Previous Lesson -- Next Lesson
3. Ala ta alaya bɛɛ dafanin yera Yesu ta adamadenya ra (Yuhana 1:14-18)
YUHANA 1:17-18
17 Sabu sariya nana cira Musa le sababu ra, nka nɛɛma ni can, o nana Yesu Kirisita le sababu ra. 18 Adamaden si ɲa ma la Ala kan ka ye; Den min bɔra Ala ra, ni a bɛ ni Fa Ala ye, ale le ka Ala lɔnniya di an ma.
Faranfasi min bɛ sɔrɔ Layirikɔrɔ ni Layirikura cɛ, an bɛ se k’a fɔ ko o ye Sariya ta terenninya sɔrɔcogo, ani Nɛɛma ta terenninya sɔrɔcogo faranfasi. Ala ka sariya kumakan tan di Musa ma, ani sarakakow ta sariyaw, ani mɔgɔw ta kow ɲanabɔcogo ta sariyaw. Ni mɔgɔ min tun sera ka o ciw kɛ k’a dafa, o tigi tun ka kan ka ɲanamanya sɔrɔ. Nka ni mɔgɔ min tun ka o sariyaw ra kelen cɛn, o tigi tun ka kan ni saya ye. O cogo ra, sariya tun ye kiti le ye, min tun bɛ saya lase mɔgɔ ma, sabu adamaden si ma dafa Ala sira tagama ko ra. Hali mɔgɔ minw tun ye Ala ɲasiranbagabaw ye, olugu tun bɛ nimisa o ta kɛwale dɔw ra tuma bɛɛ, sabu o b’a ye ko o tɛ sera ka sariya ta ciw bɛɛ kɛ. Mɔgɔ miiribari dɔw tun bɛ o yɛrɛ jate ko olugu ye mɔgɔɲumanw ye, sabu o tun b’a miiri ko olugu ko ka di Ala ye. Nka olugu nana kɛ o yɛrɛ dɔrɔn ta kow le jate ye, ani ka jusukungbɛlɛya don o ta sariya sira tagama ko ra. O ɲinana kanuya kɔ, ka o yɛrɛ bonya, ka waso tɔw ma, ko olugu dɔrɔn ta tagamacogo le terenna. Sigiya t’a ra ko sariya yɛrɛ saninyanin lo, sabu a bɛ Ala ta saninmanya cogo le yira. Nka sariya ɲa kɔrɔ, adamaden bɛɛ bɛ jate mɔgɔjuguw ye. O cogo ra, sariya bɛ an kɛ ɲanibagatɔw le ye, ka an lataga saya ra.
Ka an to nin yɔrɔjugu ra, min laban ye saya ye, kibarodiman fɔbaga bɛ Yesu Kirisita tɔgɔ fɔ a siɲaga fɔlɔ ra, k’a yira ko ale le ye an bɔsibaga ye ka bɔ an ta ɲani na, ani ka bɔ Ala ta dimi kɔrɔ. Cɛ min ye Yesu Nazarɛtika ye, ale le ye Masiya ye, min layiri tun tara, min ɲanawolomara, k’a fa Nin Saninman na. Masacɛw bɛɛ ta Masacɛ lo, Ala ta Kuma lo, Sarakalasebaga lo. Fɛn o fɛn bɛ se ka kɛ an jigi ye, ani ka an kisi, o bɛɛ sɛ sɔrɔ ale le ra.
Kirisita ma na an fɛ ni sariya sira kura ye, nka a ka an kunmabɔ ka an labɔ Sariya ta danga le kɔrɔ. An kanu kosɔn, sariya tun bɛ fɛn o fɛn ɲini an fɛ, a ka o bɛɛ kɛ k’a dafa an nɔ ra. A ka an ta jurumunw doni ta, ani kiti min tun ka kan ka ben dunuɲamɔgɔw kan; a ka bɛn don an ni Ala cɛ. Ala tɛ an jugu ye tuun an ta jurumunw kosɔn, sabu hɛra donna an ni Ala cɛ an Matigi Yesu Kirisita sababu ra. Yesu min kɛra adamaden ye, o yɛlɛra ka taga a Fa Ala fɛ sankolo ra ; a k’a ta Nin Saninman ci ka na an fɛ. A ka Sariya sɛbɛ an jusukun na, janko ka an jusukun fa miiriya ɲumanw na, ani can ni bonya bɛ miiriya minw na. An tɛ Sariya kɔrɔ tuun, nka Kirisita le bɛ ɲanamanya an kɔnɔ. O cogo le ra Ala bɛ fanga di an ma, janko Kirisita ta kanuya bɛ min ɲini an fɛ an ye se ka o kɛ.
Kabini Kirisita nana dunuɲa kɔnɔ, an bɛ nɛɛma ta wagati le ra. Ala tɛ an borofɛnw le fɛ, walama ko an ye ale bato ni sarakaw ye ka an yɛrɛ jusu suma ni o ye, nka a k’a Dencɛ ci ka na Ala ta terenninya di an ma. Ni mɔgɔ min ka la a ra o tigi bɛ jate mɔgɔ terennin ye fɛn bɛɛ ra. O kosɔn an bɛ a kanu, k’a fo, ka an yɛrɛ di a ma i ko saraka ɲamanan, sabu a ka an saninya.
Kirisita tɛ an to an kelen na i ko feretaw, nka a bɛ to an fɛ k’a ta nɛɛmaw kɛ an ma. An tun man kan ni an ta jurumunw yafa ye, walama ka don Ala ta Nin Saninman ta jɛnɲɔgɔn ya ra. An man kan ni nɛɛmafɛn si ye walama baraka si. A bɛɛ ye Ala ta nɛɛma le ye. An ka kan ni min ye o ye Ala ta dimi ni halakiri le ye. Nka an ni Kirisita ta jɛnɲɔgɔnya kosɔn lanaya baraka ra, an kɛra Ala denw ye, k’a ta nɛɛma sɔrɔ. Faranfasi min bɛ jurumun ta jɔnw ani nɛɛma ta denw cɛ, aw ka o jatemina wa ?
O nɛɛma tɛ fɛn dɔ ye, Ala Saninman ka min latigɛ ka kaɲa ni a jusukunna miiriya ye. Nka kanuya lo, min ju sigira Ala ta ko latigɛninw kan. Ala tun tɛ se k’a fɔ ko ni mɔgɔ min k’a diya a bɛ o tigi ta jurumunw yafa a ma, sabu jurumunkɛbaga ta jurumun ka kan ni a saya ye o yɔrɔnin kelen bɛɛ ra. Nka Kirisita gbengbenna ka sa an nɔ ra minkɛ, Ala tun bɛ min ɲini, o bɛɛ kɛra k’a dafa. O cogo ra, nɛɛma kɛra fɛn dɔ ye sisan, an ka kan ni min ye, Ala ta hina ko kɛra can dɔ ye, foyi tɛ se ka min bɔ a nɔ ra. An bɛ nɛɛma min sɔrɔ Kirisita ra, o le ye an ni Ala ta jɛnɲgɔnya sarati ye.
Aw bɛ se ka aw yɛrɛ ɲininka ko : O tuma Ala bɛ cogo di le, ko ni min k’a diya a bɛ se ka o kɛ, nka a ta terenniya b’a bari ka ko dɔw kɛ ? Aw ta ɲininkari jaabi flɛ nin ye : Diina caman ta mɔgɔw ka o sɔbɛ don, ka sɛgɛ ka cogo bɛɛ ɲini janko ka Ala cogo faamu. Nka o diinaw bɛ i ko yɛlɛyɛlɛnan min lɔnin bɛ dugu ma, nka o tɛ se sankolo ma. Kirisita bɛ i ko Ala ta yɛlɛyɛlɛnan min bɔra sankolo ra ka na se fɔ dugu ma. Ni an ka Ala sɔrɔ ale sababu ra, an jigi tɛ tigɛ fiyewu.
An si ma Ala Danbaga banbari ye a ɲa ra, sabu an ta jurumunw bɛ an faran ka bɔ Ala saninman ta jɛnɲɔgɔnya ra. An bɛ kuma minw bɛɛ fɔ Ala ta ko ra, o si tɛ foyi ye ni an yɛrɛ ta miiriya lakolonw tɛ. Nka Kirisita ye Ala Dencɛ ye, min bɛ ni an ye wagati bɛɛ ani tuma bɛɛ, ani min ye Ala ta Yiracogo saba ra kelen ye. O ra, Dencɛ tun ka Fa lɔn fana. Min yirara an na Ala ta ko ra sani Kirisita ye na o tɛ se k’a bɔ. Nka Kirisita le ye Ala ta Kuma dafanin ye, ani Ala ko can bɛɛ lajɛnnin yirabaga.
Kirisita ta karan jusiginanba ye mun ye?
Yesu ka an karan ko ni an bɛ Ala daari an y’a fɔ ko : «An Fa min bɛ sankolo ra ». A b’a yira an na o cogo fɛ ko Ala ta alaya kun yɛrɛ ye ko an Fa lo. Ala tɛ kuntigi fariman ye min b’a fanga digi an kan, walama kuntigi min b’a ɲini k’a ta fangatigi sigi yɔrɔ bɛɛ, walama kuntigi cɛnrikɛbaga dɔ. A tɛ an kelen tɔ an ta tɔɔrɔ ra, ko a mako tɛ an na. A b’a janto an na i ko facɛ b’a janto a den na cogo min na. Ni den benna bɔgɔ ra, a facɛ b’a labɔ k’a ko k’a saninya ; a tɛ den to a benyɔrɔ ra. Kabini an k’a faamu ko Ala ye an Fa ye, an ta jurumunw ta hami jigitigɛ min tun bɛ an na, an bɔsira ka bɔ o boro. Fa Ala ka an saninya, ka an ladon a fɛ. An bɛ ɲanamanya, ka to ni Ala ye wagati bɛɛ. Yɛlɛmariba min donna diina ko ra dunuɲa kɔnɔ bi, min b’a yira ko Ala ye an Fa ye, o ye keretiyɛnya ta miiriya kura ye, Kirisita nana min fɔ an ye. An bɛ Ala tɔgɔ min wele ko an Fa, Kirisita ta karan ni a ta kɛwalew bɛɛ bɛ sɔrɔ o tɔgɔ le kɔnɔ.
Sani a ye kɛ adamaden ye, Kirisita tun bɛ ni a Fa ye. Kanuya ta jɛnɲɔgɔnya min bɛ Kirisita ni Ala cɛ, nin kuma fɔcogo bɛ o ko gbɛya an ye. A ta saya kɔ fɛ, Dencɛ kununa ka kɔsegi a Fa fɛ. A ma taga sigi a Fa kininboroyanfan fɛ dɔrɔn, nka a bɛ Fa ta jɛnɲɔgɔnya kɔnɔ fana. O kɔrɔ ye ko a sirinin lo a Fa ra, k’a ni Fa kɛ kelen ye. O cogo ra, Kirisita bɛ kuma o kuma fɔ Ala ta ko ra, o bɛɛ ye can ye. An bɛ Ala ye Kirisita fɛ. Dencɛ bɛ cogo min na, Fa bɛ ten, Fa bɛ cogo min na Dencɛ bɛ ten.
DAARIKAN: An Fa min bɛ sankolo ra, an b’i tando ka i fo, sabu i ka Kirisita ci an fɛ, i Dencɛ kanunin. An bɛ an kinbiri gban i ɲa kɔrɔ, sabu i ka an bɔsi ka bɔ Sariya ta jatigɛba boro, ka i yɛrɛ ta terenninya sɛbɛ an jusukun na. I bɛ nɛɛma o nɛɛma kɛ an ye, an b’i fo o bɛɛ kosɔn, ani an bɛ koɲuman minw bɛɛ sɔrɔ i tɔgɔ sababu ra, ko i ye an Fa ye, an b’i bonya o bɛɛ kosɔn.
ƝININKARI:
- Kirisita nana ni miiriya kura juman ye dunuɲa kɔnɔ?