Waters of Life

Biblical Studies in Multiple Languages

Search in "Baoule":
Home -- Baoule -- The Ten Commandments -- 07 Fifth Commandment: Honor Your Father and Your Mother
This page in: -- Afrikaans -- Arabic -- Armenian -- Azeri -- -- BAOULE -- Bengali -- Bulgarian -- Cebuano -- Chinese -- English -- Farsi -- Finnish? -- French -- German -- Gujarati -- Hebrew -- Hindi -- Hungarian? -- Indonesian -- Kiswahili -- Malayalam? -- Norwegian -- Polish -- Russian -- Serbian -- Spanish -- Tamil -- Turkish -- Twi -- Ukrainian? -- Urdu? -- Uzbek -- Yiddish -- Yoruba

Previous Lesson -- Next Lesson?

Ndԑ’n i ti’n 6: NYANMIƐN MMLA BLU - AWA KUN B’Ɔ SASA SRAN SA TƐ’N I LIKA
Wafa nga Jasin Fԑ’n b’ͻ ti kpajalԑ’n ͻ yiyi Mmla blu b’ͻ o Egypt lͻ Tulԑ ndԑ tre 20 nun’n

07 - MMLA NNUN SU: Bu ɔ́ si nin ɔ nin be sran



Ezipt Lɔ Tulɛ'n 20:12
"Bu ɔ́ si nin ɔ nin be sran, kɛ ɔ ´yo nan ɔ nguan nyanman'n ɔ'a yo tɛnndɛn mɛn nga min Anannganman Nyanmiɛn n fa man wɔ'n i nun'n ti"


07.1 - Awlo bo’n ͻ ti cԑlԑ bͻ Nyanmiԑn fa man sran mun

Awlo bo’n ͻ ti kԑ nԑnnglԑnman bͻ lԑ gua kpan’n sa, yԑ ͻ ti kԑ Nyanmiԑn famiԑn diwlԑ nun lͻ like oga kun sa. Nyanmiԑn yili klͻ sran’n, ͻ yili i yasua nin bla, kԑ be yi i anyrunnyan’n nin i anwlԑn tralɛ’n nin i klolԑ’n i nglo, nan be trԑ nan be yi asiԑ’n. Awlo bo’n yԑ ͻ ti klͻ sran’m be nguan’n i mma klikli-ͻ, lԑ yԑ nvle kun i nzuԑn’n bo i bo-ͻ. Awlo bo’n ͻ sisi e wun yԑ ͻ sasa e, asa kusu bo kun yolԑ’n nin be wun ukalԑ o awlo bo’n nun, ͻ man akunndan uflԑ nga be fin gua su lͻ ba’n, be kwla-man awlo bo’n.

Like nga sran’m be kͻ be nun’n bé kwlaa be bo ti kun kԑ ͻ ti su kԑ ba mun be ‵bu bé si nin bé nin’m be sran. Ɔ ti i su kԑ ba’m be ‵klo bé si nin bé nin mun yԑ be nyin ‵yi be. Be kwlaa nga be waan Nyanmiԑn nu’an lԑ’n, bͻ be waan siԑ nin niԑn mun be ti’a like fi’n, be jao Nyanmiԑn b’ͻ yili ninnge’n kwlaa’n nin ninnge ng’ͻ yili bé’n be wun. Be jao nzuԑn kpa nga Nyanmiԑn fa wlԑli sran’m be nun’n i wun wie. Nyanmiԑn fa mmla nnun su’n sasa awlo bo’n. Man e lԑ i ase afin i yԑ ͻ yili awlo bo’n nin-ͻn, ͻ nin anuansԑ ng’ͻ o awlo bo kun nunfuԑ’m be afiԑn, ͻ nin klolԑ nin bo kun yolԑ ng’ͻ o bé afiԑn’n.

Mmla nnun su’n nun’n, nán yasua’n ngunmin yԑ ͻ fata kԑ ba’n ‵bu i sran-ͻn, sanngԑ ͻ fata kԑ ͻ ‵bu i nin sran sͻ wie yԑ ͻ fata kԑ ͻ ‵bu bla’m bé kwlaa bé sran. Ɔ fata kԑ bla’n kusu ‵yo nzͻliԑ kpa i nguan nun ba’m bé nyrun yԑ ͻ nin i wun be bo ‵yo kun ba’m bé lika nianlԑ’n nun. I sͻ’n ti yԑ Anuansԑ Laa’n nin Uflԑ’n bé bo ti kun sa sͻ’n su kԑ ͻ ti cinnjin kԑ ba’m be ‵bu bé si nin bé nin’m bé sran nin-ͻn.

Mmla ng’ͻ se sran’m be kԑ be nian bé awlo bo’n i lika’n, be bo’a yԑ kle-man sran afin ͻ o klͻ sran’n i akunndan’n nun. Mmla sͻ’n wo nnԑn’m be bͻbͻ bé nun wie, bé mma’m be su bé nin’m bé su, yԑ anunman mmla mun nin yasua mun be utu klenzua su. Be ta bé mma mun lika wlԑ lele san be bͻbͻ be kwla kunndԑ like be di. Anuansԑ ng’ͻ o awlo bo kun nunfuԑ’m bé afiԑn’n, Nyanmiԑn b’ͻ yili ninnge kwlaa’n, I yԑ ͻ siesieli i sͻ-ͻ. Sran kwlaa ng’ͻ tu tra anuansԑ sͻ’n, san fͻ bulԑ ′tͻ i su. Andԑ sran wie’m be jao Nyanmiԑn wun i sͻ’n ti be laka ba kanngan mun yԑ be kete be anwlԑn’n, be se bé kԑ: " Nán an sie amun su ndԑ nga amun si’m be kan’n i bo, nán an kan amun ase bé bo. An bu amun bͻbͻ amun wun akunndan ͻ nin amun kpa yolԑ’n i akunndan, an jao amun si’m bé wun! " Ba’m bé nyrun nun ti tuun, be nyin yi’a bé si nin bé nin mun kun, ͻ man be di-man aklunnjuԑ. Be kpanngban bé anwlԑn nun ti sanganwa.


07.2 - Tԑ nga siԑ mun be yi’n

Nyanmiԑn mannin siԑ nin niԑn’m bé atin kԑ bé sa tran akpasua’m bé siesielԑ’n nun, i sͻ’n ti aklunnjuԑ. Ba kwlaa nga be wu i’n, ͻ ti atrԑ nyԑnmԑn kun ! Wienuͻn ba’n i wunnzԑlԑ’n, ͻ fuli i si’m bé nun, b’a sunnzun-man kԑ be ′wu ba. Sanngԑ ͻ nin i sͻ’n ngba’n, Nyanmiԑn sin bé nun yԑ ͻ yili ba sͻ’n nin-ͻn, bé sa trannin ba sͻ’n i yilԑ’n nun wie. E Min buli bé sran ͻ man ͻ mannin bé atin kԑ aja like ng’ͻ o akpasua’m bé nun’n, be fa man ba kan ng’ͻ o bla’n i ku sԑ nun’n. Kԑ Nyanmiԑn man sran’n i ba kun’n, ͻ fata kԑ ͻ koto i Yifuԑ’n i bo, ͻ mԑnmԑn yԑ ͻ lԑ i ase ba sͻ’n ti.

E nin mun be suali e bé ku sԑ’n nun anglo ngwlan, ͻ ti cԑn ba ya-nnyͻn-ableso-nin-nnun, be suali e kͻnguɛ nin wia su. Like fi mian-man e. E nin bé e cԑli bé aklunnjuԑ’n nin bé ya falԑ’m bé nun. Yaya kwlaa ng’ͻ tͻ bé su ͻ nin afε’n kwlaa, e nin be e cԑli nun lika wlԑ. A trԑ i kpa be srԑli nyanmiԑn mannin e lele i sin nan b’a wu e.

Kԑ be bu awuliԑ cԑn’n i akunndan’n, srԑ kunnin be, yԑ awuliԑ cԑn’n bͻbͻ nun’n, be fԑli. E si nin i nin mun be nian e lika afuԑ kpanngban, bé sa nun yԑ e nyin-ͻn. Be nin e sri lika wlԑ yԑ be nin e fԑ lika wlԑ. Wie’m be la Nyanmiԑn ase afin i yԑ man e o nguan’n nun-ͻn, yԑ i yԑ man e yo kpa-ͻ. Sԑ e si mun be nyinnin Zezi i atin’n su’n, e si kԑ be fali e wlԑli e Si b’ͻ o nyanmiԑn su lͻ’n i sa nun. Be kleli e Nyanmiԑn i mmla’n yԑ be wlali e fanngan kԑ e fa e wla’n guԑ e Yifuԑ’n nin e Kankanfuԑ kpa’n i su. Be tali e, be niannin e lika, be kloli e yԑ be yrali e su wafa nga e bͻbͻ e sunnzun-man’n. Be niannin e lika kͻnguԑ nin wia su. Be miannin bé nyin dili junman k’ͻ yo nan y’a di like nan y’a wla tralԑ’n. Be fԑli e afͻtuԑ manlԑ nin e suklu wlalԑ’n nun ͻ nin e jannvuԑ trawlԑ’m bé nun. Kԑ e tͻli tukpacԑ’n, bͻ e wun ti lowa’n, be niannin e su ͻ nin akluntitiԑ. Be nin e dili aklunjuԑ yԑ be nin e sunnin lika wlԑ.


07.3 - Awlo bo nun afԑ mun

Anuansԑ nyanman kun cici siԑ nin ba mun. Anuansԑ sͻ’n ti dan ͻ man be klo be wun yԑ be fa bé wla guԑ bé wiengun su. Sanngԑ ͻ nin i sͻ’n ngba’n, e nun-man Nyanmiԑn su lͻ Famiԑn diwlԑ’n nun kun. Ba’n wie fi ti-a kpa yԑ siԑ’m bé kusu be ti fͻnfuԑ Nyanmiԑn nyrun. Ɔ man Nyanmiԑn i aunnvuԑ silԑ’n kunngba cԑ i ti yԑ kpԑngbԑn o, gbanflԑn o, be kwlaa be o nguan’n nun-ͻn, ͻ nin bé wiengu wun sa bͻ be yaci cԑ titi’n. Sԑ awlo bo kun nunfuԑ’m be yaci-man bé wun sa cԑ-man bé wiengu’n yԑ sԑ be tra-man bé anwlԑn’n, be kwla di-man aklunnjuԑ cԑ-man. Sԑ e klo kԑ aklunnjuԑ’n tran awlo kun nun titi’n, ͻ ti cinnjin kԑ e wun e sa tԑ’m bé wlԑ, e di bé nanwlԑ yԑ e kan e wun ase e se kpata e wiengu. Ba nga be ta be klolԑ nin yaci cԑlԑ’n nun’n bé liԑ su ti ye.

Nán siԑ mun bé ngunmin yԑ be titi bé mma mun-ͻn, afin Nyanmiԑn i Wa’n bͻbͻ seli be kԑ be ‵fa bé mma mun ‵blԑ i sin nan ͻ ‵yra be su. Ɔ fata kԑ siԑ mun be fa Zezi i akunndan’n nin i nzuԑn’n kle bé mma mun, be kle be kԑ be fa i mmla’m bé su yԑ be fa i kasiԑ dandan mun sie bé anwlԑn’n nun. Nán yasua’m bé ngunmin yԑ ͻ fata kԑ be ta ba mun wawԑ nun-ͻn, ͻ ti yasua nin bla’n bé junman lika wlԑ. Be bͻbͻ bé su lafilԑ liԑ’n, be kwla fa man-man bé mma mun asa kusu be kwla mian-man bé mma mun kԑ be lafi Zezi su. Ba’m be bͻbͻ yԑ ͻ fata kԑ be tu atin yԑ be fa akpue kԑ be sͻ be Yifuԑ’n i nun annzԑ be kaci bé sin si i. Man e uka ba mun man be wun i wlԑ kԑ siԑ mun be su yralԑ’n ͻ ka lԑ afuԑ kpanngban ͻ man be anunmannunman mun be di su wie.

Siԑ mun, nán amun saci amun mma mun dan tra su, nán an yo man be kaci fuԑnfuԑ mun. Nán amun se bé kԑ be yo like ng’ͻ tra be afuԑ’n su’n annzԑ nga be afuԑ’n ͻ’a tra su’n. Kԑ ba’n tԑ yo kaan’n, an yaci i nun m’ͻn yo kԑ bakan sa blԑ ng’ͻ nin i fata’n, nán an miԑn i kԑ ͻ yo kԑ kpԑnngbԑn mun sa. Sԑ ba’m be kͻ suklu annzԑ be suan junman’n, ͻ ti kpa sanngԑ ninnge sͻ mun be kwla kaci-man ngwlԑlԑ ng’ͻ fata kԑ e fa kle e mma mun’n. Ng’ͻ ti cinnjin tra su’n yԑlԑ kԑ man e yo nan bé akunndan’n su tike nan be klo Nyanmiԑn yԑ be fa srolԑ b’ͻ ti anyinyԑ srolԑ’n be mԑn i, man e yo nan bé akunndan’n wun sa ng’ͻ ti kpa’n nin tԑ’n bé agbaciԑ’n, man be yo nanwlԑfuԑ, be nanti seiin yԑ be tran saun yolԑ’n nun. Ɔ fata kԑ siԑ nin niԑn nin ba mun be fa blԑ be tran lika wlԑ, be koko yalԑ, be sie bé su ba’m bé kosan’m bé bo ͻ nin bé afԑ mun. Ng’ͻ ti cinnjin tra su’n yԑlԑ kԑ man siԑ mun be srԑ nyanmiԑn titi kԑ bé mma mun be si Nyanmiԑn yԑ be nin Zezi be tran titi.

Kԑ ba mun bé nyin ko ti’n, nán ndԑ nga bé si mun be kan’n i ngba yԑ be di su-ͻ. Be klo kԑ be man be atin nan be yo like nga be klo’n. I sͻ’n fͻndi kunndԑlԑ’n ͻ ti i su, afin ͻ kle kԑ ba’n su nyin. Ɔ fata kԑ siԑ mun be wun i wlԑ yԑ nán man be fa su ya. Sԑ Siԑ mun be fa bé mma mun wlԑli Nyanmiԑn b’ͻ yili i wun nglo kԑ sran sa’n i sa nun bé kanngan nun’n, be kwla tra bé anwlԑn be uka be blԑ bͻ be nyin’n nun, be su yi-man bé sa be su. Blԑ nga ba mun be nyin’n, be sa mian janvuԑ kpakpa nga be di nanwlԑ’n bé wun, ͻ ti cinnjin kԑ be fa bé wun mantan gbanflԑn nga be ti kristfuԑ mun, nan be nin be suan Nyanmiԑn Ndԑ lika wlԑ. Ɔ fata kԑ e to fluwa nga be kwla man be afͻtuԑ kpakpa mun e man be, yԑ flimun nga be nian be’n, ͻ fata kԑ e kpa bé nun. Sԑ siԑ’m be waan be mian bé mma mun nan be nanti kԑ laafuԑ’m be sa’n, ͻ yo man ba’m be jao bé si’m be wun, bé anwlԑn’n kete kpԑkun be kata bé anwlԑn’n i anuan’n.

Man ndɛ nga Zezi fa wlali sran mun bé su nun kpongbongbo’n, man ndɛ sͻ’n tran siɛ nin niԑn’m bé akunndan’n nun : "Sanngɛ sɛ sran kun saci ba kanngan nga be lafi min su'n be nun kun ti nun'n, ɔ flunman kɛ be fa yɛbuɛ nin dan kun minndɛ i kͻmin be yi jenvie'n i bunman'n nun tra kɛ ɔ ´yo sɔ'n" (Matie 18 : 6). "Sran ti nun sacilɛ’n" ͻ kle-man kɛ e jao sran sͻ’n wun ya su, sanngɛ ͻ kle kɛ e su sran kun bo man ͻ kpɛ gblɛ annzɛ ͻ wua annzɛ e yaci i nun ͻ tͻ sa tɛ wie nun, e tu-mԑn i fͻ. Sɛ e sro Nyanmiɛn yɛ sɛ e klo i kpa sakpa’n, san e ′ta e mma mun kpa yɛ e man bé afͻtuɛ kpakpa mun, i sͻ’n ti suyralɛ.

E blԑ liԑ’n su’n, silԑ’n ͻ’a wͻ i nyrun ͻ man ba kanngan’m be bu-man bé si mun kԑ lalafuԑ sran bͻ be si-man like fi’n sa. Siԑ wie’m be o lԑ be si’a fluwa klԑ, be si’a fluwa kanngan. Sanngԑ i sͻ’n man-man ba ng’ͻ si fluwa’n i atin kԑ ͻ ‵tu i wun guԑ be su annzԑ ͻ ‵sri be. I sͻ’n ti-man anyinyiԑ nin ngwlԑlԑ. Fluwa silԑ’n ͻ kle-man kԑ sran’n si ngwlԑlԑ annzԑ ͻ lԑ nyrun. Fluwa dan silԑ ͻ uka-man sran’n i kpa yolԑ’n annzԑ i saun yolԑ’n su. Siԑ mun bé kwlalԑ’n fin-man sika nga be lԑ i nun annzԑ sika nga be sie’n nun. Bé kwlalԑ’n taka Nyanmiԑn i klun sa’n su ͻ nin Nyanmiԑn bͻ ti Famiԑn’n i ye yolԑ bia bͻ be kͻ i nyrun titi nin srԑlԑ nga be srԑ man bé mma mun’n. Kԑ bͻ Nyanmiԑn ti bé si’n ti’n, ͻ fa i klolԑ b’ͻ ti aunnvuԑ silԑ klolԑ’n wlԑli siԑ’m bé anwlԑn’n nun. Kԑ Krist yili bé ti tԑ’n, ͻ man siԑ nin ba’m be lԑ akpue kԑ be ‵tu bé klun be ‵nian be wun lika.


07.4 - Mmla nnun su’n i su falԑ

? E yo sԑ nan y’a bu e si nin e nin’m bé sran ? E akunndan’n bͻbͻ se e kԑ e ′klo be yԑ e ′bu be sran afin be yԑ be ti e like cinnjin, like b’ͻ lԑ-man wunsu asiԑ su wa-ͻ. Ɔ kle kԑ man e fa e wla guԑ bé su, man e nyin yi be, man e wla fi e bͻbͻ e wun yԑ nán man e bu e bͻbͻ e wun akunndan tra be. Ɔ ti’ԑ i su kԑ ba kun bo i si annzԑ i nin. Ɔ fata-man kԑ ba kun bu i wun sran dan annzԑ sran kpa tra sran’n kwlaa awlo bo’n nun, e Min’n kunngba cԑ yԑ ͻ fata kԑ ͻ sie sran’n kwlaa awlo bo’n nun-ͻn. Zezi kleli e like k’ͻ yo nan e awlo mun b’a yo kpa nan y’a tran aklunjuԑ’n nun’n, ͻ seli kԑ: "M bɔ n kacili Sran'n kɛ m balɛ'n ɔ ti sɔ-ɔ, afin m'an ba-man kɛ be su min, sanngɛ m bali kɛ n ´su sran, nan n ´fa min wun kpɔ sran sunman bé ti" (Matie 20: 28). Nyanmiԑn i Wa’n, ͻ wla siԑ nin ba’m bé fanngan kԑ be di mmla sͻ’n su be awlo bo’m bé nun cԑn’n kwlaa.

? Kԑ ba’m be ko kpԑ bé awlobo liԑ’n, i sͻ’n kle kԑ be nian-man bé si mun bé lika kun? Cԑcԑ! Kԑ siԑ’m be ko yo kpԑnngbԑn bͻ be akunndan’n nin bé wunnԑn’n ͻ’a fԑ’n, lԑ yԑ ͻ fata kԑ ba’m be yi bé klolԑ’n i nglo bé lika tra su-ͻ, lԑ yԑ ͻ fata kԑ be nian bé lika kpa tra su-ͻ. Ɔ fata kԑ ba yasua nin ba bla mun be fa bé wun man bé si’m bé ti kԑ be kusu be fa bé wun mannin blԑ nga bé mma’m be tԑ yo kanngan’n. Blԑ nga ba’m be fa ͻ nin bé nyin nga be mian bͻ be fa nian bé si nin bé nin oke mun bé lika’n, ͻ ti kpa tra dͻͻtrͻ sua annzԑ bé andrԑti sika’n.

Mmla nnun su’n i yԑ ͻ ti mmla klikli b’ͻ man e kasiԑ weiin kpa kun afin ͻ kle e weiin kpa kԑ Nyanmiԑn fali e kԑ i mma mun sa. Nyanmiԑn boli kasiԑ kԑ sran ng’ͻ nian i si mun bé lika’n, ͻ nyan nguan tɛnndɛn, nguan bͻ ti kpa yԑ ͻ nyan suyralԑ kpanngban. Blԑ kwlaa nga ba’m be bu bé si’m bé sran bͻ ba nin siԑ mun be nanti Nyanmiԑn i klun sa’n nun’n, kasiԑ sͻ’n i nuan ‵yia bé nguan’n nun.

Nyanmiԑn tannin e si mun nin siefuԑ mun bé finfin yolԑ’n i atin. I kunngba’n nin-ͻn, Nyanmiԑn klo-man kԑ e mianmian sran mun, ɔ klo-man kԑ e yo ato buafuԑ annzԑ dunman klofuԑ annzԑ sran lakafuԑ. Zezi ͻ’a se-man kɛ : ? "Yɛ m bɔ n ti Famiԑn’n n ´se be kɛ : Nanwlɛ, like kwlaa nga an yo mannin n niaan nga be yalɛ'n tra wie'm be liԑ’n be nun kun'n, wuun min yɛ an yo mannin min-ɔn" ? (Matie 25 : 40). ? Amun wla kpɛn Absalͻn i nyin kekle b’ͻ yoli i si David su’n i su ? Kasiԑn su’n, nyin keklefuɛ’n ͻ wuli (1 Samiɛl 15 : 1-12 ; 18 : 1-18).

E kɛnngɛn Ezipt Lɔ Tulɛ'n 21 : 15-17’n nun kԑ : "Sran ng'ɔ bo i si annzɛ i nin'n, man be kun i. Sɛ sran kun tra sran je'n, sɛ ɔ yoli i atɛ o, sɛ kusu ɔ o i sa nun kɛ kanga sa o, man be kun sran sɔ'n b'ɔ trali je'n. Sran ng'ɔ bo i si annzɛ i nin i sannzan'n, man be kun i ". Nyanndra mun 20:20 se kɛ: "Sran kun ng'ɔ bo i si nin i nin be sannzan'n, i bↄbᴐ’n ɔ wa wun kɛ ɔ su wu blɛblɛblɛ kɛ kannin wie b'ɔ su nuan aosin nun'n sa. " Mmla 21: 18-21’n se kɛ: "Sɛ sran kun i wa'n i nyin ti kekle'n, bɔ i nyin yi-man sran'n, bɔ i si nin i nin be kan ndɛ kle i-ɔ, ɔ ti-man'n, bɔ be tu i fɔ-ɔ, ɔ fa-man'n, man i si nin i nin be trɛ i nan be fɛ i be wɔ klͻ’n su kpɛnngbɛn'm be ja su klɔ'n i anuan'n nun lɔ ndɛ kanwlɛ lɔ. Nan be `se klͻ’n su kpɛnngbɛn'm be kɛ: «E wa nga i nyin ti kekle, i nyin yi-man sran, wlaka nin nzanboɛ'n yɛ i waan be fa mɛn i-ɔ.» Kpɛkuun man klɔ'n su sran'm be kwlaa be finfin i yɛbuɛ be kun i. Amun `tu sa tԑ’n amun afiɛn kɛ ng'ɔ o lɛ'n sa. Izraɛlfuɛ'm be kwlaa be ´ti, kpɛkuun srɛ ´kun be ". Ba’n ͻ yoli nyin kekle i si’m bé su kpɛkuun ͻ jaoli bé wun, ͻ’a kplin-man su kɛ ͻ kaci i nzuԑn’n, ͻ man ͻ kacili ba tɛ bͻ i nzuԑn’n kwla sa nvle wunmuan’n. Blɛ sͻ nun’n, nvle kun i kpa yolԑ’n nin i fͻun tͻlɛ’n, ͻ taka ba’m bé klolɛ’n nin bé anyinyԑ’n su- ndɛ bͻbͻ k’ͻ ti sͻ-ͻ.

Nyanmiԑn kan ndԑ kle ba mun weiin kpa yԑ ͻ wla siԑ mun bé su nun kԑ be nian bé wun. Ɔ ti-mԑn i su kԑ siԑ mun be kun bé mma’m bé ya, afin ba’m be ti like bͻ Nyanmiԑn fa wlԑli bé sa nun kԑ be nian bé su. Nyanmiԑn i kasiԑ’n i nuan yiali wafa uflԑ ndԑ nga nun : "Nanwlɛ, like kwlaa nga an yo mannin n niaan nga be yalɛ'n tra wie'm be liɛ'n be nun kun'n, wuun min yɛ an yo mannin min-ɔn " (Matie 25 : 40). Sunmanfuԑ Pͻl kusu wlali siԑ’m bé su nun kpa kԑ nán man be kun bé mma’m bé ya, yԑ nán man be yo nan bé sa sin bubu bé (Efԑzfuԑ mun 6 : 4 ; Kolͻfuԑ mun 3 : 21). Ɔ fata-man kԑ siԑ mun be yaci ba’m be nun man be yo like nga be klo’n, sanngԑ i sͻ’n kle-man kԑ siԑ’m be lԑ atin kԑ be kle ba’m be nyrԑnnԑn. Ɔ fata kԑ be si kԑ nzuԑn wie mun be o afiliԑ’n nun, siԑ nin niԑn mun bé nzuԑn’n yԑ ͻ yi i wun nglo ba’m bé nun-ͻn. Sԑ ba’m bé nantilԑ’n ti’a kpa’n, ͻ fata-man kԑ siԑ mun be kplin su sͻ yԑlԑ kԑ be wuli be sa tԑ’n nun, sanngԑ man be kan be wun ase. Wun ase kanlԑ sͻ’n ͻ yo man be yo wԑtԑԑ yԑ be uka bé mma mun man be nzuԑn’n kaci. I sͻ’n ti ͻ ti cinnjin kԑ siԑ nin ba mun be srԑ Zezi titi kԑ ͻ man be sa wlԑ wunlԑ sa tԑ’n i lika nan be kaci bé nzuԑn’n, yԑ man bé akunndan’n kaci.


07.5 - Kristfuԑ nga be si mun be ti nyanmiԑn flԑfuԑ’n

Ɔ ti cinnjin kԑ ba’m be bu bé si nin bé nin’m be sran. Sanngԑ sԑ be se ba’m be kԑ be yo sa wie bͻ ti-man Nyanmiԑn klun su’n, be kwla kpalo bé si’m bé nuan nun ndԑ’n. Nyanmiԑn Ndԑ’n kԑn weiin kpa kԑ : "Sԑ e nyin yi Nyanmiԑn tra sran mun’n, ͻ ti kpa tra kԑ e nyin yi sran’n" (Sa nga be yoli’n 5 : 29). Andɛ nyanmiɛn flɛfuɛ mun nin Zuif mun bé nvle’m be nun’n, gbanflɛn nga be di bé tiaun’n, be su-man bé si mun bé nyanmiɛn sulɛ atin’n su kun afin be nin Zezi be yiali nun yɛ be sͻli i nun kɛ be Defuɛ sa. I sͻ’n ti kԑ trͻ dan wie sa be su afin Nyanmiɛn fɛli i klolɛ’n mannin be i Wawɛ b’ͻ tran be nun’n ti, yɛ be nyannin kacilɛ dan kpa wawɛ nun nin be nzuԑn nun. Siɛn’n, Nyanmiɛn su be bo kɛ be klo be si mun tra laa. Ɔ fata kɛ be sͻnnzͻn jasin bolɛ nin be nzuԑn kpakpa mun tra ijᴐlԑ’n ng’ͻ fin be nuan fite’n. Tran mindɛlɛ’n nin awlԑn tralɛ’n ti nzuԑn kpa, yɛ ͻ fata kɛ ba’m be srɛ Nyanmiԑn nanwlɛ su man be si nga be nian si’a Nyanmiɛn mun, k’ͻ yo nan Nyanmiɛn ͻ’a si be aunvuɛ’n ti. Ɔ fata kɛ be nian be osu tikatika, afin mɛn nga nun’n, sran fi klo-man e tra-man e si mun.

Sɛ siɛ wie’m be jao Zezi i Wawԑ’n i wun, yɛ sɛ be waan be mian be mma mun kɛ be kpↄci bé Defuԑ’n kɛ bé mmla’n kle be’n sa’n, blɛ’n ͻ’a ju kɛ ba sↄ’m be kpↄci be si mun. Siɛ nga be wawԑ’n kpͻ kristfuɛ mun kɛ nga sa’n, be nin fͻ bulɛ fata yɛ ͻ fata kɛ be kpↄci be. Sanngɛ ͻ ti cinnjin kɛ ba’m be ′klo bé si mun yɛ be ′bu be sran. Sanngɛ Zezi i ndɛ’n tinngɛ e : " Sran ng’ͻ klo i si annzɛ i nin tra min’n, ͻ su yo-man min liɛ" (Matie 10 : 37). Siԑ nga be yo bé mma’m be tԑtԑ Zezi su sulԑ’n ti’n, sԑ ba’m be tԑ o bé bo wun’n, sika ti annzԑ bé nvle nun mmla’m be ti annzԑ klolԑ ng’ͻ o siԑ nin ba’m bé afiԑn’n ti’n, be kwla mian be mma’m kԑ be kaci bé sin si Zezi annzԑ ͻ kwla yo man be sͻ-man Zezi nun bͻbͻ. I sͻ’n ti yԑ Zezi se e kԑ e kpͻci e osufuԑ nga be jao Jasin Fԑ’n i wun mun, s’ͻ ti’ԑ i ti’n, be yo man e kaci e sin si Zezi. Blԑ wie ju’n, kԑ gbanflԑn ko sͻ Zezi nun’n, ͻ ti kpa kԑ ͻ nin i osufuԑ mun ti nun kan k’ͻ yo nan ͻ’a kwla nyin i su lafilԑ’n nun nan ͻ’a klԑn i wun ͻ’a man Zezi kpa’n ti. Nun tilԑ sͻ’n ͻ ti’a pͻpͻ man-man siԑ mun nin ba’m be bͻbͻ, sanngԑ Nyanmiԑn i klolԑ’n ͻ ti dan tra akunndan kpakpa kwlaa nga e kwla fa man be nga be ti cinnjin man e mun.

Kristfuԑ nga be o asͻnun bo kun nun’n, ͻ fata kԑ be ′sͻ be bͻ be kle bé yalԑ Krist su lafilԑ’n ti’n be nun kԑ bé niaan mun sa annzԑ kԑ bé si mun sa annzԑ kԑ be nin mun sa. Be kwla uka be man be nyan juman annzԑ be uka be suklu’n nun annzԑ aja’n nun. Wafa nga siԑ nin niԑn’m be fa klo be mma mun b’ͻ lԑ-man awieliԑ’n, ͻ fata kԑ asͻnun mun be sͻ be nga b’a koko bé tԑ uflԑ’m be nun sͻ, kannzԑ bͻ be yo sa wie b’ͻ ti-man kpa’n. Sԑ amun sͻ sran kun bͻ ͻ’a koko i tԑ uflԑ’n nun’n, ͻ fata kԑ amun yi Krist i klolԑ’n nin i awlԑn tralԑ ng’ͻ o amun nun’n i nglo titi sran sͻ’n i lika.


07.6 - Ndԑ’n i atabo

Klolԑ nga Nyanmiԑn fa klo e’n, klolԑ kunngba sͻ’n, y’ͻ fata kԑ e fa klo e wun e awlo’n nun-ͻn. Nyanmiԑn b’ͻ ti Anannganman’n ͻ ti e Si, ͻ flԑli e kԑ e kaci i awlo nun mma mun mandimaan Krist-Zezi nun. Ɔ yoli e saun nin i Wa kunngba cԑ’n, i moja’n k’ͻ yo nan e nin i y’a di anuansԑ’n, yԑ ͻ man e nguan i Wawԑ’n i tinmin’n nun. Sԑ e si mun be kͻ lika nan loto kun be bͻbͻ annzԑ sa kekle wie nun e si mun be fi e sa’n, ͻ fata-man kԑ e wla’n bo, sanngԑ man e kan kԑ David liԑ’n sa : "Sԑ bͻ min si nin min nin be yi min blo’n, Anannganman fa min sie" (Jue mun 27 : 10). Klͻ sran’n i klolԑ’n ͻ lԑ awieliԑ sanngԑ e Si b’ͻ o nyanmiԑn su lͻ’n, ͻ sͻ e nun nin i klolԑ bͻ lԑ-man awieliԑ’n, ͻ fa e i sa klun. Ba wannzo’n i wun nyanndra’n ͻ kle e wafa nga be fa sↄli ba bͻ mlinnin’n nun’n, ͻ nin wafa nga siԑ’n fa kleli ba ng’ͻ kԑli i si bo wun lԑ kԑ ͻ si i nian’n i wun aunnvuԑ yԑ fa klo i’n. Siԑ’n klo be nnyͻn’n, yԑ ͻ kannin be boli nun. Sԑ e nin Nyanmiԑn bͻ ti e Si’n e di anuansԑ’n, ͻ yo man e wla gua ase yԑ e di alaje e nguan’n nun. Nyanmiԑn man e blԑ cԑn wie kԑ e nin i mma mun e kan e bo nun e di anuansԑ asiԑ’n su wa. Man e la Nyanmiԑn bͻ ti e Si’n i ase, awlo bo ng’ͻ fa mannin e asiԑ’n su wa’n ti, yԑ man e lԑ i ase afin ͻ kpali e kԑ e yo i awlo bo ng’ͻ o nyanmiԑn su lↄ’n i nunfuԑ wie.

www.Waters-of-Life.net

Page last modified on March 02, 2023, at 01:19 PM | powered by PmWiki (pmwiki-2.3.3)