisogo nege ta fanga kɔrɔ wa?
Yesu ko Nikodɛmu ma ko: «Ele ni kititigɛ jɛnkuru mɔgɔw bɛɛ, ani Iburahima ta durujaw bɛɛ, aw bɛɛ ka kan ka bange kokura.» O ye jagboya ye, Ala ta baara lo, min ka kan ka kɛ. An b’a fɔ k’a gbɛlɛya, an balema, ko ni a fɔra ko «aw ka kan», ko o ye jagboyako le ye an fɛ. Ni o yɛlɛmari ma kɛ, aw tɛ se ka Ala lɔn, aw fana tɛna don a ta Masaya fiyewu.
Yala aw ka fɔɲɔ fiyɛtɔ mankan mɛn ka ye wa? Mɔgɔ min bangera kokura o bɛ i ko fɔɲɔ wuritɔ. A bɛ i ko fɔɲɔ bɛ bɔ yɔrɔ lakolon le ra, ka sekɔ yɔrɔ lakolon na tuun. O cogo kelen na, Ala ta denw ta bangeko bɔra sankolo ra Ala fɛ, o fana bɛ sekɔ ka taga o Fa Ala fɛ. Fɔɲɔ mankan le bɛ a tagayɔrɔ yira.
Ni mɔgɔ bangera kokura, o bɛ lɔn ka gbɛya Nin Saninman ta kumakan le fɛ, a kɔnɔ. O tɛ kuma ni adamaden gbansan kumakan ye. Nin Saninman min jigira ka bɔ sankolo ra, ale bɛ o tigi fa, ka kɛ Ala kumakan barakaman ye ye a kɔnɔ. Yala Nin Saninman jigira ka na sigi aw jusukun na wa?
YUHANA 3:9-13
9 Ayiwa, Nikodɛmu ko Yesu ma ko: «O bɛ se ka kɛ cogo di sa?» 10 Yesu ka a jaabi ko: «Ele min ye Izirayɛli karamɔgɔba ye, ele ma o lɔn wa?» 11Yesu ko a ma ko: «Ne b’a fɔ i ye can ra, ko an ka min lɔn, an bɛ o le fɔ; an bɛ min ye, an bɛ kɛ o le seere ye fana. Nka aw t’a fɛ ka sɔn an ta seereya ma. 12 Ko minw bɛ kɛra dunuɲa ra yan, ni ne bɛ o fɔ aw ye, ni aw ma se ka la o ra, ko minw bɛ kɛra sankolo ra, ni ne ka o fɔ aw ye, aw bɛna la o ra cogo di? 13 Mɔgɔ si ma yɛlɛn ka taga sankolo kɔnɔ, fɔ min jigira ka bɔ sankolo ra; Min kɛra Adamaden ye, ale le bɛ o ye.
Ka Yesu to o kuma ɲafɔri ra, Nin Saninman fɔɲɔ fiyɛtɔ sera Nikodɛmu ma. A jusukun samana Ala nɔ fɛ. Nka a hakiri ma se ka o can ko tagafan ye, k’a faamu ka se yɔrɔjan. A k’a fɔ a da jukɔrɔ ko: «Ne m’a lɔn nin bangeko ɲɔgɔn bɛ se ka kɛ cogɔ min na.» A ka o fɔ k’a yira ko ale dɛsɛra nin ko ra. Yesu k’a fɔ a ye tuun ko: «Can lo, ele ye karamɔgɔba ye, nka i nana kumana ne fɛ; tɔw k’a ye ko olugu hakiri ka bon, walama ko o lɔyɔrɔ ka bon ka tɛmɛ, k’a fɔ ko o bɛna kuma ni ne ye. Ele ka fisa ni olugu ye, hali ni i ma Nin Saninman ta kow kɛkunw lɔn. I ta alabato bɛɛ, ani i ta sarakaw, ani i bɛ sɛgɛ minw la i yɛrɛ kan janko ka sariya sira tagama, o si tɛ foyi ɲa. I ma hali Ala ta Masaya kow bɛɛ ra fitiniw lɔn fɔlɔ.
A siɲaga sabanan le bɛ nin ye, ko Yesu bɛ nin kuma barakaman fɔ tuun: «Can ra, can ra, ne b’a fɔ i ye.» Nin kumaw fɔko kelen kelen bɛɛ kɔ fɛ, Yesu bɛ Ala ta can dɔ yira. Yesu bɛ nin fɔ k’a gbɛlɛya kosɛbɛ, sabu anw adamadenw ta hakiri ka suma ka Ala ta kow faamu.
Yesu ka Nikodɛmu karan mun wɛrɛ ra tuun? Yesu ta kuma yɛlɛmana ka bɔ a kelen ta ko kan, ka Nin Saninman kumakan fana fara a ta kan; a m’a fɔ tun ko «ne», nka a ko «an». Kirisita ni Ala ye kelen ye, ani Ala ta kuma min kɛra adamaden ye. Yesu bɛ an karan can dɔ ra yan, mɔgɔ bɛɛ ma min lɔn. A bɛ ko minw ye, a bɛ o seereya kɛ, Nin Saninman ta jɛnɲɔgɔnya ra. An ka kan ka sɔn o seereya ma, ani ka la a ra.
Yesu tun ka mun le lɔn, ni mɔgɔ tɔw ma min lɔn? A tun ka Ala lɔn, fɔ a b’a wele ko a Fa. Ni Nin Saninman tɛ, o gundo dogonin tun bɛ to dunuɲa kuntigiw ma, o ni o ta hakiritigiya bɛɛ. Kirisita bɔra a Fa fɛ, a fana sekɔra ka taga a Fa fɛ, a jigira ka bɔ sankolo ra, a fana yɛlɛra ka taga sankolo kɔnɔ tuun. Bɛnbariya min tun bɛ Ala ni adamadenw cɛ, o banna, wagati min Ala ta Nin kɛra adamaden ye, ka kɛ Yesu ye, ka o dingaba bɔ Ala ni mɔgɔw cɛ. Sisan Matigi Ala yɔrɔ man jan an na tuun, a ma kɛ siranyafɛn ye tuun, a yɔrɔ fana ka surun an na, ani a sabarinin lo fana an ta fan fɛ. Nin ye kabako ye, ko mɔgɔw ma se ka nin seereya ko faamu, seereya min ye Ala ta can ye. Min bangera Nin Saninman sababu ra, kelenya min bɛ ale ni a Fa Ala cɛ, mɔgɔw ma o faamu, sabu o ma sɔn ka la a ra, ani ka lɔ o ta jurumunw na. O m’a faamu ko o ka kan ka bange kokura, o k’a miiri ko olugu ye mɔgɔ ɲumanw ye, ani mɔgɔ hakiritigiw. O tun ka kan k’a lɔn ko ni i b’a miiri ko i ta ko bɛɛ dafanin lo, o tɛ se k’a to i ye Ala ta Yiracogo saba kɔrɔ faamu.
DAARIKAN: Fa, Dencɛ ani Nin Saninman, an bɛ i bato; i ka an mara i ta kanuya kɔnɔ, ka an kɛ danfɛnkuraw ye, ka an kɛ can ta denw ye. A to i ta can, ani i ta Nin ye fiyɛ an ta jamana kan, janko mɔgɔ caman ye se ka kisi, ani janko seereya min fɔra Fa ni Dencɛ ni Nin Saninman ta ko ra, o ye se yɔrɔ bɛɛ, k’a gbɛya k’a fɔ an ye an yɛrɛ ta kanw na.
ƝININKARI:
- Bangekokura tagamasiyɛnw ye juman ye lanabaga ta ɲanamanya ra?