Waters of Life

Biblical Studies in Multiple Languages

Search in "Peul":
Home -- Peul -- John - 073 (The raising of Lazarus)
This page in: -- Albanian -- Arabic -- Armenian -- Bengali -- Burmese -- Cebuano -- Chinese -- Dioula? -- English -- Farsi? -- French -- Georgian -- Greek -- Hausa -- Hindi -- Igbo -- Indonesian -- Javanese -- Kiswahili -- Kyrgyz -- Malayalam -- PEUL -- Portuguese -- Russian -- Serbian -- Somali -- Spanish -- Tamil -- Telugu -- Thai -- Turkish -- Twi -- Urdu -- Uyghur? -- Uzbek -- Vietnamese -- Yiddish -- Yoruba

Previous Lesson -- Next Lesson

YUUHANNA - Ndaygu ngun jalbi ka nder nibhe
Jandeeji ka Linjiila no Yuhanna seedorii nonn

DAMAL 2 - Ndaygu ngun no jalbude ka nibhe (Yuuhanna 5:1 - 11:54)
C - Fii yaadu Iisaa sakkitiindu ndun Yerusalaam (Yuuhanna 7:1 - 11:54) Fii ko sendindiri kon nibhe dhen e ndaygu ngun
4. Fii no Laazaru wurnintiniraa non e battane mun ɗen (Yuuhanna 10:40 – 11:54)

c) Fii no Laazaru immintiniraa non (Yuuhanna 11:34-44)


YUUHANNA 11:34-35
34 Onsay kanko Iisaa, o wi’i: Ko honto surruɗon mo? Ɓe jaabii mo : Koohoojo, seenee tinon. 35 Iisaa mbojji.

Iisaa jaabaaki hay huunde. Ko ɓuri kon yeddodirgol e aaden tampirɗo non hinaa ko hitti. E nder ɗin muraaɗi, kuuɗe ɗen no wondi e nafa ɓuri haalaaji ɗin. O landii ɓen tawanooɓe yo ɓe ardo mo ka yenaande. O wi’i ɓe: «Aru, yi’aa.» Ko sugu ɗin konguɗi Iisaa huutornoo fii noddugol taalibaaɓe makko ɓen ka fuɗɗoode golle makko ɗen. O noddi ɓe yo ɓe ndaaru ngurndan ɗan; hari ɓen yimɓe no landaade mo yo o ndaaru mayde nden. O wulli fewndo ko o yi’i ko honno yimɓe ɓen nennorii non faaminegol e majjere e angal gomɗinal maɓɓe. Hay taalibaajo ɓurnoo on kelɗude waawaano hollude gomɗinal haqiiqawal. Ɓandu ndun nafataa huunde, wonkii kin no leeliri gomɗinal. Ruuhu-Seniiɗo on hari addanaaka ɓe taho. Mayde ruuhuyankeere nden no laamii, e Ɓiɗɗo Alla on hari ko wullugol tun waawunoo yeeso tampere nde yimɓe ɓen wondunoo e mun nden.

Hari Iisaa ko neɗɗo, himo weltoda e ɓen wonɓe e weltaade, himo wullida e ɓen wonɓe e wullude. Ɗun meemi mo. Wonkii makko yurmeteeki kin memminii fii yi’ugol kulol mayde nden e hoore taalibaaɓe ɓen e ko ɓe lelliraa kon giggol fii Alla Jom Ngurndan on. Iisaa no wullude hande, himo ndaarude no mofte men ɗen fewndori non e no enen tigi fewndorɗen non, wondude e kala ɓe sertaali e junuubu e mayde ruuhuyankeere nden.

YUUHANNA 11:36-38a
36 Onsay Yaahuudiyankeeɓe ɓen wi’i: Ndaaree no ɓe yiɗirnoo mo! 37 Woɓɓe e hakkunde maɓɓe wi’i: Kanko, oo wuntinooɗo bumɓe, e hara o waawataano waɗude kadi hara oo neɗɗo maayaali? 38 Ɗun yurmini kadi Iisaa,…

Yahuudiyankeeɓe ɓen yi’i gonɗi Iisaa ɗin, ɓe nawri ɗun ka giggol ngol o yiɗi ngol Laazaru. Giggol ngol hinaa huunde si wonaa haqqile e miijo ɓuuɓugo tun, kono ko humodiral e ko wonkiiji ɓeya wondi kon e mun. Giggol Alla ngol no yawti faamu men ngun, hingol diwi gaɗa mayde nden. O yi’i Laazaru ka nder qaburu ombaaɗo o wulli sabu hari mayde nden heɓiino polgal e hoore giɗo makko on. Kono ɓernde makko nden no feccude kaaƴe ɗen, o eɓɓidanoo ɓandu ndun habbagol noddaandu makko ndun.

Woɓɓe e tawanooɓe ɓen itti bote e Iisaa fii ko o alaa kon huuwirde hawjere, ɓe sikkitii fii bawgal makko ngal, ɗun monini Iisaa. Angal gomɗinal e giggol e tama’u on imminay tikkere Alla nden. Iisaa no eɓɓi njattingol en niɓe ɗen, o hisina en niɓe ɗe sutiɗen yeeso ɗen, no catoroɗen e giggol makko ngol, wuuriren gomɗinal makko ngal, no woniren e nder ɓuttu e nder tama’u makko on. En yiltitotaako han kadi e etanɗe ɗe yimɓe ɓen etata ɗen, kono en hooloto mo. Himo faala wurnitugol ɓen maayuɓe e nder junuubaji mun ɗin. Hara Iisaa no jiɓii fii angal gomɗinal mon ngal, kaa himo weltodi e giggol mon tiiɗungol ngol?

TORAARE: Yaafano lan, yaa an Iisaa Joomiraaɗo, fii ko mi ronki kon hoolagol ma e yiɗugol ma. Yaafano lan fii ko mi lelliraa kon gomɗinal e ko mi hittini kon fii hoore an. Pooɗan e tama’u wurɗo on no mi teddinire e no mi tabitira soono kala e juuɗe maaɗa.

LANDAL:

  1. Ko fii honɗun ɓernde Iisaa nden aanani e ko fii honɗun o mbojjani?

www.Waters-of-Life.net

Page last modified on April 05, 2012, at 11:42 AM | powered by PmWiki (pmwiki-2.3.3)