Previous Lesson -- Next Lesson
c) Yeesu feeñu na Maryaama mu Magdala (Yowaana 20:11-18)
YOWAANA 20:17-18
17 Yeesu ne ko: « Bu ma téye, ndaxte yégaguma ca Baay ba, waaye demal ne samay mbokk, maa ngi yéeg ca sama Baay biy seen Baay, sama Yàlla jiy seen Yàlla. » 18 Noonu Maryaamam Magdala dem, yégalí ya ne leen: « Gis naa Bàroom bi! » Mu daldi leen nettali li Mu ko wax.
Maryaama nërmeelu ca suuf di màggal Yeesu, muy jéem a fóon ay tànkam, bëgg a jafandu ci Moom, ngir Mu bañ a koo réerati. Yeesu nanguwul mu laal Ko, ndaxte mbëggeelu baatin la yore. Mayoon na ko mu dégg baatam, gis teewaayam, te bëggoon mu màgg ci ngëm ci biir jokkoo ak Xel mu Sell mi. Xamaloon na loolu taalibeem ya ba mu leer naññ, ca kàddu ya Mu leen doon tàggo. Laal Ko, walla di taq ci Moom, taxul nga bokk ci Moom, waaye gëm Nekkinu Baatinam moo koy jokkale ak nit.
Yeesu ne ko du toog ci suuf si (àddina si) peeñoom, yu gàtt lañuy doon, ndaxte fi muy mujje mooy asamaan. Dafa bëggoon a dellu ca Baayam. Saraxam ba ca bant ba ubbil na Ko buntu yoon wi jëm ci Yàlla. Bii saraxalekat dafa tànnoon a jébbale boppam nib sarax, tuur deretam ngir ku Sell ki. Mu ne Maryaama: « Bul ma laal ndaxte dama war a matal njubte gi; dinaa la rammu te yónnee la dooley Xel mi. »
Mu xamal ko it ne du moom rekk moo ko moom,waaye nitu ñépp la : « Dellul ca taalibe ya,te yégal leen sama dund,li may sàkku ak sama yéegu asamaan! »
Yeesu dëfal taalibe ya jaare ko ci Maryaama. Mu woowe leen ay doomi baay. Ci kow ngëm, danuy nekk ay doomi baayam, ndax deewam, ndekkiteem ak dundam gi amul àpp. Doom baay, la nuy woowe, kon kay raw nanu nekk ay soppeem rekk. Mucc gi mat na, te lewal nañu sunu yelleefu baayoo. Siife na ak deretam sunu bokk ci geñog asamaan.
Lan la bataaxal bi Maryaama wasëroon a yët taalibe ya, ëmboon? Li jiitu mooy ne mungi dund.. Dajeek Moom, lu kenn dul fàtte la. Ñaareel bi, ñoo bokk Baay jaare ko ci dig boobu. Yeesu dafa dugal taalibeem yi ci jokkoo gu mat sëkk ak Yàlla. Wonewul Yàlla ni ku sore, ku am doole te di àtte, waaye dafa nu koy won ni Baay ju jege te fees ak mbëggeel. Du Baayu Krist doŋŋ, waaye sunu Baay la itam. Woowe na Baay ji « Sama Yàlla » ndaxte mooy lépp ci ñépp. Dafa déggal Baayam, fekk ne lépp li ñu sàkk tàqalikook Yàlla ndax bàkkaar. Nekkatul sunu noon ndax sunuy bàkkaar, waaye dafa noo bëgg, nun ñi ñu baal jaarale ko Krist mi nu rammu. Ni Mu jokkook Baay ji, la bëgge nu jokkook Kenneefu Ñett gu Sell gi, ba Mu yónnee nu Xelam mu Sell mi, ngir mbëggeel gi wesaaroo, jaare ko ci nun.
Kon Krist sant na Maryaama mi Ko njëkk a gis ba Mu amee ndam ci dee gi, mu àgge ña ca des dige jokkoo bu wér, ànd ak dégg ndigal. Mu ne bëret, dem seedeji ca kanamu taalibe ya, di biral jokkoom ak Moom, ak it baayoo gi nu Yàlla cër ci kow yiwam. Bii bataaxal mel ni liit guy jolli, dëfal na sunu xol bu tiis. Mbégte xam ne Yàlla nangu na la, te may na la dund gu dul jeex, ndax yég nga ko? Ndax gëm nga bataaxalu Maryaama, bi nuy yégal ne Krist dekki na?
ÑAAN: Nungi lay sant Boroom bi Yeesu, yów mi dekki ci biir ñi dee, teew ci sunu dund, ba di nu woowe doom-baay. Yelloowunu dund ak yów. Sant nanu la ci li nga nu baal sunuy bàkkaar. Defal ba nu nekk ay Ndawi mbég, ngir xiir ñépp ci ñu wut la.
LAAJ:
- Ban bataaxal la nu Krist yóbbante,jaare ko ci Maryaama mu Magdala?