Fluwa kaan 08 -- ? Wan yԑlԑ Krist ?
Mԑn nun akpasua nga be klo kԑ be sie nvle mun’n, be klԑ be nyrun mmua dunfuԑ’m be wun ndԑ ↄ nin ninnge nga be kle be’n, fluwa su. Be nga be waan Nyanmiԑn yԑ ↄ sunmannin be’n b’ↄ be kpԑ nyanmiԑn sulԑ i wun atin wafawafa wie mun’n, be kusu bé su sufuԑ mun be klԑ be wun ndԑ fluwa su ↄ nin intԑrnԑti su. Be yoe sↄ k’ↄ yo nan sran mun b’a su bé tinngԑfuԑ’m be su’n ti.
Mari i wa yasua’n i liԑ’n ti’a sↄ. Sran ng’ↄ klo kԑ ↄ si i’n, ↄ yi i wun nglo kle i. Dunman “Krist’n” ↄ o Anuansԑ Uflԑ’n nun kpԑ ya-nnun-kpԑ-ablesiԑn-nin-ngwlan. Mari i wa yasua’n ↄ tikeli i sran wafa ng’ↄ ti’n su, ↄ seli kԑ: “E Min Nyanmiԑn i Wawԑ’n wo min su, yԑlԑ kԑ ↄ guali min su ngo kԑ m bo Jasin fԑ’n kle yalԑfuԑ mun. Ͻ sunmannin n Kԑ n kan kle be bↄ be traili be lomuԑn’m kԑ be ′nyan bé ti, yԑ n kan kle anyansifuԑ’m be kԑ be ′wun ase, yԑ n ‵yo man mianfuԑ’m be nyan alaje, yԑ n ‵kan afuԑ nga e Min Nyanmiԑn’n ↄ ′yo i sran’m be ye’n i ndԑ” (Lik 4: 18 – 19).
Krist, i b’ↄ Nyanmiԑn guԑli i su ngo kԑ ↄ ‵di Famiԑn’n, ↄ yili i nguan’n su nvialiԑ nun sa bↄ Nyanmiԑn nuan ijↄfuԑ Ezai kannin’n, afuԑ-ya-nso i sin nan b’a wu i’n, i nglo (Ezai 61 : 1, 2).
Mari i wa yasua’n i awuliԑ’n fin Anannganman i Wawԑ’n. Kpԑkuun Nyanmiԑn Wawԑ’n yili Zezi Krist k’ↄ yo nan ↄ nin i be bo wa yo kun i junman dilԑ’n nun’n, nan ↄ’a kwla yia Nyanmiԑn klun sa’n i nuan’n ti. Krist ↄ’a yo-man sa tԑ kaan sa le. I nzuԑn’n ti kԑ Nyanmiԑn bↄbↄ liԑ’n sa, fiԑn kaan sa nu’ԑn i nun.
Ͻ yoli man sran’n kwlaa be wun i wlԑ kԑ i yԑ ↄ ti “Sran saun b’ↄ e Min’n i Wawԑ yi i nin-ↄn”. Anuansԑ Laa’n nun’n, be gua famiԑn mun, ↄ nin Nyanmiԑn nuan ijↄfuԑ mun, ↄ nin Nyanmiԑn nyrun jranfuԑ’m be su ngo. I bo’n kle kԑ b’a sie be ngunmin bé junman’n i dilԑ’n ti yԑ Nyanmiԑn i kwlalԑ’n nin i ngwlԑlԑ’n ↄ o be nun. Be ti su ngo gualԑ sↄ’n, ↄ ti Krist liԑ’n i mma klikli. Nyanmiԑn guԑli i su ngo kԑ ↄ di famiԑn mandimaan (Daniԑl 7: 13 – 14), kԑ ↄ yo Nyanmiԑn nyrun jranfuԑ tititi (Jue mun 110: 4), kԑ ↄ yo Nyanmiԑn nuan ijↄfuԑ b’ↄ boli i kasiԑ’n (Mmla 18: 5), kԑ ↄ kpata sran’m be sa tԑ’n i ti (Ezai 53), kԑ ↄ yo Nyanmiԑn i ndԑ bↄ kacili sran’n (Ezai 61: 1 – 2). I dunman Krist’n, nán Mari i wa yasua b’ↄ ti’n ti-ↄ. Sanngԑ ↄ kan junman nga Nyanmiԑn fa wlԑ i sa nun kԑ ↄ di’n i ndԑ.
? Nguԑ ti y ԑ Nyanmiԑn sunmannin Krist-ↄ ?
Nyanmiԑn b’ↄ yili ninnge’n kwlaa’n, ↄ sunmannin Krist, ↄ fԑ i Wawԑ saun i kwlalԑ’n mԑnnin i kԑ ↄ bo Jasin Fԑ b’ↄ ti sran’m be ti delԑ ndԑ’n kle yalԑfuԑ mun k’ↄ yo nan Nyanmiԑn ↄ’a bu be sran kpa’n nan b’a nyan be ti Nyanmiԑn i ya’n bo jↄlԑ dilԑ cԑn nun’n ti.
Nyanmiԑn ↄ’a bu-man mԑn nun siefuԑ mun, ↄ nin wlengbifuԑ mun, ↄ nin ngwlԑlԑ sifuԑ mun, ↄ nin sa sifuԑ mun be akunndan ka nan ↄ’a bu be nga’m be akunndan. Sanngԑ i klolԑ’n nin i aunnvuԑ silԑ’n nun’n, ↄ kaan ndԑ kleli be kanngan mun, nin be bↄ be lԑ-man moae mun, nin sa tԑ yofuԑ mun, nin be bↄ be lԑ-man fanngan mun, nin yalԑfuԑ mun, nin be bↄ be sa a mian ukalԑ wun mun. I b’ↄ kwla like’n kwlaa yo’n, ↄ sunmannin Krist nyrԑnnԑnfuԑ’m be lika, nin be bↄ be yili be blo’n be lika, k’ↄ yo nan b’a nyan sunnzunlԑ nin wawԑ nun kwlalԑ nin anannganman nguan i Wawԑ saun b’ↄ wa fa man be’n ti.
Krist flԑli i Jasin ng’ↄ bo’n kԑ “Jasin Fԑ” – Jasin b’ↄ yo fԑ. Sran kwlaa ng’ↄ lafi Jasin Fԑ sↄ’n su’n, ↄ wlu Nyanmiԑn i awlo bo’n nun yԑ ↄ nyan tranwlԑ kun nyanmiԑn su lↄ. Jasin Fԑ’n ↄ lԑ kwlalԑ kpↄlԑ b’ↄ o mԑn nun’n i su. Krist i nuan ndԑ mun be fuan ato bualԑ nin gblԑ’n, yԑ be lԑ kwlalԑ tekle bolԑ nin bla bↄ be kunndԑ be yi bo annzԑ bian bↄ be kunndԑ be wun bo’n i su. Sran ng’ↄ tie Jasin Fԑ’n b’ↄ sↄ nun’n, Nyanmiԑn Wawԑ’n trԑn i nun. Jasin Fԑ’n ti like bↄ Nyanmiԑn fa cԑ sran mun. Sran ng’ↄ kanngan-man Jasin Fԑ’n b’ↄ sↄ-man Krist bↄ Nyanmiԑn fa cԑli sran mun i nun’n, ↄ ti yalԑfuԑ titi, i wla’n gua-man ase, ↄ nin Nyanmiԑn b’ↄ o nguan nun’n be afiԑn sԑ-man.
Krist kannin kԑ Nyanmiԑn sunmԑnnin i be nga be wla ti bowa bé sa tԑtԑ’m be ti’n be lika. Ͻ de be nga be ti sa tԑ’n i kanga bↄ be o Satan i kwlalԑ’n i bo’n. Sa tԑ yofuԑ bↄ be ti wuwa wawԑ nun’n, ↄ man be su kpԑkuun ↄ man be nguan uflԑ b’ↄ ti saun b’ↄ ti seiin. Krist kan-man ndԑ ngbԑnngbԑn mun, sanngԑ ndԑ ng’ↄ kaan’n, ↄ yiԑ i nuan. Sran kwlaa ng’ↄ kanngan abonuan sa ng’ↄ yoli be Jasin Fԑ’n nun’n, nin Nyanmiԑn flԑfuԑ’m be fluwa’n nun’n, san ↄ ′kplin su kԑ Mari i wa yasua’n ↄ ti Famiԑn sakpa yԑ Nyanmiԑn i kwlalԑ’n nin i klolԑ’n kwlakwla o i sa nun. Ͻ’a ka-man ndia’n nun. Ͻ o nguan nun. Ͻ boli i kasiԑ kleli i sᴐnnzᴐnfuԑ’m be kԑ i Wawԑ’n i kwlalԑ’n ↄ wa yi i nglo be nun.
? Amun nyannin Nyanmiԑn Wawԑ’n ?
Krist ti-man awԑnfuԑ. Ͻ’a fԑ-mԑn i sa a sie-man Nyanmiԑn Wawԑ’n nin i kwlalԑ’n su kԑ ↄ ti i ngunmin liԑ sa. Ͻ fa Nyanmiԑn Wawԑ man be kwlaa nga be sa sin a bubu be bↄ be su kunndԑ Nyanmiԑn i aunnjuԑ’n, k’ↄ yo nan aklunnjuԑ Wawԑ’n ↄ’a tran be nun nan Nyanmiԑn i klolԑ’n ↄ’a yi be’n. An usa amun wun kosan kԑ : “ ? Ͻ ti i su kԑ n ka fiԑn’n nun, sa tԑ yolԑ’n i kannga dilԑ’n nun”? Annzԑ “ ?N klo kԑ n yo saun nan Nyanmiԑn bu min sran kpa Krist ti nan ↄ fԑ i Wawԑ’n man min? ” Ͻ seli kԑ:
“Sran kwlaa nga n Si fa be man min’n be ′ba n sin, ↄ man sran ng’ↄ ba n sin’n, n su fuԑn-mԑn i” (Zan 6: 37);
“Sran ng’ↄ lafi n su’n, ↄ lԑ Anannganman nguan” (Zan 6 : 35, 47 ; 8 : 12 ; 10 : 27 – 28 ; 11 : 25 – 26).
“Kԑ min nin amun y’a kaci sran wunmuan’n, man e tran sↄ titi” (Zan 15: 4).
Wↄ bᴐ a su kanngan fluwa nga’n,
Sԑ a wun Nyanmiԑn i kasiԑ’m be wlԑ yԑ sԑ a si kԑ be bo ti kploun sakpa’n, tike wↄ awlԑn’n su man Krist, ↄ ′fԑ i Wawԑ saun man wↄ.
Krist seli kԑ Nyanmiԑn guԑli i su ngo kԑ ↄ di famiԑn yԑ ↄ sunmԑnnin i kԑ ↄ wa kan afuԑ nga e Min Nyanmiԑn ↄ ′yo i sran’m be ye’n i ndԑ. Moiz i fluwa’n kle e kԑ afuԑ ablenun’n kwlaa man be yaci kanga’m be nun yԑ man be fa be ninnge kpakpa nga be fa wlali aowa’n man be (Saun yolԑ 25: 10…).
Ͻ ti wawԑ nun ti delԑ b’ↄ ti dan tra ti delԑ’n kwlaa’n i nzↄliԑ. Krist klo kԑ ↄ de be kwlaa nga be ti sa tԑ’n i kanga’n, ↄ ′de be fiԑn’n nun ↄ nin nyin kekle’n nun nan ↄ ′fa be mantan Nyanmiԑn wun. Krist lԑ i wun atin kԑ ↄ ′de be yԑ ↄ lԑ i wun kwlalԑ yԑlԑ kԑ ↄ tuli mԑn’n i sa tԑ’n. Laa blԑ nun’n, Moiz nun’n, Nyanmiԑn faa mmla mannin. Sanngԑ Zezi-Krist kusu yԑ ↄ faa ye yolԑ’n nin nanwlԑ’n bali-ↄ (Zan 1 : 17). K’ↄ fin cԑn bↄ Krist yili e ti tԑ’n, sran’m be kwlaa be lԑ atin kԑ be kpԑ be nyin Nyanmiԑn wun. Nyanmiԑn fԑ i Wawԑ’n man e, afin ↄ boli i kasiԑ, ↄ ti i aja diwlԑ’n nun aja like. Jↄlԑ dilԑ cԑn’n nun’n, Nyanmiԑn su yo-man e jↄlԑ difuԑ kun, sanngԑ e niԑn i kԑ e Si b’ↄ ti aunnvuԑ sifuԑ b’ↄ trԑ i awlԑn e wun’n, b’ↄ su minndԑ e kԑ ↄ ′sↄ e nun nin aklunye’n sa.
Wafa nga e nin Krist e yiali nun’n
N yoli sa tԑ’n i kannga yԑ n yoli n klun klo sa mun be kannga. Cԑn’n kwlaa ninnge nga be yo n fԑ’n yԑ n yo-ↄ, like nga n ko yo nan min wla’n ↄ’a gua ase’n, yԑ n yo-ↄ. N dili n klun klo mԑn, n kunndԑli bla mun, n kunndԑ kԑ klolԑ’n ↄ yi min awlԑn’n, sanngԑ m’an nyan-man nun like fi. Min aklunnjuԑ dilԑ’n ti kaan sa i sin’n n wun i wlԑ kԑ n konvi tԑ sↄ like uflԑ. N ku yi-man le, aklunnjuԑ dilԑ’n nun. Cԑn kun’n, n tili Zezi i wun ndԑ. Be seli min kԑ ↄ ti Defuԑ b’ↄ uka e sa kekle’m be nun. M boli i kunndԑlԑ bo. Min janvuԑ kun kannin like nga Mari i wa yasua’n yo mannin sran’m be kwlaa’n i ndԑ kleli min. Ͻ yiyi nun kleli min kԑ Zezi kwla kaci min nguan’n.
Krist wuli min ti, yԑ ↄ mannin min anannganman nguan, k’ↄ yo nan m’an tran aklunnjuԑ dilԑ nun’n ti. K’ↄ yo nan m’an nyan i aklunnjuԑ’n nin i klolԑ’n, n si kԑ ↄ fata kԑ n fa min awlԑn’n mԑn i yԑ n kan min wun ase i bo. I sↄ’n ti n fali akpue kԑ n kaan ndԑ n kle i yԑ n flԑli i kԑ ↄ bla min nguan’n nun. Ͻ tili ndԑ nga n kannin’n kpԑkuun ↄ bali min awlԑn’n nun sakpa. Ͻ boli i ti delԑ junman’n i bo min nun. Siԑn’n, aklunnjuԑ’n ↄ’a yi min kpo. Srԑ kun-man min kun, n koko-man sa sa fi su kun, kannzԑ be kle min yalԑ’n, min wla bo-man afin ↄ nian min lika yԑ ↄ yia min asamian’m be nuan. Wↄ bᴐ a su kanngan fluwa nga’n, n su flԑ wↄ kԑ a bla Zezi sin, srԑ i kԑ ↄ wlu wↄ awlԑn’n nun, k’ↄ yo nan aklunnjuԑ’n ↄ’a yi wↄ nan ↄ’a si alaje dilԑ nga be nyԑn i sa kekleekle’m be afiԑn’n.
Nyanmiԑn srԑlԑ
E si Nyanmiԑn, a ti aklunyefuԑ, a ti aunnvuԑ sifuԑ. A ti be bↄ be kaci be nzuԑn’n be wawԑ nun si. N la wↄ ase afin a sunmannin Krist bↄ a guԑli i su ngo kԑ ↄ yo Famiԑn’n, e mԑn fiԑn nga nun. Ͻ nin min fata-man kԑ n mantan ↄ wun annzԑ n nyan ↄ wawԑ’n yԑlԑ kԑ n ti sa tԑ yofuԑ. Sanngԑ be nga Nyanmiԑn i ninnge’m be mian be sa’n, a yra be su. A kplinnin krist i tԑ yilԑ bↄ tuli e sa tԑ’n su. N koto wↄ bo n manman wↄ yԑ n srԑ wↄ kԑ a gua min su ngo nin ↄ Wawԑ Saun, k’ↄ yo nan min nguan’n ↄ’a kaci nan m’an kan min wun ase, nan m’an yo ↄ liԑ mlↄnmlↄn mandimaan, nan m’an yo aunnvuԑ sifuԑ, nan ↄ klolԑ’n ↄ’a yi min kԑ Krist liԑ’n sa’n ti. M’ↄn yo sↄ-ↄ.
? An klo kԑ amun si Krist i wun ndԑ uflԑ ekun?
An klԑ e fluwa e wa fa Krist i Jasin Fԑ’n blԑ amun ngbԑn, an tua-man kalԑ fi, ↄ nin Nyanmiԑn ndԑ’n i wun akunndan bulԑ fluwa wie mun, ᴐ nin srԑlԑ wie mun. An kanngan Jasin Fԑ’n sↄ’n yԑ an srԑ Nyanmiԑn, k’ↄ yo nan amu’an nyan Nyanmiԑn i aunnjuԑ b’ↄ ti anannganman’n ti.
An fa Krist i Jasin Fԑ’n cԑ amun janvuԑ mun
Sԑ Krist kacili amun awlԑ’n nan ↄ mannin amun nguan uflԑ’n, yԑ sԑ i Wawԑ’n wo amun nun’n, an fa fluwa nga man amun janvuԑ mun ↄ nin be bↄ be lafi-man Krist su mun. E ′blԑ amun fluwa nga kpanngban. Be nga be sↄ fluwa nga nun’n, an srԑ Nyanmiԑn man be. E su minndԑ kԑ an klԑ e fluwa. An klԑ amun adrԑsi’n weiin kpa.
WATERS OF LIFE
P.O. BOX 60 05 13
70305 STUTTGART
GERMANY
Internet: www.waters-of-life.net
Internet: www.waters-of-life.org
e-mail: info@waters-of-life.net