Previous Lesson -- Next Lesson
3. Kirisita bɛ suw lakunu ka dunuɲa ta kiti tigɛ (Yuhana 5:20-30)
YUHANA 5:20-23
20 Sabu Fa bɛ Dencɛ kanu, o kosɔn a bɛ ko o ko kɛ, a bɛ o bɛɛ yira a ra. A yɛrɛ bɛna fɛn caman yira a ra tuun min ka bon ka tɛmɛ nin kan, janko aw ye kabakoya. 21 Sabu Fa bɛ suw lakunu ka ɲanamanya di o ma kura ye cogo min na, o cogo ra ni Dencɛ b’a fɛ ka ɲanamanya di minw ma, a b’a di olugu le ma. 22 Fa tɛ kiti tigɛ mɔgɔ si kan fana, nka a ka kitiko bɛɛ to Dencɛ le boro, 23 janko bɛɛ ye Dencɛ bonya i n’a fɔ o bɛ a Fa bonya cogo min na. Ni mɔgɔ min ma sɔn ka Dencɛ bonya, Fa min ka a ci, o tigi tɛ o le bonyara.»
Nin kɛwalew ka bon dɛ! Adamaden si tɛ se ka nin kow kɛ, nka Yesu bɛ se k’a kɛ. Fa bɛ o baaraw don Dencɛ boro, Dencɛ bɛ o baaraw kɛ. An bɛ kɛwale fla kɔrɔsi nin hayanw na, minw tun ye cirayakumaw ye Kirisita ta ko ra ka kaɲa ni Ala ta Kuma ye (Mɔgɔ min tun bɛna o ko fla dafa a ta ɲanamanya ra, Yahudiyaw tun bɛ o tigi le makɔnɔna): Ka suw lakunu, ani ka kiti tigɛ terenninya kan. A flɛ, Yesu le nana a kɛ o ko fla bɛɛ kɛbaga ye. A tun kɔnna ka waajuri kɛ a jugu ɲa kɔrɔ, k’a fɔ ko ale le ye ɲanamanya Matigi ye, ani min bɛna kiti tigɛ, hali ni o ka ale jate i ko fatɔ, walama i ko Ala tɔgɔcɛnbaga. O k’a latigɛ ko o bɛna a faga. Yesu tun ka o kumaw fɔ o ye, sabu a tun b’a fɛ ka o jusukun yɛlɛma, ka kɛ sababu ka o ta miiriyaw yɛlɛma, k’a to o ye nimisa ni o jusukun bɛɛ ye.
An ta Ala tɛ mɔgɔw halakibaga ye, nka ɲanamanya dibaga lo, min tɛ jurumunkɛbaga si ta saya fɛ. A b’a fɛ jurumunkɛbaga ye a ta jusukungbɛlɛya dabla, ka na ɲanamanya dibaga fɛ. Ni mɔgɔ min ka ban Ala ra, o tigi bɛ to ka sa dɔɔni dɔɔni le, a nin ta fan fɛ, a farisogo ta fan fɛ, ani a hakiri ta fan fɛ. Nka ni mɔgɔ min ka gbara Kirisita ra, o tigi bɛ ɲanamanya kokura, a bɛ ɲanamanya banbari sɔrɔ. Matigi b’a fɛ ka jogo kura le di aw ma, ani ka aw lakunu ka bɔ jurumun ta sunɔgɔ ra. Yala aw bɛ a kumakan jatera wa? Walama aw bɛ aw ta ɲanamanya bɛɛ kɛra jurumun le ra, ka to ka aw jarakikow le kɛ?
Wagati bɛɛ ani tuma bɛɛ, dunuɲa ju sigira can le kan. Hali ni adamadenw ta miiriya tɛ o Matigi kan, o bɛ mɔgɔ faga, ka ɲɔgɔn janfa, o bɛɛ n’a ta, can kɔni tɛ yɛlɛma. Kitilon le ye dunuɲa ta lɔnba ye. Ala bɛna a yɛrɛ dimibɔn kojugukɛbagaw bɛɛ ra, minw bɛ muso cɛ saninw ani dɛsɛbagatɔw minako juguya, olugu ta bɛ juguya. Ala ka kiti bɛɛ don Kirisita boro. A bɛna bɛɛ ta kiti tigɛ, siyaw bɛɛ, kanw bɛɛ, diinaw bɛɛ. Yesu tun ye adamaden ye min ma jurumun si kɛ, o ra a bɛ an ta adamadenya cogo faamu, ka an ta dɛsɛyɔrɔw lɔn. A ta kiti terennin lo. Ni a nana ni a ta nɔɔrɔ ye wagati min na, dunuɲa siyaw bɛɛ bɛna kasi, sabu o tun ma kititigɛbaga jate, o k’a mafiyɛnya, ka ban a ra. Yala aw bɛ o kow faamu wa?
O tuma, bɛɛ bɛna o kinbirigban Dencɛ ɲa kɔrɔ. Minw tun ma Kirisita batoko jate dunuɲa ra yan, olugu bɛna a bonya, ka siran, fɔ ka yɛrɛyɛrɛ. Kirisita ka kan ni sebagaya ye, ani fɛn bɛɛ tigiya, ani hakiritigiya, ani bonya, ani nɔɔrɔ. (Yirari 5:12). A ka dunuɲamɔgɔw ni Ala bɛn kelen ma. A kɛra Sagaden ye, k’a yɛrɛ di ka sa an kosɔn. Ala ni Dencɛ bɛɛ ka kan kanuya ani sebagaya ta fan fɛ, kɛwalew ta ko dɔrɔn tɛ. O fla bɛɛ ka kan ni an ta bonya ye, ani an ta batori. O kosɔn wagati min Yesu tun bɛ dugukolo kan, a tun tɛ ban mɔgɔ si ta batori ma. An ka kan ka Dencɛ bonya i n’a fɔ an bɛ Fa bonya cogo min na. An bɛ se ka an ta daari fɔ Dencɛ ye, i n’a fɔ an b’a fɔ Fa ye cogo min na.
Minw bɛɛ bɛ ban Kirisita ra, walama k’a dɔgɔya, olugu bɛ ban Fa yɛrɛ le ra fana. Matigi Ala bɛ se ka Dencɛ ɲanawoloma a yɛrɛ sago ma. Fɛn min kosɔn mɔgɔw bɛ ban ko Kirisita ye Dencɛ ye, ani ka ban k’a bato, o ye mɔgɔw yɛrɛ ta sira juguw ye. O tɛ a ɲini ka Kirisita lɔn minkɛ, o cogo ra o tɛ se ka Ala lɔn ka kaɲa ni a ta alaya ye.
YUHANA 5:24
24 Can ra ne b’a fɔ aw ye ko mɔgɔ min ka ne ta kuma lamɛn ka la ne cibaga ra fana, o tigi ka ɲanamanya banbari sɔrɔ; kiti tɛna tigɛ a kan tuun, sabu a bɔra saya ra ka don ɲanamanya ra.
Ni mɔgɔ min ka Kirisita ta Kibarodiman lamɛn ni ɲagari ye, ka la a ra ko Ala Dencɛ lo, ka la a ra ko ale le bɛ an kunmabɔ an ta jurumunw ma, o tigi bɛ ɲanamanya banbari sɔrɔ. O ɲanamanya tɛ damina saya kɔ fɛ, nka a bɛ damina nin dunuɲa ra yan le, Nin Saninman baraka ra. O Nin bɛ jigi aw kan, sabu aw lara Fa ni Dencɛ ra. Mɔgɔ bɛɛ tɛ Kirisita ta kumaw kɔrɔ faamu, hali ni o k’a lamɛn siɲagako waga caman, k’a karan sɛbɛw kɔnɔ, ani k’a kɔnɔkumaw bɛɛ sɛgɛsɛgɛ. O tɛna kuma Dencɛ ta nɛɛma ko ra, o fana tɛna tagama ka kaɲa ni Nin Saninman ye. Lanaya sɔbɛ kɔrɔ ye ko i bɛ i jigi la Kirisita kan, ka sɔn a ta kow ma. Ni i ka don o jɛn ra ni Kirisita ye, Ala bɛ i jate mɔgɔ terennin ye, i bɛ bɔsi Ala ta kiti ma, sabu lanaya le bɛ i kisi, kɛwalew tɛ. Minw bɛ o yɛrɛ karifa Kirisita ta gbengbenyiri sen kɔrɔ, Kirisita ta kanuya bɛ olugu datugu, ka o ta jurumunw jɔsi ka bɔ yi, ani ka o jusukun saninya. A bɛ an ja gbɛlɛya ka gbara Ala ra. Sabu Matigi Ala kɛra an Fa ye, wagati min an bangera kokura. Ala bɛ an jate mɔgɔ terennin ye minkɛ, o le bɛ na ni an ta bange kokura ye.
Kirisita ka layiriba min ta, yala aw sera ka o lɔn wa? Aw bɔsira ka bɔ saya ni a ta jatigɛw boro. Aw ɲanaman lo wagati bɛɛ ani tuma bɛɛ Kirisita ta nɛɛma sababu ra. Ala ta dimi tɛna ben aw kan k’a ye tuun fiyewu.
Aw ta lanaya Kirisita ra, o ka aw cogo yɛlɛma; sisan ɲanamanya saninman ani ɲanamanya banbari kɛra aw ta ye. Jɛn min bɛ an siri Kirisita ra, o ma kɛ an yɛrɛ ta miiriya dɔrɔn nɔ ye dɛ, fɛn dɔ lo min kɛra, min bɛ a nɔ ra, ani min ye can yɛrɛ ye. Ka to Kirisita ta jɛnyɔgɔnya ra, kisiri si man bon ka tɛmɛ o kan. Aw ye nin hayan 24 karan, k’a lɔn kun fɛ, ka aw ɲa lɔ Kirisita ra; ni o kɛra lon dɔ an bɛna ɲɔgɔn ye Ala ta Masaya banbari ra.
DAARIKAN: An bɛ i bato an Fa, Dencɛ, ani Nin Saninman. I ka an ta jurumunw yafa, ka an jate mɔgɔ terenninw ye. An sen tɛna kɛ Ala ta kiti ra, sabu i ka an bɔsi Ala ta dimi ma. An bɛ i bato sabu i ta ɲanamanya donna an kɔnɔ, saya tɛ se sɔrɔ an kan tuun. An bɛ ɲanamanya i ye wabati bɛɛ. A to an sirinin ye to i ra, janko an ye i tɔgɔ bonya lakari.
ƝININKARI:
- Fa Ala ka baara nafaman fla juma le karifa Kirisita ma?