TRAITÉ 03 -- E, ne nin, baraka la Matigi Ala ye!
Mɔgɔ caman bɛ baara gblɛn kɛ walisa ka se ka o baro sɔrɔ, o b’a fɛ ka wari caman sɔrɔ, ka o ta ɲanamaya kɛ nafolo tigiya ra. O bɛ o ka wagati bɛɛ kɛ fɛn ɲinina walisa ka fɛn sɔrɔ ka laganfiya. K’a sɔrɔ Maiyamu dencɛ bɛ anw karan ko: ʻʻ Mɔgɔ si tɛ se ka baara kɛ kuntigi fla ye ; sabu a bɛna kelen kɔniya ka tɔ kelen kanu, walama a bɛ nɔrɔ kelen na, ka tɔ kelen mafiyɛnya. Aw tɛ se ka kɛ Ala ta jonw ye, ka kɛ wari fana ta jonw ye.ʼʼ (Matiyu 6 : 26)
Dawuda k’a ɲini ka o ko ɲanabɔ, ni Matigi batoli ye. A k’a makun, a yɛrɛ le ka o wajibiya a yɛrɛ kan, a ma sɔn a miiriya ye to fɛn wɛrɛ kan ni Matgi kelenpe tɛ, a ma Miiriya si toy min bɛ se ka a yɔrɔ ma janɲa Matigi ta jɛɲɔgɔnya ra. A ko: ʻʻE, ne nin, barika la Matigi Ala ye ! ne jusukun bɛɛ ye baraka la a tɔgɔ saninman kan ! E, ne nin, baraka la Matigi Ala ye, i kana ɲina a ta ko ɲuman si kɔ. A le le bɛ i ta terenbariyaw bɛɛ yafa, a le le bɛ i ta banaw bɛɛ kɛnɛ ya. A bɛ i nin kunmabɔ kaburu ma, k’a ta ɲumanya ni a ta hina kɛ masafugula ye i kun na.ʼʼ (zaburu 103 : 1-4)
Ka se ka taga ɲa Ala daari ni tandonri ra, o bɛ bɔ i ka ko latigɛnin , ani i yɛrɛ jagbeyali ni muɲri le ra. Dawuda tun b’a fɛ ka Matigi boɲa ka tando. Nin saninman b’a kɛ lanabagaw bɛ o jusukunw da yɛrɛ ka danbaga ta sira ta.
A sɛbɛra ko: Matigi, Biblu Kitabu Saninman layiri kɔrɔ kɔnɔ, siɲa waga wɔɔrɔ ni kɛmɛ seegi ani mugan ni seegi 6'828, k’a sɔrɔ a sɛbɛra ko: Ala, siɲa waga fla ni kɛmɛ wɔɔrɔ 2'600. Ala tɔgɔ le ye ko Matigi «Min tɛ ban » a bɛ to tuma bɛɛ. O tɔgɔ bɛ yirari kɛ a ta kantigiya ra Min tɛ yɛlɛ ma. A le le kelenpe kakan ni lanaya ni fori ye, i na fɔ Dawuda ya kɛ cogo min na.
Nka o bɛɛ n’a ta, miiriya caman wɛrɛw tun bɛ nana kabɔ a hakiri kɔnɔ, a ma sɔn k’a makun o kan, a ma yɛrɛ ma jigi o ye. O bɛɛ le kosɔn cira Dawuda ka ɲini a yɛrɛ nin fɛ ko a ye Matigi Ala tandon. A ka latigɛ ko a miiriya ye fa Ala ko ɲuman lon na ani a tandonli ra. Cira Dawuda tun b’a fɛ ka Ala kanu n’a nin bɛɛ ye, ka boɲa ni a yɛrɛ kun bɛɛ ye. A ka Matigi Ala tɔgɔ wele ko Saninman: la firi yɔrɔ si tɛ min na, nanbara ni faniɲa ni jurumu ta ra. Mɔgɔ min bɛ gbɛrɛ Matigi Ala ra, a ta Saninyari nɔrɔ bɛ se o tigi ma, k’a o tigi ta baara juguw bɛɛ bla kɛnɛ kan. Dawuda ka o ɲɔgɔn le lon Ala kola, a ka yɛrɛ ma jigi Ala Saninman ye, k’a boɲa. Matigi ta Saninyari bɛ a ta nɔɔrɔ lamini, sabu saninman Ala le kakan ni boɲa ba ye. Mɔgɔ min bɛ a ɲasin a le ma o tigi bɛ nɔɔrɔ sɔrɔ a jusukun dunba ra.
Dawuda ka ɲini a nin fɛ a siɲa saba na ra, ko a ye makun ka taga ɲa Ala tandori ra. Ocogo ra a miiriya tun ma ɲagamin, a tun tɛ jɔrɔ ra wari ko ra, a tun tɛ siran na hami kow ŋa wala gbɛlɛya nataw ɲa. a ka latigɛ ka miiriya bɛɛ sinsin matigiw ta Matigi kan, min bɛ se ko bɛɛ la dunuɲa kɔnɔ.
Nin saninman blara Dawuda ɲa ka taga Matigi fo ka ko ɲuman lon, a ka Nɛɛma min sɔrɔ ka bɔ Matigi fɛ. Ka kɛ ɲa ni mɔgɔw cogo ye an ka teri ka ɲina Matgi ta dugawu kɔ, ani a ka an ta Ala daari minw jaabi. An bɛ le kɛra koɲumanlonbariw kuntigi ye Ala ta ɲumanya fan fɛ.
Walisa aw ka na ɲina Ala ta dugawu sifa caman kɔ, an b’a ɲini aw fɛ, Matigi ka dugawu min kɛ aw ye, aw ka o bɛɛ sɛbɛ, o kɔ aw ka a fo ni jusu gbɛni ye. Aw ka a tando fɔɲɔ sumanin ni ji kosɔn – sanji ni glace kuru – baro ni faniw – worobagaw ni somɔgɔw – karamɔgɔw ni karan faw – baara kɛ yɔrɔw ni sigi yɔrɔw – jamana kɔnɔ hɛra ni laganfiya kosɔn. – a fo a ka aw mara fɔɲɔ jugu ni sanpɛrɛn ma, ni dugukolo yɛrɛ yɛrɛ, wala tasuma mana min bɛ bɔ dugukolo kɔrɔ. A fo k’a masɔrɔ a ka aw ta jamana mara kɔngɔ ni kɛlɛ ma. Ala ka fɛn min bɛɛ kɛ aw yɛrɛ ta ɲanamaya kɔnɔ o jate mina ka fo. Aw kana aw yɛrɛ kɛ fori kɛ bariye. aw ye aw yɛrɛ degi tando li ra tuma bɛɛ, k’a fo a ka ko minw kɛ aw ye can ra, walisa aw ka nisɔndiya Matigi ta ɲagari ka sigi aw kɔnɔ.
Nin Saninman ka yira cira Dawuda ra, ko fɛn min ka fisa ka tɛmɛ fɛnw bɛɛ kan, an kakan ka Ala fo fɛn min na, o ye jurumun yafa le ye. Mɔgɔ caman bɛ ɲanamaya la o b’a kɛ i na fɔ olugu ye mɔgɔ terenin le ye, minw ma kojugu foy kɛ. O bɛ o ka filiw dogo, o bɛ yala yala i ko bɔnɔbagatɔ. Aw ka ka na tugu olugu kɛ cogo kɔ, aw ye ninmisa ka lɔ aw ta jurumunw na ka o fɔ Matigi ɲana, ka latigɛ ko aw tɛ na o kɛ tuguni, walisa jijali min yirara cira yuhana ra aw ka o sɔrɔ. ʻʻNi an ko jurumun tɛ an na, o tuma an bɛ an yɛrɛ le lafirira ; can tɛ an jusukun na. Nka ni an ka lɔ an ta jurumunw na, Ala min ye kankelentigiye, ani a terenni lo, ale bɛ na yafa an ma, ka an saninya, ka bɔ terenbaliyakow bɛɛ ra;ʼʼ (Yuhan fɔlɔ 1 : 8-9)
Dawuda ka Matigi ta nɛɛma sɔrɔ a ta ɲanamaya kɔnɔ, a ka Ala fo. A ka lɔn ko Matgi Ala ka ta jurumunw bɛɛ yafa a ma. An tɛ nɛɛma dafanin sɔrɔ diina sira wɛrɛw ra. siga siga kuma dɔ i na fɔ la a la walama nasɔrɔ, an tɛ o kuma ɲɔgɔn na sɔrɔ Tawrata layiri kɔrɔ kɔnɔ walama Injiili layiri kura kɔnɔ. Sabu a tɛ an ta juruumunw fan kelen dɔrɔn le yafa an ma, Nka a b’a saninya ka bɔ jurumun bɛɛ ma, a bɛ a ta terenniya di an ma, a b’a ta nɛɛma nin an na, a ta kanuya kosɔn. k’a masɔrɔ kirisita ta saya fɛ, a ka jurumunw kafari saraka bɔ ka dunuɲa mɔgɔw ta jurumunw yafa, an lara o ra ko: ʻʻo cogo ra, a ka minw saninya ka bɔ jurumun na, a bɛ olugu kɛ mɔgɔ dafaninw ye tuma bɛɛ, a ta saraka kelenpe sababu ra.ʼʼ ( Heburuw 10 : 14)
Kirisita k’a fɔ ko: mɔgɔ o mɔgɔ k’a ta jurumun yafa sɔrɔ, o tigi kakan ka yafa a juguw ma, i nafɔ Ala yafa ra a ma cogo min na.(Matiyu 6 : 12) yala juguw bɛ aw ra wa ? bɛn tɛ aw ni mɔgɔ dɔ ciyɛ aw ka sjgida ra wa ? aw ka laɲini sisan ka yafa olugu ma ni o tɛ aw tɛna yafari sɔrɔ Matigi fɛ a bɛ min di gban san. Adaari Matigi fɛ a ye fanga di aw ma, walisa aw ka se ka yafa aw juguw ma, o ka ko jugu minw kɛ aw ra, i na fɔ danbaga Matigi ka a lugu ta hakɛw yafa ka ban cogo min na. Matiyu 6 : 14)
O kɔ fɛ Nin saninman ka yira cira Dawuda ra ko : kɛnɛ ya fana ye Ala ta nilifɛn nafama dɔ ye. A ka Ala fo. Mura ni kun dimi bɛ kɛ an na tuma dɔ, wagati dɔ an bɛ madimi ka jolida bɔ an farikolo ra, wala ka bana kɛnɛyabari kɛ, o bɛ na ta Matigi bɛ an kɛnɛ ya, a ta hina kosɔn. dɔgɔtɔrɔw ta bana kisɛ sɛgɛ sɛgɛri ani o ta firaw tɛ la bɔlikɛ ka se ka an kɛnɛya. Nɔɔrɔ ka kɔ segi sebagaya bɛɛ tigi ma. Matigi bɛ jigi di an ma : ʻʻ ne le ye Matigi Ala ye, ne le bɛ awkɛnɛya ʼʼ. (Bɔri15:26)
Mariyamu dencɛ ka o layiri dafa. Banabagatɔ minw nana a ma a ka olugu kɛnɛya, a ka nin jugu gbɛn ka bɔ jinatɔw ra. An ka bi lonw na, a bɛ tɛmɛ dɔgɔtɔrɔw ni filaw ta fan fɛ ka bana filakɛ, Nka kɛnɛyari dafanin bɛ bɔ a le le fɛ. Yala aw miiri la o la wa ? aw ka na ɲina ka aw danbaga fo ni aw jusu bɛɛ ye, ale le bɛ kɛnɛya di aw ma, a le le bɛ aw ka bana kɛnɛ ya.
Masa Dawuda tun ye Ala ta diina sira mɔgɔ ba dɔ ye. A ka lon ko lon dɔ a le bɛna a yɛrɛ sɔrɔ Matig Ala ɲa kɔrɔ. O kosɔn a ka ta saya labɛn, k’a sɔrɔ Matigi ka yira a ra ko a bɛna a bɔ saya dingɛ kɔnɔ, a ma o ma layiri sɔrɔ a ta tereninya kosɔn, Nka a tun lara Matigi min na o le bɛ se ka tereninya dafanin di. Mɔgɔ o mɔgɔ lara kirisita ra, o tigi tɛ siran sa ya ɲa ni kaburu janka ta ɲa. sabu Mariyamu dencɛ k’a fɔ ko : ʻʻ ne le bɛ suw la kunu, ne le bɛ ɲanamanya di ; ni mɔgɔ o mɔgɔ ka la ne ra, o tigi bɛna ɲanamanya, hali ni a sara. Ni mɔgɔ o mɔgɔ bɛ ɲanamanya, ka la ne ra, o tigi tɛna sa ka ye fiyewu ! ele lara o ra wa ? ʼʼ (Yuhana 11 : 25-26)
Marimu dencɛ kununa ka bɔ kaburu kɔnɔ, a kɛnikɔ ka se sɔrɔ sa ya kan. A ka se sɔrɔ setana kan, a ka ta ɲanamanya banbari yira can na. Mɔgɔ o mɔgɔ bɛ tugu a kɔ a bɛna olugu dɛmɛ, ka o bolo mina ka saya bonda sira tigɛ, ka taga ni o ye ɲanamanya banbari ra.
Matigi Ala Nin saninman ka Dawuda la lɔniya ko: dunuɲa kɔnɔ, Sanu Masafugulanw tɛ fɛn bɛɛ la ɲuman ye. Matigi ta Masafugulanw kaɲi ka tɛmɛ dunuɲa ta kan, a nɔɔrɔ ma lo, abɛ manamana tuma bɛɛ. Mɔgɔ min ka Mtigi ta hina sɔrɔ, n’a bɛ a taran taran fagantanw ni banabagatɔw ra, ka dɛsɛbagatɔw dɛmɛ, ani o ban na mɔgɔ minw na, ka lonaw dɛmɛ, otigi bɛna Nin Sanu Masafugulan nɔɔrɔman sɔrɔ Matigi fɛ. Yala aw ka Matigi ta makari n’a ta hina Masafugulan sɔrɔwa, a bɛ o di a ta baaradenw ma, hina bɛ minw na. ? aw jusukun ka gbɛlɛn ka tɛmɛ farakuru kan wa? Wala aw jusukun farakuru cila, walisa aw ka se ka hina ɲanibagatɔw ni kasibagatɔw ra ? kirisita bɛ aw ɲamina ka aw bla makari sira kan min tɛ ban, a tɛ o kɛ aw sigi ɲɔgɔn ni aw tɛriw dɔrɔn cɛman, Nka a bɛ o ɲɔgɔn na kɛ mɔgɔ firiniw ni lanabariw cɛman, jigi tɛ minw fɛ dunuŋa kɔnɔ ani lahara. Aw ye gbɛrɛ olugu ra, a ka na bara aw ra, ka o ɲada cogo yɛlɛmanin ye sɛgɛfɛ. aw ye Aladaari o ye, ka miiri o ko la, walisa Matigi ye aw bla ka taga Ala ta baara kɛ o cɛma, ni tereninya ani kanuya ye.
Mɔgɔ saninmanw minw kolɔn ni tɛ, olugu bɛna ɲanamanya sanu Masafugulan don o kun na. O hina ra fagantaw ni ɲanibagatɔw ra, o ka Aladaari o ye, o ka o dɛmɛ ka o yɛrɛ saraka o ye, i na fɔ Matigi tun ka kɛ o ye cogo min na, a ko : ʻʻ o le kosɔn min kɛra Adamden ye, a le yɛrɛ ma na janko mɔgɔw ye na baara kɛ a ye, nka a nana ka na baara kɛ mɔgɔw ye le, ani ka a yɛrɛ ni di, ka kɛ mɔgɔ caman kunmabɔsara ye.ʼʼ (Matiyu 20 : 28) kirisita kɛra anw ta sira ye, anw kɛra a ladegibaga ye ; a bɛ fanga ni jijari di an ma, walisa an ka baara kɛ a ye ni ɲagari ye.
Kalankɛla kanulen,
aw bɛ wari le ɲinina wa ? wala lɔ yɔrɔba ? walama kirisita ka alugu cogo yɛlɛma ka aw la fa hina ni makari ra, ka sanu Masa fugulan, min tɛ ye ɲana, ka o don aw kun na ? aw ye zaburu sira kɛmɛ ni saaba, karan 103 ka a mara aw jusukun na, fɔɔkase ka fɔ aw kun fɛ. Aw ye kɛ koɲuman lonbagaw ye, ka lon ko Ala ka kanuya min jigi ra ka bɔ Ala ra, o ye Kirisita le ye, a le min bɛ aw yɛl ɛma ka kɛɲa ni a yɛrɛ ja ye. Aw ye aw yɛrɛ masiri ni koɲuman lon ye ani tando ri ye !
Anw labɛnin lo ka Kirisita ta Kitabu kibaro diman, ni Ala daari kanw, ani ka miiri Matigi ta kumaw ma, ni aw ye oɲini anw fɛ, anw bɛna o ci aw ma gbansan. O sɛbɛw bɛna aw dɛmɛ, ka tando ri kɛ ani ka foli kɛ, ni aw jusukun bɛɛ ye. Aw ye aw mɔgɔ ɲɔgɔnw ja gbɛlɛya ka o la jija walisa o ka Matgi tando k’a ta baara kɛ.
Sani an ka aw ta lɛtrɛ sɔrɔ, an bɛ Ala daari aw ye. An b’a ɲini aw fɛ, aw fana ka Ala daari an ye. Aw kana ɲina ka aw tɔgɔ sɛbɛ ani aw ka adrɛci, aw ka sɛbɛ ka ɲa walisa a ye se ka karan :
WATERS OF LIFE
P.O. BOX 60 05 13
70305 STUTTGART
GERMANY
Internet: www.waters-of-life.net
Internet: www.waters-of-life.org
e-mail: info@waters-of-life.net