Previous Lesson -- Next Lesson
a) Yesu ka jɛnɛyakɛbaga bla nimisa sira kan (Yuhana 4:1-26)
YUHANA 4:16-24
16 Ayiwa, Yesu ko a ma ko: «Taga i cɛ wele ka na yan.» 17 Muso ko: «Cɛ tɛ ne fɛ!» Yesu ko a ma ko: «Jo bɛ i fɛ k’a fɔ ko cɛ tɛ i fɛ. 18 Sabu i sigira cɛ looru le fɛ; i bɛ min fɛ sisan, o fana tɛ i cɛ ye. I ka min fɔ, o ye can ye.» 19 Muso ko a ma ko: «An karamɔgɔ, ne k’a ye cogo min na, ele ye cira le ye! 20 O ra, ne bɛ i ɲininka: mun na anw Samarikaw, anw bɛmaw ka Ala bato nin kuru le kan yan, k’a sɔrɔ aw Yahudiyaw, aw b’a fɔ ko Ala ka kan ka bato yɔrɔ min na ko o ye Zeruzalɛmu le ye?» 21 Yesu k’a jaabi, ko: «Muso, la ne ra; wagati dɔ bɛna se, aw tɛna Fa Ala bato nin kuru kan tuun, walama Zeruzalɛmu. 22 Ayiwa, aw Samarikaw aw bɛ min batora, aw tɛ o lɔn; nka an Yahudiyaw, an bɛ min batora, an ka o lɔn, sabu kisiri bɔra Yahudiyaw le ra. 23 Nka wagati bɛna se, a sera yɛrɛ ka ban; Alabatobagasɔbɛw bɛna Fa Ala bato nin ni can le ra; sabu Fa Ala bɛ o batobagaw ɲɔgɔn le ɲinina. 24 Ala ye Nin le ye, o kosɔn minw bɛɛ bɛ a bato, olugu ka kan ka a bato Nin sababu le ra, ani can ra.»
Yesu ka ɲanamanya ji nege don muso ra, ka Ala ta ninfɛn sɔrɔko nege don a ra; sisan fɛn min bɛ a bari ka o ninfɛn sɔrɔ, Yesu bɛ o yira a ra, ko a ta jurumun lo. Yesu m’a jaraki ko a ye jɛnɛyakɛbaga ye, nka a k’a fɔ a ye ni ɲumanya ye, ko a ye taga a cɛ wele ka na. O kuma ka muso sɔgɔ a jusukun na. Nin muso tun bɛ i ko muso tɔw bɛɛ, a tun b’a fɛ ka cɛ sɔrɔ min bɛ se k’a mara, k’a janto a ra. Nka ale kɛra kelennamɔgɔ ye, mɔgɔw b’a mafiyɛnya; ko minw bɛ se k’a lamaroya a tun t’a fɛ ka o fɔ Yesu ɲa kɔrɔ. O kosɔn a k’a ta maroya dogo, ka kuma surunya k’a fɔ ko cɛ tɛ ale fɛ.
Yesu sɔnna a ta jaabi ma, sabu ale ka gundoko bɛɛ lɔn. A k’a lɔn ko a tun bɛ a kelen na, a tun bɛ kanuya sɔbɛ le ɲinina, ka to ka a farisogo diyanankow kɛ, ka to ka jurumun dɔ kɛ ka fara dɔ kan.
Jɛnɛya suguya bɛɛ ye kojugu ye; a bɛ mɔgɔ jusukun lanɔgɔ, ka mɔgɔ ta miiriyaw can; o ko bɛ se musow le ma kosɛbɛ. Ni muso ni a cɛ faranna, muso ta ɲinita ye ko a cɛ ye sekɔ ka na, o ye ɲɔgɔn faamu.
Samarikamuso nana a faamu ko Yesu tɛ mɔgɔ gbansan ye, ko cira lo. A yɛrɛ tun k’a lɔn a yɛrɛ kɔnɔ ko Ala kelenpe le bɛ se ka ale dɛmɛ. Nka Ala bɛ sɔrɔ min? A bɛ sɔrɔ cogo di? Aladaari ni Ala bato tun tɛ a ta sira ye tuun. Kabini san caman a tun ma taga Ala batoyɔrɔ ra, o bɛɛ n’a ta a tun bɛ a kisisira le ɲinina, ani ka hɛra sɔrɔ Ala fɛ.
Yesu ka saninyari nege don a ra minkɛ, a k’a yira a ra ko mɔgɔ bɛ batori kɛ yɔrɔ min na, ko o tɛ a jate, nka i bɛ min bato o le bɛ jate. Yesu k’a fɔ a ye ko Ala le ye sankolo Fa ye. Yesu ka kisiri ko yira a ra; o bɛ sɔrɔ Ala lɔnniya sababu ra. Yesu k’a fɔ siɲaga saba ko ‹Fa›. Adamaden ta hakiritigiya, walama a ta Ala ɲasiran, o tɛ na ni Ala lɔnniya ye, nka ka lanaya kɛ Kirisita ra, o le bɛ na ni Ala lɔnniya ye.
Yesu k’a ɲafɔ a ye ko alaw bɛɛ man kan ka wele ko Fa. Samarikaw derira ka ala caman bato. Nka Yahudiyaw kɔni tun k’a lɔn Matigi Ala ye Ala min ye, ale Ala min tun k’a yɛrɛ yira kabini wagati jan, ani ka Kisibaga dɔ nako layiri ta , ko o Kisibaga bɛna bɔ Dawuda ta gba ra.
Ala ta sira min yirara Biblu kɔnɔ, o nana kɛ dunuɲa bɛɛ ta ye, sabu ko minw tun bɛ Ala bato ɲasin Alabatosoba kelen ma, bɛɛ ka kan ka taga batori min kɔnɔ, o kow banna. Sisan lanabagaw le ye Ala ta batoso ye; Nin Saninman bɛ sigi o kɔnɔ, o ta ɲanamanya ye batori ye min bɛ ɲasin Ala ta nɔɔrɔ ma. Lanabagaw bɛ lɔn min fɛ, o ye ko Kirisita ka o kunmabɔ, ani ka o don a ta kanuyaba kɔnɔ. Ɲanamanya min terennin lo, o ka o ɲanawoloma, ka kɛ mɔgɔ jusukun gbɛninw ye, ka saninya Ala ta sebagaya baraka ra. O Fa ka o jusukunw yɛlɛma. O ta batori bɛ kɛ ni jusukun gbɛnin ye, ani Ala tandori caman. Fa Ala bɛ ɲagari, k’a ye ko a denw bɛ o ta waleɲumanlɔn lase ale ma o yɛrɛ sago ma.
Ala ye Nin le ye, sɔnninfɛn tɛ, walama nin dɔ ja. An Fa lo, an fana k’a Nin lɔn. A ka an ta barakantanyaw lɔn, k’a lɔn ko se tɛ an ye ka gbara ale ra. O kosɔn a nana an fɛ a Dencɛ sababu ra, ka na an saninya a ta saraka sababu ra, ani k’a ta Nin Saninman ci an ma. Ala b’a fɛ ka den caman sɔrɔ; sabu Ala ta denw le bɛ se ka batori ɲanaman lase a ma, batori min bɛ kɛ nin ani can kan. An bɛ Fa daari ko a ye an fa a ta Nin Saninman na, ani a ta can, ani a ta nɛɛma, janko an ta ɲanamanya cogo ye bɛn ni a ta kanuya ye.
I n’a fɔ mɔgɔ si tɛ se ka Ala bato ka kaɲa ni Ala yɛrɛ cogo ye, o kosɔn Yesu ka Nin Saninman di an ma. O le sababu ra an bɛ se ka kɛ Ala daaribaga kankelentigiw ye, ani a ta baaraden ninsɔndiyaninw, ani seere jagbɛlɛnw. O tuma, an ta ɲanamanya bɛna ɲasin an Fa ta batori le ma, ni kanuya ye, Nin Saninman ta sebagaya ra, min bɛ sɔrɔ Kirisita ta gbengbenyiri sababu ra.
Kirisita ka Alabatosoba saninya, ka Ala bato cogo sɔbɛ sigi sen kan. Fa Ala k’a yɛrɛ yira nin muso jurumuntɔ ra Kirisita sababu ra. Muso lɔra a ta jurumun na k’a fɔ minkɛ, k’a yira ko a mako bɛ ɲanamanya ji ra minkɛ, o ra, a ka nɛɛma sɔrɔ.
DAARIKAN: An Fa min bɛ sankolo ra, i b’a fɛ ko an ye i bonya ni an jusukun bɛɛ ye, ani ko an ye saninya an tagamacogo ra, ka i tando i ta nɛɛma kosɔn. An ta batori saninya. A to an ye kɛ baaradenw ye, baaraden minw bɛ tugu i Dencɛ kɔ, ani minw bɛ i bonya. An fa Nin Saninman na, min bɛ an kɛ i daaribagaw ye, ka an dɛmɛ an ye i ta Kuma sira tagama, min bɛ bɔ Kibarodiman na.
ƝININKARI:
- Mun le bɛ se ka Ala bato bari ka kɛ batori sɔbɛ ye, ani an bɛ se ka batori sɔbɛ sira sɔrɔ cogo di?
YUHANA 4:25-26
25 Muso ko Yesu ma ko: «Ne ka a lɔn ko Masiya bɛna na, o bɛ min wele Kirisita; ni a nana, a bɛna fɛn bɛɛ ɲafɔ an ye.» 26 Yesu ko muso ma ko: «Ne min bɛ kumana i fɛ, ne yɛrɛ lo.»
Sebagaya ni can min bɛ sɔrɔ Yesu ta jususuma kumaw ra, muso ka o faamu. Yesu tun ka layiri minw ta a ye a tun b’a fɛ ka o layiriw dafatɔ ye. Ciraya kuma min tun b’a fɔ ko Kirisita nawagati surunyara, muso hakiri jigira o ciraya kuma ra. A k’a jigi bɛɛ la Yesu kan, ka la a ra ko Yesu kelenpe le bɛ se ka ale karan Ala batocogo sɔbɛ kɛcogo ra.
Min bɛ an kabakoya, o ye ko Yesu tun ma sɔn k’a yɛrɛ yira k’a gbɛya wagati tɛmɛninw na, i ko a k’a kɛ cogo min na ni nin muso ye. A k’a yira muso ra ko Ala tun ka Min layiri ta, k’a ci ka na dunuɲa ra, k’a fa ni Nin Saninman ye, ko o ye ale le ye. «Ala ka min di mɔgɔw ma, Ala ta kuma min kɛra adamaden ye, kisiri min labɛnna mɔgɔ bɛɛ ye, ne yɛrɛ le ye o ye.»
Muso tun m’a lɔn ko ni a fɔra ko Masiya, o b’a yira ko masaw ta Masa lo, ciraw bɛɛ kuntigi, ani sarakalasebaga. I b’a sɔrɔ ko a tun k’a mɛn ko Masiya nako bɛna bɛn ni suw kunuko ye, ani hɛraba nako dugukolo kan. Sigiya t’a ra ko a tun ka jamana kuntigiw ta miiriyaw ko mɛn jamana hɔrɔnya ko ra fana, yahudiyaw tun b’a miiri ko Masiya bɛna ko minw kɛ. Ale kɔni tun bɛ Kisibaga le ɲinina, min bɛ se ka ale bɔsi a ta jurumunw na; a tun lara a ra fana ko Kirisita bɛ se ka o kɛ.
Yesu k’a fɔ a ye ko: «Ne min bɛ kumana i fɛ, ne yɛrɛ lo.» Ala ta ko latigɛninw, ani ciraw ka layiri minw fɔ, o bɛɛ bɛ sɔrɔ nin kuma kelen kɔnɔ, ko ‹ne yɛrɛ lo›. Mɔgɔ si tun tɛ se k’a fɔ k’a gbɛya ka tɛmɛ nin kan ko ale ye Masiya ye. Nka o bɛɛ n’a ta, Kirisita kɛrɛbaga bɛna a ja gbɛlɛya ka o faninya fɔ, ko ale ye Masiya ye. Kirisita kɛra kanuya farisogoraman ye, a tɛ ban jurumunkɛbaga si ra, hali kolɔnbariw. A hinara hali nin siya wɛrɛ muso ra Samari. A b’a yɛrɛ yira i ko hinabaga le, kititigɛbaga tɛ.