Waters of Life

Biblical Studies in Multiple Languages

Search in "Peul":
Home -- Peul -- John - 065 (Jesus reveals himself to the healed one)
This page in: -- Arabic -- Armenian -- Bengali -- Cebuano -- Chinese -- English -- Farsi? -- French -- Hausa? -- Hindi -- Indonesian -- Kiswahili -- Kyrgyz -- Malayalam -- PEUL -- Portuguese -- Russian -- Serbian -- Spanish? -- Tamil -- Telugu? -- Turkish -- Urdu -- Uyghur? -- Uzbek -- Yiddish

Previous Lesson -- Next Lesson

YUUHANNA - Ndaygu ngun jalbi ka nder nibhe
Jandeeji ka Linjiila no Yuhanna seedorii nonn

DAMAL 2 - Ndaygu ngun no jalbude ka nibhe (Yuuhanna 5:1 - 11:54)
C - Fii yaadu Iisaa sakkitiindu ndun Yerusalaam (Yuuhanna 7:1 - 11:54) Fii ko sendindiri kon nibhe dhen e ndaygu ngun
2. Fii no heɓidaaɗo e mbunɗan on selliniraa non (Yuuhanna 9:1-41)

c) Fii no Iisaa feeɲiri non e aaden sellinaaɗo on wa Ɓiɗɗo Alla on (Yuuhanna 9:35–41)


YUUHANNA 9:35-38
35 Iisaa humpitii wonde ɓe ferike on wumunooɗo ka yaasi. Onsay kanko Iisaa o ari, o tawi mo, o wi’i mo: Hiɗa gomɗini Ɓiɗɗo Alla on? 36 On jaabii mo, wi’i: Ko hombo woni on, yaa an koohoojo, fii yo mi gomɗin mo? 37 Iisaa wi’i mo. A yi’ii ontigi. Oo wonɗo ma wowlande ko kanko. 38 Kanko kadi o wi’i: Joomiraaɗo, mi gomɗinii. onsay o sujjani mo.

Ko ko feƴƴi ɗon ko addayɗun ɓuttu non. Ɓay Iisaa nanii fii ko neɗɗo sellinaaɗo on raɗaa kon, o ɗaɓɓiti mo, o tawi himo wondi e ande tiiɗunde. Iisaa no jebbilii fii tiiɗingol gomɗinɓe ɓen fow kala gomɗinɗo sendaaɗo e ɓeynguure mun nden e weldiɓɓe mun ɓen sabu Almasiihu on. Si tawii hiɗon fewndini sugu ɗun, men fellintinanay on wondema Iisaa heɗoto ko noddoton mo kon, o aray kadi kanko tigi e mon, o accitirtaa on nii. Hita on ɗaɓɓa ballal yimɓe ɓen, on ɗaynete. Punnee Iisaa tun. Tama’u woo alanaa on ka hoore leydi gaa e ka kammuuli yawti mo kanko Iisaa. Himo yiɗi on.

Ontuma, Iisaa landii on suka landal hittungal, o wi’i mo: «Hiɗa gomɗini Ɓiɗɗo Alla on, wonɗo on kadi Ɓii-Aaden on?» Iisaa no faamunoo wonde on neɗɗo no andunoo nokkuure ka windii ɗon ka deftere annabi Danuu’iila ka Ahadi Hindi (Danu’iila 7:13-14) ka wi’aa ɗon wondema ko Ɓii-Aaden on woni ɲaawoowo on aduna on e Ɓiɗɗo Alla on. Iisaa no landaade mo ngal landal fii andugol si tawii himo faalaa accitaade iwi hande haa poomaa e juuɗe mangu mawngu Ɓiɗɗo Alla on. Hari suka on andiino tigi fii ko Iisaa yawti kon neɗɗanke tun, kono o fewtiri e makko noddirgol mo: «Joomiraaɗo». Himo faalanoo andude ɓuri nii fii Ɓiɗɗo Alla on fii wota o rewu tun aaden niinaaniijo tun – ɗun ko rewugol sanamu non.

E fee ɗun, Iisaa jaabii mo jaabawol darjingol, o wi’i: «A yi’irii mo gomɗinal ngal, ado a yiirude ɗun gite ɗen, ko min woni on; ko Ɓiɗɗo Alla on woni yewtude ma.» Oo suka hatonjinaano e habbagol no o accitoroo e juuɗe Iisaa. O sujjani mo, wa wi’ugol wonde: «Joomiraaɗo, miɗo e juuɗe maa, ko an laamii lan, ko an woni karamokoojo an on e Joomiraaɗo an on. Ko an woni Giggol wontugol ngol ɓandu, miɗo ɗofti maa e nder anniye, ko mi jiyaaɗo maa gila hande.» Musiɗɗo, hara a anditii Ɓiɗɗo Alla on, e nder mbaadi neɗɗanke ndin? Hara on humodirii e makko wa gomɗinɗo? E hara on rewirii mo wa jiyaaɗo? 

YUUHANNA 9:39-41
39 Iisaa wi’i fahin: Ko fii ɲaawooree addimmi ka aduna ɗoo, fii yo ɓe yi’ataa ɓen yi’u, e yo yi’ooɓe ɓen wumu. 40 Ɓay woɓɓe e Fariisiyaayɓe ɓen wondunooɓe e makko ɓen nanii ɗin konguɗi, ɓe wi’i mo: Kere menen kadi, ko men bumɓe? 41 Iisaa jaabii ɓe, wi’i: Si tawno hara ko on bumɓe, on heɓataano junuubi, kono ɓay jooni hiɗon wi’ude hiɗon yi’a, ko non luttidirton e junuubi mon.

Ɓay suka on sujjii yeeso Iisaa, o tonhananooka ɗun, sabu Iisaa no handi e kala teddungal. Kono Iisaa wi’i wonde arugol makko adday ɲaawoore e hoore mawnintiniiɓe ɓen e rewooɓe ɓen miijotonoo ɓen ko ɓe andu ɓe, kono hara ɓe andaa hay huunde e nder goonga on. Bunɗo on e junuubankeeɓe ɓen andi fii ɗun, ɓe tuubi, junuubankeeɓe ɓen laɓɓinaa. Hari Iisaa alaa ɲaawude ɓe tuubaali ɓen; ko kamɓe woni ɲaawude hoore maɓɓe e nder bugitagol maɓɓe kisiyee on. Ɓe hendinoke ndaygu seeɗahu ko feƴƴi rewrude e annabaaɓe ɓen e seedeeji windiiɗi ɗin ka Kitaabul-Muggadasi. Kono ɓe salii salaade few jande Iisaa nden, ɓe lelliraa ko heddii kon e ndaygu woodunoongu ngun. Ɓe luttay wuminude, ɓerɗe maɓɓe ɗen yoora, ɓe wona sattuɓe faaminde e sortooɓe wonkii. Ardu Almasiihu on ndun e waaju makko ngun ko battane ɗiɗi mari: kisiyee on maa jahannama on, kuddi ndin maa barki kin. Ko honno ɓernde mon nden woniri?

Hari e nder ɓen heɗotooɓe Almasiihu on Fariisiyaaɓe no tawaa, ɓen sikki ko kamɓe fewtinaa ɗin konguɗi. Ɓe lanɗii, ɓe wi’i: «Kere, ko men bumɓe?» Iisaa yaltintini naafigiyaagal maɓɓe ngal ko o wi’i ɓe ɗun ɗoo: «Si tawno hiɗon ƴettirnoo tigi hoore mon wa bumɓe, hara no ruuhu mon on fewndori non no aanini on, on tuubayno junuubaaji mon ɗin yeeso annabi Yaayaa, on sellayno junuubaaji mon ɗin; hendoɗon non yaafuyee on e baraaji. Kono ko hoore mon tigi wonuɗon e ɗaynude, hiɗon ɓanginde wonde alaa ko on andaa, hiɗon ƴettitorii wa feewuɓe. Ko sugu nden mawnitaare, hiɗon hollude ko wumiɗuɗon kon e sattere fii mon nden. On hendotaako hay ko ɓuri e fanɗude e ndaygu ndaygu aduna on ngun.»

TORAARE: Yaa an Iisaa Joomiraaɗo, ko an woni Ɓiɗɗo wontuɗo on neɗɗo. Meɗen rewude ma, meɗen ɗoftaade maa gila jooni haa poomaa. Doole amen ɗen e keyeeji amen ɗin no e juuɗe maa. Meɗen toraade ma yo a yaafano men laɓɓinanaa men ɓerɗe amen ɗen, fii wota junuubu woo junuubu, no o fotata woo, heendindir men e maa.

LANDAL:

  1. Ko honɗun sujjangol Iisaa ngol firi?

www.Waters-of-Life.net

Page last modified on April 05, 2012, at 11:36 AM | powered by PmWiki (pmwiki-2.2.109)