Waters of Life

Biblical Studies in Multiple Languages

Search in "Peul":
Home -- Peul -- Matthew - 054 (Forbidding Adultery)
This page in: -- Arabic -- Armenian -- Azeri -- Bulgarian -- Chinese -- English -- French -- Hebrew -- Hungarian? -- Indonesian -- Latin? -- PEUL -- Polish -- Russian -- Spanish? -- Uzbek -- Yiddish

Previous Lesson -- Next Lesson

MATTA - Tuubee ko fii laamu Almasiihu on ngun bhadike!
Jandeeji suutaadhi ka Linjiila Almasiihu on no Matta yottiniri mo non
SOBBHUNDU 2 - Fii waaju e golle Almasiihu on Jaliilu (Matta 5:1 - 18:35)
A - Fii waaju ngun ka hoore fello: Fii sariya teddudho on ka laamu kammu ngun (Matta 5:1 - 7:27) -- Fii no maakuuji Almasiihu on dhin mottindiriraa non ka aranun
1. Fii ko waddhii en kon telenma yimbhe bhen (Matta 5:21-48)

b) Fii ko jinaa on tonhaa kon no firi yo en dhabbhu laabhal (Matta 5:27-32)


MATTA 5:27-30
27 On nanii kadi wi'aama wonde: ‹wota a jeenu. 28 Kono min mi wi'ay on, kala ndaarudho debbo fii himmangol mo, haray ontigi jeenii mo ka bhernde mun. 29 Si tawii yiitere maa nyaamere nden wonay sabu haa feggodhaa, haray awu nde, bugodhaa nde ka woddhiti-maa. Ko fii no bhuru-maa moyyhande ka teral maa gootal hayra, edii ka bhandu maa ndun fow bugee ka jahannama. 30 Si tawii jungo maa nyaamo ngon kadi wonay sabu haa feggodhaa, haray tayhu ngo, bugodhaa ka woddhiti-maa. Ko fii no bhuru-maa moyyhande ka teral maa gootal hayra edii ka bhandu maa ndun fow yaha ka jahannama.

Ko Almasiihu on woni sincudho sariya ahadi Heyri ndin immorde ka Alla. O tentinii fii ko sariya on firi kon tigi-tigi, o yaltinii dhun, o yaajinirii dhun giggol makko sellungol ngol. O firtaali yamirooje kiddhe dhen, kono o timminii dhe rewrude e jannde makko nden e jikku makko on. Bawgal makko ngal newnanii mo maakugol oo maaku dhoo: «Kono min mi wi’ay on.» Dhen aayeeje no fensiti fii yamiroore jeedhidhabhere nden nde sincudho sariya arano on tigi yamiri nden. Almasiihu on no waawi fensitude fii makko e himo jogii faamu fii wadhugol dhun. Sariya mo janguno en on dow no farlii en no dhuytiren kuudhe men bondhe dhen. Sariya on telenma ko laabhaa kon no farli en dhuytugol anniyeeji bondhi dhin. Dhen yamirooje dhidhii non no haanaa wadheede e juudhe hakkile dhen e fondo ngon. Bhayru si en nangike e dhin pilci, dhe dhidhi hidhe mari battane bondhe.

Almasiihu on no yidhi junuubankeebhe bhen, o saatinii bhe ka kisiyee. Battane mun, en haanaa bugitaade junuubankeejo woo junuubankeejo ka o hikkori woo, kono ko yo en yidhu bhe. Yimbhe bhen wadhay hondu ko hasii kon e debbo hebhudho bhiddho e nder junuubu maa jibindho fantuujo, bhe nyaawa kuugal makko bongal ngal. Bhe yejjita wonde hibhe boni bhuri on debbo, bhayru kala ndaarirdho goddho yiitere himme yhettirte wa wadhudho jinaa yeeso Alla. Worbhe bhen no himma no weebhiri, hibhe jogii anniyeeji e faaleeji tuunudhi. En fow hidhen mari anniyeeji e koydhi bondhi. Hay gooto alaa wondho wadhude ko moyyhi (Zabuura 14:3; Roomu 3:12). Awa wattanee yili e naafigiyaagal, hita on wi’a hidhon bhuri wadhoowo jinaa bugitaadho e anyaadho. Qirritanee hoore mon, wowliron nii: «Yaa an Alla, yurminan min oo junuubankeejo!» (Luuka 18:13).

Hara hidhon jabhi wonde aaden kala ko junuubankeejo immori ka mbaadi makko? Almasiihu on maakani junuubankeebhe ndarndaabhe bhen oo maaku: «Si tawii yiitere maa nyaamere nden wonay sabu haa feggodhaa, haray awu nde, bugodhaa nde ka woddhiti-maa.» Almasiihu on no faami fii anniyeeji wondhi dhin ka bhernde, bhundu bonki kin. Hidhen handi e nyawdoowo ruuhu sellina on, heydhintinanoowo en bherdhe faljinooje dhen. Tororen mo wano annabi Daawuuda tororii non: «Labbhinan mi fow e kala bonki, labbhinaa junuubu an on » (Zabuura 51:2).

Si on tayhii jungo mon ngon, dhengal mon ngal jokkay yewtude kongudhi aaliidhi e yhowugol yimbhe bhen piiji bondhi. Sahaabaajo hay gooto huutoraali nden yamiroore Almasiihu on, kono bhe hendike bhernde heyre, bhe labbhiniraama Ruuhu Seniidho on. Si Almasiihu on maakii: «Awu yiitere maa nden. Tayhu jungo maa ngon», o wi’aali yo en yhettir dhun no windorii non, kono himo hollude no fewndordhen non e boneeji sutiidhi en dhin, waawudhi naadugol en ka jahannama.

Bhandu men ndun ko tuunudu, wonkii men kin kadi ko tuunuki gila ko wondhen paykun. Kono yhiiyhan Almasiihu on dhan no waawi labbhinde fondo men ngon e kala kuugal bongal, Ruuhu makko Seniidho on tagana en faale no fooliren himmeeji hubbhaydhi e men dhin. Si tawii hidhon e nder junuubu, hita on lutta dhon. Immee, fewton Alla. Himo faamani fii ko faaladhon kon laabhal ngal, o ardoto on no waawiron hoore mon. Tabitee e Almasiihu on sabu ko kanko tun waawata wallitaade on no wuuriron ngurndan laabhudhan. Ko kanko woni Dandoowo mon on e gidho mon sella-findeejo on. O happantaa on, kono o jokkay hollugol on giggol ngol o yidhi on ngol. Himo habbii on!

TORAARE: Yaa an Joomi, medhen nandita e tuunubhe yeeso laabhal maa ngal e senaare maa nden. Yaafano men miijooji amen tuunudhi e kongudhi amen e kuudhe amen bondhe fow. Labbhin men men fow. Tagu e amen bhernde laabhunde rewrude e Ruuhu maa Seniidho on. Yaafano men junuubaaji amen dhin fii no men jokkira tindinoore maa nden. Wallito men no men selira kala ko naadata men e halkaare jinaa. Maru men e nder ko men humondiri kon e maa.

LANDAL:

  1. Ko honno jattinirte dhen e jarrabuyeeji naadaydhi en dhin e nder jinaa e jiibholdu?

www.Waters-of-Life.net

Page last modified on May 18, 2012, at 09:41 AM | powered by PmWiki (pmwiki-2.2.109)