01 - NDƐ SU FITILƐ : NYANMIƐN MMLA BLU’N I CINNJIN DAN B’Ɔ TI’N
Sran kwlaa ng’ͻ ‵fa alapla Deli lԑ b’ͻ ‵kͻ Srinagar Kachemir akpasua’n su’n, ͻ ‵wun Himalaya oka bͻ be o Ɛndi kongo’m be su’n, bͻlԑ ufue bͻ o oka sͻ’m be su’n ti’n, ͻ yo nyԑnmԑn kpa. Kongo kanngan mun be o oka nglonglo sͻ’m bé afiԑn. Nyanmiԑn ble’n, ͻ kata oka sͻ wie’m be ti’n su. Wie mun be nglonglo’n kwla ju mԑtri akpi-mͻcuԑ tra su. Be o oka nga be ti mԑtri akpi-nnun’m bé ti su nglo mmua kpa.
Kԑ a fin alapla nun jra Srinagar cԑ’n, a ′wun kԑ ninnge nga sran mun be kͻ be nun nin nzuԑn wafawafa’n kwlaa be o lika wlԑ. Hindu mun nin Buddhafuԑ mun nin Zuif mun nin nyanmiԑn flԑfuԑ mun nin be nga be waan Nyanmiԑn nu’an lԑ mun be o lika wlԑ klͻ sͻ’n su. Bé ninnge’m be sͻwlԑ mun nin asͻnun sua mun nin nyanmiԑn flԑwlԑ sua mun nin kponngbo bue nga be klԑ bé su mun be o lika wlԑ kԑ akplowa yԑ be su si sa. Akpasua kun klo kԑ be si kԑ ͻ o lԑ wie. Nvle nnun be yia mԑn i bue kaan sͻ’n su- Ɛndi, Pakistan, Afganistan, Risi, Sini-. Kԑ a wlanwlan Kachemir klͻ kanngan nin klͻ dandan’m bé su’n, a wun i kԑ sran mun be kpԑ bé wun kannglԑ sa gaan, a si kԑ ndԑ o be afiԑn. I afuԑ ablasan-nin-nsan yԑ bͻ alԑ kunlԑ tԑ kpa kun o kongo klanman sͻ’n nunfuԑ mun be sacilԑ.
Klͻ sran’m bé nzuԑn mun, nin like nga sran mun be kͻ bé nun’n bé mmla mun nin nvlenvle mun bé siefuԑ mun bé akunndan mun be sͻnnin yԑ bé wlԑ wunlԑ’n ti’a pͻpͻ. Be ti kԑ Himalaya oka mun sa. Sanngԑ fluwa nga sran mun be klԑli be, ͻ nin nyanmiԑn sulԑ atin nga sran mun be kpԑli be ba, nin mmla kpanngban nga be kpԑli be’n, be kwlaa be o mmla blu i bo kԑ Himalaya lͻ oka mun be nun nglonglo kpa’n ͻ o be nga mun be su mmua kpa lͻ’n sa.
Like bͻ ti kԑ oka nglonglo kpa kun sa b’ͻ o klͻ sran’m be kwlaa bé su’n, yԑlԑ Mmla blu’n. Nyanmiԑn kunngba cԑ b’ͻ ti Nyanmiԑn kpafuԑ’n, ͻ kannin ndԑ kleli Moiz b’ͻ ti nnԑn kankanfuԑ’n, ͻ yili i klun sa’n i nglo kleli i yԑ ͻ klԑli i mmla mun yԑbuԑ tԑbua mun be su. Zuif mun be nyin yi bé nannan sͻ’n yԑ be wla kpԑn su titi kԑ i yԑ Nyanmiԑn man ͻ nin be trali aeguԑ Sinaï oka’n su lͻ nin-ͻn. I afuԑ akpi-nsan-afuԑ-ya-nsan yԑ, be tԑ kanngan mmla blu’n bé nyanmiԑn srԑwlԑ sua’m bé nun.
Kristfuԑ mun bé su lafilԑ’n ͻ taka mmla blu’n su wie afin ͻ ti mmla b’ͻ kaci-man. Zezi seli i sͻnnzͻnfuԑ’m be kԑ : "be su nunnun-man mmla'n i nun fluwa mma kaan kun annzɛ i nun ndɛ kaan kun lele san kɛ nglo'n nin asiԑ’n be nun-man lɛ kun'n. San i kwlaa sɔ'n ɔ ´kpɛn su" (Matie 5 : 18).
Nyanmiԑn flԑfuԑ mun be flԑ Moiz kԑ "Kalimu Allah" bͻ i bo’n yԑlԑ nyanmiԑn i jasin bofuԑ. Be bu i kԑ Nyanmiԑn nuan ijͻfuԑ kun sa nin nvle i su kpԑn kun sa, sran kun b’ͻ kpԑli like nga sran mun be kͻ be nun’n kun ba yԑ i kunngba’n ti nvle tinngԑfuԑ kun b’ͻ lԑ kwlalԑ. Nyanmiԑn flԑfuԑ mun bé akunndan’n nun’n, Moiz ti mԑn wunmuan’n nun sran dandan’m be nun kun.
Mmla blu nga Moiz fa mannin sran mun’n, ͻ ti cinnjin Anuansԑ Laa’n nun. Lele andԑ ͻ ti klͻ sran mun be nguan’n i bo ase wlalԑ like dan kpa. Sran ng’ͻ suan mmla blu’n, b’ͻ di su, b’ͻ fa kle sran uflԑ mun’n, ͻ kaci akunndanfuԑ. Nvle nga i nyin kpa mmla sͻ’m be su bͻ i wla fi be su’n, ͻ saci yԑ ͻ mlin. Sran kwlaa ng’ͻ klo kԑ sa sͻ’m be to fuԑn i’n, ͻ fata kԑ ͻ suan mmla sͻ mun kpa.
Mmla blu’n i akunndan bulԑ’n ͻ’a yo cinnjin Kachemir lͻ yԑlԑ kԑ ninnge nga sran mun be kͻ bé nun’n nin ajulisufuԑ mun bé akunndan mun b’a sanngan nun yԑ be su kun alԑ. Lika sͻ’n i nun tranlԑ’n ͻ’a yo kekle ͻ man ͻ ti cinnjin man sran mun kԑ be sa be sin Nyanmiԑn i mmla’n i wun Anuansԑ Laa’n nun. Yalԑ nga e nin gbanflԑn kpanngban nga be o nvle sͻ nun e kokoli be’n, i yԑ man e klԑli fluwa nga-ͻ. Be fin nvlenvle fanunfanun, yԑ be nyanmiԑn sulԑ atin’m be ti fanunfanun, sanngԑ be kunndԑli nanwlԑ’n i atin’n, k’ͻ yo nan be nguan’n ͻ’a yo kpa’n ti. Be buli mmla blu’n i akunndan yԑ be wunnin kԑ ndԑ ng’ͻ kan be’n be ti cinnjin yԑ be ti nanwlԑ. Sran kwlaa ng’ͻ bu ndԑ sͻ’n i akunndan kԑ be liԑ’n sa’n, ͻ nyan su yralԑ i nguan nun cԑn’n kwlaa.