Previous Lesson -- Next Lesson
3. Karamɔgɔden wɔɔrɔ minw kɛra fɔlɔw ye (Yuhana 1:35-51)
YUHANA 1:43-46
43 O dugusagbɛ Yesu ko a bɛ taga Galile; a tagatɔ, a ka Filipe ye. A ko Filipe ma ko: «Tugu ne kɔ.» 44 Filipe tun bɛ bɔ Bɛtisayida; o tun ye Andere ni Piyɛri fana ta dugu le ye. 45 Filipe tagara Natanayɛli ye minkɛ, a k’a fɔ a ye ko: «Cira Musa tun ka mɔgɔ min ko fɔ a ta sariya kitabuw ra, ani cira tɔw fana ka min ko fɔ, an ka o ye: Yesu min bɛ bɔ Nazarɛti, ale lo, Yusufu dencɛ.» 46 Natanayɛli ko Filipe ma ko: «Yala fɛnɲuman bɛ se ka bɔ Nazarɛti wa?» Filipe ko: «Ayiwa, i yɛrɛ ye na a flɛ sa.»
An kɔnna ka hayan minw karan, an ka ko minw ye, o kow kɛra tere naani le kɔnɔ ka tugu ɲɔgɔn na. A tere fɔlɔ, ciraden dɔw nana ka bɔ Zeruzalɛmu ; a tere flanan, Yuhana ka Yesu yira ko Ala ta Sagaden lo; a tere sabanan, Yesu ka karamɔgɔden naani wele; a tere naaninan, Yesu ka Filipe ni Natanayɛli wele, ka fara karamɔgɔden tɔw kan.
Yesu yɛrɛ le tagara Filipe fɛ. Sigiya t’a ra ko Filipe tun k’a mɛn Batizerikɛbaga fɛ ko Yesu tun bɛ o cɛ ra. A barara a ra k’a ye ko Batizerikɛbaga nana Yesu yira ko Ala ta Sagaden lo. Filipe tun ma sɔn ka gbara Yesu ra. A tun b’a fɛ ka taga Matigi fɛ, nka a tun b’a miiri ko ale ka dɔgɔ ka kɛ Yesu jɛnɲɔgɔn ye. O ra, Yesu yɛrɛ le tagara a fɛ, k’a ta siranya ta miiriyaw bɛɛ ban, k’a wele ko a ye wuri ka tugu ale kɔ.
Ni Yesu yɛrɛ bɛ a diyanan mɔgɔw ɲanawoloma, o ka kan, sabu ale le ka o dan, ka o kanu, ani ka o kunmabɔ. Anw le tɛ a latigɛ an yɛrɛ ma ka sɔn Yesu ma, nka ale le bɛ kɔn ka an ye; A ka an yɔrɔ ɲini, ka an ye, ani ka an wele a ta baara kama.
Ni weleri ma kɛ, foyi tɛ kɛ, ni Kirisita yɛrɛ ma an ci, an tɛ se ka baara nafaman si kɛ. Ni mɔgɔ min bɛ baara kɛ Ala ta Masaya kɔnɔ, k’a sɔrɔ a ma wele o baara kama, o tigi bɛ a yɛrɛ sɛgɛra le, a fana bɛ tɔw degu baara ra. Nka ni mɔgɔ min bɛ Kirisita lamɛn, ka sɔn k’a kan mina, Kirisita b’a janto o tigi ra, ka lɔ ni a kunko ye wagati bɛɛ.
Filipe tagara kibarodiman fɔ o yɔrɔnin kelen bɛɛ ra, ka o kibaroya ɲuman fɔ a tericɛ Natanayɛli ye, ko: «An ka Masiya ye!», a m’a fɔ ko «ne ka Masiya ye». O cogo ra a bɛ jɛn ni Egilisi ta lanaya fɔnin ye.
A bɛ i n’a fɔ ko Yesu ka kunnafoni dɔw di a ta karamɔgɔdenw ma a ta cira kɛcogo ko ra, nka a ma fɛn fɔ a bangeko ra Bɛtilɛhɛmu, walama a lamɔfa Yusufu ta ko ra. O ra, karamɔgɔdenw tun ma foyi lɔn a ta ɲanamanya ra.
Natanayɛli tun karanna Ala ta Kuma ra kosɛbɛ. Layiri minw tun sɛbɛra Kirisita ta ko ra cira Musa ta kitabuw kɔnɔ ani Ciraw ta kitabuw kɔnɔ, a tun ka o kow sɛgɛsɛgɛ kosɛbɛ. O ra, a tun k’a lɔn ko Masiya bɛna bange Bɛtilɛhɛmu le, ka bɔ Dawuda ta duruja ra, ka sigi masaya ra a ta mɔgɔw kunna. A tun ka gbɛlɛn Natanayɛli fɛ k’a sɔn a ma ko Masiya bɛ bɔ Nazarɛti, o dugu fitini min tɔgɔ yɛrɛ ma fɔ Layirikɔrɔ kɔnɔ, ani cira si ma min tɔgɔ fɔ. A hakiri tun b’a ra fana ko Faso kanubagaw ta jɛnkuru tun murutira Rɔmu ta fanga kama o yɔrɔ le ra. Rɔmukaw tun ka o murutiri cɛn, ka mɔgɔ caman faga o ko ra.
Filipe kɔni tun ma nafa ye o kow si ra. Ale tun ka Kirisita sɔrɔ minkɛ o ɲagariba le tun bɛ a jusu ra. Jusudiyaba min tun bɛ a ra, o kɛra sababu ye ka Natanayɛli ta sigiya bɛɛ ban. A ka kuma surunya k’a tigɛ, k’a fɔ ko: «I yɛrɛ ye na a flɛ sa.» O kumacogo le ye kibarodiman fɔri jusiginan ye, sabu a b’a to mɔgɔ bɛ can sɛgɛsɛgɛ, ani k’a sɔrɔ, ni i ko «I yɛrɛ ye na a flɛ sa.» Aw kana sɔsɔri kɛ ni mɔgɔ ye Yesu ta ko ra, nka aw ye Yesu ta sebagaya faamu, k’a lɔn ko a bɛ ni aw ye. An ta seereya ma jusigi adamadenw ta hakiri ta miiriyaw kan, nka a jusigira mɔgɔ dɔ le kan, min ye Matigi yɛrɛ ye.
DAARIKAN: Matigi Yesu, i ni ce, sabu i ka an jusukunw fa i ta ɲagari ra; an ladon i ta jɛnɲɔgɔnya ɲuman na, janko an fana ye se ka dɔw lana i fɛ. Waajuri lɔgɔ don an na, an ye mɔgɔw waaju ni kanuya ni muɲu ye; siranya min bɛ an na, ani an bɛ ko minw kɛ sababu ye ka ban ita baara ma, ani maroya min bɛ a sɔrɔ Kibarodiman ko ra, sabari i ye yafa an ma o ra.
ƝININKARI:
- Karamɔgɔden fɔlɔw ka Yesu tɔgɔ fɔ mɔgɔ tɔw ye cogo di?