Previous Lesson -- Next Lesson
ЖАКАН - Жарык караңгыда жаркырап турат
Жакан жазган Жакшы Кабар
3. Ыйса шакирттер менен чогу турган Томаска да көрүндү (Жакан 20:24-29)
Жакан 20:29
29 Ыйса ага: «Сен Мени көргөндөн кийин ишенип жатасың, көрбөй ишенгендер бактылуу. – деди.
Томас Ыйсанын жарааттарына колу менен тийген соң ишенгендигин, же көрүп эле ишенгендигин билбейбиз. Ишенбестиги жана кайратсыздыгы үчүн Томас уялгандыр. Ыйса Томастын ишенимин көзү менен көргөндөн кийин ишенүү деп атады, бирок Теңир ишенимдин жогорку баскычын кургусу келди: бул көз менен көрбөй туруп, Анын сөздөрүнө эч шектенбестен ишенүү. Ишенимин бекемдөө үчүн түштү, аянды жана көрүнүштү каалаган адам ишенимде али жаш, жетиле элек, ал туура калыптанбаган адам. Бирок ошентсе дагы, өтө керектүү маалда Ыйса шакирттерине бир нече жолу көрүнүп, алардын ишенимдерин бекемдеди.
Ыйсаны көрбөй туруп ишенгендер Анын батасына ээ болушат, бакытка толушат. Заматта болуп өткөн көрүнүшкө караганда, чыныгы ишеним улуу күчтү туудурат. Кудайдын Сөзүнө болгон адамдын ишеними көзгө көрүнбөгөн Сүйлөөчүнү урматтаган болот.
Ыйса бир нече жолу көрүнгөндөн баштап, жакшы кабарчылар жана элчилер бизге Жакшы Кабарлар менен Элчилердин Каттарында бизге муну кабарлай башташкан. Ыйсанын тирилүүсү менен жаңы доор жар салынып, ишенгендердин жүрөктөрүндө Кудайдын өмүрү өркүндөй баштады. Биздеги ишеним жөн гана көз караш, же ой-толгоо эмес; бул тирүү өмүр жана өлүп тирилген Машайак менен ширешкен жашоо. Бул биздин замандагы керемет; миллиондогон адамдар Ыйсаны көрбөсө дагы ишенишет, анткени ишеним аркылуу алар түбөлүк өмүрдүн күчүнө ээ болушат.
Көптөгөн ишенгендер туугандарын, оокат-жайларын, атүгүл өмүрүн да жоготушат. Алар Машайактын Сөздөрүнө болгон ишеним логиканын чегин ашып өткөн ишеним аркылуу чындыкка ээ болушту. Мындай ишенимди Ыйса Өз Сөзү менен, жана ишенгендердин жашоосуна келип кирүүсү менен, муну аларга сыйлык катары ыйгарат. Ишеним бүтүндөй табиятыбызды камтып, бизди Куткаруучу Ыйсага бириктирет.
Сыйынуу: Теңир Ыйса, биздин ишенимибиздин негиздөөчүсү Өзүңсүң. Бизди сүйүп алдың. Сенин чындыгың бизге Сөзүң аркылуу келет. Мени куткарарыңа мен эми ишенем. Менин досторумду да куткарасың, алардын жандандырасың жана алар түбөлүк өмүргө, чексиз кубанчкы ээ болуусу үчүн, Өз ысымың аркылуу мени тирүү ишенимге бекемдейсиң.
СУРООЛОР:
- Эмне үчүн Ыйса көрбөй ишенгендерди «бактылуу» деген?