Previous Lesson -- Next Lesson
3. Ala ta alaya bɛɛ dafanin yera Yesu ta adamadenya ra (Yuhana 1:14-18)
YUHANA 1:15-16
15 Yuhana ka ale ta ko le fɔ, ka pɛrɛn k’a fɔ mɔgɔw ye ko: «Ne tun ka min ko fɔ ko a bɛna na ne kɔ fɛ, ko nka a bɛ ne ɲa, sabu sani ne ye woro, ale tun bɛ yi kakɔrɔ, ale le ye nin ye.» 16 Ayiwa, a ka an bɛɛ wasa a ta nɛɛma baraka ra, ka nɛɛma an ye lon bɛɛ.
Yuhana Batizerikɛbaga k’a fɔ jama ye ni kanba ye, ko Kirisita min tun nana ale kɔ fɛ, ko o tun bɛ ale ɲa fɛ, o ko ni adamadenya ta kɔrɔyasira tɛ kelen ye. O kuma fɛ, Batizerikɛbaga tun k’a yira ko Kirisita bɛ yi wagati bɛɛ ani tuma bɛɛ. A ka seereya kɛ ka nin can fɔ, ko Kirisita bɛ dunuɲa yɔrɔ bɛɛ kunna, wagati bɛɛ, ani ko Ala banbari lo, min tɛ yɛlɛma k’a ye.
Ka Batizerikɛbaga to kongokolon kɔnɔ, mɔgɔw ta jurumun juguyakojugu k’a tɔɔrɔ. A ka o karan ko o ye nimisa ka o ta jurumun yafa sɔrɔ. Nka a nana Yesu ye minkɛ, a jusu diyara, sabu a k’a lɔn ko Kirisita tun worora ka kɛ adamaden ye, damina tɛ a ra, laban tɛ a ra, a ta ko bɛɛ ye can ye, ani saya fana tun tɛ se ka se sɔrɔ a kan. Kirisita ta adamadenya min ɲanagbɛ bɛ kɛ Nowɛli ra, o ɲagari bɔra Ala ta ɲanamanya banbari nako le ra, min nana kɛ adamaden ye an cɛ ra. Ɲanamanya ka se sɔrɔ saya kan cogo min na, o damina le ye nin ye, sabu Kirisita sababu ra, jurumun min bɛ an lataga saya ra, ale ta ko banna.
Batizerikɛbaga ka o nɛɛma bonya ye min kɛ, Ala ta alaya dafanin min bɛ Kirisita ra, a ka o tando, k’a bonya. Pɔli tun ka nin can fɔ, ko : « Sabu Alaya dafanin bɛɛ bɛ Kirisita farikolo ra. Aw bɛ fɛn bɛɛ sɔrɔ ka wasa ale baraka le ra.» Yuhana ka o can kumaw surunya k’a fɔ a ta kuma fɔta ra ko : « a ka an bɛɛ wasa a ta nɛɛma baraka ra, ka nɛɛma an ye lon bɛɛ.»
Kirisita ta alaya dafanin, o ye mun ye, ani an ka mun sɔrɔ o sababu ra ? Yuhana ka Kirisita ta ɲanamanya kɔrɔ fɔ an ye cogo min na ka kaɲa ni hayan tɛmɛninw ye, ni aw hakiri bɛ o ra, o tuma aw bɛna Kirisita ta ɲanamanya bonya faamu, k’a ye ko a ta nɛɛma ta jiba bɛ woyo ka se an ma lon o lon.
Kirisita ye Ala ta Kuma ye, min bɔra Fa Ala ra, i n’a fɔ kuma bɛ bɔ mɔgɔ da ra cogo min na. Ale le ye Ala jusukun kɔnɔnɔyɔrɔ ye, ani Ala sago, ani Ala cogo yɛrɛ, ani Ala diyananko. Ni Kibarodiman ta kuma bɛ se an ma, ka don an jusukun na, ka an sago yɛlɛma, o tuma Kirisita bɛ na don an jusukun na, ka an yɛlɛma ka kaɲa ni a yɛrɛ ta cogo ɲuman ye. Yala o tɛ nɛɛma ɲumanba ye wa ?
Kirisita ye Ala ta Ɲanamanya ye. Kolɔnbagaw bɛ se ka bonw lɔ, ka pɔnw lalaga, ani marifa juguw, nka o si tɛ se ka mɔgɔ ɲanamanya. Ala bɛ ɲanamanya min di bangebagaw ma, olugu ta lɔyɔrɔ ye ka o di o ta denw ma. O tɛ nɛɛma le ye wa ? I n’a fɔ nin dunuɲa ta ɲanamanya bɛ ban, Kirisita bɛ a yɛrɛ Nin lana lanabagaw kan, min ye ɲanamanya banbari Nin ye. Lanabagaw bɛɛ bɛ Ala ta ɲanamanya sɔrɔ min sababu ra, o tɛna sa k’a ye. Yala o fana tɛ nɛɛma dɔ le ye wa ?
Kirisita ye dunuɲa ta yeelen ye. Ale le ka se sɔrɔ dibi kan, a bɛ yeelen lana su fɛ, dibifinba cɛma. Mɔgɔ minw tununin lo dibi ra, a bɛ jigiya di olugu ma, k’a ta sebagaya lana dunuɲamɔgɔw kan, o ŋunatɔ tɔɔrɔ boro. Kirisita ta yeelen bɛ se ka dunuɲa ta dibi gbɛn. Minw lara Kirisita ra, ni o kɛra jamana kuntigiw le ye, walama baara wɛrɛ kɛbagaw, walama gbatigiw, walama Egilisiw mɔgɔw, olugu bɛ fanga sɔrɔ ka kɛ mɔgɔ terenninw ye ani mɔgɔ kankelentigiw ye o ta yɔrɔw ra. Yala o tɛ nɛɛma dɔ faranin ye nɛɛma dɔ kan wa ?
Yesu le ye dunuɲa danbaga ye. Ala ta sebagaya dafanin bɛ sɔrɔ ale le ra. A ta kabakow tun ye tagamasiyɛnw le ye minw bɛ a ta fangatigiya yira. A kunuko ka bɔ saya ra, o k’a yira ko a ta ɲanamanya ka se sɔrɔ saya kan. A farikolo ta fan fɛ, farikolo gbiriya min tun bɛna a lajigi ji jukɔrɔ, a ka o fanga cɛn, fɔ ka tagama ji kan. A ka mɔgɔ waga looru baro fɔ ka o fa ni burukun looru ni jɛgɛden fla ye. Hali kunsigiden da min bɛ aw kun na, a ka o da lɔn. Yala aw bɛna sɔn ka aw yɛrɛ majigi a ta nɛɛma kɔrɔ wa, o nɛɛma min sababu ra a bɛ a janto aw ra ?
Yala aw b’a fɛ ka ko wɛrɛ lɔn Kirisita ta alaya dafanin ta ko ra wa ? Dunuɲa ye ale ta le ye. Aw borofɛnw ani aw ta naforow, aw ta ɲanamanya wagati fitiniw, o bɛɛ ye a ta le ye. Aw fana ye a ta le ye. A ka aw dan, ale le fana bɛ aw mara. Fɛn bɛɛ bɛ Kirisita boro. A ka a ta nɛɛmafɛnw karifa aw ma janko aw ye o mara ale ye. Aw farisogo, aw ta miiriyaw, aw bangebagaw, o bɛɛ ye fɛn dɔw ye aw Matigi ka minw di aw ma. Yala aw bɛna a fo a ta nɛɛma kosɔn wa ?
Min bɛ an kabakoya Yesu ta adamadenya ani Nowɛli ta ko ra, o ye ko Ala ni a ta alaya dafanin kɛra farisogo ye, ka kɛ denfitini ye. Cira Ezayi tun kɔnna ka o kabako ciraya kɛ kabini san 700, sanin a kɛwagati ye se, ka kaɲa ni Nin Saninman ta miiriya ye : « Sabu den dɔ worora an ye, dencɛ dira an ma. Kuntigiya bɛna di a ma. O bɛna a tɔgɔ la ko Ladibaga min ɲɔgɔn tɛ, Ala barakatigi, fa Ala banbari, Hɛra Masa » (Ezayi 9:5). Nka min ye kojugu ye, o ye ko adamadenw hakiri ka suma k’a faamu ko Kirisita sababu ra, cogo ɲuman min tun bɛ adamaden na kabini a dantuma ra Ala bɛ o lasekɔ adamaden na. Yesu nɔɔrɔman lo, hakiritigi lo, ladibaga hakiriman lo, Ala banbari sebɛɛtigi. Ala ta cogo bɛɛ ani a ta nɛɛma bɛɛ tun bɛ Yesu denɲɛni lanin na bɛganw ta domuniminan kɔnɔ. Ala ka nɛɛma ɲumanba min kɛ an ye, ka na an fɛ Yesu sababu ra, yala aw bɛ o faamu wa ? An bɛ se k’a fɔ ko : Ala bɛ an fɛ !
Kirisita t’a fɛ ka o setigiyaw mara a yɛrɛ kelen ta ye, ni o tɛ a tun bɛna to sankolo ra yi. A nana an ta dunuɲa ra, ka na kɛ adamaden ye k’a yɛrɛ majigi ka kɛ an ɲɔgɔn ye, janko ka sankolo sira dayɛlɛ an ye, ka an ni a Fa cɛ bɛn, ani ka an fa a ta alaya dafanin na. O cogo kelen na, Pɔli bɛ seereya kɛ k’a fɔ ko Ala bɛ min ɲini, o ye ko a ta alaya dafanin ye sɔrɔ Egilisi kɔnɔ. Aw ye Efɛsikaw 1:23, 4:10 karan, ani Kɔlɔsikaw 2:10 ; o bɛna kɛ sababu ye k’a to aw ye Ala tando, ka aw Matigi ta nɛɛma bonya lakari. Aw kana to barakantanya ra aw ta jurumunw na, nka aw ye aw jusukun dayɛlɛ ka Kirisita ta alaya dafanin sɔrɔ. Aw ye gbara denɲɛni lanin na domuniminan kɔnɔ ; ni o kɛra nɛɛma camanba le bɛna woyo ka bɔn aw kan. A bɛna aw kɛ aw kɛrɛfɛ mɔgɔw ta nɛɛma sɔrɔsababu ye.
DAARIKAN: Matigi Yesu, ele le ye Ala dencɛ ye. Kanuya ni sebagaya ni can bɛ i fɛ. An bɛ an kinbiri gban i ɲa kɔrɔ, an bɛ ɲagari sabu i ma i yɛrɛ mabɔ an na ka to yɔrɔjan, nka i nana sigi an cɛ ra. I bɛ an kanu. I ka i yɛrɛ kɛ adamaden ye ka an kunmabɔ. An b’i fo sabu i bɛ nɛɛma dɔ fara dɔ kan, ka nɛɛma kɛ an ye lon o lon.
ƝININKARI:
- Ni an ko Kirisita ta alaya dafananin o kɔrɔ ye di?