Previous Lesson -- Next Lesson
3. Paqja e lamtumirës së Krishtit (Gjoni 14:26-31)
GJONI 14:26
26 "Por Ngushëlluesi, Fryma e Shenjtë, të cilin Ati do ta dërgojë në emrin tim, do t'ju mësojë çdo gjë dhe do t'ju kujtojë gjithçka që ju thashë.
Kush guxon të pretendojë se ka kuptuar domethënien e të gjitha fjalëve të Krishtit? Dhe kush mund t'i mësojë përmendësh të gjitha thëniet e tij ose t'i zbatojë ato? Dishepujt e shqetësuar në darkën e Zotit morën parasysh ligësinë e tradhtarit dhe atë që mesa dukej kishte të ngjarë të bënte. Ata nuk ishin në gjendje të mbanin mend shumë nga ato që tha Jezusi në fjalimin e tij të lamtumirës, përveç Gjonit.
Jezusi u ngushëllua nga harresa e dishepujve, duke e ditur se Fryma e së vërtetës do të vinte mbi ta për t'i ndriçuar dhe përtërirë siç i kishte këshilluar. Fryma vazhdon veprën e Jezusit me të njëjtin kuptim dhe synim. Ai mbron të dobëtit. Jezusi nuk zgjodhi gjenitë, studiuesit e aftë në filozofi dhe retorikë; përkundrazi ai zgjodhi peshkatarë, taksambledhës dhe mëkatarë të ndryshëm për të turpëruar njohuritë e larta të botës së studimeve të përparuara. Ati në mëshirë ua dërgoi Frymën e tij të paaftëve për t'i bërë ata fëmijët e Tij, të talentuar me urtësinë e përulësisë, duke mohuar vetveten, duke jetuar në drejtësi.
Jezusi nuk botoi një libër në stil poetik, as nuk ia diktoi ungjillin e tij dikujt që mund të humbiste disa faqe ose të harronte thelbin. Ai priste me besim që Fryma e së vërtetës t'i mësonte dishepujt e tij, t'i ndriçonte, t'i drejtonte dhe t'u kujtonte gjithçka që tha. Ungjilli është një nga veprat madhështore të Shpirtit, deri më sot. Ai ia kushtoi planin e shpëtimit gjuhës njerëzore, kujtimit të dishepujve; por Fryma i kujtoi dhe i mësoi, duke i vendosur në thëniet e Jezusit, në mënyrë që Fryma të përlëvdonte Birin me anë të dëshmisë së Apostullit. Ne nuk kemi asnjë libër tjetër përveç shkrimeve të apostujve të Krishtit, të cilët me përulësi i paraqitën botës njohurinë dhe besimin që kishin marrë. Asnjë fjalë e shtuar nuk u vu në gojën e Jezusit. Predikimi i tyre nuk ishte lajm i ftohtë dhe i thatë që po vjetërohej me kalimin e kohës, por Fryma e ka rinovuar vitalitetin e këtyre tregimeve vazhdimisht deri në ditët e sotme. Kur lexojmë ungjillin, është sikur po lexojmë ngjarje që ndodhin në ditët tona. Nëse i dëgjojmë fjalët e Krishtit, është sikur ai të na prekë veshët me zërin e tij. Ai që pretendon se dishepujt shpikën ose shtrembëruan ungjillin origjinal, injoron Frymën e së vërtetës, pasi në Frymën e Shenjtë nuk ka mashtrim; ai është e Vërteta dhe Dashuria.
GJONI 14:27
27 "Unë po ju lë paqen; Unë po ju jap paqen time; Unë nuk po jua jap si e jep bota. Zemra juaj mos u trondittë dhe mos u frikësoftë".
Jezusi u ofroi dishepujve të tij paqen, duke e përfunduar fjalimin e tij të lamtumirës me këtë shënim, paqe që tejkalon çdo përshëndetje njerëzore. Ai po largohej, por la amanet që paqja e tij të mbizotëronte mbi kuvendet e tyre. Ai nuk foli për paqen e rreme siç bëjnë gazetat e përditshme. Me siguri do të vinin tundimet. Meqenëse njerëzit jetojnë të ndarë nga Perëndia, zemërimi i tij bie mbi të gjitha paudhësitë e njerëzve. Jezusi flet për një paqe të ndryshme, paqe në ndërgjegje, që vjen nga falja e mëkateve që buron nga pajtimi ynë me Perëndinë dhe është e pranishme në paqen brenda Kishës. Paqja e Krishtit është Fryma e Shenjtë, fuqia e përjetshme e pandërprerë, që vjen nga Perëndia dhe kthehet tek Ai.
Gënjeshtra, urrejtja dhe dhuna, vrasja, zilia, lakmia dhe papastërtia janë të përhapura në botë. Por Jezusi na urdhëron të mos lejojmë që këto valë satanike të na fundosin. I ligu është princi i kësaj bote. Por te Jezusi, i Dashuri, mbizotëron paqja që na pengon të biem në errësirë dhe dëshpërim. Gjithashtu na çliron nga tronditja e zemrës dhe frika e vdekjes. Besimtari në Krishtin banon në Perëndinë dhe Perëndia në të. A vlen kjo edhe për ju? Jezusi flinte në barkë mes valëve të stuhishme. Të gjithë në varkë ishin të dëshpëruar pasi uji po e mbushte atë. Atëherë Jezusi u ngrit dhe e qortoi stuhinë dhe u bë qetësi. Ai u tha dishepujve të vet: O ju besimpakë, pse keni frikë?
GJONI 14:28-31
28 "Ju më dëgjuat që ju thashë: "Unë po shkoj dhe do të kthehem tek ju." Po të më donit, do të gëzoheshit, sepse unë po shkoj tek Ati, sepse Ati është më i madh se unë. 29 Dhe jua kam thënë tani para se të ndodhë, që kur të ndodhë, të besoni. 30 Nuk do të flas më gjatë me ju, sepse po vjen princi i kësaj bote. Ai nuk ka fuqi mbi mua; 31 por unë bëj ashtu siç më ka urdhëruar Ati, që bota të dijë se unë e dua Atin. Ngrihuni, le të ikim prej këndej.
Dishepujt u shqetësuan ndërsa Zoti i tyre përsëriti lajmin se do t'i linte. Ndarja po afrohej. Përsëri, Jezusi konfirmoi largimin e tij, por gjithashtu theksoi faktin se ai po kthehej. Ai tha: "Gëzohuni, që po ju lë, sepse po shkoj tek Ati. Gëzohuni që shkoj në atdheun tim origjinal. Unë nuk do të ngarkoj mbi ju asgjë si vuajtja e kryqit. Unë do t'ju çliroj nga frika e varrit. Mesazhi im për ju është për unitetin tuaj me Atin. Nëse do më donit, do të gëzoheshit për kthimin tim në parajsë. Unë e konsideroj Atin tim më të madh se unë. Unë e dua Atë shumë, por edhe dashuria ime për ju nuk do të pushojë kurrë. Unë do të vij te ju në Frymën e Tij."
Jezusi përshkroi një tablo të mrekullueshme të Atit, që ata të kuptonin madhështinë e Tij dhe të kapeshin pas Tij, si dhe të ishin gati për ndarjen e tyre nga Mjeshtri, i cili ishte afër vdekjes. Jezusi donte që ata të mbanin mend se vdekja nuk do të thoshte se Perëndia ishte kundërshtari i tij. Paqja midis Atit dhe Birit ishte e qëndrueshme, kështu që Ati do ta tërhiqte atë drejt Vetes përtej asaj vdekjeje.
Fjalë të tjera ishin të panevojshme; Jezusi u ngrit për të përmbushur urdhrin e Atit, që është shpengimi i botës në kryq. Atëherë Fryma do të vinte mbi dishepujt e tij. Ky shpengim do të zbatohej për të gjithë njerëzimin. Ai dëshironte që çdo njeri të ishte i vetëdijshëm për dashurinë e pafund të Perëndisë.
Pastaj, Jezusi dhe pasuesit e tij lanë dhomën e sipërme ku kishte vendosur Besëlidhjen e Re dhe dolën në errësirën e natës, duke kaluar luginën e Kidronit. Ata ecën në malin e Ullinjve drejt Kopshtit të Gjetsemanisë, ku fshihej tradhtari.
LUTJE: Të falënderojmë, Zot, për paqen tënde. Ti i ke pastruar zemrat tona dhe na ke dhënë prehje. Na fal ankthet, frikërat dhe dëshpërimet tona në përrenjtë e urrejtjes, konflikteve dhe korrupsionit. Faleminderit që Fryma jote na ruan në paqe. Na kujtoftë në orët e tundimit fjalët e tua të fuqishme, që të mos biem në mëkat, mosbesim apo mallkim dëshpërimi, por të shikojmë ty duke u lutur me shpresë, të durueshëm në gëzim. Faleminderit që rruga jonë kthehet përsëri tek Ati. Të përulemi, o Qengji i Perëndisë, që na përgatit një banesë në parajsë.
PYETJA:
- Çfarë është paqja e Zotit?
PYETËSOR - 5
I dashur lexues,
na dërgo 12 përgjigje të sakta nga 14 pyetjet e mëposhtme. Më pas do të të dërgojmë vazhdimin e kësajj serie studimesh.
- Pse e pranoi Jezusi vajosjen e Marisë?
- Çfarë do të thotë hyrja e Jezusit në Jeruzalem?
- Pse konsiderohet vdekja e Krishtit si lavdërim i së vërtetës?
- Çfarë do të thotë të bëhemi bij të dritës?
- Cili është urdhërimi i Perëndisë në Krishtin për ne të gjithë?
- Çfarë donte të thoshte Jezusi me larjen e këmbëve dishepujve të tij?
- Çfarë mësojmë nga shembulli i Krishtit?
- Cilat janë domethëniet e lavdisë që tregoi Jezusi kur Juda e braktisi atë?
- Pse dashuria është e vetmja shenjë që i dallon të krishterët?
- Cila është marrëdhënia midis Krishtit dhe Perëndisë Atë?
- Përmend një kusht parësor për përgjigjen e lutjes!
- Cilat janë cilësitë që Jezusi i ngarkon Frymës së Shenjtë?
- Si rritet dashuria jonë për Krishtin dhe si zbret mbi ne Trinia e Shenjtë?
- Çfarë është paqja e Zotit?
Mos harroni të shkruani emrin dhe adresën tuaj të plotë në faqen e përgjigjeve të pyetësorit, jo vetëm mbi zarf. Dërgojini përgjigjet tuaja në adresën:
Waters of Life
P.O.Box 600 513
70305 Stuttgart
Germany
Internet: www.waters-of-life.net
Internet: www.waters-of-life.org
e-mail: info@waters-of-life.net