Waters of Life

Biblical Studies in Multiple Languages

Search in "Peul":
Home -- Peul -- Matthew - 019 (Worship of the Magi)
This page in: -- Arabic -- Armenian -- Azeri -- Bulgarian -- Chinese -- English -- French -- Hebrew -- Hungarian? -- Indonesian -- Latin? -- PEUL -- Polish -- Russian -- Spanish? -- Uzbek -- Yiddish

Previous Lesson -- Next Lesson

MATTA - Tuubee ko fii laamu Almasiihu on ngun bhadike!
Jandeeji suutaadhi ka Linjiila Almasiihu on no Matta yottiniri mo non
SOBBHUNDU 1 - Piiji arani dhin ka golle Almasiihu on (Matta 1:1 - 4:25)
A - Fii jibineede annabi Iisaa e paykunyaagal makko ngal (Matta 1:1-2:23)

3. Fii no gandidhubhe bhen yhentorii annabi Iisaa e no bhe sujjirani mo non (Matta 2:1-11)


MATTA 2:1-2
1Ɓay wonii Iisaa jibinaama Bayti-Lahiimi, ɗun ko e nder diiwal Yahuuda fewndo laamu Heroodu, onsay gandiɗuɓe iwri funnaange ari Yerusalaam, 2 ɓe wi'i: «Ko honto oo lanɗo Yahuudiyankeeɓe arɗo e jibineede woni? Ko fii men yi'ii hoodere makko nden ka funnaange, men arii sujjangol mo.

Dhun e tawde leyyhi aduna on dhin fow no habbii ardu Joomi on, dhun feyyhiri wa ko gooto wattanaali yili e mun, dhun no hersinii. Annabi Iisaa jibina wa si gooto andaa, maagara woo wadhaaka. O bhoorike darja makko on, o arii e nder oo aduna wa aaden mo goddho woo andaa. Hidhen waawunoo habbaade yo Bhiddho Alla on jabbhore maagara tiidhudho, wondude e darja e teddungal ngal o haanaa jonniteede ngal fow. Meetelli dhin e labbooji laamu dhin yanayno ka koydhe makko, lambhe bhen e hooreebhe bhen ka aduna wonayno jiyaabhe makko yankinanii bhe mo. Yahuudiyankeebhe bhen no habbinoo sugu on Almasiihuujo, kono no piiji dhin feyyhiri non no serti fota. «Hari daaluyee on no e oo aduna, kono aduna on andaali mo» e «o arii ka makko, kono bhe makko bhen jabbhaaki mo» (Yuuhanna 1:9-11).

E hitaande 587 adii I.-A., hari Yahuudiyankeebhe bhen no wadhaa e joge e ndii leydi wi’eteendi Araama-Naharayni. Bhe sendoduno e yimbhe bhen andal mabbhe Alla ngal e piiji hiitaadhi fennyindhi dhin fii ko Gedhal Daawuuda on immintee kon ka aduna fii addangol yimbhe bhen bhuttu. Ngal nelal hewti jamaaji hodhudhi dhin sengo Funnaange. Dhin jamaaji yejjitaali oo neddho keldhudho wi’eteedho Danu’iila, oo annabaajo mawdho gollunoodho gila ko neebhi e ley laamu Nubakanesaaru ngun e lontinoobhe on bhen. O accuno batte e ngun jamaanu.

Wobbhe e Yahuudiyankeebhe bhen janguno pellet gundooji adunaaru ndun ka Dudhal Astronomiiwal wongal ngal Baabilon nokkuure tawaande ka Kalduyankeebhe bhen. Bhe taskino fii ko dhee tulbhe moolanaadhe dhidhi wi’eteedhe Saturne e Jupiter bhadodirta e ko dhe foppodirta kon fayda e ndee nyalaande 29 mai e hitaande 7 adii I.-A. Dhen tulbhe moolanaadhe dhidhi wonuno sabu yaltugol hoodere jalbude poy. Bhen ndaaroobhe koode dhen no sikkunoo wonde foppodirgol dhen tulbhe moolanaadhe no sappii leydi hakkundeeri ndin, hara wi’eteende nden Saturne ko maandini ko hiwande nde Yahuudiyankeebhe bhen hiwetee nden, wi’eteende nden Jupiter kayre ko maandini ko hoodere lambhe bhen. Battane mun, bhe taskii fii dhen tulbhe moolanaadhe, bhe faami wonde Almasiihu landho Yahuudiyankeebhe bhen on e jogitiidho on adunaaru ndun jibinaama.

Gandidhubhe bhen hewti Yerusalaam, hibhe iwri Funnaange, hibhe dhabbhita landho Yahuudiyankeebhe on. Bhe hammiri Yerusalaam bhayru ko dhon woni saare mawnde nden. Hibhe waawunoo sikkude wonde: «Si wa on landho jibinaama, men nanoyay fii mun haa ka nder leydi amen. Awa dhun no dawi fota ka men yaha fii sujjangol mo.» Kono hakkee ko bhe hawji bhe fibhi anniye wadhugol sugu nduu yaadu woddhundu fii tun no bhe yiitira mo.

Wakkilaare mabbhe nden no jannude en wondema bhen dhabbhoobhe Almasiihu on e hoore laabhal, ndaarata tampereeji dhin e boneeji hulbhiniidhi wondhi dhin ka hoore laawol. Bhen dhabbhiroobhe Alla ittiri bhernde mun nden fow, bhe yiitay mo.

Gandidhubhe bhen limi bhe tawi wonde foppodirgol ngol tulbhe dhidhi moolanaadhe wi’eteedhe dhen Jupiter e Saturne, bhurdhe dhen mawnude e nder wondhe dhen fow takko naange ngen ko laabi dhidhi dhun wadhata e hitaande wootere nden, e saa’i kala nde dhun wadhi jaawiire jalboore yaltitay. Yeeso nden huunde nde woowaa, bhe fibhi anniye immingol yimbhe haa ka Dudhal wongal Yerusalaam no bhe tawiree ko foppodiral dhimmal ngal wadhata kon, e maanaa e ndee nyalaande, bhe wona ton kadi haa nde foppodiral tammal ngal wadhata woo e ndee nyalaande 3 desaabur hitaande 7 adii I.-A. Imminaabhe bhen hari no dhabbhitude nokkuure ka landho Yahuudiyankeebhe keso on jibintee dhon, dhun ko wattitoowo on aduna on. Bhen seteebhe hulaali lakkere tiidhunde wadhaynde nden ceedhu. Bhe yaari leydi Sirii iwrude Ifuraatiwol, hibhe tayhita candhi mawdhi dhin Oronto e Litani no bhe hewtira ka sengo nyaamo leydi Jordanii ndin. Onsay bhe tiindodiri e wulaa on, bhe hewti Yerusalaam ka pelle dhen hatti dhon tooweendi mun ndin.

Bhen gandidhubhe landaaki si tawii landho jibinaama, kono e hino ko bhe landii kon kisan: «Ko honto oo landho Yahuudiyankeebhe ardho e jibineede woni?» Hibhe joginoo ngal pellital ka nder bhernde mabbhe.

Hibhe habbinoo yi’ugol ka jamaa on sujjanta on landho keso, hara hibhe rewamo no bhe hendoroo kisan jaabawol. Hibhe landaade ngal landal dendaangal bhen bhe fottunoo e mun, kono gooto jonnaali bhe jaabawol laabhungol. Haa hande sugu nden majjere no lutti ka aduna, hino yurmi ko tawi kon hay ka nder mofte almasiiyaaje sugu bhen yimbhe no woodi. En faamaali fii dhun. Bhen bhe sutordhen wa haanubhe en ardaade haa ka Almasiihu on kambhe tigi ko bhe jananbhe yeeso makko.

Malaa’ikaajo on fennyinani ngaynaakoobhe on fii jibineede Almasiihu on, hoodere fennyinanii dhun gandidhubhe bhe wonaa Yahduuiyanke bhen. Allaahu on daalirani dhen mojobe dhidhi yimbhe no dhe waawira faamude. Allaahu on no mari nooneeji heewudhi no o faaminirta en.

TORAARE: Alla Jom-Bawgal, mi yettii ma sabu ko an woni jogitiidho on koode dhen e naange ngen. A tagii adunaaji dhin, ko an woni ko jeyi dhi. A yewtay bhe andaa Alla bhen e nder koydhi e piiji fennyinaadhi, a yedhii aduna on daaluyee maa wontudho on neddho no men andira muydhe maa dhen. Tagu e amen sugu dhen faale fii yi’ugol Bhiddho maa on wano oo mo jom faamu en marunoo on, bhen hawjunoobhe yahugol fii fottugol e makko.

LANDAL:

  1. Ko honde tuma dhee tulbhe moolanaadhe dhidhi wi’eteedhe Saturne e Jupiter wondhe ka kammu takko koode dhen foppodirnoo fayda e on saa’a?

www.Waters-of-Life.net

Page last modified on May 18, 2012, at 09:00 AM | powered by PmWiki (pmwiki-2.2.109)